Arnar Már Elíasson forstjóri, Sigríður Elín Þórðardóttir forstöðumaður þróunarsviðs og Reinhard Reynisson sérfræðingur byrjuðu á því að heimsækja sveitarstjórn Reykhólahrepps þriðjudaginn 24. október þar sem ýmis mál bar á góma, þar á meðal húsnæðismál, aðgengi að heitu vatni, almenningssamgöngur, verslun í dreifbýli og fleira.

Seinna í sömu viku samþykkti stjórn stofnunarinnar svo að hefja aðildaviðræður við sveitarfélagið að verkefninu Brothættar byggðir.

Á miðvikudag kom þríeykið til fundar í Vesturbyggð og hitti á fjölmennan hóp sveitarstjórnarfólks.  Þar kom Aflamark Byggðastofnunar sérstaklega til umræðu auk óstaðbundinna starfa, ýmissa styrkja úr byggðaáætlun og lánveitinga.

Á fimmtudag mætti stjórn Byggðastofnunar til stjórnarfundar í húsakynnum Vestfjarðastofu á Ísafirði auk þess að funda þar með fulltrúum stofunnar, þeim Sigríði Ó. Kristjánsdóttur framkvæmdastjóra og Aðalsteini Óskarssyni sviðsstjóra byggðamála, um málefni Vestfjarða.

Á föstudag áttu svo Arnar Már og Sigríður Elín góðan fund með Braga Þór Thoroddsen, sveitarstjóra Súðavíkurhrepps. 

Til umræðu voru  lánveitingar, styrkveitingar, gangnagerð, húsnæðisvandi og fjölmenning auk annars.

Bráðabirgðaniðurstöður úr sýnum úr villtum fuglum gefa til kynna sýkingu með fuglainflúensuveirum. Samhliða hafa í auknum mæli borist tilkynningar til Matvælastofnunar um veika eða dauða villta fugla.

Almenningi er ráðlagt að handsama ekki villtan fugl sem er hættur að forða sér í burtu, heldur skal tilkynna slíkan fund til Matvælastofnunar og fylgjast með fuglinum. Allir sem halda alifugla og aðra villta fugla skulu viðhafa ýtrustu smitvarnir til að koma í veg fyrir smit frá villtum fuglum í eigin fugla.

Sýni hafa verið tekin úr tveimur hröfnum, sem fundust annars vegar á Laugarvatni og hins vegar í Öræfum. Þá hefur verið tekið sýni úr hettumáfum á Húsavík. Annar hrafnanna fannst veikur og drapst svo, hinn hrafninn virtist vera heilbrigður en gat ekki flogið. Hann var tekin til aðhlynningar en um síðustu helgi, tveimur vikum eftir að hann fannst, var hann aflífaður þar sem ástandi hans hrakaði mikið.

Hettumáfarnir fundust dauðir á Húsavík. Tilraunastöð HÍ í meinafræði að Keldum greindi fuglainflúensuveirur í þessum sýnum.

Almenningi er ráðlagt að koma ekki mjög nálægt eða handleika villtan fugl sem virðist ekki geta bjargað sér, nema með góðum sóttvörnum svo sem með því að nota einnota hanska og veiruhelda grímu. Það á líka við um fugl sem er einungis með væg einkenni eða virkar jafnvel heilbrigður að öðru leyti.

Matvælastofnun mun upplýsa um leið og staðfesting liggur fyrir um gerð veiranna sem hafa fundist nú í haust. Nánari greining á þeim getur síðan gefið vísbendingu um uppruna veiranna.

Matvælastofnun ítrekar beiðni til almennings um að tilkynna til stofnunarinnar um fund á veikum eða dauðum villtum fuglum. 

Í grein á heimasíðu Félags íslenskra bifreiðaeigenda er sagt frá því að lögreglan á Suðurlandi sé EKKI að sekta ökumenn bifreiða, sem eru komnar á nagladekk, þótt slík dekk séu almennt aðeins leyfð frá 1. nóvember til 15. apríl.

Veturinn er hins vegar byrjaður að gera vart við sig og hitastig oft á tíðum undir frostmarki á nóttunni og viðbúið að frost og hálka séu byrjuð að láta á sér kræla þetta árið.

Lögreglan hefur fengið mikið af fyrirspurnum um nagladekk frá ökumönnum og því er það undirstrikað að ökumenn bifreiða, sem eru búnar nagladekkjum, eiga ekki sekt yfir höfði sér.

Bolvíkingafélagið í Reykjavík stóð fyrir veglegu kaffihlaðborði í safnaðarheimili Bústaðakirkju á sunnudaginn. Á annað hundrað manns mættu fyrst í messu og svo í kaffið á eftir. Nýkjörin stjórn félagsins stóð fyrir samkomunni og Kristján B. Ólafsson, formaður félagsins kynnti starfið framundan. Næst á dagskránni er að halda jólahlaðborð í Skíðaskálanum í Hveradölum í nóvember næstkomandi. Verður það betur auglýst þegar nær dregur.

