Samgöngu- og sveitarstjórnarráðherra hefur skipað starfshóp til að fara yfir rekstur innanlandsflugvalla landsins. Markmiðið  er að ná fram hagkvæmari rekstri á innanlandsflugi og skilvirkari rekstri flugvalla sem leiði til lægri flugfargjalda. Starfshópnum er falið að fara yfir núverandi fyrirkomulag innanlandsflugsins, hugmyndir að breyttu fyrirkomulagi og meta hvaða leikreglur skili neytendum mestri hagkvæmni. Gert er ráð fyrir að tillögur taki mið af því að markaðslögmál verði nýtt eins og kostur er til að ná fram hagkvæmni við rekstur flugvalla og flugleiða, að verðlagning opinberra aðila verði eins gegnsæ og auðið er og að innanlandsflug stuðli að aðgengi landsmanna að þjónustu og afþreyingu, styrki atvinnurekstur á landsbyggðinni og þjóni ferðamönnum eins og best verður á kosið. Þetta kemur fram í tilkynningu.

Miðað er við að starfshópurinn skili skýrslu með rökstuddum tillögum sem eru til þess fallnar að stuðla að markmiði verkefnisins. Ráðgert er að hópurinn skili áfangaskýrslu með helstu tillögum fyrir árslok og lokaskýrslu fyrir 1. maí 2018.

smari@bb.is

Ein af síðustu bæjarhátíðum sumarsins, Bláberjadagar í Súðavík, fer fram um næstu helgi. Dagskráin hefst á föstudaginn með ærsladiskói á nýjum ærslabelg sveitarfélagsins á skólalóð Súðavíkurskóla kl. 16:00. Tælenska matarveislan kemur svo í kjölfarið á Jóni Indíafara en aðalnúmer hátíðarinnar, föstudagstónleikarnir í Samkomuhúsinu, hefjast kl. 19:00 og standa til miðnættis.

Dagskráin heldur áfram allan laugardaginn og á sunnudaginn og endar með bláberjamessu í Súðavíkurkirkju kl. 17:00  á sunnudag.

Hér eru nokkrar myndir úr safni bb.is frá fyrri bláberjadögum

bryndis@bb.is

Sigríður Elsa Kjartansdóttir, dómari við Héraðsdóm Vestfjarða, lætur af störfum um mánaðamótin og hefur störf við Héraðsdóm Reykjavíkur þann 1. september. Staðan á Ísafirði hefur ekki verið auglýst laus til umsóknar en Sigríður Elsa segir að samkvæmt þeim upplýsingum sem hún hefur fengið verður það gert fljótlega. Hún mun sinna afmörkuðum verkefnum fyrir Héraðsdóm Vestfjarða samhliða störfum sínum við Héraðsdóm Reykjavíkur þangað til nýr dómari verður ráðinn.

smari@bb.is

Sam­kvæmt fyrstu niður­stöðum les­fim­i­prófa sem voru lögð fyr­ir ís­lenska grunn­skóla­nem­end­ur í fyrsta skipti á síðasta skóla­ári hafa marg­ir skól­ar náð góðum ár­angri sér­stak­lega í yngstu ár­göng­un­um. Hins veg­ar er þörf á um­bót­um á miðstigi, þ.e. í 5.–7. bekk. Leggja þarf áherslu á fjöl­breytt­ar leiðir í skól­um og á heim­il­um til að auka margs kon­ar lest­ur nem­enda. Þá þarf að finna leiðir til að gera lest­ur áhuga­verðari og auka aðgengi að hvetj­andi les­efni. Þetta kem­ur fram í til­kynn­ingu menntamálaráðuneytisins.

Greint var frá niður­stöðu les­fim­i­próf­anna í gær þegar fyrsta heila skóla­ári læsis­verk­efn­is­ins, Þjóðarsátt­mála um læsi, lauk.

Þátt­taka í les­fim­i­próf­un­um var góð en 75% nem­enda í 1.-10. bekk tóku þátt í próf­un­um í maí. Mest þátt­taka var í 3. bekk eða 83% en minnst í 10. bekk þar sem 54% nem­enda tóku þátt. Alls lögðu 93% skóla próf­in fyr­ir á skóla­ár­inu 2016-2017 og fleiri munu taka þátt nú í sept­em­ber. Þetta kem­ur jafn­framt fram í til­kynn­ingu.

Les­fim­i­próf­in eru mæli­tæki til að meta lestr­arkunn­áttu og fram­vindu nem­enda í les­fimi, lesskiln­ingi, orðaforða, staf­setn­ingu og rit­un og til að skima fyr­ir lestr­ar­erfiðleik­um, und­ir yf­ir­heit­inu Les­fer­ill.

smari@bb.is

Síðasta Fokk­er-vél Air Ice­land Conn­ect flaug af landi brott frá Reykja­vík­ur­flug­velli í morg­un. Þetta eru mik­il tíma­mót hjá flug­fé­lag­inu því Fokk­er-vél­ar hafa verið í rekstri þess frá ár­inu 1965, eða í yfir hálfa öld. Flug­vél­inni var flogið til Hol­lands þar sem nýir eig­end­ur frá Kan­ada taka við henni.

