Kristján Einarsson Lionsmaðurinn á Flateyri hefur undanfarið grúskað í gömlum skjölum Lionsfélags Önundarfjarðar og þar kemur ýmisleg spaugilegt í ljós. Til dæmis bréf sem Emil Hjartarson skrifar Austurbakka hf og er ætlað sannfæra „tollheimtumenn í fjármálaráðuneytinu um að Lionsmenn eru ekki að kaupa apparatið til að leika sér með á fundum þegar lítið er að gera“. Tilefnið er að Lionsfélagið hafði fjárfest í hjartarafrita handa heilsugæslustöðinni á Flateyri.
Í bréfinu segir ennfremur „bréfið vélrituðum við „sveitó“ (þ.e. sveitarstjórinn) á splunkunýja ritvél sveitarstjóraembættisins, sem við kunnum hvorugir á.“
Það er líka fullyrt að héraðslæknirinn hafi í votta viðurvist og með fullri rænu og viti og ótilneyddur líst því yfir að hann muni nota tæki til rannsókna á sjúklingum. Í þokkabót hafi valinkunnir menn lýst því yfir við bréfritara og „sveitó“ að þeir muni leyfa læknisfræðilega athuganir á þeim, líka knattspyrnumenn og hundaeigendur !
Þess má geta að umræddur „sveitó“ mun vera þáverandi sveitarstjóri Flateyrarhrepps Kristján Jóhannesson en hann lést 3. október 2006. Emil Hjartarson var skólastjóri á Flateyri.
Árbók Ferðafélags Íslands árið 2017 er tileinkuð Ísafjarðardjúpi, frá Skálavík að Vébjarnardjúpi og höfundur hennar er dr. Ólína Kjerúlf Þorvarðardóttir. Ferðafélag Íslands efnir nú til ferðar fyrir eldri og heldra borgara og mun langferðabifreið að sunnan hafa rennt í hlað seinnipartinn í gær með fróðleiksfúsa um sögusvið árbókarinnar.
Í gærkvöldi gengu höfundur bókarinnar og leiðsögumaður hópsins um Ísafjarðarbæ og segja sögu bæjarins sem hér á árum áður var annar fjölmennasti kaupstaður landsins og á laugardag gengur hópurinn um Óshlíðina til Bolungarvíkur.
Ferðafélag Íslands gaf út sína fyrstu árbók árið 1928. Árbókin hefur síðan komið út árlega í óslitinni röð og er einstæður bókaflokkur um land og náttúru. Hver bók fjallar venjulega um tiltekið afmarkað svæði á landinu og nær efni þeirra nú um landið allt, víða í annað eða jafnvel þriðja sinn.
Kjaradómur hækkar laun æðstu embættismanna þjóðarinnar um 8,5% segir í 20 ára gömlu Bæjarins besta sem nú er aðgengilegt á vef bb.is. Þetta er frétt sem gæti verið skrifuð í dag nema hvað núna eru prósenturnar talsvert hærri. Það var helst í fréttum í 29. tölublaði Bæjarins besta árið 1997 að ákvörðun hafði verið tekin um að sameina Þorbjörn hf í Grindavík og Bakka hf. Í Bolungarvík og þótti rétt að taka fram að skip Bakka hf voru máluð í litum Bakka hf. Í leiðara blaðsins kemur fram að eigendur Bakka munu eiga 29% af sameinuðu félagi og að höfuðstöðvar nýs félags verði í Grindavík.
Naglinn ehf var fengin til að stækka flugstöðvarbygginguna og Einar Snorri ráðinn markaðsráðgjafi hjá Atvinnuþróunarfélagi Vestfjarða. Og veiðin var dauf í ám við Ísafjarðardjúp, aðeins 50 laxar komnir á land og þetta var fyrir „veiða/sleppa“ hugmyndafræðina. Sæluhelgin var á sínum stað með 101 „krakka“ í Mansakeppninni.
Hálfsíða af fasteignaauglýsingum og á Seljalandsveg 48 eru settar tæpar 13 milljónir. Einar K. er með aðsenda grein og Gula bókin fattar ekki að búið er að sameina sex sveitarfélög á norðarverðum Vestfjörðum.
Viðtalið er við sýslumanninn Ólaf Helga Kjartansson og Snerpa býður Fritz samnetskort á aðeins 12.900 kr.
Gilsfjarðarbrú er í byggingu og skemmtiferðarskipið Queen Elizabeth II hafði klukkustundar viðdvöl í Ísafjarðardjúpi. En erfiðlega gengur að manna kennarastöður á Vestfjörðum og er það næstum það eina sem hefur breyst í fréttum þessi tuttugu ár.
