Tap vegna verkfalls sjómanna er metið fleiri milljarða króna og standi verkfallið lengur er áætlað að tapið geti numið um það bil milljarði á dag. Þetta kemur fram í skýrslu sjávarútvegs- og landbúnaðarráðherra um áhrif verkfallsins. Þorgerður Katrín Gunnarsdóttir, sjávarútvegs- og landbúnaðarráðherra, segir skýrsluna ekki leysa kjaradeiluna en hún varpi þó ljósi á þjóðfélagslegt tap deilunnar og gæti nýst í framtíðinni

Heildaráhrif verkfallsins á ráð- stöfunartekjur sjómanna eru talin nema um 3.573 milljónum króna til 10. febrúar 2017; tekjutap 2.400- 2.600 fiskverkamanna er metið á um 818 milljónir króna; tekjutap ríkissjóðs er gróft áætlað á tímabilinu 2,5 milljarðar króna og sveitarfélaga einn milljarður króna. „Ekki er hægt að halda því fram að þjóðhagslegt tap af völdum verkfallsins hafi numið 960-1.160 milljónum króna á hverjum verkfallsdegi hingað til, en bent er á að rannsóknir gefi það til kynna að við algjört og langvarandi vinnslustopp nálgist hið þjóðhagslega tap á degi hverjum þessar upphæðir. Vinnustoppið nú er hvorki algjört né langvarandi, en er engu að síður mjög víðtækt og hefur dregist á langinn þannig að áhrifa þess gætir nú talsvert víðar í hagkerfinu en á fyrstu vikum verkfallsins,“ segir í skýrslunni.

smari@bb.is

Frá því í lok nóvember 2016 hefur inflúensa A(H3) verið staðfest hjá 226 einstaklingum á landinu er fram kemur á vef Landlæknisembættisins. Í síðustu viku greindust fleiri með staðfesta inflúensu samanborið við vikurnar á undan og hefur hún nú verið staðfest í öllum landshlutum. Inflúensan er hlutfallslega algengari meðal 60 ára og eldri, meðalaldurinn er 63 ár hjá þeim sem greinst hafa frá því í nóvember. Inflúensan var fyrr á ferðinni á höfuðborgarsvæðinu en á síðustu vikum hefur inflúensan farið hægt vaxandi á landsbyggðinni. Frá því í byrjun desember hafa alls 95 einstaklingar legið á Landspítala vegna inflúensu, flestir yfir 70 ára, þar af greindist 21 í síðustu viku sem er aukning borið saman við vikurnar á undan.

Inflúensan er útbreidd í samfélaginu, sennilega er hún í hámarki núna og gera má ráð fyrir að tilfellum fækki á næstu vikum. Inflúensa A(H3N2) er sá stofn sem hefur verið í dreifingu, en ekki er útilokað að inflúensa A(H1N1) eða inflúensa B eigi eftir að koma í kjölfarið á næstu vikum.

Þeim fjölgar sem sem greinast með staðfesta Respiratory Syncytial veirusýkingu (RSV) en hún hefur greinst hjá alls 114 einstaklingum frá því í byrjun október, þar af 19 í síðustu viku sem er svipaður fjöldi og hefur greinst á síðastliðnum vikum. Það má því gera ráð fyrir að RSV sé í dreifingu í samfélaginu. Börn á fyrsta og öðru aldursári greinast hlutfallslega oftast með RSV en veiran hefur einnig verið staðfest hjá öðrum aldurshópum, einkum meðal aldraðra, sem ásamt ungabörnum er þekktur áhættuhópur. Þá er fjöldi tilkynninga frá heilsugæslunni og bráðamóttökum um niðurgang eins og gera má ráð fyrir á þessum árstíma.

annska@bb.is

Búið er að vinna tillögu að stjórnunar- og verndunaráætlun fyrir náttúrvættið Surtabrandsgil á Barðaströnd. Tillagan er unnin af fulltrúum Vesturbyggðar, ábúenda á Brjánslæk  og Umhverfisstofnunar. Surtarbrandsgil var friðlýst sem náttúruvætti árið 1975 og var markmiðið með friðlýsingunni að vernda surtarbrand og leirlög þar sem er að finna steingerðar leifar gróðurs tegundaríkustu skóga sem fundist hafa í jarðlögum hér á landi og klæddu landið fyrir um 12 milljónum ára. Undanfarin ár hefur ferðamannastraumur aukist á svæðinu og er svæðið nú á appelsínugulum lista Umhverfisstofnunar yfir svæði sem eiga á hættu að tapa verndargildi sínu. Helsta ógn Surtarbrandsgils er brottnám steingervinga úr gilinu.

