Þema dagsins þetta ár er nútímahlutverk íslenska fjárhundsins. Enn gegnir íslenski fjárhundurinn sínu hlutverki sem sveitahundur en hann hefur sannarlega fengið verkefni í viðbót. Þetta kemur fram í fréttatilkynningu frá skipuleggjendum dagsins og þar eru verkefni nútíma hundsins talin upp.
Íslenski fjárhundurinn er Rauða kross-hundur sem fer í heimsóknir á hjúkrunarheimili, hann er einnig lestrarhundur og hlustar á börn lesa fyrir sig – bæði í grunnskóla þar sem sömu börnin lesa fyrir hundinn í margar vikur sem og á Borgarbókasafninu í Grófinni. Eins er íslenski fjárhundurinn stoð og stytta margra aldraðra sem öðlast betri heilsu með því að ganga úti með sinn góða vin. En fyrst og fremst er íslenski fjárhundurinn einstakur félagi og hluti af sinni fjölskyldu.
Íslenski fjárhundurinn er heiðraður með dagskrá víða um land og á Ísafirði munu fulltrúar þessa merka hundakyns og eigendur að hittast við Ísafjarðarkirkju kl. 14:00 og ganga niður á torg.
Fyrsti leikur Íslands fer fram í dag á Koning Willem II stadion í Tilburg. Þar mun íslenska liðið mæta Frakklandi, en franska liðið eru talið einna líklegast til að landa Evrópumeistaratitlinum. Leikurinn hefst kl. 18:45 og er sýndur beint á RÚV.
Í riðlinum eru Frakkland, Sviss og Austurríki auk Íslands. Næst leikur Ísland við Sviss þann 22. júlí og hefst sá leikur klukkar 14:00. Við Austurríki keppir liðið þann 26. júlí kl. 18:45 en 8-liða úrslitin hefjast 29. júlí.
Hlaupahátíð á Vestfjörðum var nú haldin í níunda sinn en hún hófst á föstudag með sjósundi en þar var keppt í 500 og 1500 m sundi. Keppendur voru 29 talsins og voru sigurvegarar þau Margrét J Magnúsdóttir í 1500 m og Jakob Daníelsson og Ingibjörg Kristjánsdóttir í 500 m. Hátíðin hélt svo áfram um kvöldið þegar Arnarneshlaupið hófst með 21,1 km hlaupi og svo 10 km hlaupi. Þar voru 111 kempur sem skiluðu sér í mark og voru sigurvegarar í 21,1 km hlaupinu Rúnar Sigurðsson og Ingibjörg Kristjánsdóttir. Í 10 km hlaupinu voru það þau Ólafur Austmann Þorbjörnsson og Sonja Sif Jóhannsdóttir sem stóðu uppi sem sigurvegarar.
Rjómablíða var á föstudaginn og skapaðist mikil og góð stemning á Silfurtorginu þegar keppendur komu í markið.
Hátíðin hélt svo áfram á laugardaginn en hún hófst á 55 km Vesturgötuhjólreiðum en þá hjóla keppendur frá Þingeyri, upp Kirkjubólsdal, yfir Álftamýrarheiði , út Arnarfjörð og inn Dýrafjörð að Þingeyri aftur. Keppnin í ár var einnig Íslandsmeistaramót í maraþonfjallahjólreiðum og voru það 137 keppendur sem lögðu af stað í þessa þrekraun.
Það var mikill endasprettur hjá körlunum sem endaði á því að Ingvar Ómarsson stóð uppi sem sigurvegari eftir harða keppni við Hafstein Ægir Geirsson. Sigurvegari í kvennaflokki var svo Hrönn Ólína Jörundsdóttir.
