Þorgerður Katrín Gunnarsdóttir landbúnaðarráðherra leggur til að fé verði fækkað um 20% og þeir bændur sem vilji hætta sauðfjárframleiðslu haldi 90% af greiðslum frá ríkinu í fimm ár. Þeir sem hætta á næsta ári fá 70% í þrjú ár. Tillögurnar eru hluti af aðgerðum til að draga úr framleiðslu kindakjöts. Greiðslur til hvers bónda miðist við greiðslumark, innlegg, fjárfjölda og aðrar forsendur fyrir greiðslum, eins og þær voru á viðkomandi búi að meðaltali árin 2016 og 2017 og geta bændur valið hvort þeir fái greitt í einu lagi eða með jöfnum greiðslum út samningstímann.

Þá eiga bændur sem fækka fé um að lágmarki 50 kindur í haust kost á greiðslu 4.000 kr. sláturálags.

Þeir framleiðendur sem gera samninga um að hætta á grundvelli ofangreinds skuldbinda sig til að taka ekki upp sauðfjárframleiðslu að nýju á gildistíma núverandi sauðfjársamnings.  Þeir sem gera samninga um fækkun skuldbinda sig til að auka ekki framleiðslu sína á gildistíma núverandi sauðfjársamnings.  Kvöðin verði bundin við framleiðanda og tengda aðila.

Til að mæta hlut af yfirvofandi kjaraskerðinu eiga þeir bændur sem ætla að halda áfram búskap kost á greiðslum sem miðast við fjölda kinda á vetrarfóðrum haustið 2016. Skilyrði fyrir þessum greiðslum verði m.a. að viðkomandi bóndi búi á lögbýli og hafi fleiri en 150 vetrarfóðraðar kindur. Tekið er fram að þetta verður einskiptisaðgerð.

Samkvæmt gildandi búvörusamningi er 99 milljónum kr varið í svæðisbundinn stuðning á árinu 2017 en sú fjárhæð hækkar í 145 milljónir kr. á næsta ári. Þessar greiðslur koma fyrst og fremst þeim bændum til góða sem eiga erfitt með að sækja atvinnu utan búsins vegna fjarlægðar frá þéttbýli. Til þessa verkefnis verði varið 150 milljónum kr. til viðbótar því fé sem áskilið er í samningnum.

smari@bb.is

Hreppsnefnd Árneshrepps auglýsir nú tillögu að breytingu á aðalskipulagi hreppsins og deiliskipulagstillögu vegna fyrirhugaðrar Hvalárvirkjunar. Í tillögunum felst meðal annars heimild fyrir starfsmannabúðum á framkvæmdasvæðinu, vegir um virkjunarsvæðið verði skilgreindir og efnistökusvæði verði skilgreind við Hvalárósa, í Hvalá og við Hvalárvatn. Frestur til að skila athugasemdum er til 16. október. Hvalárvirkjun er 55 MW virkjun sem Vesturverk ehf. á Ísafirði ætlar að reisa. Vesturverk er í eigu HS Orku og þriggja einstaklinga á Ísafirði.

Síðustu misseri hefur andstaða við Hvalárvirkjun farið vaxandi, en virkjunin hefur verið í nýtingarflokki rammaáætlunar Alþingis síðan 2013. Tómas Guðbjartsson skurðlæknir hefur verið fremstur í flokki andstæðinga virkjunarinnar og orð hans hafa á tíðum farið þvert í Vestfirðinga sem telja virkjunina vera mikið framfaramál fyrir fjórðunginn. Meðal heimamanna í Árneshreppi og hjá brottfluttum úr hreppnum er einnig fólk sem berst af krafti gegn virkjuninni. Á málþingi um virkjunina í sumar voru samtökin Rjúkandi stofnuð, en þau draga nafn sitt af á sem stendur til að virkja á Ófeigsfjarðarheiði. Samtökin ætla að berjast fyrir verndun umhverfis, náttúru og menningarminja í Árneshreppi.

smari@bb.is

Héraðsfundur Vestfjarðaprófastsdæmis andmælir hugmyndum biskupafundar um að leggja niður embætti sóknarprests á Reykhólum. Héraðsfundurinn var haldinn á Patreksfirði í gær. Í ályktun fundarins segir að niðurlagning embættisins muni rýra kirkjulega þjónustu í Reykhólaprestakalli. Einnig er minnt á að einungis rúmt ár er liðið síðan að skipaður var nýr sóknarprestur á Reykhólum og gert við hann haldsbréf. Embættið var auglýst með þeim skilmálum að til staðar væri íbúðarhæft húsnæði fyrir prestinn. Héraðsfundur væntir þess að í stjórn kirkjunnar séu menn orða sinna og standi við skuldbindingar sínar.