Stjórnunar- og verndaráætlun fyrir Surtarbrandsgil er ætlað að vera stefnumótandi skjal og unnið í samvinnu við sveitarfélag og ábúendur á ríkisjörðinni Brjánslæk, er hún hugsuð sem stjórntæki til að móta framtíðarsýn svæðisins. Markmiðið með gerð hennar er að leggja fram stefnu um verndun Surtarbrandsgils og hvernig viðhalda skuli verndargildi svæðisins þannig að sem mest sátt ríki um. Með áætluninni er stefnt að því að standa vörð um og efla jákvæða ímynd svæðisins. Í áætluninni er lögð fram stefnumótum til 10 ára, ásamt aðgerðaráætlun til 5 ára.

Frestur til að skila inn athugasemdum við tillöguna er til 23. mars 2017.

► Hér má nálgast tillöguna

smari@bb.is

Í dag hóf UN Women á Íslandi sölu á nýrri húfu undir slagorðinu „Fokk ofbeldi.“ Húfunni er ætlað að vekja fólk til vitundar um það stöðuga ofbeldi sem konur og stelpur þurfa að þola á almenningssvæðum í borgum heimsins. Á síðasta ári var farið í samskonar herferð og létu viðbrögðin ekki á sér standa en húfurnar seldust þá upp á einungis fimm dögum.

Ofbeldi gegn konum, stúlkum og börnum í almenningsrýmum er vandamál um allan heim er segir í fréttatilkynningu frá UN Women á Íslandi. Þar segir jafnframt að konur sem búa á þéttbýlissvæðum séu tvöfalt líklegri til að verða fyrir ofbeldi, sérstaklega í fátækustu löndum heims samkvæmt rannsóknum á vegum Sameinuðu þjóðanna. Meira að segja í öruggustu borgum heims eins og Reykjavík verða konur fyrir ofbeldi af ýmsu tagi fyrir það eitt að vera konur. Víða um heim er slíkt ofbeldi daglegt brauð sem hamlar konum að lifa eðlilegu lífi eins og að ferðast til og frá vinnu, ganga í skóla eða eiga sér félagslíf. Með verkefninu Öruggar borgir (Safe Cities Global Initiative) vinnur UN Women að því að gera borgir heimsins öruggari fyrir konur og stúlkur með sértækum lausnum út frá svæðisbundnum veruleika.

Með því að kaupa húfuna tekur fólk þátt í að auka öryggi kvenna og stúlkna í borgum um allan heim, er ágóðinn rennur til verkefnis UN Women Öruggar borgir og styrkti Vodafone framleiðsluna svo allur ágóðinn rennur til verkefnisins. UN Women segja Fokk ofbeldi húfuna ætlaða fullorðnum. Orðalagið er sagt vísvitandi ögrandi og ætlað að hreyfa við fólki og það hafi hugfast að ein af hverjum þremur konum verða fyrir ofbeldi á lífsleiðinni. Húfurnar, sem eru í takmörkuðu upplagi, fást í vefverslun UN Women á Íslandi sem og í verslun Vodafone í Kringlunni dagana frá og með deginum í dag og til 24. febrúar.

Eitt mikilvægasta verkefni UN Women á Íslandi er að styðja við verkefni UN Women um heim allan heim sem miða að því að uppræta ofbeldi gegn konum og stúlkum, efla réttindi þeirra og þátttöku þeirra í stjórnmálum. UN Women vinnur einnig að efnahagslegslegri valdeflingu kvenna ásamt því að tryggja að þörfum kvenna og stúlkna í neyð sé mætt. Samtökin standa fyrir fjölda herferða og  hafa farið nýstárlegar leiðir við að vekja landsmenn til umhugsunar um kynjajafnrétti og valdeflingu kvenna um víða veröld. Í næstu viku standa þau til að mynda fyrir dansbyltingu gegn ofbeldi, Milljarður rís, sem meðal annars fer fram á Ísafirði í Edinborgarhúsinu í hádeginu föstudaginn 17.febrúar.

annska@bb.is

Lögreglan á Vestfjörðum, Slökkvilið Ísafjarðarbæjar og Björgunarfélag Ísafjarðar taka þátt í 112 deginum sem verður haldinn um allt land og verða til taks við Menntaskólann á Ísafirði milli kl 14 og 16 á morgun. Tæki þessara mikilvægu viðbragðsaðila verða til sýnis og hægt er að fræðast um starfsemina. „Það er hlutverk okkar að bregðast við beiðnum frá neyðarnúmerinu 112 og því langar okkur að kynna hvaða tækjakostur er hér á svæðinu og sérstaklega er unga kynslóðin boðin velkomin. Við hlökkum til að sjá ykkur,“ segir í tilkynningu.

smari@bb.is