Síða 2170

Bregður þá vanalega veðráttu

Hafnarstrætið á Ísafirði í dag

 

Í dag er höfuðdagur og samkvæmt gamalli veðurtrú segir að veðurfar muni batna með Höfuðdegi og haldast þannig í þrjár vikur.

Höfuðdagurinn er samkvæmt gildandi tímatali 29. ágúst. Þann dag á Heródes konungur að hafa látið eftir konu sinni að Jóhannes skírari skyldi hálshöggvinn.

Á Vísindavefnum kemur fram að árið 1700 hafi tímatali verið breytt. Þá fluttist „gamli“ höfuðdagurinn yfir á 9. september og trúðu ýmsir á veðrabreytingar þann dag. Nú er dagurinn ávallt tengdur 29. ágúst. Trúnni á höfuðdaginn fylgdi bæði von og ótti. Mikilvægt þótti að hafa lokið heyskap fyrir höfuðdag ef tíð var góð en einnig lifðu margir í þeirri von að úr rættist við höfuðdag ef sumarið hafði verið vætusamt. Það á svo sannarleg við hér á norðanverðum Vestfjörðum en í dag er bæði bjart og fallegt.

Vísindavefurinn upplýsir ennfremur að íslenska heitið höfuðdagur virðist fyrst koma fyrir í bréfi frá 15. öld en þó þannig að nafnið var tengt Jóhannesi skírara, það er ákveðinn verknaður fór fram „á höfuðdaginn Johannis baptiste“. Þessi siður hélst lengi. Liðið var fram á 19. öld áður en farið var að nefna daginn án tilvísunar til Jóhannesar.

bryndis@bb.is

Teigsskógur: Lagasetning orðin eina færa leiðin

Elsa Lára Arnardóttir. Mynd: mbl.is / Ómar

Elsa Lára Arnardóttir, þingmaður Framsóknarflokks í Norðvesturkjördæmi, segir að lagasetning vegna veglagningar í Teigsskógi sé orðin eina færa leiðin til að höggva á hnútinn. Þetta kemur fram í aðsendri grein á bb.is í dag. Í greininni rifjar hún upp á hausti 2014 funduðu þingmenn kjördæmisins með þáverandi samgönguráðherra. Að sögn Elsu Láru voru ýmsar leiðir lagðar fyrir fundinn til að finna aðferð sem yrði til þess að hægt væri að byrja vegalagningu sem fyrst. „Flestir þingmenn kjördæmisins, ef ekki allir, vildu fara í lagasetningu til að höggva hnút á þá stjórnsýsluflækju sem nýr vegur um Teigsskóg er. Samkvæmt þeim svörum sem þingmenn fengu á fundinum þá átti endurupptaka á fyrra umhverfismati að vera stysta leiðin í átt að settu markmiði. Það ferli tæki innan við 18 mánuði og vegaframkvæmdir gætu hafist á árinu 2016,“ segir í greininni.

Eins og alþjóð veit eru jarðýturnar ekki farnar af stað í Gufudalssveit og nýverið kom fram að það skýrist ekki fyrr en seint á næsta ári hvort og hvenær framkvæmdir geta hafist.

Elsa Lára segir að málið sé enn á byrjunarreit og ekkert staðist sem rætt var um á fyrrnefndum fundi.

„Áætlanir hafa ekki gengið upp og því virðist lagasetning vera orðin eina færa leiðin. Það er ábyrgðarhlutverk okkar þingmanna Norðvesturkjördæmis að ganga í málið og koma þessu mikilvæga samgönguverkefni áfram. Þetta getur ekki gengið svona lengur,“ skrifar Elsa Lára.

smari@bb.is

Bátur brann í Norðurfirði

Báturinn er gjörónýtur.

Báturinn Eyjólfur Ólafsson HU-100, 7 tonna plastbátur, brann til kaldra kola í höfninni í Norðurfirði í morgun. Á Litlahjalla, fréttavef Árneshrepps, segir að útibústjóri Kaupfélagsins á Norðurfirði hafi orðið vör við eldinn um klukkan sjö í morgun. Slökkvilið Hólmavíkur var kallað út og var slökkviliðsstörfum lokið fyrir kl. 10 í morgun. Enginn var um borð í bátnum, en báturinn kom í land í Norðurfirði í nótt vegna brælu og var ráðgert að halda aftur á sjó í dag.

Eyjólfur Ólafsson var með heimahöfn á Skagaströnd.

 

smari@bb.is

Lagasetning kemur til greina.

Elsa Lára Arnardóttir. Mynd: mbl.is / Ómar

Enn og aftur er vegalagning um Teigsskóg komin í uppnám. Það er óásættanlegt með öllu og staða sem þessi getur ekki gengið lengur.

