Mest lesna fréttin á vef Bændablaðsins í dag er grein undir heitinu „Hvers vegna bærinn Ísafjörður heitir Ísafjörður“ eftir Einar Jónsson fiskifræðing. Tilefni greinarinnar sem er æði löng og ítarleg má rekja til ljósmyndar af pollinum á Ísafirði í Bændablaðinu í byrjun nóvembermánaðar þar sem vísað var til nafngiftar Ísafjarðar og Ísafjarðardjúps. Ræður Einar í það á sinn hátt hversvegna bærinn beri nafnið Ísafjörður, þegar hann er í Skutulsfirði og fjörðurinn Ísafjörður í raun mun innar við Ísafjarðardjúp, sem hann segir að hafi ekki heitið það heldur einfaldlega Ísafjörður. Segir Einar lausn ráðgátunnar tiltölulega einfalda og furðar sig á að fræðimenn hafi ekki fram til þessa ráðið þessa gátu með eftirfarandi hætti:

„Málið er það að sá mikli flói eða fjörður sem nú er nefndur Ísafjarðardjúp hét alls ekki svo í upphafi heldur aðeins Ísafjörður og það er ekki fyrr en í byrjun átjándu aldar að annars skilnings fer að verða vart, þ.e. að orðið Ísafjarðardjúp sé ekki bara nafn á svæði utan eða í mynni hins forna Ísafjarðar heldur nái lengra inn og í kortasögu Íslands má síðan rekja hvernig þetta nafnabrengl eða nafnabreyting færist æ innar í Ísafjörðinn uns Borgarey er náð og er þá varla annað en innsti halinn eftir með nafninu Ísafjörður en hann hafði aldrei annað nafn en náði í upphafi allt út að Rit og ysta hluta Stigahlíða.“

Í greininni dregur Einar fram allmörg dæmi sem styðja við kenningu hans, líkt og úr Landnámu þar sem segir frá Þuríði Sundafylli og skattlagningu hennar: „„Hún setti og Kvíarmið á Ísafjarðardjúpi og tók til á kollótta af hverjum bónda í Ísafirði.“ Hér í lýsingu Landnámu eru allir hlutir strax morgunljósir. Hún sló eign sinni á Kvíarmið sem voru á Ísafjarðardjúpi en þar mun átt við djúpið fyrir og í mynni Ísafjarðar enda Kvíarmið enn vel þekkt í dag rétt SV af Ritnum. Síðan tók hún toll af hverjum bónda (kollótta á) í Ísafirði. Þetta orðalag tekur af allan vafa um að Ísafjörður var þá allur hinn stóri flói sem við í dag köllum Djúpið.“

Fjölmörg önnur dæmi eru dregin upp, líkt og kortaupplýsingar og skrif Eggerts og Bjarna. Greinina má lesa í heild sinni hér.

annska@bb.is

Verð á þorski og ýsu hefur nánast tvöfaldast á fiskmörkuðum frá því að verkfall sjómanna hófst fyrir þremur vikum. Allir bátar nema einn sem landa í Bolungarvík eru á sjó í dag.

Samúel Samúelsson hjá Fiskmarkaði Suðurnesja í Bolungarvík segir verðhækkunina vera gríðarlega: „Það er mjög mikil verðhækkun á öllum tegundum, þorskur og ýsa og skarkoli hafa hækkað gríðarlega mikið. Fyrir verkfall vorum við að selja þorskkílóið á 250 krónur, en hefur verið að seljast frá 500-600 krónur kílóið núna síðustu daga. Ýsan hækkaði gríðarlega en hefur lækkað aðeins, ég var að selja stóra línuýsu á svona 370-390 krónur, sem venjulega væri á 250 krónur kílóið“

Samúel segir verkfallið ekki hafa haft áhrif á markaðinn nema til góðs þegar litið er til verðhækkana: „Þetta verkfall hefur lítil áhrif á okkur nema til góðs, verðin hafa hækkað og aðeins einn bátur sem ekki rær hjá okkur, það er Sirrýin. Við vorum mjög óheppin með veður milli hátíða en í dag og í gær voru allir á sjó.“

Hann segist þó vona að deilan leysist bráðlega: „Maður óskar náttúrulega engum þess að vera í verkfalli lengur og vonar að deilan leysist. En þetta kemur ágætlega út hjá okkur á meðan gefur á sjó höldum við áfram að vinna. Við erum að selja 30-40 tonn á dag.“

brynja@bb.is

Bæjarráð Hornafjarðar krefst þess að norðaustur/suðvestur-flugbrautin á Reykjavíkurflugvelli verði opin í neyðartilfellum á meðan aðrar lausnir í sjúkraflutningum séu ekki tiltækar. Bærinn sé afskekktur og langt sé í næstu aðstoð þegar þörf sé á liðsauka. Frá þessu var sagt hjá Ríkisútvarpinu.

