Sigurður Ingi Jóhannsson, formaður Framsóknarflokksins, leggur til leiðir að sætta deilendur í fiskeldismálum. Þorri almennings á norðanverðum Vestfjörðum og allir sveitarstjórnarmenn með tölu hafa lýst yfir megnri óánægju með tillögur starfshóps um stefnumótun í fiskeldi þar sem lagt er til að farið verði eftir áliti Hafrannsóknastofnunar um að loka Ísafjarðardjúpi fyrir laxeldi. Í grein Sigurðar Inga í Morgunblaðinu í dag segir hann að það sé „sorglegt til þess að vita að starfshópurinn hafi ekki geta komið sér saman um að taka tillit til mótvægisaðgerða,“ þegar fjallað var um áhættu af slysasleppingum og erfðablöndun. Sigurður leggur tvennt til. Í fyrsta lagi að bestu mögulegu tækni verði beitt til að hindra för sleppifiska upp í ár og bendir hann á að íslenskt nýsköpunarfyrirtæki sé að þróa slíka tækni. Þá leggur hann einnig til að áhættumat Hafrannsóknastofnunar fái alþjóðlega rýni áður en það er lagt til grundvallar ákvarðanatöku í málinu.

Í greininni skrifar Sigurður Ingi:

„Það er sorglegt til þess að vita að ekki hafi verið gerð nein tilraun til þess að meta hin efnahags- og félagslegu áhrif af laxeldi í sjó, en á sama tíma er markmið skýrslunnar að hafa sjálfbæra þróun að leiðarljósi. Það er tómt mál að tala um sjálfbært fiskeldi og ná sátt um greinina án þess að meta alla þrjá þættina.“

smari@bb.is

Ísfirska fyrirtækið Kerecis tekur nú þátt rannsóknarmálþingi varnarmálaráðuneytis Bandaríkjanna (MHSRS). Á ráðstefnunni kynnti fyrirtækið niðurstöður tveggja stórra rannsókna sem fjármagnaðar eru af bandaríska hernum. Fyrirtækið kynnti niðurstöður brunasárarannsóknar þar sem að þau prófa vöruna sína á brunasárum sem ná niður í hold. „Niðurstöðurnar voru afskaplega jákvæðar og færa okkur nær því að selja bandaríska hernum sáraroð til notkunar á átakasvæðum. Steve Jeffery ofursti og brunalæknir í breska hernum kynnti niðurstöðurnar,“ segir Guðmundur Fertram Sigurjónsson, framkvæmdastjóri Kerecis, í tilkynningu frá fyrirtækinu. Kerecis kynnti einnig niðurstöður heilabastrannsóknar. Heilabast er þunnur vefur milli heila og höfuðkúpu.

Málþingið er samkomustaður herlækna og hjúkrunarfræðinga, vísindamanna varnarmálaráðuneytis Bandaríkjanna, háskólafólks og einkageirans til að skiptast á upplýsingum um rannsóknir og þróun á heilbrigðislausnum fyrir hermenn.

smari@bb.is

Haraldur Benediktsson, þingmaður Sjálfstæðisflokksins í Norðvesturkjördæmi, segir að Þorgerður Katrín Gunnarsdóttir landbúnaðarráðherra taki vanda sauðfjárbænda af mikilli léttúð. Þetta kemur fram í viðtali við Harald í blaðinu Vesturland. „Ástandið núna er mesta vá sem við höfum séð í sauðfjárrækt í langan tíma. Það sem hryggir mig mest er hvað menn hafa tekið þessu af mikilli léttúð, og sérstaklega landbúnaðarráðherra,“ segir Haraldur og bætir við: „En, að mæta þessu af svona léttúð sem mér hefur fundist ráðherrann gera, ber vott um fullkomið úrræðaleysi og áhugaleysi á að takast á við starfið sitt.“

Hann segir að það sé vitað að bændur fóru til ráðherra í mars/apríl með upplýsingar um hvert stefndi í sauðfjárbúskapnum. „Þeir báðu hana að beita sér fyrir því að sláturhúsin mættu vinna saman að því að flytja kjöt út á erlenda markaði. Þetta hefði orðið til þess að létta á birgðum. Þeir voru ekkert að biðja um neina eða verulega peninga þarna í upphafi. Það er heldur alls engin lausn í þessum málum að opna hirslur ríkisins og byrja að ausa út fé. Ráðherrann brást við þessu með því að segja við bændur að þeir skyldu spyrja Samkeppniseftirlitið. Það biður svo um upplýsingar sem bændur mega ekki safna. Svona sirkus er öll meðhöndlun á þessu máli búin að vera í allt sumar.“

