Fleiri landsmenn á aldrunum 25-64 ára voru háskólamenntaðir en með framhaldsskólamenntun árið 2015. Árið 2014 voru háskólamenntaðir 25-64 ára íbúar á Íslandi í fyrsta skipti fleiri en íbúar með menntun á framhaldsskólastigi, en munurinn var innan skekkjumarka. Árið 2015 var munurinn hins vegar marktækur en þá voru háskólamenntaðir 25-64 ára 38,9% íbúa á Íslandi (64.600), 35,9% höfðu lokið framhaldsskólastigi (59.600) og 25,2% höfðu eingöngu lokið grunnmenntun, þ.e. styttra námi en framhaldsskólastigi (41.900), samkvæmt niðurstöðum úr vinnumarkaðsrannsókn Hagstofu Íslands. Íbúum með háskólamenntun fjölgaði um 3.400 frá fyrra ári en íbúum, sem aðeins hafa grunnmenntun, fækkaði um 2.200.

Fjölgun háskólamenntaðra má að miklu leyti rekja til fjölgunar háskólamenntaðra kvenna, og fækkun þeirra sem hafa eingöngu lokið grunnmenntun má líka rekja að miklu leyti til aukinnar menntunar kvenna. Minni breytingar hafa orðið á menntun karla á árunum 2003-2015. Þessar upplýsingar er að finna í vinnumarkaðsrannsókn Hagstofu Íslands og má lesa frekar hér.

annska@bb.is

Á fundi bæjarráðs 19. desember lagði Gísli H. Halldórsson bæjarstjóri fram drög að samkomulagi við Hestamannafélagið Hendingu en um árabil hefur verið ágreiningur milli hestamannafélagsins og sveitarfélagsins vegna landspildu í Hnífsdal í eigu Hendingar sem ónýttist vegna jarðgangagerðar. Þar fór forgörðum skeiðvöllur Hendingar og hafa þeir nú byggt upp að hluta til nýja aðstöðu í Engidal.

Í ágúst 2008 segir frá því að Ísafjarðarbær hafi lagt fram tvær bótatillögur sem félagsmenn Hendingar felldu með öllum greiddum atkvæðum og undirbúningur hafinn til málsóknar á hendur Ísafjarðarbæ. Í október ári seinna segir Marinó Hákonarson, formaður Hendingar að óháð mat á tjóni félagsins sé metið á 46,5 milljónir króna, félagsmenn séu nú búnir að missa þolinmæðina og hafi ráðið sér lögfræðing. Í maí í fyrra situr allt við sama keip og krafa Hendingar nú komin upp í 84 milljónir.

Vegagerðin hefur verið tilbúin til greiðslu bóta frá byggingu ganganna sem felast í greiðslu 20 milljóna til Ísafjarðarbæjar og þar til nú verið talið ekki væri hægt að ganga frá þeirri greiðslu fyrr en frágengnu samkomulagi milli Hendingar og Ísafjarðarbæjar. Að sögn Gísla Halldórs virðist nú liggja fyrir að hægt er að ganga frá samkomulegi við Vegagerðina og greiðslu bótanna óháð niðurstöðu í ágreiningsefnum milli sveitarfélagsins og hestamannafélagsins.

Nú virðist hilla undir samkomulag ef marka má minnisblað bæjarstjóra frá 19. desember og bókun bæjarráðs í gær: „Lögð fram drög að samkomulagi milli Vegagerðarinnar og Ísafjarðarbæjar um greiðslu fullnaðarbóta vegna byggingar Bolungarvíkurganga, þ.á.m. vegna skerðingar á aðstöðu Hestamannafélagsins Hendingar að Búðartúni í Hnífsdal.“ Þarna er um að ræða samningur um bótagreiðslu Vegagerðarinnar til Ísafjarðarbæjar, niðurstaða bótagreiðslu Ísafjarðarbæjar til hestamannafélagsins liggur ekki ennþá fyrir.