Ennfremur skorar héraðsfundur á kirkjustjórnina að framvegis verði tveir prestar í fullu starfi í Patreksfjarðarprestakalli.

Héraðsfundir væntir þess að biskupafundur svari þessari ályktun með formlegu bréfi eða fundi með heimamönnum.

smari@bb.is

Dómsmálaráðuneytið hefur auglýst laust til umsóknar embætti héraðsdómara á Vestfjörðum. Dómarinn mun hafa starfstöð við Héraðsdóm Vestfjarða en sinna störfum við alla héraðsdómstólana eftir ákvörðun dómstólaráðs og jafnframt vera dómstjóri í Héraðsdómi Vestfjarða.

Miðað er við að skipað verði í embætti dómarans hið fyrsta eftir að nefnd um hæfni dómara hefur lokið starfi sínu. Sigríður Elsa Kjartansdóttir lét af störfum sem dómstjóri við Héraðsdóm Vestfjarða um mánaðamótin. Þangað til nýr dómari verður skipaður dómstólaráð gengið frá því að fjórir héraðsdómarar muni tryggja áframhaldandi meðferð mála sem rekin eru fyrir Héraðsdómi Vestfjarða. Þau munu sjá til þess að reglulegt dómþing verði mannað fyrsta og þriðja miðvikudag hvers mánaðar. Dómararnir eru Jón Höskuldsson, Kristinn Halldórsson, Símon Sigvaldason og Sigríður Elsa Kjartansdóttir. Þau munu einnig sinna bakvöktum til skiptis.

smari@bb.is

Fiskeldi hefur þegar haft mikil áhrif á sunnanverðum Vestfjörðum, í sveitarfélögum sem áður höfðu háð þunga varnarbaráttu. Komi til aukins fiskeldis mun það leiða til verulegrar fólksfjölgunar í viðkomandi byggðum sem aftur kallar á afleiddar framkvæmdir s.s. íbúðabyggingar og til styrkingar innviða. Um þetta er fjallað í nýrri skýrslu þróunarsviðs Byggðastofnunar um byggðaleg áhrif fiskeldis. Í Tálknafjarðarhreppi byggja 16 fjölskyldur afkomu sína á fiskeldi, að því er segir í skýrslunni. Níu af þeim eru með samtals 19 börn á grunnskólaaldri en í leik- og grunnskóla Tálknafjarðar eru samtals 56 börn. Í Tálknafjarðarhreppi byggja 16 fjölskyldur afkomu sína á fiskeldi, að því er segir í skýrslunni. Níu af þeim eru með samtals 19 börn á grunnskólaaldri en í leik- og grunnskóla Tálknafjarðar eru samtals 56 börn. Í sveitarfélaginu er fyrirhugað að byggja upp hitaveitu sem lækka mun húshitunarkostnað á staðnum.

Fiskvinnsla Þórsbergs ehf. á Tálknafirði lokaði haustið 2015 og töpuðust við það yfir 40 störf. Hefði laxeldið ekki komið til væri staða sveitarfélagsins mun lakari en hún er. Í Vesturbyggð er atvinnustig nokkuð hátt og störfum hefur fjölgað mikið en í stærsta fiskeldisfyrirtækinu í Vesturbyggð starfa nú um 100 manns. Um er að ræða fjölbreytt störf, heilsársstörf bæði á sjó og í landi. Í skýrslunni er sérstaklega tekið fram að störfum háskólamenntaðra, kvenna og störfum millistjórnenda hefur fjölgað.

Í skýrslunni er rakið að Vestfirðir hafa búið við mikla fólksfækkun undanfarin ár og áratugi. Framundan eru miklar breytingar á norðan- og sunnanverðum Vestfjörðum, gangi áætlanir um um sjókvíaeldi eftir, og skýrsluhöfundar segja að í raun fari svæðin þá úr nokkuð samfelldu samdráttarferli í uppbyggingar- og þensluferli með umtalsverðri fjölgun íbúa, byggingu íbúðarhúsnæðis og annarri uppbyggingu sem fylgir fólksfjölgun og breyttri aldurssamsetningu. Hvar áhrifin verða mest ræðst að miklu leyti af því hvar helstu starfsstöðvar fyrirtækjanna verða. Í þessu ferli mun reyna mikið á stjórnsýslu og innviði sveitarfélaganna á svæðinu. Að mati skýrsluhöfunda er stærsta áskorunin á Vestfjörðum að útvega nægilegt íbúðarhúsnæði handa nýjum íbúum og halda uppi þjónustustigi.

smari@bb.is

Það er ekkert í málningarveður í kortunum í dag, það spáir norðaustan 3-8 og rigningu og 10-15 á annesjum, en yfirleitt 3-10 m/s á morgun. Rigning með köflum og hiti 7 til 13 stig.