Í nýlegu svari sem ég fékk frá samgönguráðherra kemur fram að ráðherra sé ekki að skoða sérstaka lagasetningu til að liðka fyrir vegaframkvæmdum um Teigsskóg (http://www.althingi.is/altext/146/s/1070.html). Því er það ábyrgðarhlutverk þingmanna í Norðvesturkjördæmi að taka málið í sínar hendur, því lagasetning hlýtur að koma til greina þegar staðan er enn og aftur orðin þessi. Sérstaklega þar sem þær áætlanir sem settar voru fram árið 2014, hafa ekki gengið upp.

Haustið 2014 funduðu þingmenn Norðvesturkjördæmis m.a. með þáverandi samgönguráðherra um mikilvægi þess að nýr vegur yrði lagður um Teigsskóg. Ýmsar leiðir voru lagðar á borðið til að finna aðgerð sem yrði til þess að hægt væri að byrja vegalagningu sem fyrst. Flestir þingmenn kjördæmisins, ef ekki allir, vildu fara í lagasetningu til að höggva hnút á þá stjórnsýsluflækju sem nýr vegur um Teigsskóg er. Samkvæmt þeim svörum sem þingmenn fengu á fundinum þá átti endurupptaka á fyrra umhverfismati að vera stysta leiðin í átt að settu markmiði. Það ferli tæki innan við 18 mánuði og vegaframkvæmdir gætu hafist á árinu 2016 (http://www.visir.is/g/2014141019455). Núna árið 2017 erum við enn á byrjunarreit og ekkert staðist sem rætt var á fundinum þarna um árið.

Í öllu þessu ferli, hef ég sem þingmaður Norðvesturkjördæmis sett fram ýmsar fyrirspurnir um málið, m.a. um áfangaskiptingu verkefnisins, eyrnamerkt fjármagn til verkefnisins og fyrirspurn um lagasetningu eða aðrar aðgerðir til að koma verkefninu af stað. Allar þessar fyrirspurnir, sem og aðrar má finna hér: http://www.althingi.is/altext/cv/is/fyrirspurnir/?nfaerslunr=1161

Við virðumst enn og aftur vera á byrjunarreit. Áætlanir hafa ekki gengið upp og því virðist lagasetning vera orðin eina færa leiðin. Það er ábyrgðarhlutverk okkar þingmanna Norðvesturkjördæmis að ganga í málið og koma þessu mikilvæga samgönguverkefni áfram. Þetta getur ekki gengið svona lengur.

Elsa Lára Arnardóttir

þingmaður Framsóknarflokksins í Norðvesturkjördæmi.

Skipar starfshóp um rekstur innanlandsflugvalla

Ísafjarðarflugvöllur.

Samgöngu- og sveitarstjórnarráðherra hefur skipað starfshóp til að fara yfir rekstur innanlandsflugvalla landsins. Markmiðið  er að ná fram hagkvæmari rekstri á innanlandsflugi og skilvirkari rekstri flugvalla sem leiði til lægri flugfargjalda. Starfshópnum er falið að fara yfir núverandi fyrirkomulag innanlandsflugsins, hugmyndir að breyttu fyrirkomulagi og meta hvaða leikreglur skili neytendum mestri hagkvæmni. Gert er ráð fyrir að tillögur taki mið af því að markaðslögmál verði nýtt eins og kostur er til að ná fram hagkvæmni við rekstur flugvalla og flugleiða, að verðlagning opinberra aðila verði eins gegnsæ og auðið er og að innanlandsflug stuðli að aðgengi landsmanna að þjónustu og afþreyingu, styrki atvinnurekstur á landsbyggðinni og þjóni ferðamönnum eins og best verður á kosið. Þetta kemur fram í tilkynningu.

Miðað er við að starfshópurinn skili skýrslu með rökstuddum tillögum sem eru til þess fallnar að stuðla að markmiði verkefnisins. Ráðgert er að hópurinn skili áfangaskýrslu með helstu tillögum fyrir árslok og lokaskýrslu fyrir 1. maí 2018.

smari@bb.is

Bláberjadagar í Súðavík

Frá bláberjadögum 2013

Ein af síðustu bæjarhátíðum sumarsins, Bláberjadagar í Súðavík, fer fram um næstu helgi. Dagskráin hefst á föstudaginn með ærsladiskói á nýjum ærslabelg sveitarfélagsins á skólalóð Súðavíkurskóla kl. 16:00. Tælenska matarveislan kemur svo í kjölfarið á Jóni Indíafara en aðalnúmer hátíðarinnar, föstudagstónleikarnir í Samkomuhúsinu, hefjast kl. 19:00 og standa til miðnættis.

Dagskráin heldur áfram allan laugardaginn og á sunnudaginn og endar með bláberjamessu í Súðavíkurkirkju kl. 17:00  á sunnudag.

Hér eru nokkrar myndir úr safni bb.is frá fyrri bláberjadögum

bryndis@bb.is

Lætur af störfum um mánaðamótin

Sigríður Elsa Kjartansdóttir.