Vél­in sem tók á loft í morg­un er Fokk­er-50 sem kall­ast TF-JMS. Hún er síðust af fjór­um Fokk­er-50 vél­um sem kanadíska fyr­ir­tækið Avmax keypti af Air Ice­land Conn­ect. Vélin var ein af sex Fokker 50 vélum sem voru keyptar nýjar til landsins árið 1991.

smari@bb.is

Í síðustu viku barst lögreglu tilkynning um um eld í íbúðarhúsi í Hnífsdal. Einn íbúi var í húsinu og hlaut hann brunasár. Hann var lagður inn á sjúkrahús vegna brunasáranna, sem þó virtust ekki vera lífshættulegir. Svo virðist sem eldurinn hafi kviknað þegar íbúinn var að kveikja upp í eldstæði. Greiðlega tókst að hefta útbreiðslu eldsins og slökkva hann. Í yfirliti lögreglunnar á Vestfjörðum um mál sem komu upp í síðustu viku segir að tilkynnt var um eitt vinnuslys en í því tilviki féll starfsmaður fyrirtækis í Bolungarvík úr stiga. Hann var fluttur á sjúkrahús á Ísafirði, þó ekki með lífshættulega áverka.

Fjórar tilkynningar bárust um að ekið hafi verið á lambfé í umdæminu. Það er því rík ástæða fyrir búfjáreigendur að reyna allt til að halda því frá vegi og sömuleiðis fyrir ökumenn að gæta varúðar, ekki síst í ljósi þess að skyggnið þverr.

Allst voru 18 ökumenn kærðir fyrir of hraðan akstur í liðinni viku.

Lögreglan fjarlægði skráningarplötur af fólksbifreið einni á Ísafirði. Ástæðan var sú að þak bifreiðarinnar hafði verið fjarlægt en bifreiðin ekki búin viðeigandi öryggisbúnaði fyrir ökumann og farþega. Bifreiðin þannig tekin úr umferð af öryggisástæðum. Lögreglan vill vara við því að skerða öryggi ökutækja með þessum hætti.

smari@bb.is

Fyrir ofan byggðina í Hnífsdal, í fjallinu Bakkahyrnu, er þekkt kennileiti sem kallast Hádegissteinn. Steinninn er 2-4 m á kant og tugir tonna á þyngd. Sérfræðingar Veðurstofunnar segja ljóst að steinninn er á hreyfingu og gæti fyrivaralaust hrunið niður í byggðinga við Dalbraut og neðan hennar.  Í vettvangsferð starfsmanna Veðurstofunnar fyrir viku sást greinilega að steinninn er  á hreyfingu og skófir á steininum ofanverðum gefa til kynna að steinninn hafi nýlega skriðið til eða snúist um allmarga cm þannig að sjá má skófalausa rönd sem nýlega hefur dregist upp fyrir yfirborðið.

Í minnisblaði Tómasar Jóhannessonar, jarðeðlisfræðings hjá Veðurstofunni, kemur fram að tilefni er til aðgerða til þess að draga úr hættu af völdum hugsanlegs hruns steinsins niður hlíðina, enda gæti hann valdið slysum á fólki og talsverðu tjóni á byggingum.

Tvennt er í stöðunni að mati Tómasar. Annars vegar að sprengja steininn upp í svo litla mola að ekki stafi hætta af þeim þegar þeir velta niður á jafnsléttu og hins vegar að festa steinninn með ankerum og/eða steyptri undirstöður til þess að koma í veg fyrir að hann hreyfist frekar.

Tómast telur að líklega sé betra að sprengja steininn, en þá þurfi kunnáttumenn í verkið og væntanlega væri rétt að rýma byggðina þegar steinninn er sprengdur og koma jafnvel fyrir grjóthrunsnetum eða öðrum fyrirstöðum til þess að hindra að steinbrot kastist niður í byggðina.

Í minnisblaðinu er bent á að á næstunni verða svissneskir tæknimenn á landinu á vegum Landsvirkjunar, en þeir sérhæfa sig í að draga úr grjóthrunshættu með því að festa eða sprengja lausagrjót sem hætta kann að stafa af.