Aðspurður hvernig hann vill glíma við vandann sem blasir við svarar Haraldur á þessa leið:

„Ég myndi vilja sjá núna að ráðherra lýsti því yfir að hún ætlaði að biðja Ríkisendurskoðun um að greina birgðir, magn þeirra og samsetningu. Greina efnahagsreikninga sláturhúsa og láta leggja mat á mögulegar hagræðingaraðgerðir.  Þá verður ráðherra að segja í fyrsta lagi: „Ég mun standa í því að hjálpa ykkur að leysa þennan birgðavanda þannig að hann verði orðinn ásættanlegur í upphafi næstu sláturvertíðar 2018.“ Þá verður ráðherra líka að segja: „Ef ég á að lýsa þessu yfir, að ég muni vilja vinna að lausn birgðamála eða koma birgðum í viðunandi horf fyrir 2018, þá verða sláturleyfishafarnir núna að hafa þor til að endurskoða þessa verðlista sem nú er búið að gefa út. Draga lækkanir að stóru hluta til baka.“

smari@bb.is

Nú líður að haustverkum og í september smala bændur fjöll og firnindi. Það eru bændur á Ströndum sem ríða á vaðið með réttum í Skeljavíkurrétt þann 8. september og síðasti auglýsti réttadagur er 1. október á Barðaströnd.

Lista yfir réttir á landinu má nálgast á vef Bændablaðsins en hér að neðan eru réttardagar Vestfjarða. Bændablaðið setur þó þann fyrirvara að náttúruöflin geta sett allt úr skorðum og svo geta villur slæðst með.

Skeljavíkurrétt í Steingrímsfirði, Strand. föstudaginn 8. sept. kl. 16.00

Eyrarrétt á Eyri í Kollafirði, Reykhólahrepp, A-Barð. laugardaginn 9. sept.

Staðarrétt í Steingrímsfirði, Strand. sunnudaginn 10. sept. kl. 14.00

Melarétt í Árneshreppi, Strand. laugardaginn 16. sept. kl. 16.00

Minni-Hlíð í Hlíðardal laugardaginn 16. sept. kl. 14.00

Syðridalsrétt í Bolungarvík laugardaginn 16. sept. kl. 14.00

Broddanes, Strand. sunnudaginn 17. sept. kl. 16.00

Kirkjubólsrétt í Steingrímsfirði, Strand. sunnudaginn 17. sept. kl. 14.00

Grundarrétt í Reykhólahreppi, A-Barð. föstudaginn 22. sept.

Arnardalsrétt í Arnardal í Skutulsfirði laugardaginn 23. sept.

Hjarðardalsrétt í Hjarðardal í Dýrafirði laugardaginn 23. sept.

Hraunsrétt við Hraun í Hnífsdal í Skutulsfirði laugardaginn 23. sept.

Kirkjubólsrétt við Kirkjuból í Engidal í Skutulsfirði laugardaginn 23. sept.

Kjósarrétt í Árneshreppi, Strand. laugardaginn 23. sept. kl. 14.00

Króksfjarðarnesrétt í Reykhólasv., A-Barð. laugardaginn 23. sept.

Skarðsrétt í Bjarnarfirði, Strand. laugardaginn 23. sept.

Traðarrétt við Tröð í Bjarnardal í Önundarfirði laugardaginn 23. sept.

Kinnarstaðarrétt í Reykhólahr., A-Barð. sunnudaginn 24. sept.

Innri-Múlarétt á Barðaströnd, V.-Barð. sunnudaginn 1. okt. kl. 14.00

bryndis@bb.is

Bæjarstjórn Vesturbyggðar skorar á Alþingi að beita lagasetningu nú þegar til að höggva á þann hnút sem staða vegalagningar um Vestfjarðaveg 60 er í, oftast nefnd vegagerð í Teigsskógi. Í ályktun bæjarstjórnar segir að það sé ekki samboðið nútímasamfélagi að standa í vegi fyrir uppbyggingu atvinnulífs í heilum landsfjórðungi.