Á meðan að hjólreiðakeppnin var þá var skemmtidagskrá á Þingeyri fyrir fjölskylduna. Þar voru 8 km skemmtihjólreiðar og 2 og 4 km skemmtiskokk. Reynt var að sníða að yngri kynslóðinni og fengu allir glaðning þegar komið var í mark. Einnig var boðið upp á hópjóga sem var haldið í íþróttahúsinu á Þingeyri og var mikil þátttaka þar. Vöfflur voru bakaðar og eitthvað fyrir alla meðan beðið var eftir fulorðna fólkinu í hjólreiðunum.
Sunnudagurinn hófst svo með Vesturgötuhlaupi en keppendur í 45 km hlaupinu voru ræstir klukkan 8 frá Þingeyri. Þeir hlaupu svo sömu leið og hjólreiðamennirnir fóru á laugardeginum nema að markið var á Sveinseyri. Sigurvegarar voru Gunnar Atli Fríðuson og Sigrún Sigurðardóttir en Sigrún setti nýtt brautarmet hjá konum. 24 km hlaupið hófst kl 11 en það hlaup hefst í Stapadal. Þar voru sigurvegarar Valur Þór Kristjánsson og Ingveldur Hafdís Karlsdóttir. Sigurvegarar í 10 km hlaupinu voru þau Pétur Tryggvi Pétursson og Kristrún Guðnadóttir.
Veðrið í Vesturgötuhlaupinu var vægast sagt ekki spennandi, mikið rok og grenjandi rigning en keppendur létu það ekki á sig fá. Flestir voru drullugir upp fyrir haus og rennandi blautir. Einhverjir hefðu viljað vera með sundgleraugu en allir ánægðir að komast í mark og hlýja sér. Kaffi og kleinur og allskyns góðgæti biðu keppenda í markinu og gátu allir hlýjað sér í heitum rútum og tjaldi. Alger metþátttaka var í Vesturgötunni en alls kláruðu 211 hlauparar.
Hátíðin hefur reynt að halda henni vestfirskri og eru nánast öll verðlaunin héðan af svæðinu. Það voru kayakferðir frá Borea, Siglingar með Vesturferðum, föt frá Craftsport, gisting á Hótel Ísafirði, vettlingar og ullarpeysur frá Þingeyri, salt úr Reykjanesi, súkkulaði úr Súðavík, vestfirskar bækur, harðfiskur, mjólkurvörur frá Örnu í Bolungarvík og matur á Tjöruhúsinu. Einnig er fjöldinn allur af útdráttarvinningum frá fyrirtækjum hér í bænum og eru aðstandendur hátíðarinnar mjög þakklát fyrir þennan stuðning því annars væri ekki mögulegt að halda hátíð sem þessa. Samtals voru þátttakendur um 600 og margir tóku þátt í fleiri en einni grein.
Um helgina fór einnig fram þríþraut en þar syntu keppendur 500 m, hjóluðu 55 km og hlupu svo á sunnudeginum 24 km. Sigurvegarar þar voru þau Katrín Pálsdóttir og Stefán Guðmundsson
Frá fjallahjólreiðakeppninni 2017.
Frá Vesturgötuhjólreiðum 2017.
Fleiri myndir má skoða á facebooksíðu hátíðarinnar en það voru þeir Ágúst Atlason og Ásgeir Helgi Þrastarson sem mynduðu keppendur.
Á heimasíðu Reykhólahrepps kemur fram að umfangsmiklu viðhaldi á Grettislaug á Reykhólum er nú lokið og laugin opnaði aftur á föstudaginn var. Til stóð að bíða með viðhald laugarinnar fram á haust en þegar leki kom á þrýstikút í tækjarými hennar var ekki við ráðið og nú er búið að bæta þrýstikútinn sem lak og skipta út fjörgömlum mótorlokum sem stjórna hitastigi. Starfsmenn laugarinnar luku skyldubundnu skyndihjálparnámskeiði og sundprófi,
Laugin hefur nú verið hreinsuð og máluð og tilbúin til notkunar fyrir heimamenn og gesti.