Þar kom fram að sjúkraflugvél frá Mýflugi gat ekki flutt hjartveikan sjúkling frá Höfn í Hornafirði til Reykjavíkur vegna veðurs heldur þurfti að fara með hann til Akureyrar. Flugmaður hjá Mýflugi sagði í færslu á Facebook að þeir hefðu við þessar aðstæður getað nýtt sér norðaustur/suðvestur-flugbrautina en henni var lokað um mitt síðasta ár.

Arna Lára Jónsdóttir, formaður bæjarráðs Ísafjarðarbæjar, segir ferlegt ef ekki sé hægt að lenda sjúkraflugvél í Reykjavík: „Við höfum ekki rætt neyðarbrautina sérstaklega eftir þessar fréttir að austan. Það er auðvitað alveg ferlegt ef ekki er hægt að lenda sjúkraflugvél í Reykjavík af mannavöldum, þar sem öflugasta sjúkrahús er landsins er staðsett. Það var samt gott að ástand sjúklings var þeim þeim hætt að hægt var að sinna honum á sjúkrahúsinu á Akueyri, því annars hefði getað farið verr.“

brynja@bb.is

Ísfirski tónlistarmaðurinn Örn Elías Guðmundsson, betur þekktur sem Mugison, er tilnefndur til Króksins tónlistarverðlauna Rásar 2. Veitt er sérstök viðurkenning til þess tónlistarmanns eða hljómsveitar sem skarað hefur fram úr í lifandi tónlist á árinu.

Í umfjöllun um Mugison segir „Mugison gaf út plötu á árinu eftir nokkuð hlé, hélt tónleika um allt land og endaði í Hörpu í Reykjavík með tvenna tónleika sem hlustendur Rásar 2 gátu notið síðastliðinn nýársdag. Með í för var hljómsveit þéttskipuð góðu tónlistarfólki sem náði að skila flóknum og stórum útsetningum plötunnar á aðdáunarverðan hátt. Mugison sjálfur sýndi svo enn og sannaði að hann er ekki bara fyrirtaks lagasmiður heldur einn af okkar bestu söngvurum.“

Verðlaunin kallast Krókurinn, og er nafnið vísun í Pétur Kristjánsson heitinn sem var þekktur fyrir magnaða sviðsframkomu. Þetta verður í þriðja sinn sem Krókurinn er veittur en áður hafa Dimma og Agent Fresco hlotið hann. Einnig eru tilnefnd Emmsjé Gauti, Of Monsters and Men og Soffía Björg.

brynja@bb.is

Hin árlega þrettándagleði Bolungarvíkurkaupstaðar og Ísafjarðarbæjar verður haldin í Bolungarvík í ár. Þetta kemur fram á vef Bolungarvíkurkaupstaðar.

Á þrettándagleðina koma álfar og kóngafólk, prinsar og prinsessur, stallari, biskup og skratti, bændafólk, álfameyjar, ljósálfar og svartálfar, jólasveinar, púkar og Grýlu-börn og svo auðvitað Grýla sjálf með Leppalúða sínum.

Dans verður stiginn og söngvar sungnir við hljóðfæraspil og þrettándabrennu svo sem vera ber á þrettándanum.

Hátíðarsvæðið er við Hreggnasa fyrir ofan Grunnskóla Bolungarvíkur og heilsugæslustöðina og hefst hátíðin klukkan 20:00 föstudaginn 6. janúar 2017.

Löng hefð er fyrir því að þrettándagleðin endi á flugeldasýningu sem Björgunarsveitin Ernir í Bolungarvík stendur fyrir. Sveitin verður einnig með flugeldasölu föstudaginn 6. janúar klukkan 16-18 við Hafnargötuna.

brynja@bb.is