Sterk króna mun líklega leiða til þess að afkoma í sjávarútvegi í ár verði hin versta í 20 ár. Þetta kemur fram í úttekt greiningardeildar Arion banka. Reiknað er með að hlutfall EBITDA-hagnaðar af tekjum verði 13% í ár en til samanburðar var það 30% á árunum 2011 og 2012. Breytt landslag kallar ugglaust á hagræðingu í greininni. „Það er ekki lengur góðæri í sjávarútvegi,“ segir Konráð S. Guðjónsson, hagfræðingur hjá greiningardeild Arion banka, í samtali við ViðskiptaMoggann. Þrátt fyrir að efnahagur sjávarútvegsins sé í heild traustur bendir Konráð á að tæpur fjórðungur sjávarútvegsfyrirtækja var með neikvætt eigið fé árið 2015.

„Það eru allar líkur á því að einhver uppstokkun muni eiga sér stað í sjávarútvegi til að mæta breyttum aðstæðum, hvort sem það verður með sameiningum eða fyrirtækjunum takist að bregðast við með öðrum hætti,“ segir Konráð.

Vinna er hafin á gerð áhættumats vegna mögulegrar erfðablöndunar eldislax við íslenska, villta laxastofna. Þetta kemur fram í svari Þorgerðar Katrínar Gunnarsdóttur, sjávarútvegs- og landbúnaðarráðherra við fyrirspurn Bjarna Jónssonar, varaþingmanns Vinstri grænna í Norðvesturkjördæmi.

Markmið áhættumatsins er að meta hve mikið umfang eldis má vera á hverjum stað án þess að það valdi óafturkræfum skaða á náttúrulegum laxastofnum vegna erfðablöndunar. Í svari ráðherra kemur fram að við gerð áhættumatsins verða notuð bestu fáanlegu gögn um hlutfall sleppinga, áhrifa hafstrauma, fjarlægð áa og stofnstærð laxa í ám auk erfðasamsetningar villtra stofna.

Hafrannsóknastofnun annast framkvæmd verkefnisins með hjálp erlendra sérfræðinga.

Vinabæjarsamstarf Ísafjarðarbæjar og Kaufering í Þýskalandi er um margt merkilegt. Einn þáttur í því sem ekki hefur farið hátt er er elja skógræktarmanna í báðum sveitarfélögum. Þeir Ludwig Pertl frá Kaufering og Sæmundur Þorvaldsson frá Læk í Dýrafirði hafa síðustu ár unnið að ræktun skógar fyrir ofan Þingeyri og sömuleiðis hefur verið plantað samanburðarskógi í Kaufering. Í aðsendri grein Ludwig Pertl í dag segir hann að þar eð hingað til hafi aðallega barrtré verið flutt til Íslands var ákveðið að bæta nú við lauftrjám til að auka frjósemi jarðvegsins. Trjátegundir sem vaxa í Ölpunum, s.s. garðahlynur, linditré, askur og beyki geta gegnt hér mikilvægu hlutverki. Eftir tilskilin leyfi fengust frá íslenskum skógræktaryfirvöldum vorið 2014 var hægt að senda fyrstu sendingu af fræi til Íslands. Sáningin tókst frábærlega og þannig var hægt að planta u.þ.b. 8000 lauftrjám á Íslandi.

12 manna hópur frá Kaufering fór til Ísafjarðar í júlí 2016 og tók þar þátt í hátíðahöldum í tilefni af 150 ára afmæli bæjarins og einn liður í þeim var sameiginleg gróðursetning á Þingeyri. Fyrir ofan þorpið vex nú fyrsti bæverski skjólskógurinn á Íslandi með fjórum tegundum lauftrjáa frá Ölpunum. Árið 2015 plöntuðu bæjarstjórarnir Erich Püttner og Gísli Halldór Halldórsson samanburðarskógi í Kaufering.

„Árangurinn er stórkostlegur. Eiginlega ótrúlegur. Farið hefur verið í mörg stór átaksverkefni til að rækta nýja skóga á Íslandi þar sem áður var lítið um trjágróður. Það var sameiginlegt markmið vinabæjarsamstarfsins frá upphafi, einnig okkar Sæmundar. Loftslagsbreytingar hafa líka haft áhrif á Íslandi og hættan á jarðvegseyðingu fer greinilega vaxandi,“ segir í greininni.

Mikill meirihluti landsmanna er andvígur frumvarpi um sölu áfengis í matvöruverslunum. Þetta kemur fram í nýrri könnun sem Félagsvísindastofnun vann fyrir Rúnar Vilhjálmsson, prófessor á heilbrigðisvísindasviði Háskóla Íslands, og greint er frá á vef RÚV. Könnunin er hluti af netkönnun Félagsvísindastofnunar. Hún náði til 1733 18 ára og eldri á landinu öllu. Fólkið var valið af handahófi úr þjóðskrá. Spurt er um ýmis samfélagsleg málefni í könnuninni og var ein af spurningunum um viðhorf almennings til frumvarps um sölu áfengis í verslunum. Svarhlutfall var 65%. Samkvæmt könnuninni er tæplega 70% landsmanna andvígur frumvarpinu og meirihluti allra samfélagshópa og kjósenda allra stjórnmálaflokka er á móti frumvarpinu.