Staða málsins í dag er að Reykhólahreppur þarf að koma nýjum veglínum inn á aðalskipulag, en breytingar á aðalskipulagi taka minnst sex mánuði. Við breytingarnar og útgáfu framkvæmdaleyfis þarf hreppurinn að taka afstöðu til álits Skipulagsstofnunar um vegalagningu í Teigsskógi, en í áliti stofnunarinnar á umhverfismatsskýrslu Vegagerðarinnar var lagst gegn framkvæmdum í Teigsskógi. Aðalskipulag tekur ekki gildi nema með samþykki Skipulagsstofnunar og ekki er hægt að veita framkvæmdaleyfi nema það sé í samræmi við skipulag.

smari@bb.is

Heldur færri Íslendingar voru ánægðir með sumarveðrið í ár á Íslandi heldur en síðasta sumar, eða 70%. Eins sögðust 86% Íslendinga ánægðir með sumarfríið sitt í könnun MMR sem er ekki mikil breyting frá árinu áður.

Síðasta sumar mældist ánægjan með sumarveðrið 94% og þá sögðust 89% Íslendinga vera ánægðir með sumarrfríið sitt.

Þegar ánægjan með sumarveðrið var skoðuð eftir landshlutum kom í ljós að íbúar á Norðvestur- og Vesturlandi voru ánægðastir með veðrið í sumar, eða 83,5%. Þar á eftir voru íbúar á Norðaustur- og Austurlandi, þar sem 82,6% íbúa voru ánægðir með sumarveðrið. 70,1% íbúa Reykjavíkur voru svo ánægðir með veðrið á Íslandi í sumar. Þeir sem voru síst ánægðir voru íbúar í nágrenni Reykjavíkur (64,4%) og Suðurlands (59,1%).

Þróun á afstöðu Íslendinga frá árinu 2010 til 2016 sýndi að ánægja með sumarveðrið var yfirburða mikil árin 2010 og 2016, þegar 95% (árið 2010) og 94% (árið 2016) sögðust vera ánægðir með veðrið það sumarið. Lægst var þó ánægjan árið 2013 en þá voru einungis 44% Íslendinga ánægðir með veðrið.

Þrátt fyrir mikla sveiflu í ánægju á sumarveðri á milli ára þá hefur ánægja fólks með sumarfríið sitt haldist nokkuð stöðug. Frá því að mælingar hófust árið 2010 hefur ánægja Íslendinga með sumarfríið sitt flöktað á bilinu 86% til 91%.

smari@bb.is

Þann 26. ágúst síðastliðinn voru liðin 40 ár frá því að samningur um stofnun Orkubús Vestfjarða var undirritaður í Gagnfræðaskólanum á Ísafirði en fyrirtækið tók svo til starfa um áramótin 1977 – 78. Þetta kemur fram í 34. tbl. Bæjarins besta árið 1997 en blaðið er nú aðgengilegt á vef bb.is.

Það var fleira skemmtilegt í fréttum í lok ágúst árið 1997, margt kunnuglegt og gæti verið sagt í dag. Umhverfisráðherra kynnir sér yfirstandandi framkvæmdir við ofanflóðavarnir og umræða um Vestfirði er neikvæðari en efni standa til segir í frétt um heimsókn fjárlaganefndar á Vestfirði. Samgöngumálinu voru þá sem nú Vestfirðingum hugleikin. Erfitt var að manna Grunnskóla Ísafjarðar og 30% kennara leiðbeinendur, nú eru 50% kennara í Grunnskóla Flateyrar án kennsluréttinda.

Í Framhaldsskóla Vestfjarða hefja 270 nemendur nám haustið 1997, í ár eru nemendur Menntaskólans á Ísafirði 254.

bryndis@bb.is

Samkvæmt nýrri skýrslu hagdeildar ASÍ um þróun á skattbyrði launafólks hefur skattbyrði aukist í öllum tekjuhópum á tímabilinu frá 1998-2016 en aukningin er langmest hjá þeim tekjulægstu. Þegar skoðað er samspil tekjuskatts, útsvars og persónuafsláttar auk barna- og vaxtabóta hefur t.d. skattbyrði para á lágmarkslaunum með tvö börn og lágmarks eigið fé í húsnæði (20%) í heildina aukist um 21 prósentustig á umræddu tímabili. Munurinn á skattbyrði tekjulægstu hópanna og þeirra tekjuhærri hefur því minnkað og dregið hefur úr tekjujöfnunarhlutverki skattkerfisins. Kaupmáttaraukning síðustu ára hefur þannig síður skilað sér til launafólks með lægri tekjur en þeirra tekjuhærri vegna vaxandi skattbyrði.