Helgina 28. – 30. júlí verður haldin Náttúrbarnahátíð á Ströndum og ef vitnað er í hátíðarhaldara þá eiga allir að vita að Strandamenn er náttúrubörn sem í gegnum ár og aldir hafa glímt við náttúruöflin og lært að lifa með þeim. Þeir heyra grasið gróa og snjóinn snjóa og vita hvað það þýðir þegar hrafninn klöktir til beggja átta á bæjarhlaðinu. Á Náttúrubarnahátíð fá gestir á öllum aldri, bæði börn og fullorðnir, tækifæri til að finna og rækta sitt innra náttúrubarn.
Náttúrubarnaskólinn stendur fyrir hátíðinni og þjóðfræðingurinn Dagrún Ósk Jónsdóttir hefur starfsheitið yfirnáttúrubarn. Þessi menningarstofnun hefur verið starfrækt síðan sumarið 2015 og heldur námskeið og skemmtanir og stendur fyrir allskonar útivist. Náttúrubarnaskólinn er starfræktur innan vébanda Sauðfjárseturs á Ströndum, í félagsheimilinu Sævangi sunnan við Hólmavík, og þar verður hátíðin haldin.
Markmið hátíðarinnar eru fyrst og fremst að hafa gaman, flétta saman fróðleik og fjöri. Ætlunin er að sýna fram á hvað allir skapaðir hlutir í okkar nánasta umhverfi eru í raun og veru merkilegir. Hvernig vernda má náttúruna og sýna henni virðingu, en jafnframt nýta náttúrugæði á sjálfbæran, skapandi og skemmtilegan hátt.
Hátíðin hefst á föstudegi á gönguferð og síðan veðurgaldri við veðurupplifunarstöð sem á að tryggja gott veður alla helgina á Ströndum. Veðurgaldurinn hefur, að sögn hátíðarhaldara, margsannað ágæti sitt í Náttúrubarnaskólanum, en ef hann bregst algjörlega verður alltaf hægt að flýja inn í Sævang með flesta dagskrárliði, nema kannski með útieldun og fjallgöngur.
Eftir það mun hljómsveitin Ylja halda tónleika og svo verður vöffluhlaðborð og Náttúrubarnakviss, skemmtilegur spurningaleikur fyrir alla fjölskylduna. Um helgina verður svo m.a. hægt að taka þátt í náttúrujóga, fjallgöngu og sjósundi. Þá verða smiðjur fyrir börn um útieldun og tónlist í náttúrunni, einnig verður hægt að læra jurtalitun, að vinna úr ull og rekaviði, ásamt fróðleik um hvað við getum lagt af mörkum til að vernda náttúruna.
Svavar Knútur verður svo með tónleika á laugardeginum, myndlistarsýningin Hlýnun eftir Ynju art verður á svæðinu, Ingó Geirdal sýnir töfrabrögð, sagðar verða drauga- og tröllasögur í gömlu sagnahúsi, sirkusfólk úr Melodic Objeccts sýnir listir sínar, hægt verður að fara á hestbak, heimsækja plastdýragarð og margt fleira.
Gestavinnustofur ArtsIceland á Ísafirði bjóða til listamannaspjalls í menningarmiðstöðinni Edinborg, föstudaginn 21.júlí. Þar munu þrír listamenn sem nú dvelja í hinum alþjóðlegu vinnustofum segja frá verkum sínum. Það eru þau SHIH YU CHU sem upprunalega kemur frá Taiwan og vinnur að kvikmyndagerð og hugmyndafræðilegri list, ástralska myndlistarkonan Lorna MacRithcie sem notast við fjölbreytta miðla og Han Sungpil sem er frá Suður-Kóreu og hefur ljósmyndað minjar um hvalveiðistöðvar og kolanámur, bæði á Suður- og Norðurheimskautinu.
Listamannaspjallið verður í Bryggjusal og hefst klukkan 17.
SHIH YU CHU er frá Taiwan en er búsettur í Chicago. Hann gerir heimildarmyndir og vinnur hugmyndafræðileg verk (concept art). Hann byrjaði sem kvikmyndagerðarmaður og listrænn stjórnandi í sjónvarpsþáttagerð. Hann hefur unnið sem leikstjóri, kvikmyndatökumaður og við klippivinnslu og unnið til verðlauna fyrir stafræna kvikmyndagerð. SHIH YU hefur lært og numið frá Indónesíu til Suður-Ameríku, New York til Tokyo. Við listsköpun sína hefur hann mestmegnis beint sjónum að snertiflötum mennskunnar í nútíma samfélagi við kapítalisma.
Um þessar mundir er SHIH YU einnig virkur á samfélagsmiðlum þar sem hann býr til skondin myndbönd sem hann birtir á Instagram síðu sinni iouoy56489. Hann starfar einnig sem Butoh dansari og vinnur að auglýsingagerð til uppgripa.
