Afkoma Ísafjarðarbæjar eftir fyrstu sex mánuði ársins er mun verri en fjárhagsáætlun gerði ráð fyrir. Hallarekstur bæjarins á fyrri helmingi ársins nam 4,4 milljónum kr. en fjárhagsáætlun gerðir ráð fyrir 82,6 milljóna kr. rekstrarafgangi á tímabilinu. Samkvæmt minnisblaði Eddu Maríu Hagalín, fjármálastjóra Ísafjarðarbæjar, eru minni skatttekjur helsta ástæða fyrir rekstrarhalla bæjarins. Skatttekjur Ísafjarðarbæjar (útsvar og framlag jöfnunarsjóða) voru 111 milljónum kr. lægri en gert var ráð fyrir fjárhagsáætlun.

Þá drógust tekjur hafnarinnar verulega saman, eða um 52 milljónir kr. Rekstrafgangur hafnarinnar eftir sex mánuði var neikvæður um 3,9 milljónir kr. en fjárhagsætlun gerði ráð fyrir 32 milljóna kr. afgangi af rekstri. Í minnisblaðinu kemur fram að skekkja gæti verið í samanburðinum þar sem verið er að innleiða nýtt kerfi yfir tekjubókanir og  hugsanlega eru einhverjar tekjur bókaðar í ágúst sem tilheyra júní.

Þá er mun verri afkoma af Fasteignum Ísafjarðarbæjar ehf., en halli af rekstrinum nam 35,6 milljónum kr. þegar fjárhagsætlun gerði ráð fyrir 2,4 milljón kr. hallarekstri. Skýringanna er að leita í því að viðhaldi á Fjarðarstræti 4-6 sem var farið í á árinu 2016 en hluti Fasteigna Ísafjarðarbæjar var greiddur á þessu ári, alls 20 milljónir kr. Þá voru fasteignagjöld á íbúðum bæjarins á Ísafirði vanáætluð um 3,5 milljónir kr. Annað viðhald á íbúðum á Ísafirði er 10,5 milljónum króna yfir áætlun og er að mestu vegna framkvæmda á Pollgötu.

Það vegur á móti minnkandi tekjum að nokkrir málaflokkar skila betri afkomu en gert var ráð fyrir í fjárhagsáætlun. Má þar nefna félagsþjónustuna sem skilar 20 milljónum kr. betri afkomu vegna hærri tekna frá Byggðasamlagi Vestfjarða um málefni fatlaðs fólks. Þá er snjómokstur 11 milljónum kr. undir áætlun og rekstur Slökkviliðs Ísafjarðar og rekstur sjúkraflutninga 8,5 milljónum kr. betri en áætlun gerði ráð fyrir.

smari@bb.is

Haraldur Benediktsson, fyrsti þingmaður Norðvesturkjördæmis, segist ekki vera andvígur laxeldi í Ísafjarðardjúpi en segist jafnframt ekki finna rök gegn áhættumati Hafrannsóknastofnunar. Þetta kemur fram í aðsendri grein Haraldar á bb.is í dag. Haraldur áréttar að áhættumatið geti tekið breytingum og hann telur vafalítið að eldi verði í Djúpinu með tíð og tíma. Í greininni segir Haraldur að ef aðeins væri um að ræða þrjár litlar laxveiðiár í Djúpinu mætti vel nota leikreglur laga og réttar og semja sig að niðurstöðu. „Það gilda hinsvegar ákveðnar skyldur og  lög um vernd á villtum stofni laxa. Það er ekki svo, þótt það virðist ósanngjarnt, að miklir hagsmunir margra víki til hliðar minni hagsmunum fárra,“ segir í greininni.

Hann lýkur greininni á þessum orðum:

„Ég held með Skagamönnum í knattspyrnu á hverju sem gengur. Ég þarf ekkert að rökstyðja það. Ég held hinsvegar með laxeldi á grundvelli þekkingar sem hægt er að afla hér heima og erlendis og þess mats sem er á hendi Hafrannsóknarstofnunar að leggja fyrir stjórnvöld. Allir ættu að ræða málin á þeim grunni.“

smari@bb.is

Frændsystkin Helenu Bjarkar Þrastardóttur, afkomendur Marsellíusar Bernharðssonar skipasmiðs og Albertu Albertsdóttur á Ísafirði, ásamt fjölskyldum afhentu á laugardaginn Safnahúsinu á Ísafirði veglegan útibekk til minningar um hana.

Helena Björk Þrastardóttir var fædd á Ísafirði 18. ágúst 1981, dóttir Þrastar Kristjánssonar og Þórlaugar Ásgeirsdóttur. Undanfarin ár starfaði hún sem bókavörður á bókasafninu á Ísafirði og var vinsæl með gesta safnsins enda einstaklega þjónustulipur og hlý í framkomu.

Nánar má lesa um gjöfina á facebook síðu Safnahússins er það kemur fram að starfsfólk Safnahússins á Ísafirði þakkar fjölskyldu Helenu Bjarkar fyrir gjöfina sem mun nýtast vel gestum og gangandi en um leið halda á lofti minningu yndislegrar stúlku með fallegt bros og hlýja nærveru.

Veðurspámenn Veðurstofunnar spá norðaustan 5-13 og rigningu með köflum hér á Vestfjörðum en hvassast á útnesjum. Lægir á morgun og styttir upp eftir hádegi. Hiti 7 til 14 stig.