Bæjarfulltrúi Sjálfstæðisflokksins, Jónas Þór Birgisson, lét bóka sérstaka ánægju með lyktir máls og þá sérstaklega að þær hafi verið á sömu nótum og lagt var upp með árið 2013.

bryndis@bb.is

10. janúar kl. 14:20 frétt uppfærð
Ábending hefur borist um að við atkvæðagreiðslu um bótatillögur árið 2008 hafi þær verið naumlega felldar, ekki með öllum greiddum atkvæðum og fram kemur í þessari frétt og í frétt sem birtist í ágúst 2008.

Í nýútkominni skýrslu dr. Þórs Sigfússonar kemur fram að aukið framboð á hvítum eldisfiski gæti haft talsverð áhrif á markað á hvítum fiski. Villtur hvítfiskur eins og til dæmis Alaskaufsinn og Atlandshafsþorskurinn hefur haldist í magni nokkuð stöðugur frá árinu 1980 og Íslendingar átt um 10% af framboði hvítfisks í heiminum. Nú eru blikur á lofti og gera áætlanir ráð fyrir því að íslendingar muni aðeins bjóða um það bil 1% af framboði á hvítum fiski árið 2020. Framleiðsla á hvítum eldisfiski hefur farið úr 0.3 millj. tonna árið 1990 og reiknað er með að verði rúm 12 millj. tonna árið 2020. Helstu tegundir í hvítfiskeldi eru tilapia og pangasius.

Í skýrslunni kemur ennfremur fram að all nokkur munur sé á hvíta eldisfisknum og villta Atlandshafsþorskinum með tilliti til gæða, næringarinnihalds, uppruna og sjálfbærnisjónarmiða en engin trygging er fyrir því að neytendur taki mikið mið af því enda þekking þeirra á gæðum fisks oft verulega takmörkuð, að mati skýrsluhöfundar. Söluaðilar á neytendamörkuðum séu oft á tíðum líka framleiðendur á eldisfiski.

Þór segir nauðsynlegt að Ísland treysti ímynd Íslandsþorskins á harðnandi markaði og leggur upp þá hugmynd að efla mætti samstarf við Norðmenn, Rússa og Færeyinga um kynningu á Atlandshafsþorskinum jafnvel sameinast í markaðs- og sölustarfi.

Kristján Jóakimsson vinnslu- og markaðsstjóri hjá Hraðfrystihúsinu Gunnvör í Hnífsdal tekur undir áhyggjur Þórs og bætir við að ekki hafi verið lögð næg áhersla á að markaðssetja okkar vöru sem gæðavöru, skapa okkur sérstöðu á markaði með því. Í viðtali sem tekið var við Kristján í blaðinu Sóknarfæri árið 2013 segir hann að „Farsælast sé að snúa bökum saman og koma fram sem ein heild“ og í samtali við Kristján í dag segir hann þessi orð enn í fullu gildi.

bryndis@bb.is

Kvenréttindafélag Íslands ítrekar áskorun sína til þeirra alþingsmanna sem fá það verkefni að mynda nýja ríkisstjórn að tryggja að jöfn kynjahlutföll séu á ráðherrastólum. Félagið hvetur enn fremur alla flokka á Alþingi að gæta þess að tilnefna konur og karla til jafns í nefndir og ráð og tryggja jöfn kynjahlutföll í opinberum nefndum og ráðum. Þetta kemur fram í fréttatilkynningu frá Kvenréttindafélaginu í dag og segir ennfremur „Kynjajafnrétti er grundvöllur hagsældar og velferðar og án valdeflingar og þátttöku kvenna á opinberum vettvangi er ekki hægt að uppfylla markmið Sameinuðu þjóðanna um frið, jafnrétti og lýðræði.

Ráðherrar
Þess má geta að samkvæmt vef Alþingis hafa 125 karlmenn gengt ráðherraembætti frá 1904 en 27 konur eða 18%

Í hinum hundrað ára Framsóknarflokki hafa verið 41 ráðherra, 83% þeirra eru karlar.

Sjálfstæðisflokkurinn skartar 45 ráðherrum og 82% þeirra eru karlar.

Vinstri grænir hafa átt 7 ráðherra, 3 karla og 4 konur og Samfylkingin 12 ráðherra, 5 karla og 7 konur.