Fyrir landið er spáin svona:

Suðaustan og austan 8-13 m/s en hægari vestlæg átt vestantil á morgun. Rigning með köflum eða skúrir en lengst af samfelld úrkoma SA-til . Hvessir heldur vestantil annað kvöld en dregur úr vindi um landið austanvert. Hiti yfirleitt 10 til 15 stig en heldur svalara á morgun.

bryndis@bb.is

Horfur Vestra í 2. deild Íslandsmótsins í knattspyrnu vænkuðust ekki um helgina. Á laugardag átti liðið fyrir höndum erfiðan útileik gegn Njarðvíkingum sem sitja í toppsæti deildarinnar. Eftir stundafjórðungs leik voru Suðurnesjamennirnir komnir með tveggja marka forystu og skoraði Kenneth Hogg bæði mörkin. Birkir Freyr Sigurðsson kom Njarðvík í 3-0 í upphafi seinni hálfleiks, en stuttu síðar minnkaði Pétur Bjarnason muninn. Eftir það voru fleiri mörk ekki skoruð og lokatölur 3-1 fyrir Njarðvík.

Eftir leikinn er Vestri með í 8. sæti deildarinnar með 21 stig, sama stigafjölda og KV, Höttur og Fjarðabyggð. Liðin fjögur berjast um að halda sér frá fallinu, en lið Sindra er þegar fallið í 3. deild.

Síðustu þrír leikir Vestra eru:

Heimaleikur gegn Aftureldingu laugardaginn 9. september.

Útileikur gegn Magna laugardaginn 16. september.

Heimaleikur gegn Hetti laugardaginn 23. september.

smari@bb.is

Á angling.is má nú sjá veiðitölur í aflahæstu ám sumarsins og þar trónir Ytri-Rangá og Hólsá á toppnum með 4.582 laxa á land en þar er stangafjöldi á dag 18 stangir en um Ytri Rangá segir á þessum sama vef:

„Í Ytri Ranga eru skilyrði fyrir sjálfbæran laxastofn, en mjög fáliðaðan og bundinn við svæðið hjá Rangárflúðum. Talið var gott ef þar fengust 50 laxar yfir sumarið. Nú hefur þetta gjörbreyst eftir að farið var að sleppa miklu af gönguseiðum í árnar upp úr 1990. Best var veiðin 2008, en þá fengust 14.315 laxar í Ytri Rangá. Það er langmesti afli, sem vitað er til að veiðst hafi á stöng í einni á hérlendis til þessa.“

Miðfjarðará er önnur aflahæst með 2.937 laxa og 10 stangir á dag en í þriðja sæti er Þverá + Kjarará með 1.890 laxa og 14 stangir. Á hælana á Miðfjarðará er Eystri-Rangá með 1.773 laxa á 18 stöngum. Ekki er um sjálfbæran laxastofn að ræða í Eystri Rangá en með sleppingum sjógöngseiða hefur þó tekist að ná upp góðum laxagöngum.

Laugardalsá hefur gefið 144 laxa á land.  En um Laugardalsá segir á vef angling.is „Þarna er eitt besta dæmið um vel heppnaða fiskrækt hérlendis, en áin var fisklaus allt til að fiskvegur var sprengdur í Einarsfoss. Meðalveiði er 315 fiskar á ári 1974 til 2008, minnst 111 laxar 1996, en mest 703 laxar 1978. Auk laxveiðinnar má fá staðbundinn urriða og bleikju í vötnunum.“

bryndis@bb.is

Okkar eigin einleikari Elfar Logi Hannesson lauk í vikunni fjármögnun á útgáfu á einstakri bók um einleikjasögu Íslands. Í dag fékk hann svo í hús nokkra kassa af bókinni og stendur nú yfir dreifing á henni í verslanir og afgreiðsla á fyrirframpöntunum.

Á vef Kómedíuleikhússins segir að Einleikjasaga Íslands sé sannarlega einstök bók sem á enga sína líka. Bókin er prýdd fjölda einstakra mynda af einleikurum þjóðarinnar auk þess er þar að finna skrá yfir alla einleiki er settir hafa verið á senu í hinu íslenska atvinnuleikhúsi. Það er ekki heldur á hverjum degi sem íslenskar leikhúsbókmenntir komast á prent. Þessi útgáfa var eins og svo margt annað í listinni heljarinnar langhlaup.

Þeir sem ekki ætla á gamanmyndhátíð á Flateyri, taka ekki þátt í þríþraut Craft og fara ekki að hjóla með Ferðafélagi Ísfirðinga, geta sest niður með kaffibolla og lesið allt um einleiki á Íslandi alla helgina.

bryndis@bb.is