Minnisblaðið var lagt fyrir fund bæjarráðs Ísafjarðarbæjar í dag og var bæjarstjóra falið að kynna málið fyrir hverfisráði Hnífsdals.

smari@bb.is

Bæjarráð Ísafjarðarbæjar tekur undir bókun skipulag- og mannvirkjanefndar um stækkun eldisleyfis Arctic Sea Farm í Dýrafirði, Fyrirtækið áformar að auka eldi á laxfiskum í Dýrafirði úr 2.000 þúsund tonnum í 4.000 tonn. Í umsögn Ísafjarðarbæjar er vísað í burðarþolsmat Hafrannsóknastofnunar þar sem Dýrafjörður er talinn þola eldi á allt að 10.000 tonnum og er súrefnisbúskapur fjarðarins jafnvel talinn þola allt að 40% meira eldi en það. Áhrif uppsöfnunar næringarefna frá eldinu eru talin hafa mjög takmörkuð áhrif á botndýralíf á svæðinu, en með umhverfisvöktun er ætlun framkvæmdaraðila að fylgjast með mögulegum áhrifum á það og verða kvíaþyrpingar færðar til ef talið verður tilefni til. Í Dýrafirði og í nágrenni hans eru engar laxveiðiár og er því samkvæmt áhættumati Hafró engin áhætta fyrir villta laxfiskstofna af hugsanlegum strokufiski frá eldinu.

Er það því mat Ísafjarðarbæjar að stækkunaráform Arctic Sea Farm séu „rökrétt í framhaldi af ágætum árangri síðustu ára, ábyrg og varfærin, þar sem stækkunin er enn talsvert undir útreiknuðu burðarþoli fjarðarins og áform um viðbrögð þess eðlis að neikvæð umhverfisáhrif verða í algeru lágmarki,“ eins og það er orðað í umsögninni.

smari@bb.is

Árneshreppur á Ströndum, Þingeyri og Borgarfjörður eystri hafa fengið inngöngu í verkefni Byggðastofnunar Brothættar byggðir. Því er ætlað að leita lausna á bráðum vanda byggðarlaga vegna fólksfækkunar og erfiðleika í atvinnulífi.

Bæjarráð Ísafjarðarbæjar fagnar ákvörðun um að Þingeyri verði þátttakandi í verkefninu og leggur áherslu á að Flateyri verði jafnframt þátttakandi.

Blásið verður til íbúaþings á þessum þremur stöðum, verkefnastjórn sett á laggirnar og verkefnastjórar ráðnir. Fleiri byggðarlög hafi knúið á um að taka þátt í verkefninu.

Sjö önnur byggðarlög taka þátt í verkefninu Brothættar byggðir: Bíldudalur, Breiðdalshreppur, Raufarhöfn, Skaftárhreppur, Grímsey, Hrísey og Öxarfjörður.

bryndis@bb.is

Afkoma Ísafjarðarbæjar eftir fyrstu sex mánuði ársins er mun verri en fjárhagsáætlun gerði ráð fyrir. Hallarekstur bæjarins á fyrri helmingi ársins nam 4,4 milljónum kr. en fjárhagsáætlun gerðir ráð fyrir 82,6 milljóna kr. rekstrarafgangi á tímabilinu. Samkvæmt minnisblaði Eddu Maríu Hagalín, fjármálastjóra Ísafjarðarbæjar, eru minni skatttekjur helsta ástæða fyrir rekstrarhalla bæjarins. Skatttekjur Ísafjarðarbæjar (útsvar og framlag jöfnunarsjóða) voru 111 milljónum kr. lægri en gert var ráð fyrir fjárhagsáætlun.

Þá drógust tekjur hafnarinnar verulega saman, eða um 52 milljónir kr. Rekstrafgangur hafnarinnar eftir sex mánuði var neikvæður um 3,9 milljónir kr. en fjárhagsætlun gerði ráð fyrir 32 milljóna kr. afgangi af rekstri. Í minnisblaðinu kemur fram að skekkja gæti verið í samanburðinum þar sem verið er að innleiða nýtt kerfi yfir tekjubókanir og  hugsanlega eru einhverjar tekjur bókaðar í ágúst sem tilheyra júní.

Þá er mun verri afkoma af Fasteignum Ísafjarðarbæjar ehf., en halli af rekstrinum nam 35,6 milljónum kr. þegar fjárhagsætlun gerði ráð fyrir 2,4 milljón kr. hallarekstri. Skýringanna er að leita í því að viðhaldi á Fjarðarstræti 4-6 sem var farið í á árinu 2016 en hluti Fasteigna Ísafjarðarbæjar var greiddur á þessu ári, alls 20 milljónir kr. Þá voru fasteignagjöld á íbúðum bæjarins á Ísafirði vanáætluð um 3,5 milljónir kr. Annað viðhald á íbúðum á Ísafirði er 10,5 milljónum króna yfir áætlun og er að mestu vegna framkvæmda á Pollgötu.

Það vegur á móti minnkandi tekjum að nokkrir málaflokkar skila betri afkomu en gert var ráð fyrir í fjárhagsáætlun. Má þar nefna félagsþjónustuna sem skilar 20 milljónum kr. betri afkomu vegna hærri tekna frá Byggðasamlagi Vestfjarða um málefni fatlaðs fólks. Þá er snjómokstur 11 milljónum kr. undir áætlun og rekstur Slökkviliðs Ísafjarðar og rekstur sjúkraflutninga 8,5 milljónum kr. betri en áætlun gerði ráð fyrir.

smari@bb.is