Í október í fyrra samþykkti alþingi í þingsályktun að setja á stofn nefnd til undirbúnings aldarafmælis sjálfstæðis og fullveldis Íslands 2018. Nefndin hefur hún hafið störf og leitar eftir þátttöku almennings í hátíðardagskránni. Lögð er áhersla á samstarfsverkefni og verkefni með nýstárlega nálgun á viðfangsefnið segir í fréttatilkynningu frá nefndinni. Þar kemur sömuleiðis fram að auglýst verði eftir verkefnum í lok ágúst og þar eru eftirfarandi línur lagðar:
Minnast aldarafmælis sjálfstæðis og fullveldis Íslands og/eða hafa skírskotun til þess þáttar í sögu þjóðarinnar.
Fjalla um og/eða byggja á fullveldishugtakinu, hvort heldur er í fortíð, nútíð eða framtíð.
Hvetja til samstarfs.
Samstarf getur verið þvert á greinar, milli landsvæða, aldurshópa, þjóðfélagshópa, landa, ólíkra stofnana og félagasamtaka.
Höfða til barna og ungs fólks og eru til þess fallin að auka þekkingu og innsýn þeirra í söguna, samfélagið og fullveldishugtakið.
Höfða til fjölbreytts hóps fólks og hvetja til almennrar þátttöku.
Draga fram áhugaverða samlíkingu milli fortíðar og nútíðar í sögu lands og þjóðar, s.s. í menntun, heilbrigðismálum, náttúru, umhverfismálum, vísindum, stjórnmálum, atvinnuþróun, samgöngum og í daglegu lífi fólks.
Hafa nýstárlega nálgun á þjóðararfinn og/eða á viðfangsefnið.
Eru til þess fallin að vekja athygli á sérstöðu Íslands í samfélagi þjóðanna.
Nú er hægt að nálgast upplýsingar um hvaða efni er vinsælast í íslenskum bókasöfnum á vef Landskerfis bókasafna. Á vefsíðunni Vinsælustu titlarnir er m.a. hægt að draga út tölur um vinsælustu bækurnar, vinsælustu tímaritin, hvaða kennslubók er eftirsóttust í framhaldsskólum landsins og hvað háskólaborgararnir taka að láni. Einnig er hægt að skoða hvað unga fólkið okkar er að lesa og hvort munur sé á lestarmynstri höfuðborgarbúa og Austfirðinga.
Til þess að nálgast þessar upplýsingar og fleiri er farið inn á vefsíðuna Vinsælustu titlarnir á vef Landskerfis bókasafna velja það sem áhugi er á að skoða.
Upplýsingarnar á þessari vefsíðu byggja á upplýsingum um útlán úr bókasafnskerfinu Gegni.
Landskerfi bókasafna rekur tölvukerfi á sviði bóka-, lista- og minjasafna. Kerfin eiga það sammerkt að hafa umsjón með safnkosti og miðlun efnis til notenda. Gegnir er rekstrarkerfi fyrir flest bókasöfn landsins.
Fornminjafélag Súgandafjarðar hóf síðastliðið sumar byggingu á verbúð eins og þær voru á öldum áður við sjávarsíðuna þar sem sjómenn bjuggu þegar þeir voru í verinu. Í Staðardalnum var róið til fiskjar frá nokkrum verstöðvum: Stöðinni, Árósnum og Keravíkinni.
Núverandi verbúð er staðsett á sama stað og réttarskáli kvenfélagsins Ársólar stóð áður á svokölluðum Hreggnasa. Í næsta nágrenni má sjá tóftir af verbúðum og fleiri gamlar tóftir uppgötvuðust þegar drónamyndir voru teknar meðan á byggingu stóð. Verkefnið var unnið í góðu samstarfi við Minjastofnun sem m.a. tók út svæðið áður en framkvæmdir hófust til að tryggja að engum minjum yrði raskað.