Þessa þróun rekur ASÍ einkum rekja til þess að:

• Persónuafsláttur hefur ekki fylgt launaþróun sem hefur aukið skattbyrði lægri launa mest.
• Stuðningur vaxtabótakerfisins hefur minnkað verulega á tímabilinu og fækkað í þeim hópi sem fær greiddar vaxtabætur vegna tekju og eignaskerðinga. Tekjulágt barnafólk með lágmarks eigið fé (20%) í húsnæði sínu fær í dag lítinn sem engan stuðning í gegnum vaxtabótakerfið.
• Íslenska barnabótakerfið er veikt og dregur eingöngu úr skattbyrði einstæðra foreldra og allra tekjulægstu para. Pör með börn sem hafa tekjur við neðri fjórðungsmörk fá nánast enga skattaívilnun vegna framfærslu barna og hafa því nánast sömu skattbyrði og þeir sem engin börn hafa á framfæri.
• Húsaleigubótakerfið hefur þróast með sama hætti og önnur tilfærslukerfi og því hefur dregið úr stuðningi við launafólk á leigumarkaði. Nýtt húsnæðisbótakerfi bætir nokkuð hag láglauna einstaklinga og einstæðra foreldra á leigumarkaði en láglauna pör fá eftir sem áður lítinn eða engan stuðning vegna leigukostnaðar.

smari@bb.is

Afla­verðmæti ís­lenskra skipa í maí­mánuði nam tæp­um 10,7 millj­örðum króna, eða 11,3% minna en í maí 2016. Þó var fiskafli skip­anna í mánuðinum 27% meiri en árið áður, eða tæp 138 þúsund tonn.

Þetta kem­ur fram í til­kynn­ingu frá Hag­stofu Íslands. Ljóst er að lægra fisk­verð veld­ur þess­um sam­drætti þegar rýnt er í töl­ur stof­unn­ar, en verðmæti þorskafl­ans nam tæp­um fimm millj­örðum og dróst sam­an um 0,9%, þrátt fyr­ir að magnið hafi auk­ist um 19,9%.

Sam­drátt­ur varð þá einnig í verðmæti annarra teg­unda. Verðmæti flat­fiskafla dróst sam­an um 23,4% og verðmæti upp­sjáv­ar­afla dróst sam­an um 24,8%.

Enn frem­ur nam verðmæti botn­fiskafl­ans rúm­um 8 millj­örðum, sem er 4,7% sam­drátt­ur miðað við maí 2016.

Á tólf mánaða tíma­bili frá júní 2016 til maí 2017 nam afla­verðmæti ís­lenskra skipa 114 millj­örðum króna, sem er 19,7% sam­drátt­ur miðað við sama tíma­bil ári fyrr, en þá var verðmætið rúm­ir 142 millj­arðar króna. Þarna mun­ar 28 millj­örðum króna.

smari@bb.is

Ísafjarðarhöfn hefur ekki látið gera mælingar á loftgæðum þegar stór skemmtiferðaskip eru í höfn á Ísafirði. Í gær var greint frá mælingum sem Náttúruverndarsamtök Íslands í samstarfi við þýsku náttúruverndarsamtökin NABU gerðu á Sundahöfn í Reykjavík í sumar. Loft­gæði í Sunda­höfn verða marg­falt verri en í miðborg­um er­lendra stór­borga á borð við London, þegar skip­in láta vél­ar sín­ar ganga við hafn­ar­bakk­ann. Dr. Axel Friedrich, sem hef­ur verið vís­inda­leg­ur ráðgjafi mæl­inga á meng­un frá skemmti­ferðaskip­um við Reykja­vík­ur­höfn, varar fólk sem glímir við heilsufarsvandamál við að fara á skemmtiferðaskip sem og að fara til staða sem skipin heimsækja.

Guðmundur M. Kristjánsson, hafnarstjóri Ísafjarðarbæjar, segir honum vitanlega hafi ekki verið gerðar mælingar á loftgæðum á Ísafirði í tengslum við komu skemmtiferðaskipa. Hann bendir á að nýjar reglur Alþjóðasiglingamálasamtakanna (IMO) taki gildi árið 2020. „Þar verða reglur um brennslu á svartolíu hertar og annað hvort þurfa menn að brenna hreinna eldsneyti eða setja upp hreinsibúnað í skipunum,“ segir Guðmundur.

smari@bb.is