Sveitarstjórn Strandabyggðar lýsir lýsir þungum áhyggjum vegna erfiðleika hjá sauðfjárbændum. Sauðfjárbúskapur er næst stærsta atvinnugreinin í sveitarfélaginu. Í bókun sveitarstjórnar segir að ef fram fer sem horfir mun afkoma fjölda íbúa í Strandabyggð versna um 40-50% á tveimur árum. „Ekkert samfélag þolir það án þess að skaðast efnahags- og félagslega. Þau sveitarfélög þar sem sauðfjárbúskapur er aðal atvinnugreinin munu verða verst úti,“ segir í bókuninni.

Sveitarstjórn treystir því að stjórnvöld grípi til allra mögulegra aðgerða til hjálpar sauðfjárbændum, afurðastöðvum og sveitarfélögum til að komast yfir þá erfiðleika sem nú blasa við. „Að gera ekkert í þeirri stöðu sem nú er uppi væri ótrúlegt skeytingarleysi og fyrirlitning gagnvart byggðum landsins,“ segir að lokum.

smari@bb.is

Á morgun verður haldið Bryggjuball í annað sinn á Norðurfirði á Ströndum og er það harmonikkan sem er í aðalhlutverki. Dagskráin hefst þó í kvöld með stemningskvöldi á Kaffi Norðurfirði en svo fer sjálft bryggjuballið fram á vörubílspalli á bryggjusvæðinu. Linda Guðmundsdóttir frá Finnbogastöðum, ætlar ásamt góðum félögum að spila á fyrir dansi í Norðurfirði. Þetta er í annað sinn sem hún heldur Bryggjuball á Norðurfirði en fyrra ballið var fyrir tveimur árum. Skemmtunin byrjar í kvöld með tónleikum á Kaffi Norðurfirði og á morgun kl. 22 verður dansinn stiginn og nikkurnar þandar á bryggjunni á Norðurfirði. Hljómsveit Lindu nefnist gleðikonurnar og spilar svokallaða klesmertónlist, sem á rætur sínar að rekja til júðskra farandtónlistarmanna í Austur-Evrópu.

Því má svo bæta við að á sunnudaginn verður Íslandsmeistaramót í hrútadómum í Sauðfjársetrinu á Ströndum.

smari@bb.is

Í kvöld munu í Tjöruhúsinu koma saman vinir og vandamenn Helenu Bjarkar Þrastardóttur heitinnar, bókavarðar við Bókasafnið á Ísafirði, sem féll nýverið frá, allt of ung að aldri. Ætlunin er að minnast Helenu, skála fyrir henni og gleðjast yfir þeim góðu stundum sem hún deildi með okkur, en í dag hefði Helena fagnað 36 ára afmæli sínu. „Afmælisveislan“ verður með glaðlyndu og hressilegu sniði og eru allir boðnir velkomnir, en þar mun tónlist verða flutt, meðal annars af Skúla „Mennska“ Þórðarsyni, bekkjarfélaga og vini Helenu til margra ára, auk þess sem skoska stúlknasveitin Midas Fall hefur ferðast sérstaklega til landsins til þess að spila henni minningarsöng. Þá verður frumsýnt málverk af Helenu í essinu sínu eftir listakonuna Jelenu Micic, sem jafnaldrar Helenu og bekkjarfélagar við Grunnskólann og Menntaskólann á Ísafirði hafa látið útbúa og verður fært Bókasafninu á Ísafirði, vinnustað hennar, að gjöf að helginni lokinni.

Coca Cola á Ísafirði hefur að auki lagt til forláta bjórkúta til styrktar ætluðum minningarsjóð um Helenu sem nú er í bígerð, en þannig mun allur ágóði af bjór sem selst í kvöld (og verður á sérstökum kostakjörum) renna beint í sjóðinn, sem nánar verður kynntur síðar.

Fyrirhugaðir minningartónleikar um Helenu, sem Ásgeir Helgi yngri bróðir hennar hefur haft í býgerð, eru enn á dagskrá og munu fara fram að ári liðnu.

