Útgerðarfélagið Mýrarholt ehf. í Bolungarvík hefur keypt dragnótarbátinn Örn GK. Mýrarholt hefur gert út Ásdísi ÍS í tæp þrjú ár, bæði á rækju og á dragnót. Aflabrögðin á dragnótinni hafa verið með eindæmum góð og á síðasta ári fiskaði Ásdís tæp 1.500 tonn. Frá því er greint í Aflafréttum að um 1.000 þorskígildakvóti hafi verið á Erni og hluti kvótans fylgir með í kaupunum. Mýrarholt er í eigu bræðranna Jóns Þorgeirs og Guðmundar Einarssonar og sona þeirra beggja.

Örn er talsvert stærri en Ásdís, eða 22 m að lengd og átta metra breiður. Báturinn var smíðaður í Póllandi árið 1999 og er sérsmíðaður fyrir dragnótarveiðar. Á vef Aflafrétta er haft eftir Einari Guðmundssyni, skipstjóra á Ásdísi, að afhending Arnar fari fram fljótlega og þá mun báturinn fara í slipp.

smari@bb.is

Afli íslenskra skipa árið 2016 var 1.069 þúsund tonn sem er 247 þúsund tonnum minna en landað var árið 2015. Samdrátt í aflamagni á milli ára má nær eingöngu rekja til minni loðnuafla en ríflega 101 þúsund tonn veiddust af loðnu á síðasta ári samanborið við tæp 353 þúsund tonn árið 2015. Þetta kemur fram í tölum Hagfstofu Íslands. Samdráttur í afla uppsjávartegunda var 32% á milli ára en alls veiddust tæp 576 þúsund tonn af uppsjávartegundum. Botnfiskafli nam 457 þúsund tonnum á síðasta ári sem er 4% aukning miðað við fyrra ár. Að venju er þorskaflinn uppistaðan í botnfiskaflanum en tæp 264 þúsund tonn veiddust af þorski á síðasta ári sem er 8% meira en árið 2015. Flatfiskaflinn var svipaður á milli ára og var tæp 24 þúsund tonnum á síðasta ári. Afli skel- og krabbadýra nam 12,7 þúsund tonnum sem er jafngildir 26% aukningu miðað við árið 2015.

Í desembermánuði var fiskaflinn rúm 59 þúsund tonn sem er 20% meiri afli en í desember 2015. Aukið aflamagn í desember skýrist af auknum uppsjávarafla, en afli uppsjávartegunda, kolmunna og síld, var 15 þúsund tonnum meiri en í desember 2015. Samdráttur varð hinsvegar í öðrum aflategundum, botnfiskafli dróst saman um 14%, flatfiskafli um 41% og skel- og krabbadýraafli um 28%.

Þrátt fyrir aukið aflamagn í desember má gera ráð fyrir að verðmæti aflans í desember hafi dregist saman um 5,5% sem skýrist af aflasamdrætti verðmætari tegunda.

smari@bb.is

Ísafjarðarbær getur ekki komist út úr vatnssölusamningi við Köldulind ehf. Fyrirtækið hefur forgangsrétt að umframvatni í Skutulsfirði. Kanadíska fyrirtækið Amel Group hefur lýst áhuga á vatnskaupum á Ísafirði en eins og áður segir er Kaldalind með forgangsrétt að umframvatni. Samningur Kaldalindar gengur úr gildi í september 2017, hafi fyrirtækið ekki nýtt sér forgangsrétt að vatni samkvæmt ákvæðum samningsins.

Í lok október áttu Saleh Saleh, framkvæmdastjóri Amel Group og Johan Gallani hjá Gallani Consultants með þeim Þórdísi Sif Sigurðardóttur, bæjarritara Ísafjarðarbæjar, og Brynjari Þór Jónassyni, sviðsstjóra umhverfis- og eignasviðs.

Talsvert umframvatn kemur úr Vestfjarðagöngum og hugmynd kanadíska fyrirtækisins er að tanka því á skip við gömlu bryggjuna á Grænagarði, þar sem sementi var áður skipað upp.

smari@bb.is

Bolvíkingurinn Haukur Vagnsson og kona hans Warapon Chanse hafa tekið við rekstri Íslendingabarsins á Pattaya í Tælandi. Staðurinn heitir Viking Bar & Restaurant, en gengur iðulega undir nafninu Íslendingabarinn eða Íslenski pylsubarinn og er til húsa við New Plaza við Moo númer 8, á besta stað í borginni samkvæmt Hauki. Íslendingar sem í auknu mæli heimsækja Pattaya yfir vetrarmánuðina hafa margir fundið sitt athvarf, sinn Staupastein á staðnum, kannski af skiljanlegum ástæðum þar sem þar má fá þjóðarrétt Íslendinga, hinn nýrri, SS pylsu með öllu. Þar má einnig fá bæði Tópas og Opal í fljótandi formi sem einnig hefur vakið lukku meðal gesta að sögn Hauks og ætlar hann að bjóða getum þar upp á ekta Hesteyrarpönnukökur eftir uppskrift móður sinnar Birnu Pálsdóttur. Á staðnum má horfa á fótbolta og handbolta með íslenskum leiklýsingum og var fullt úr úr dyrum er sýnt var frá leikjum íslenska handboltalandsliðsins um helgina.

Haukur segist skora á Vestfirðinga að koma í heimsókn til Pattaya og segir að þau á Íslendingabarnum geti verið gestum innan handar með að bóka viðeigandi húsnæði og bílaleigubíla til að mynda: „Hér er allt mjög ódýrt og mjög gott að vera. Mjög stabíll 30 gráðu hiti.“ Segir Haukur um Pattaya og eru hann og Warapon með í undirbúningi að bjóða upp á golfferðir til staðarins, en Haukur segir vellina sem finna má þar og þjónustan í kringum þá vera í hæsta gæðaflokki.

Haukur segist ætla að dvelja að mestu á Pattaya yfir vetrarmánuðina, en koma reglulega heim til Íslands þar sem hann rekur enn skemmtistaðinn Hendrix, jafnframt því sem hann mun halda áfram að sigla með ferðamenn til Hornstranda á sumrin á bát sínum Hesteyri ÍS:

annska@bb.is

Komin er út reglugerð um veitingastaði, gististaði og skemmtanahald. Í reglugerðinni er heimagisting skilgreind sem gisting á lögheimili einstaklings eða einni annarri fasteign í hans eigu sem hann hefur persónuleg not af.  Einstaklingum er heimilt að leigja út heimili sitt eða aðra fasteign sem viðkomandi hefur til persónulegra nota í allt að 90 daga á ári án þess þurfa að sækja um rekstrarleyfi.

Heimagisting verður valkostur fyrir þá, sem vilja leigja út lögheimili sitt eða aðra fasteign sem það hefur til persónulegra nota  (t.d. sumarbústað) til styttri tíma. Sá sem hyggst leigja út samkvæmt heimagistingu má gera það að hámarki í  90 daga á almanaksárinu.

Heimagisting er starfsleyfisskyld samkvæmt ákvæðum laga nr. 7/1998 um hollustuhætti og mengunarvarnir.

Einstaklingar sem ætla að bjóða upp á heimagistingu þurfa að skrá sig hjá Sýslumanni, sem hefur í þessum tilgangi opnað nýjan vef, www.heimagisting.is . Við skráningu ber viðkomandi aðila að staðfesta að til staðar sé starfsleyfi heilbrigðisnefndar.

smari@bb.is