Andstaðan við frumvarpið er meiri á landsbyggðinni, þar sem 74 prósent voru á móti en 66,5 prósent á höfuðborgarsvæðinu.

Á laugardaginn verður sannkallaður hátíðisdagur í Tónlistarskóla Ísafjarðar. Þá munu tveir nemendur skólans, þau Mikolaj Ólafur Frach og Anna Anika Jónína Gumundsdóttir halda einleikstónleika en þau þreyta bæði framhaldspróf í píanóleik í vikunni.

Anna og Mikolaj hafa bæði stundað nám við Tónlistarskóla Ísafjarðar frá unga aldri. Anna fæddist á Ísafirði 19. maí 1998 og hóf píanónám sitt í útibúi Tónlistarskólans á Flateyri árið 2004 en undanfarin 3 ár hefur Beata Joó verið aðalkennari hennar. Anna Anika hefur tekið virkan þátt í skólastarfinu og komið fram innan tónlistarskólans og utan hans. Hún tók t.a.m. tvisvar þátt í Samfés ásamt vinum sínum og spilaði í annað skiptið til úrslita í Reykjavík. Í nóvember árið 2015 tók Anna þátt í píanókeppni EPTA og hafnaði í 4.-5. sæti. Anna hefur tekið þátt í tónlistarflutningi á sólrisuhátið MÍ árin 2016 og 2017. Í vetur hefur hún verið í ryþmasveit tónlistarskólans. Anna Jónína kveður Tónlistarskóla Ísafjarðar með þessum tónleikum en hún hyggst hefja nám í eðlisfræði við Háskóla Íslands næsta haust. Dagskráin er fjölbreytt og fær Anna til liðs við sig nokkra gesti meðal annarra afa sinn Björgvin Þórðarson sem syngur einsöng.

Mikolaj fæddist á Ísafirði árið 2000. Hann hóf píanónam hjá móður sinni Iwonu Frach aðeins fimm ára gamall en hún hefur verið aðalkennari hans frá upphafi.

Mikolaj hefur hlotið margar viðurkenningar á tónlistarkeppnum bæði hér á landi og í útlöndum. Mikolaj  sigraði VI Píanókeppni Íslandsdeildar EPTA í Reykjavík (2015), hlaut þriðju verðlaun í XIII Alþjóðlegri Píanókeppni í Görlitz (2014). Einnig hlaut hann annað sæti í Fryderyk Chopin Interpretation Competition í Reykjavík (2010). Mikolaj hefur margsinnis komið fram fyrir hönd skólans á Lokatónleikum Nótunnar í Hörpu.

Mikolaj stundar líka gítar- og söngnám við TÍ en hugðarefni hans eru liggja ekki eingöngu í tónlistinni, heldur skipa íþróttir stóran í sess í lífi hans og má þar nefna sund og gönguskíði. Á efnisskráni eru m.a. verk eftir Bach, Beethoven og Chopin.

Tónleikarnir verða í Hömrum og hefjast tónleikar Önnu Jónínu kl. 13 en tónleikar Mikolaj verða kl. 16.

Á 12 mánaða tímabili, frá apríl 2016 til mars 2017, fjölgaði launþegum á Íslandi um 4,8 prósent og voru þeir 181.900 í mars sl. Skipt eftir atvinnugreinum hefur launþegum fjölgað mikið á milli ára hjá launagreiðendum í byggingariðnaði og ferðaþjónustu. Launþegum hefur hins vegar fækkað í sjávarútvegi. Þetta kemur fram í gögnum Hagstofunnar.

Í mars voru 2.368 launagreiðendur og um 10.900 launþegar í byggingarstarfsemi og mannvirkjagerð og hafði launþegum fjölgað um 1.200 eða um 13% samanborið við mars 2016. Sömuleiðis voru í mars 1.547 launagreiðendur og um 24.000 launþegar í einkennandi greinum  ferðaþjónustu og hafði launþegum fjölgað um 2.800 eða um 13% á einu ári. Launþegum hefur á sama tíma fjölgað um 5.900 eða um 3%.

Bæjarstjórn Vesturbyggðar mótmælir harðlega þeirri ákvörðun að taka Breiðafjarðarferjuna Baldur úr áætlun yfir Breiðafjörð með tilheyrandi röskun fyrir íbúa og atvinnulíf.  Baldur hefur gert hlé á ferðum sínum milli Stykkishólms og Brjánslækjar þar sem skipið var lánað til Vestmannaeyja til afleysinga á meðan Herjólfur er í slipp.

Í bókun bæjarstjórnar frá því í gær er bent er á að ferðir Baldurs eru mikilvægar fyrir ferðaþjónustu á svæðinu svo og aðrar útflutningsgreinar. Baldur fer væntanlega í slipp í haust og fækkar það enn ferðum ferjunnar á þessu ári. Bæjarstjórn Vesturbyggðar krefst þess að samgönguyfirvöld útvegi ferju til að leysa Breiðafjarðarferjuna Baldur af líkt og fordæmi eru fyrir annars staðar í landinu.