Haukur S. Magnússon, vinur Helenu og einn skipuleggjenda afmælisveislunnar, segir að með henni sé fyrst og síðast hugmyndin að gefa þeim sem báru gæfu til að kynnast Helenu vettvang til gleðjast, eiga góða stund saman og heiðra minningu vinkonu sinnar. „Helena var dásamleg manneskja,“ segir Haukur, „sem því miður var tekin frá okkur allt of snemma. Við viljum halda minningu hennar á lofti og tryggja að þessi glaðværa, brosmilda stúlka sem lífgaði upp á líf svo margra í kring um sig muni ávallt eiga sér stað í hjörtum þeirra sem hún snerti.“

Viðburðurinn hefst um kl. 22.30, aðgangur er ókeypis og eru allir velkomnir.

Þess má og geta að annað kvöld mun Dr. Gunni koma fram í Tjöruhúsinu, ásamt Stífgrím kombóinu og hljómsveitinni Ást, en aðgangur er einnig ókeypis þar og allir velkomnir.

smari@bb.is

Heilbrigðisráðherra og forstöðumenn heilbrigðistofnana áttu fund í velferðarráðuneytinu í gær til að ræða um tækifæri og leiðir til að auka samvinnu milli stofnana og til að styrkja teymisvinnu innan þeirra.

Í tilkynningu kemur fram að fundarmenn ræddu um sjónarmið sín og reynslu af margskonar samvinnu milli stofnana og innan þeirra og voru þeir á einu máli um að samvinna og teymisvinna hafi verið efld. Til dæmis hafi forstöðumenn hist reglulega undanfarin misseri þar sem rædd eru sameiginleg mál og verkefni til að samhæfa ýmsa verkferla og til að bæta þjónustu.

Á fundinum kom fram að mikilvægt sé að formgera betur samstarf stofnana og setja niður skýrari viðmið og verklag um ýmis sameiginleg mál sem snúa bæði að þjónustu við sjúklinga og rekstrarlegum þáttum. Með því móti megi bæta þjónustu og aðgengi sjúklinga að henni. Sömuleiðis kom fram að meiri samvinna stofnana skapi tækifæri til að nýta betur sérþekkingu starfsfólks til dæmis með starfsmannaskiptum og fræðslu.

Óttarr Proppé heilbrigðisráðherra segir kærkomið að eiga slíkt samtal við stjórnendur heilbrigðisþjónustunnar og mjög ánægjulegt að heyra samhljóminn í orðum forstöðumannanna: „Það er greinilegt að samvinna milli stofnana skiptir forstöðumennina miklu máli og þeir hafa mikinn áhuga á að efla það enn frekar. Nú verður hrundið af stað verkefnum hér í ráðuneytinu í takt við þær góðu tillögur sem fram komu á fundinum“ sagði ráðherra meðal annars í lok fundarins.

smari@bb.is

Í skýrslu Byggðastofnunar um hagvöxt landshlutanna 2008-2015 kemur fram að vöxtur hefur verið í öllum landshlutum að Vestfjörðum undanskildum. Þar dróst framleiðslan saman um 6% á tímabilinu en að meðaltali var hagvöxtur landshlutanna 4%. Skýrsluhöfundar telja markvert að fólki fjölgar sums staðar á Vestfjörðum, á stöðum sem lengi hafa átt erfitt uppdráttar, til dæmis á Patreksfirði, á Bíldudal og í Bolungarvík. Sjávarútvegur er hvergi eins mikilvæg atvinnugrein og á Vestfjörðum. Um 24% ársverka á Vestfjörðum voru í sjávarútvegi árið 2015 og rúmlega 2% ársverka voru í fiskeldi. Laun á ársverk eru lægri í fiskveiðum á Vestfjörðum en annars staðar og meðallaun á ársverk í öllum atvinnugreinum eru aðeins undir landsmeðaltali árið 2015. Umsvif í sjávarútvegi jukust á tímabilinu og í skýrslunni er bent á að talsverð uppbygging hefur verið í fiskeldi og meiri uppbygging fyrirhuguð á næstu árum.