Ríkisstjórnir
Í þriðja ráðuneyti Davíðs Oddsonar frá 1999-2003 (Sjálfstæðisflokkur og Framsóknarflokkur) sátu 15 ráðherrar, þar af 4 konur eða 27%.

Í fjórða ráðuneyti Davíðs Oddsonar frá 2003 – 2004 (Sjálfstæðisflokkur og Framsóknarflokkur) sátu 13 ráðherrar, þar af 3 konur eða 23%.

Í ráðuneyti Halldórs Ásgrímssonar frá 2004-2006 (Framsóknarflokkur og Sjálfstæðisflokkur) sátu 14 ráðherrar, þar af 3 konur eða 21%.

Í ráðuneyti Geirs H. Haarde frá 2006-2007 (Sjálfstæðisflokkur og Framsóknarflokkur) sátu 12 ráðherrar og þar af 4 konur eða 33%.

Í öðru ráðuneyti Geirs H. Haarde frá 2007-2009 (Sjálfstæðisflokkur og Samfylking) sátu sömuleiðis 12 ráðherrar, þar af 4 konur eða 33%.

Í ráðuneyti Jóhönnu Sigurðardóttir 2009 sátu 10 ráðherrar, 5 konur og 5 karlar.

Í öðru ráðuneyti Jóhönnu Sigurðardóttir 2009-2013 (Samfylking og Vinstri grænir) sátu 15 ráðherrar, þar af 7 konur eða 47%.

Í ráðuneyti Sigmundar Davíðs Gunnlaugssonar 2013-2016 (Framsóknarflokkur og Sjálfstæðisflokkur) voru 11 ráðherrar, þar af 5 konur eða 45%.

Í ráðuneyti Sigurðar Inga Jóhannssonar 2016 (Framsóknarflokkur og Sjálfstæðisflokkur) voru/eru 10 ráðherrar, fimm konur og fimm karlar.

bryndis@bb.is

Nú fer hver að verða síðastur í að sækja um í Uppbyggingarsjóð Vestfjarða þetta árið en umsóknarfrestur til að sækja um verkefnastyrki til menningarmála, styrki til atvinnu- og nýsköpunarverkefna, og stofn- og rekstrarstyrki til menningarstofnana rennur út á miðnætti. Á árinu 2017 verður litið sérstaklega til verkefna sem uppfylla eitt eða fleiri eftirfarandi skilyrða: Verkefni sem efla nýsköpun og atvinnuþróun á svæðinu, verkefni sem stuðla að vöru- og gæðaþróun í starfandi fyrirtækjum, verkefni sem mynda atvinnutækifæri og auka fagmennsku á sviði lista og menningar, verkefni sem efla samstarf, ýmist á milli svæða, listgreina, fyrirtækja eða rannsóknaraðila, verkefni sem styðja við uppbyggingu og eflingu menningartengdrar ferðaþjónustu, verkefni sem skapa störf fyrir háskólamenntaðar konur og ungt fólk á svæðinu, atvinnuþróunar- og nýsköpunarverkefni sem eru gjaldeyrisskapandi og atvinnuþróunarverkefni sem eru á sviði líftækni.

Hægt er að sækja um styrki til allt að þriggja ára. Framkvæmda- og fjárhagsáætlun þarf að miðast við þann tímaramma í umsóknum, þegar sótt er um tveggja eða þriggja ára styrk.

Uppbyggingarsjóður er hluti af Sóknaráætlunar Vestfjarða og í umsjón Fjórðungssambands Vestfirðinga. Hann veitir styrki til menningar, atvinnuþróunar og nýsköpunar. Uppbyggingarsjóður varð til með samningi ríkis og Fjórðungssambands Vestfirðinga um Sóknaráætlun Vestfjarða 2015-2019 sem undirritaður var 10. febrúar 2015.

Sérstök níu manna úthlutunarnefnd Uppbyggingarsjóðs sér um að fara yfir umsóknir og úthluta styrkjum, á grundvelli Sóknaráætlunar Vestfjarða, áherslna og úthlutunarreglna, auk gæða umsókna og verkefna. Árið 2017 verður væntanlega úthlutað um 65 milljónum úr sjóðnum.

Hér má sækja um í sjóðinn.

annska@bb.is