Í haust festi skíðasvæði Ísafjarðarbæjar kaup á átta ára gömlum Kässbohrer Pisten Bully 600 snjótroðara. Troðarinn er með spili sem mun gjörbylta öllu verklagi á skíðasvæðinu, en troðarinn geturi spilað sig upp bröttustu brekkurnar og sömuleiðis heldur spilið við troðarann á niðurleiðinni sem gerir brekkurnar vandaðri og öruggari. Á vef skíðasvæðisins kemur fram að talsverður tíma- og olíusparnaður fæst með spilinu þar sem ekki þarf að keyra troðarann inn dalinn til að komast upp á topp.

Troðarinn fór í gegnum upptekt í verksmiðjum Kässbohrer og er því eins og nýr. Starfsmenn Skíðasvæðisins fengu troðarann afhentan á laugardag og fór helgin í að koma honum saman og fara yfir virkni tækjabúnaðar.

Jón Smári Valdimarsson verður allsráður á nýja troðaranum og tók hann við lyklum af mönnum frá Kässbohrer. Jón Smári er eðlilega afar spenntur að prófa nýju græjuna og nú vantar ekkert nema meiri snjó í brekkurnar í Tungudal.

smari@bb.is

Hafnarstjórn Ísafjarðarbæjar hefur boðið út gerð viðlegustöpuls á Mávagarði á Ísafirði. Stór olíuflutningaskip hafa átt örðugt með að liggja við Mávagarð í vissum vindáttum þar sem hætta er á að skutur skipanna reki upp í grjótgarðinn. Allt frá því að hafnarmannvirkið á Mávagarði var tekið í notkun hefur hafnarstjórn lagt þunga áherslu á að leysa þetta brýna vandamál.  Tilboð verða opnuð 31. janúar og verklok skulu vera 1. Júlí 2017.

smari@bb.is

Búnaðarfélagið Bjarmi í Ísafjarðarbæ fer fram á að bæjaryfirvöld taki til efnislegrar meðferðar ósk félagsins um vetrarþjónustu á sveitavegum í bæjarfélaginu. Í byrjun desember fundaði félagið með bæjarstjóra, embættismönnum og fulltrúum Vegagerðarinnar þar sem félagsmenn rökstuddu ósk sína um vetrarþjónustu alla virka daga. Í dreifbýli í Ísafjarðarbæ eru yfir 30 heimili með heilsársbúsetu. Með bréfi til bæjarstjóra dagsettu 9. janúar er erindi Bjarma ítrekað og farið fram á málið fá efnislega afgreiðslu hjá stjórnýslu sveitarfélagsins þar sem „fyrrgreind fundarhöld virðast ekki hafa dugað til að máli komist í efnislega afgreiðslu,“ eins og það er orðað í bréfi formanns Bjarma.

Í afgreiðslu bæjarráðs Ísafjarðarbæjar segir að mikill vilji sé hjá Ísafjarðarbæ til að leita leiða svo bæta megi snjómokstur umfram það sem hann er í dag. Sviðsstjóri umhverfis- og eignasviðs, forstöðumaður þjónustumiðstöðvar og bæjarstjóri hafa verið með þetta mál til skoðunar  og vonast bæjarráð er til að hægt verði að þoka þessum málum til betri vegar.

smari@bb.is

Togararnir sem Hraðfrystihúsið – Gunnvör hf. og Vinnslustöðin hf. í Vestmannaeyjum eru með í smíðum í Kína halda fljótlega til „veiða“ á miðin í næst við skipassmíðastöðinni í Shidao í Kína. Þetta kemur fram á vef Vinnslustöðvarinnar. Breki VE mun fara í prufuferð á undan Páli Pálssyni ÍS.

„Aðalatriðið er að kanna afl togskips með stærstu skrúfu íslenska fiskiskipaflotans. Auðvitað kostar verulega fjármuni og fyrirhöfn að senda veiðarfæri alla þessa leið en við viljum ganga úr skugga um að allur búnaður virki eins og til er ætlast áður en skipið verður afhent,“ segir Rúnar Helgi Bogason vélsmiður í frétt á vef Vinnslustöðvarinnar. Hann hefur verið í borginni Shidao í Kína í hálft annað ár og litið fyrir hönd útgerðanna eftir smíði systurskipanna ásamt Finni Kristinssyni vélfræðingi.

Fyrir liggur að láta reyna á ýmis tæki og tól í höfn í Kína, meðal annars átaksmæla aðalvélina með því að festa stálvíra úr skipinu í landi og láta skipið síðan toga.

Mikilvægasta þolraunin verður samt úti á sjó og Rúnar Helgi veit ekki til þess að svona nokkuð hafi verið gert áður með íslenskt fiskiskip hjá erlendri skipasmíðastöð fyrir afhendingu.

„Sjórinn er grunnur þarna úti fyrir. Við viljum gjarnan komast á 100 til 150 metra dýpi en það kostar allt að tveggja sólarhringa siglingu hvora leið og ekki víst að kínversk stjórnvöld leyfi slíka langferð. Meiningin er svo að færa trollið yfir í Pál Pálsson og prófa hann á sama hátt líka en ekki fyrr en séð er að allt sé með felldu í Breka. Ef eitthvað kemur upp á þar verður brugðist við í báðum skipunum áður en Páll fer í sína prófunarveiðiferð.“

smari@bb.is

Ísafjarðarbær er með í athugun gerð samninga um ljósleiðaravæðingu í dreifbýli í sveitarfélaginu er greint er frá á heimasíðu bæjarins. Ef af verður mun verkefnið verða unnið í áföngum, taka nokkur ár og felast í að koma að lágmarki á ljósleiðaratengingu á þá staði sem hverju sinni uppfylla skilyrði sem Fjarskiptasjóður setur um þátttöku sjóðsins á næstu árum.

Auglýsir sveitarfélagið eftir fjarskiptafélögum sem ætla sér, á markaðsforsendum, að bjóða ljósleiðaratengingar til lögheimila og annarra staða í dreifbýli í sveitarfélaginu næstu 3 ár. Sé fyrir hendi ásetningur um slíkt, óskar Ísafjarðarbær eftir upplýsingum um fyrirhugaða uppbyggingu en að öðrum kosti kemur til greina að styrkja, eða hafa milligöngu um styrkveitingu til verkefna sem uppfylla skilyrði. Óskað er eftir að þau fjarskiptafyrirtæki sem eru áhugasöm hafi samband við sveitarfélagið í gegnum netfangið taeknideild@isafjordur.is fyrir klukkan 12 miðvikudaginn 25. janúar 2017

Að því gefnu að ekki sé uppi ásetningur um ljósleiðaravæðingu í dreifbýli í sveitarfélaginu á markaðsforsendum hyggst Ísafjarðarbær gera samning við hæfan aðila sem lýsir yfir áhuga á  að hanna, byggja, reka og eiga ljósleiðarastreng ásamt því sem honum tilheyrir. Samningar munu fela í sér að Ísafjarðarbær veiti viðkomandi opinberan fjárhagslegan stuðning til verkefnisins eða einstakra áfanga þess. Ísafjarðarbær áskilur sér allan fyrirvara um hvort af einstökum áföngum verður þar sem ekki hefur verið fullmótuð stefna um verkefnið.

annska@bb.is