Sigríður Elsa Kjartansdóttir, dómari við Héraðsdóm Vestfjarða, lætur af störfum um mánaðamótin og hefur störf við Héraðsdóm Reykjavíkur þann 1. september. Staðan á Ísafirði hefur ekki verið auglýst laus til umsóknar en Sigríður Elsa segir að samkvæmt þeim upplýsingum sem hún hefur fengið verður það gert fljótlega. Hún mun sinna afmörkuðum verkefnum fyrir Héraðsdóm Vestfjarða samhliða störfum sínum við Héraðsdóm Reykjavíkur þangað til nýr dómari verður ráðinn.

smari@bb.is

Yngstu árgangarnir koma best út

Sam­kvæmt fyrstu niður­stöðum les­fim­i­prófa sem voru lögð fyr­ir ís­lenska grunn­skóla­nem­end­ur í fyrsta skipti á síðasta skóla­ári hafa marg­ir skól­ar náð góðum ár­angri sér­stak­lega í yngstu ár­göng­un­um. Hins veg­ar er þörf á um­bót­um á miðstigi, þ.e. í 5.–7. bekk. Leggja þarf áherslu á fjöl­breytt­ar leiðir í skól­um og á heim­il­um til að auka margs kon­ar lest­ur nem­enda. Þá þarf að finna leiðir til að gera lest­ur áhuga­verðari og auka aðgengi að hvetj­andi les­efni. Þetta kem­ur fram í til­kynn­ingu menntamálaráðuneytisins.

Greint var frá niður­stöðu les­fim­i­próf­anna í gær þegar fyrsta heila skóla­ári læsis­verk­efn­is­ins, Þjóðarsátt­mála um læsi, lauk.

Þátt­taka í les­fim­i­próf­un­um var góð en 75% nem­enda í 1.-10. bekk tóku þátt í próf­un­um í maí. Mest þátt­taka var í 3. bekk eða 83% en minnst í 10. bekk þar sem 54% nem­enda tóku þátt. Alls lögðu 93% skóla próf­in fyr­ir á skóla­ár­inu 2016-2017 og fleiri munu taka þátt nú í sept­em­ber. Þetta kem­ur jafn­framt fram í til­kynn­ingu.

Les­fim­i­próf­in eru mæli­tæki til að meta lestr­arkunn­áttu og fram­vindu nem­enda í les­fimi, lesskiln­ingi, orðaforða, staf­setn­ingu og rit­un og til að skima fyr­ir lestr­ar­erfiðleik­um, und­ir yf­ir­heit­inu Les­fer­ill.

smari@bb.is

Síðasti Fokkerinn farinn

Síðasta Fokk­er-vél Air Ice­land Conn­ect flaug af landi brott frá Reykja­vík­ur­flug­velli í morg­un. Þetta eru mik­il tíma­mót hjá flug­fé­lag­inu því Fokk­er-vél­ar hafa verið í rekstri þess frá ár­inu 1965, eða í yfir hálfa öld. Flug­vél­inni var flogið til Hol­lands þar sem nýir eig­end­ur frá Kan­ada taka við henni.

Vél­in sem tók á loft í morg­un er Fokk­er-50 sem kall­ast TF-JMS. Hún er síðust af fjór­um Fokk­er-50 vél­um sem kanadíska fyr­ir­tækið Avmax keypti af Air Ice­land Conn­ect. Vélin var ein af sex Fokker 50 vélum sem voru keyptar nýjar til landsins árið 1991.

smari@bb.is

Kviknaði í út frá eldstæði

Í síðustu viku barst lögreglu tilkynning um um eld í íbúðarhúsi í Hnífsdal. Einn íbúi var í húsinu og hlaut hann brunasár. Hann var lagður inn á sjúkrahús vegna brunasáranna, sem þó virtust ekki vera lífshættulegir. Svo virðist sem eldurinn hafi kviknað þegar íbúinn var að kveikja upp í eldstæði. Greiðlega tókst að hefta útbreiðslu eldsins og slökkva hann. Í yfirliti lögreglunnar á Vestfjörðum um mál sem komu upp í síðustu viku segir að tilkynnt var um eitt vinnuslys en í því tilviki féll starfsmaður fyrirtækis í Bolungarvík úr stiga. Hann var fluttur á sjúkrahús á Ísafirði, þó ekki með lífshættulega áverka.

Fjórar tilkynningar bárust um að ekið hafi verið á lambfé í umdæminu. Það er því rík ástæða fyrir búfjáreigendur að reyna allt til að halda því frá vegi og sömuleiðis fyrir ökumenn að gæta varúðar, ekki síst í ljósi þess að skyggnið þverr.

Allst voru 18 ökumenn kærðir fyrir of hraðan akstur í liðinni viku.

Lögreglan fjarlægði skráningarplötur af fólksbifreið einni á Ísafirði. Ástæðan var sú að þak bifreiðarinnar hafði verið fjarlægt en bifreiðin ekki búin viðeigandi öryggisbúnaði fyrir ökumann og farþega. Bifreiðin þannig tekin úr umferð af öryggisástæðum. Lögreglan vill vara við því að skerða öryggi ökutækja með þessum hætti.

smari@bb.is

Nýjustu fréttir