Það voru aldeilis ekki skornar við nögl veitingarnar sem kaffinefndin bauð upp á og að gömlum og góðum sið var sungið yfir kaffinu kunnugleg lög sem Bolvíkingar gjarnan syngja þeir þeir koma saman. Það var prestsonurinn Þorgils Þorbergsson sem stjórnaði söngnum.

Ólafur Kristjánsson fyrrv. bæjarstjóri fremst með söngblöðin.

Kaffinefndin.

Fjölmennt var í kaffinu.

Kaffihlaðborðið.

Þarna hittust þrír samstarfsmenn á Alþingi um árabil. F.v. Kristján Möller, Sigrún Þórisdóttir, Einar K. Guðfinnsson og Kristinn H. Gunnarsson.

Frá messunni.

Myndir: Kristján B. Ólafsson.

Bæjarráð leggur til að hækka fjárveitingu í fjárhagsáætlun ársins til snjómoksturs um 25 m.kr.

Fram kemur í skýringum að kostnaðurinn frá janúar til maí hafi verið 65 m.kr. og að gildandi áætlun hafi verið vanáætluð um 15 m.kr. á þessu tímabili.

Ólíklegt er talið að ekki snjói fyrir áramót og er því óskað eftir 10 m.kr. til að geta brugðist við snjókomu á haustmánuðum.

Kostnaðinum er mætt með lækkun á handbæru fé.

Framlög til HSV lækkuð um 20 m.kr.

Bæjarráð leggur einng fram tillögu um breytingar á fjárveitingu til íþróttamála. Framlag til HSV er lækkað um 20 m.kr. þar sem um áramótin var samningur við HSV endurnýjaður og við það lækkaði styrkur til þeirra sem nemur rekstri skrifstofu og íþróttaskóla, en á móti hækka þrír liðir um sömu fjárhæð.

Íþróttaskólinn var rekinn á vormánuðum og nam kostnaðurinn 5,7 m.kr. Kostnaður vegna íþróttasvæðið hækkar um 8,5 m.kr. og er það einkum vegna snjómoksturs og loks lækka styrkir nefna um 6 m.kr., þar af 1,8 m.kr. vegna golfsvalla og 1,2 m.kr. vegna skíðasvæðis. Liðurinn aðrar hátíðir hækkar um 1 m.kr.

Á fyrstu átta mánuðum ársins námu útflutningsverðmæti eldisafurða tæpum 31 milljarði króna. Það er um 22% aukning frá sama tímabili í fyrra, þá hvort tveggja á breytilegu og föstu gengi. Þessa aukningu má að langstærstum hluta rekja til laxeldis. Þannig er útflutningsverðmæti lax komið í rúma 25 milljarða króna, sem er um þriðjungs aukning á milli ára og met á tilgreindu tímabili. 

Þetta kemur fram í nýju fréttabréfi Samtaka fyrirtækja í sjávarútvegi.

Sjókvíaeldi meginstoðin í dag

Sú aukning sem orðið hefur í útflutningsverðmæti eldislax á árinu má vafalaust að langmestu leyti rekja til sjókvíaeldis en þó má reikna með að útflutningur frá landeldi sé farinn að leggja sitt lóð á vogarskálarnar. Eins og sjá má á myndinni hér að neðan, þá hefur meginþorri framleiðslunnar á laxi hér á landi farið fram í sjó á undanförnum árum, eða sem nemur um 95% af allri framleiðslunni. Uppbygging í sjókvíaeldi er vel á veg komin, þó enn sé einungis helmingur framleiðsluheimilda í nýtingu. Það mun því áfram vera hryggjarstykkið í framleiðslu á laxi á allra næstu árum segir í fréttabréfinu.

Meiri fjölbreytni styrkir efnahagslífið

Þá segir að aukin umsvif í fiskeldi hér á landi séu jafnframt afar jákvæð fyrir þær sakir að fjölbreytileiki atvinnulífsins eykst. Það er afar mikilvægt eins og endurspeglast vel í nýlegri fréttatilkynningu lánshæfismatsfyrirtækisins Moody’s í tengslum við hækkun fyrirtækisins á lánshæfiseinkunn íslenska ríkisins. Þar var einmitt vísað til þess að einkunnin gæti verið hækkuð frekar ef áframhaldandi aukinn fjölbreytileiki efnahagslífsins myndi draga úr sveiflum í hagvexti.

„Án nokkurs vafa er hér verið að vísa meðal annars til aukinna umsvifa fiskeldis hér á landi, þó fyrirtækið tilgreinir enga atvinnugrein sérstaklega í þessu sambandi. Fiskeldi er ein þeirra útflutningsgreina sem hefur verið í hvað mestum vexti á undanförnum árum og horfur eru á enn frekari vexti á komandi árum. Það sem stendur lánshæfismati ríkissjóðs einmitt einna helst fyrir þrifum er smæð og einsleitni hagkerfisins, sem lengi vel hefur hvílt á fremur fáum stoðum.“

Einkahlutafélagið Skógur ehf á Ísafirði skilaði 1.848 m.kr. hagnaði á árinu 2023. Söluhagnaður af hlutabréfum varð 1.829 m.kr. Ekki kemur fram í hvaða félögum selt var en telja má víst að um sé að ræða hagnað af sölu hlutabréfa í Kerecis.