Á landinu öllu er hæg norðlæg átt og allvíða úrkoma, einkum sunnan og suðaustanlands. Norðan 5-10 á Vestfjörðum í dag en norðvestan 8-15 austast í nótt. Rofar til á sunnanverðu landinu í kvöld og nótt. Stöku skúrir suðaustantil síðdegis á morgun en styttir að mestu upp norðantil annað kvöld. Hiti 9 til 16 stig.

bryndis@bb.is

Klukkan hálf ellefu í gærkvöldi hafði  Egill ÍS-77, sem er 70 brúttótonn dragnótarbátur, samband við stjórnstöð Landhelgisgæslunnar og tilkynnti um eld í ljósavélarými. Skipverjar sem eru fjórir sögðust vera búnir að loka öllu að vélarrýminu til að hefta útbreyðslu eldsins og til að freista þess að kæfa hann. Egill var staddur út af mynni Dýrafjarðar.

Stjórnstöð Landhelgisgæslunnar kallaði til nærstaddra skipa og báta og óskaði eftir að þau stefndu að Agli ÍS-077, auk þess sem áhöfn TF-LÍF var ræst út sem og sjóbjörgunarsveitir Slysavarnafélagsins Landsbjargar á vestfjörðum.

Slökkvilið höfuðborgarsvæðisins sendi 3 slökkviliðsmenn með TF-LÍF og slökkviliðsmenn af Vestfjörðum voru sendir með bátum á vegum sjóbjörgunarsveita á Vestfjörðum.

Næst Agli ÍS-077 var báturinn Jón Hákon BA sem áætlaði að verða við Egil um kl. 23:10 en einnig hélt Aldan ÍS í átt að Agli en þessir bátar voru staddir við mynni Dýrafjarðar.

Samkvæmt upplýsingum af vettvangi virtist eldur enn laus um borð um kl. 23:00 en þar sem Egill gat siglt undir eigin vélarafli var skipið komið á lygnari sjó inn á Dýrafirði.

Kl. 23.18 tilkynnti Jón Hákon að þeir væru komnir að Agli og fylgdu skipinu til hafnar á Þingeyri. Kl. 23.43 komu 3 slökkviliðsmenn um borð í Egil en þeir voru fluttir með fiskibátnum Imbu frá Þingeyri.

Upp úr miðnætti kom TF-LÍF á vettvang en um svipað leiti komu fleiri slökkviliðsmenn með fiskeldisbátnum Hafnarnesi sem fóru um borð í Egil.

Var því ákveðið að þyrlan lenti á Þingeyri með slökkviliðsmennina frá Slökkviliði höfuðborgarsvæðisins og biði átekta ef á aðstoð þyrfti að halda.

Jón Hákon og Aldan snéru við en Egill hélt í fylgd Hafnarness, Imbu og björgunabátsins Gísla Hjalta frá Bolungarvík sem komin var inn á Dýrafjörð um kl. 00:30.

Egill lagði að bryggju á Þingeyri laust eftir kl. eitt í nótt og slökkviliðsmenn náðu að slökkva eldinn um tvöleytið í nótt. Snemma í morgun blossaði eldurinn upp aftur og um hálfníuleytið tókst slökkviliðsmönnum að slökkva alla elda. Báturinn er mjög skemmdur, ef ekki ónýtur.

Samkvæmt vinnumarkaðsrannsókn Hagstofu Íslands var atvinnuleysi í júli 1 prósent sem er það lægsta frá því að samræmdar mælingar Hagstofunnar hófust árið 2003. Að jafnaði 201.900 manns á aldrinum 16–74 ára á vinnumarkaði í júlí 2017, sem jafngildir 83,3% atvinnuþátttöku. Af þeim voru 199.800 starfandi og 2.100 án vinnu og í atvinnuleit. Samanburður mælinga fyrir júlí 2016 og 2017 sýna að atvinnuþátttaka dróst saman um 2,5 prósentustig. Fjöldi starfandi jókst um 1.900 manns en hlutfall starfandi af mannfjölda minnkaði um 1,6 stig. Atvinnulausir eru nú 2.000 færri en í júlí 2016 og hlutfallið þá var 2%. Þeir sem standa utan vinnumarkaðar samkvæmt mælingunni eru 40.400 sem er um 6.900 fleiri en í júlí 2016 en þá voru þeir 33.500.

smari@bb.is

Mat­væla­stofn­un hef­ur tekið í notk­un nýja Facebooksíðu und­ir yf­ir­skrift­inni Dýra­vakt Mat­væla­stofn­un­ar. Til­gang­ur síðunn­ar er að skapa gagn­virk­an vett­vang til að miðla upp­lýs­ing­um um heil­brigði og vel­ferð dýra milli Mat­væla­stofn­un­ar, dýra­eig­enda og al­menn­ings, ann­ars veg­ar með upp­lýs­inga­gjöf frá stofn­un­inni til dýra­eig­enda um dýra­vel­ferðar­mál og hins veg­ar með upp­lýs­inga­gjöf frá al­menn­ingi til Mat­væla­stofn­un­ar þegar grun­ur leik­ur á illri meðferð á dýr­um. Þetta kem­ur fram í til­kynn­ingu.

Á síðunni verða meðal ann­ars birt­ar upp­lýs­ing­ar til dýra­eig­enda um hvernig auka megi vel­ferð og heil­brigði dýra, hvaða regl­ur gilda um dýra­hald og hvernig brugðist er við þegar þeim er ekki fylgt. Opið er fyr­ir at­huga­semd­ir und­ir hverri færslu.

Facebooksíðan er hins veg­ar hvorki ætluð til þess að veita ráðgjöf um sjúk­dóma, grein­ingu eða meðhöndl­un, né til að kom­ast í sam­band við dýra­lækni á vakt. Þetta kem­ur jafn­framt fram í til­kynn­ingu.

smari@bb.is