Síðastliðið sumar voru veggirnir hlaðnir og í sumar var sett torfþak á verbúðina og gaflar og hurð smíðuð. Við hliðina á verbúðinni er sexæringur sem Fornminjafélag Súgandafjarðar fékk frá bátasafninu á Reykhólum og er hann um 80 ára gamall. Framundan er að mála bátinn og smíða bátaspil líkt og sjá mátti við Stöðina í næsta nágrenni. Til stendur að gera meira í kringum verbúðina til að líkja sem mest eftir umhverfi verbúðanna, m.a. aflraunasteinar og fiskigarðar. Inni í búðinni verður reynt að líkja eftir því sem var með svefnstæði ofl. Bekkur er staðsettur við hliðina á verbúðinni sem gerir hann að ákjósanlegum stað til að stoppa á og njóta útsýnisins.
Fjöldi félagsmanna og annarra velunnara kom að verkefninu og sýndi því mikinn velvilja. Allt var unnið í sjálfboðavinnu og það sem þurfti að kaupa var keypt með félagsgjöldum Fornminjafélagsins.
Verbúðin verður vígð á næstunni en hún hefur fengið nafnið Ársól eftir kvenfélaginu sem rak réttarskálann sem var á sama stað og búðin er byggð á.
Verbúðin er öllum opin og öllum velkomið að kíkja inn og lifa sig inn í þúsund ára sögu útræðis á þessum fallega stað í Súgandafirði.
Eins og undanfarin ár verða veittir styrkir úr Menningarsjóði vestfirskrar æsku til framhaldsnáms sem vestfirsk ungmenni geta ekki stundað í heimabyggð sinni. Að öðru jöfnu njóta þeir forgangs úr sjóðnum sem hafa misst foreldra og einstæðar mæður og konur meðan ekki er fullt launajafnrétti. Ef engar umsóknir eru frá Vestfjörðum koma umsóknir Vestfirðinga búsettum annarsstaðar til greina.
Félagssvæði Vestfirðingafélagsins er Ísafjarðarsýslur, Ísafjörður, Stranda- og Barðastrandasýslur.
Umsóknir skulu sendar fyrir lok júlí mánaðar 2017 til Menningarsjóðs vestfirskrar æsku c/o Haukur Hannibalsson, Digranesheiði 34, 200 Kópavogur og skal umsögn fylgja frá skólastjóra og/eða öðrum sem þekkja viðkomandi nemanda, efni hans og aðstæður. Netfang: haukurhannibalsson@simnet.is
Á síðasta ári voru veittir styrkir að upphæð 450þúsund til þriggja ungmenna frá Vestfjörðum.
Yngri flokkar körfuboltadeildar Vestra fengu góða heimsókn um helgina þegar Martin Hermannsson og Hildur Björg Kjartansdóttir sóttu Ísafjörð heim og sáu um æfingar gærdagsins hjá félaginu. Martin, sem er KR-ingur í húð og hár, er orðinn atvinnumaður í körfubolta og leikur með A-deildarliðinu Châlon-Reims í Frakklandi. Hildur er nýgengin til liðs við Breiðablik en hún spilaði í háskólaboltanum í Bandaríkjunum. Hún er úr Stykkishólmi og því uppalin í Snæfelli.
Þau Hildur og Martin eru á hringferð um landið í átaksverkefni Körfuknattleikssambands Íslands sem nefnist Körfuboltasumarið. Verkefnið er m.a. styrkt af FIBA Europe og miðar að því að hvetja unga iðkendur til dáða, kenna þeim markmiðasetningu og hvað þarf til að ná langt í íþróttinni.
Nánar má lesa um heimsókn þeirra Hildar og Martins á heimasíðu Vestra.
Það spáir smáskúrum í dag á Vestfjörðum en næstu daga ætti að vera hægt að hengja þvott til þerris. Hitastig gæti náð tveggja stafa tölu en það er þó ekki víst.
Búist er við stormi við suðvesturströndina og á hálendinu upp úr hádegi á morgun með hvössum vindhviðum við fjöll, sem geta verið varasöm farartækjum sem taka á sig mikinn vind. Einnig má gera ráð fyrir talsverðri rigningu sunnan- og vestanlands.