Eignir félagsins voru í árslok 2.293 m.kr. og skuldir aðeins 8 m.kr. Helstu eignir voru markaðsverðbréf að fjárhæð 835 m.kr. og handbært fé 958 m.kr.

Greiddur var 36 m.kr. arður á árinu 2023 og er lagt til að af afkomu 2023 verði greiddur arður á árinu svo sem lög leyfa.

Eigendur eru að jöfnu Gísli Jón Hjaltason og Anna Kristín Ásgeirsdóttir.

Jón Jónsson fyrrv. sveitarstjórnarmaður í Strandabyggð segir viðbrögð Þorgeirs Pálssonar, sveitarstjóra í Strandabyggð í Bæjarins besta við niðurstöðum KPMG vera til marks um að hann misskilji skýslu KPMG algerlega og svo segi í ofanálag ósatt um fundargerð sveitarstjórnar frá 2021. Þar komi nákvæmlega ekkert fram um styrkveitingar og greiðslur upp á 61 milljón til Jóns Jónssonar. Hins vegar sé þar að finna upplýsingar um kostnað við samstarf Strandabyggðar og Strandagaldurs um rekstur Upplýsingamiðstöðvar í áratug og annan stuðning sveitarfélagsins við Strandagaldur og Sauðfjársetrið.

Í færslu á Facebook fer Jón yfir þessi mál frá sínum sjónarhóli og segir þar: „Það vekur athygli að Þorgeir segir ekki aðeins ósatt um greiðslur á milljónatugum til mín persónulega, heldur segir hann líka að þær upplýsingar séu komnar frá skrifstofustjóra og sveitarstjórninni sem þá sat. Það er ekki satt, Salbjörg skrifstofustjóri og fulltrúar í gömlu hreppsnefndinni eru vandað og heiðarlegt fólk sem hefur aldrei sakað mig um sjálftöku fjármuna úr sveitarsjóði. Stundum er rétt að hafa staðreyndirnar með.“

Jón fer svo yfir málavöxtu á umræddu tímabili:

Í skýrslunni eru upplýsingar um tímalínuna um setu í hreppsnefnd og stjórnum menningarstofnana sem afsanna þessar lygar. Ég ætla að setja tímalínuna hér fram með aðeins aðgengilegri og nákvæmari hætti: 

# 2000-2007 – sat í stjórn Strandagaldurs

# 2002-2007 – sat í stjórn Félags áhugamanna um Sauðfjársetur á Ströndum

# júní 2010 – júní 2014 – sat í sveitarstjórn Strandabyggðar eftir listakjör

# maí 2018 – maí 2022 – 4. varamaður í sveitarstjórn Strandabyggðar eftir persónukjör, sat sex sveitarstjórnarfundi sem slíkur

# ágúst 2019 – janúar 2020 og maí 2021 – maí 2022 – aðalmaður í sveitarstjórn Strandabyggðar vegna forfalla

# nóv 2018 – maí 2024 – aftur í stjórn Strandagaldurs, eftir að Sigurður Atlason féll frá allt of snemma.

Sat alls ekki beggja vegna borðs

Jón segir: „Það kemur skýrt fram í skýrslunni að ég sat alls ekki beggja vegna borðs, í langflestum af þeim tilvikum sem eru samt tekin til skoðunar. Það á eingöngu við um tímann í hreppsnefnd 2019-2022 og setuna í stjórn Strandagaldurs á sama tíma. Þrátt fyrir það sýndi ég bæði þá og áður þá fagmennsku að víkja ávallt af fundum og tók aldrei þátt í umræðum um stuðning við þessar stofnanir. Það á sér sögulegar skýringar, vegna þess að ég kom þeim á laggirnar með mörgu öðru góðu fólki á sínum tíma. Eins var kona mín framkvæmdastjóri Sauðfjárseturins 1. jan. 2012 til 30. sept. 2024.

Það kemur líka skýrt fram að ég sjálfur og fyrirtæki í minni eigu hafa aðeins fengið einn styrk frá sveitarfélaginu síðustu áratugi, 80 þús í ljósmyndaverkefni vorið 2018. Þá var ég ekki í hreppsnefnd.

Ég er mjög ánægður með niðurstöðu skýrslu KPMG, en á þó eftir að spyrja nánar út í þessa áherslu þeirra á stuðning við Sauðfjársetrið og Strandagaldur í gegnum tíðina í skýrslunni, jafnvel á tímabilum þar sem ég var hvorki í stjórn þeirra né í sveitarstjórn.“

Þá birtir Jón tvö skjöl um aðkomu hans annars vegar að sauðfjársetrinu á Ströndum og hins vegar að Strandagaldri.