Fjórðungssamband Vestfirðinga hefur bætt við tveimur örnámskeiðum í umsóknagerð til Uppbyggingarsjóðs Vestfjarða, en á mánudag sögðum við frá örnámskeiðahrinu þeirra sem nú stendur yfir. Þeir sem áhugasamir eru um að sækja um í sjóðinn eru hvattir til að mæta, en umsóknarfrestur rennur út 9.janúar. Í hann er hægt er að sækja um verkefnastyrki til menningarmála, styrki til atvinnu- og nýsköpunarverkefna, og stofn- og rekstrarstyrki til menningarstofnana.

Það eru þeir Skúli Gautason, menningarfulltrúi Vestfjarða og Valgeir Ægir Ingólfsson, atvinnumálafulltrúi sem kenna á flestum námskeiðanna. Í kjölfarið bjóða þeir upp á viðtöl og ráðgjöf fyrir þá sem eftir því óska, á Ísafirði er það Magnea Garðarsdóttir hjá AtVest sem mun leiða þátttakendur í sannleikann um hvernig umsóknum skal best háttað. Til viðbótar við þá staði sem áður var sagt frá verða þeir á Bókasafninu á Reykhólum á morgun, miðvikudag klukkan 17 og í sal Þróunarseturs Vestfjarða í Vestrahúsinu á Ísafirði á fimmtudag, klukkan 14.

annska@bb.is

Jón Steinn Elíasson, formaður Samtaka fiskframleiðenda og útflytjenda segir stöðuna í fiskútflutningi mjög slæma. Hann segir verkfall sjómanna koma sér illa fyrir fiskvinnslur án útgerðar og minni fyrirtæki í sjávarútvegi um allt land „Síðasta ár var auðvitað mjög erfitt út af genginu. Svo kemur þetta verkfall ofan í það þannig að staðan er mjög erfið,“ segir Jón Steinn, í samtali við Vísir.

Frá því var greint í síðustu viku að Oddi á Patreksfirði og Íslenskt sjávarfang á Þingeyri hefðu tekið saman tæplega 100 manns af launaskrá hjá sér vegna vinnslustöðvunar.

„Það er skelfilegt að láta tvær heilar vikur falla dauðar niður. Það segir manni það að þeir ætla ekkert að semja heldur bíða bara eftir að ríkisstjórnin setji á þetta lög. Ég get ekki lesið annað út úr þessu. Ég ætla bara að vona að menn grípi ekki til slíkra aðgerða nema að á samninga verði reynt fyrir alvöru áður,“ segir Jón Steinn við blaðamann Vísis.

Næst verður fundað í deilu sjómanna og útgerðarmanna 5. janúar, en verkfall sjómanna hefur staðið síðan 14. desember síðast liðinn.

brynja@bb.is

Pétur G. Markan, sveitarstjóri Súðavíkurhrepps, segir gjaldskrárhækkanir Orkubús Vestfjarða sem tóku gildi 1. janúar síðast liðinn vinna gegn niðurgreiðslu ríkisins vegna húshitunarkostnaðar.
„Auðvitað er það sárt þegar að niðurgreiðsla vegna húshitunarkostnaðar hækkar þurfi OV að hækka sína gjaldskrá á móti, sem er auðvitað ekkert annað en bein aðgerð til að taka hluta af ívilnun sem á að skila sér til íbúa svæðisins til sín. Á götumálinu myndi þetta heita að taka vont „cut“ af greiðslu ríkisins til íbúa svæðisns.“

Gjaldskrá fyrir dreifingu raforku hækkuðu um 7% og fyrir sölu um 4%. Í tilkynningu frá Orkubúinu segir að áhrif hækkunarinnar á heildarorkukostnað heimila verði minnst hjá heimilum í þéttbýli sem nota fjarvarma til upphitunar, eða 2,1%, en hækkun hjá þeim sem nota rafmagn til upphitunar verður 4,5% í þéttbýli en 5% í dreifbýli.

Pétur segir Orkubúið mismuna fólki með gjaldskránni: „Þessi hækkun minnir líka á að íbúar Súðavíkur, sem svo sannanlega búa í þéttbýli, borga dreifbýlisgjald fyrir sína húshitun, sem hækkar um 5% á meðan aðrir íbúar í þéttbýli þurfa að taka á sig 4,5% hækkun. Hvers vegna OV sér ástæðu til að mismuna fólki svona er sjálfsagt verkefni fyrir fleiri fagmenn en bara viðskipta – og verkfræðinga til að útskýra.“

Hann segist vona að Orkubú Vestfjarða taki þessi mál til endurskoðunar á árinu: „Þetta er algjörlega óskiljanlegt og skömm af fyrir OV. Ég er viss um að OV eigi eftir að endurskoða þessa afstöðu þegar líður á árið 2017. Nýtt ár er tækifæri til að vinda ofan af allskonar vitleysu. Hef fulla trú á stjórnendum OV til að gera það.“

brynja@bb.is

Matvælarannsóknir Íslands – Matís varð 10 ára þann 1. janúar. Árið 2007 tók Matís formlega til starfa er rannsóknastofa Umhverfisstofnunar, Rannsóknarstofnun landbúnaðarins (RALA), Rannsóknastofnun fiskiðnaðarins (RF) og líftæknifyrirtækið Prokaria, sameinuðust undir einum hatti. Þar var þá kominn sameiginlegur vettvangur til rannsókna á matvælum og í líftækni. Hjá hinu nýstofnaða fyrirtæki var áhersla lögð á að auka verðmætasköpun í íslenskri matvælaframleiðslu, matvælaöryggi og lýðheilsu.