Á hinn bóginn skruppu fjármálaþjónusta og tryggingar saman, aðallega á seinni hluta tímabilsins. Í þessum greinum voru umsvif árið 2015 aðeins fjórðungur af því sem var 2008. Nokkuð dró úr húsbyggingum og opinber stjórnsýsla dróst einnig saman.

smari@bb.is

Ef allir landsmenn kaupa 3 kíló af umfram það sem þeir eru vanir, á tímabilinu 15. ágúst til 15. september, þá gengur hratt á þær lambakjötsbirgðir sem er í landinu. Magnús Magnússon, ritstjóri Skessuhorns, hefur skorað á landsmenn að taka höndum saman og eyða lambakjötsfjallinu. Útlit er fyrir að um 1.300 tonn af lambakjöti verði til 1. september. Þetta er um 700 meira en æskilegt væri. Þetta jafngildir því nánast að mánaðarsala sé til á lager þegar nýtt kjöt kemur á markað.

smari@bb.is

48 nýnemar hefja nám við Menntaskólann á Ísafirði í dag en alls eru nemendur þessa haustönn 254. Fjarnámsnemar eru orðnir 114 og enn er verið að afgreiða umsóknir um fjarnám, en skólinn er eins og undanfarin ár í samstarfi við 12 aðra framhaldsskóla á landsbyggðinni undir merkjum Fjarmenntaskólans. Hlutfall starfs- og verknáms er hátt eins og oftast áður í MÍ eða um 36%. Auk bóknámsbrauta verða nemendur á 7 starfs- og verknámsbrautum í haust.

Að sögn skólameistara, Hildar Halldórsdóttur munu 16 nemendur hefja nám í húsasmíði en hún verður að þessu sinni kennt í lotubundnu fjarnámi með dagskólakennslu. Frá árinu 2014 hefur skólinn boðið upp á skipstjórnarnám í lotubundu fjarnámi í samstarfi við Tækniskólann sem hefur gefist vel og aðsókn í það nám hefur verið góð.

Hildur segir heimavistina vel nýtta og aðeins örfá herbergi laus.

Vel hefur gengið að ráða kennara til skólans enda lítil starfsmannavelta milli anna og eru allar stöður mannaðar.

Skólinn hefur nú tekið við rekstri Mötuneytis MÍ af Hugljúfu Ólafsdóttur sem rekið hefur mötuneytið mörg undanfarin ár. Halldór Karl Valsson matreiðslumaður hefur verið ráðinn til að veita mötuneytinu forstöðu.

Hildur segir að áfram lögð áhersla á leiðsagnarnám í kennslu (e. formative assessment), en í því felst m.a. að virkja nemendur til þess að vera eigendur og ábyrgðarmenn á eigin námi.

bryndis@bb.is

Stór hópur manna úr mótorhjólaklúbbum BMW tók á rás snemma í gærmorgun og lagði af stað frá bensínstöð N1 vestur á firði. Þarna voru saman á ferð 25 félagar úr BMW klúbbnum og jafn margir úr þýskum systurklúbbi. Þeirra fyrsti náttstaður fyrir vestan var á Tálknafirði þar sem þeir gistu í nótt. Halda svo áfram til Ísafjarðar í dag og til Norðurfjarðar á Ströndum á morgun þar sem leiðir skiljast, því Þjóðverjarnir fara hringinn umhverfis landið en Íslendingarnir suður.

„Trússbíll fylgir okkur og ferjar samkomutjald og fleira og verður það sett upp á gististöðum. Þetta er sennilega stærsta ferð mótorhjólamanna um Vestfirði sem farin hefur verið,“ sagði Guðmundur Björnsson læknir, einn leiðangursmanna, í samtali við blaðamann Morgunblaðsins.

bryndis@bb.is

Hann skvettir aðeins úr sér í dag með norðaustan 8-15 og hitinn er 5 – 12 stig hér á Vestfjörðum en varað er við norðvestan strekkingi eða allhvössum vindi á Suðausturlandi. Vindur gæti þar náð meira en 25m/2 í hviðum við fjöll. Það er varasamt fyrir ökutæki sem taka á sig mikinn vind.

Það styttir upp seinnipartinn og um helgina eru líkur á brakandi blíðu.

bryndis@bb.is