Matís hefur vaxið fiskur um hrygg þau 10 ár sem fyrirtækið hefur starfað í þessari mynd og er í dag þekkingarfyrirtæki sem sinnir fjölbreyttu rannsókna- þjónustu- og nýsköpunarstarfi í matvæla- og líftækniiðnaði. Matís veitir ráðgjöf og þjónustu til fyrirtækja í sjávarútvegi og landbúnaði, sem og íslenska ríkinu. Sem dæmi kemur Matís að þróun á nýjum vörum og ferlum fyrir fyrirtæki og hefur mikilvægu hlutverki að gegna varðandi gæði og öryggi matvæla, en fyrirtækið gegnir þó ekki eftirlitshlutverki líkt og fjallað var um í tengslum við Brúneggjamálið síðla á síðasta ári.

Fyrirtækið er með 6 starfsstöðvar á Íslandi þar á meðal á Ísafirði og Patreksfirði þar sem lögð er áhersla á þróun vinnsluferla í samstarfi við fyrirtæki á svæðinu. Þar er almennri tækniráðgjöf fyrir viðskiptavini Matís sinnt, í formi hönnunar og tæknivinnu. Einnig er lögð áhersla rannsókna- og þróunarstarf, sem og á fiskeldi, einkum þorskeldi í sjó. Gunnar Þórðarson hjá Matís á Ísafirði hlaut í nóvemberlok Svifölduna ásamt og Alberti Högnasyni hjá 3X Technology. Svifaldan er veitt fyrir framúrstefnuhugmynd ársins og eru verðlaunin veitt á Sjávarútvegsráðstefnunni. Hugmynd þeirra var um ofurkælingu á botnfiski.

Á heimasíðu fyrirtækisins er nú að finna ársskýrslu síðasta árs, þar sem jafnframt er stiklað á stóru í starfssemi Matís í einskonar smásagnaformi og segir í fréttatilkynningu frá fyrirtækinu að innihaldið sýni svo ekki verði um villst að stofnun Matís var rökrétt og mikið framfaraskref á sínum tíma. Skýrsluna má sjá hér.

annska@bb.is

Gjaldskrár Orkubús Vestfjarða hækkuðu frá og með 1. janúar gjaldskrá fyrir dreifingu raforku um 7% en 4% fyrir sölu. Á sama tíma hækkuðu niðurgreiðslur vegna húshitunar sem að einhverju leiti dregur úr kostnaðaraukningu heimila. Á vef OV segir að áhrif hækkunarinnar á heildarorkukostnað heimila verða minnst hjá heimilum í þéttbýli sem nota fjarvarma til upphitunar, eða 2,1%, en hækkun hjá þeim sem nota rafmagn til upphitunar verður 4,5% í þéttbýli en 5% í dreifbýli. Helsta ástæða hækkunarinnar er sögð vera 13% hækkun á flutningi raforku hjá Landsneti sem er innifalin í hækkun Orkubúsins fyrir dreifingu, ásamt almennum kostnaðarhækkunum og hækkun launa.

Svo raforkukaupendur geti betur glöggvað sig á hækkununum tekur OV nokkur dæmi um breytingarnar: Fyrir dæmigert heimili í þéttbýli sem notar fjarvarmaveitu til upphitunar þá hækkar orkureikningur mánaðarins um 500 krónur eða um 6.000 krónur á ári. Hækkunin nemur 2,1%. Þá er miðað við að heimilið noti um 30.000 kWst í upphitun á ári og 5.000 kWst í almenna notkun. Fyrir sambærilegt heimili í þéttbýli sem notar raforku til upphitunar þá hækkar orkureikningur mánaðarins um 1.056 krónur eða 12.672 kr á ári. Hækkunin nemur 4,45%. Fyrir heimili í dreifbýli sem notar sömu orku á ári þá hækkar reikningurinn um 1.293 krónur á mánuði eða 15.510 krónur á ári. Hækkunin þar nemur því 5%. Dæmi um hækkun hjá atvinnufyrirtæki sem notar 350.000 kWst á ári og 72 kW afl er alls 5,6% fyrir dreifingu flutning og sölu.

Vestfirðingar hafa löngum verið í flokki þeirra landsmanna sem greiða mestan orkukostnað á landinu. Í desember var fjallað um niðurstöður útreikninga sem Byggðastofnun fékk Orkustofnun til að gera á orkukostnaði í nokkrum þéttbýlis- og dreifbýlisstöðum á landinu sem leiddi í ljós mestan mun á orkuveitusvæði RARIK og Orkubús Vestfjarða í dreifbýli og á Seltjarnarnesi, þar sem munur á mánaðarlegum greiðslum nam 287%.

annska@bb.is