Verkið sem SHIH YU hefur unnið að á Ísafirði er Wave. Westfjords. Þar fjallar hann um staðinn sem ferðamenn sækja og skilja við. Verkið er myndbandsinnsetning sem sýnir nálgun listamannsins við landið, Ísland, og samskipti hans við samfélagið. Heimsóknir, myndataka og áframsending myndanna aftur til baka er helsta ferlið að baki verkinu. Með þessu móti hámarkar listamaðurinn meðvitund sína um landið, lífsstílinn, aðstæðurnar og samfélagið. Verkið kemur með nýja sýn á hvernig fólk neytir menningar í dag, jafnframt því sem það spyr: Hvernig getum við sneitt hjá markaðshyggju sem listamenn eða manneskjur yfir höfuð, þegar samfélög reiða sig meir og meir á ferðaþjónustu.
Kyrrmyndir úr myndabandsverki SHIH YU CHU Wave.
Lorna MacRitchie er frá Sydney í Ástralíu. Hún er fædd á Englandi og er um þessar mundir búsett í London þar sem hún hyggur á frekara nám í myndlist í haust við Central Saint Martins. Hún er myndlistarkona með bakkalárgráðu frá UNSW Art and Design í Sydney og vinnur með listmálun, skúlptúra, textíl, teikningu, keramik og innsetningar. Hún lagði einnig stund á myndlistarnám við Háskólann í Conneticut undir handleiðslu prentmeistarans Laurie Sloan. Lorna er hugmyndaríkur myndasmiður, hún hefur sett upp tímarit og starfað sem grafíklistamaður, meðal annars fyrir fjölmiðlafyrirtækið Cicada Press í Sydney.
Verkið sem Lorna MacRitchie vinnur að um þessar mundir er Taster II, sem er í senn hversdagslegt og fullt af leikgleði. Það kemur inn á líkamlegar langanir og ferlið að bíða og undirbúa. Þar er könnuð umbreytingin frá stúlku í konu og komið inn á þrá, heimilishald, nánd og skömm í gegnum endurtekna og yfirþyrmandi nálægð hundruða bleikra, mjúkra kubba.
Han Sungpil er frá Seoul í Suður-Kóreu. Hann lagði stund á nám í myndlist í heimalandinu með áherslu á ljósmyndun. Einnig hefur hann meistaragráðu frá Kingston háskóla í London þar sem hann sérhæfði sig í listrænni stjórnun fyrir nútímahönnun. Sungpil hefur haldið fjölda einka- og samsýninga víða um heim. Hann starfar sem myndlistamaður og leggur mesta áherslu á notkun ljósmynda, myndbanda og innsetninga. Í verkum sínum kemur hann inn á umhverfismál, sögulega atburði og uppruna fjölbreyttra menningarafkima heimsins. Hann notast við fræðilegar rannsóknir, safnar heimildum um grunnþemu náttúrunnar, umhverfis og orkumál, allt frá eyðingu frumskóga í Indónesíu til kolanámuvinnslu á Norðurheimskautinu.
Verkið sem hann vinnur að núna heitir Intervention. Þar er sjónum beint að málefnum tengdum náttúrunni eins og nálægð orkuframleiðslu og áhrif manna á náttúruna. Han Sungpil hefur ferðast um bæði Norður- og Suðurheimskautið í leit að minjum um kolanámur og hvalveiðistöðvar. Ljósmyndirnar af því sýna á listrænan og gagnrýnin hátt frá stórkostlegri náttúru og hvernig hún er þjóðnýtt af mönnunum. Í dvöl sinni í listavinnustofu ArtsIceland hefur Sungpil haldið áfram vinnu sinni við þetta verkefni og hefur hann myndað og tekið myndbönd af minjum hvalveiðistöðva á Vestfjörðum sem eru fulltrúar sögunnar og geyma minni atvinnuhvalveiða hér við land.
Ein af myndum Han Sungpil, Deception island.
Listamannaspjallið verður í Bryggjusal og hefst klukkan 17. Það fer fram á ensku og eru allir velkomnir.
Eitt af því sem gjarnan er útundan hjá bæjarfélögum er viðhald gangstétta og svo sannarlega er þörf á að lagfæra margar gangstéttir í byggðakjörnum Ísafjarðarbæjar. Hafnarstrætið á Ísafirði er engin undantekning í þeim efnum og þar þarf margt að laga. Verktaki hefur nú nýlokið við að leggja nýjar hellur frá horni Mánagötu að gamla Húsamiðjuhúsinu og árangurinn glæsilegur eins og sjá má á meðfylgjandi mynd. Smátt og smátt þarf svo að lagfæra allar gangstéttir, brotnar og illa farnar stéttir eru slysavaldar fyrir gangandi vegfarendur.
Sólbjört Gunnarsdóttir var spennt fyrir þessu nýja dóti.
Bolvíkingar hafa nú fjárfest í því stórskemmtilega leikfangi sem ærslabelgur er. Vígsluhátíð belgsins var á þriðjudaginn var og þrátt fyrir hellirigningu mættu bæjarbúar vel á athöfnina og mikil gleði þegar fyrsti hópurinn var ræstur í hopp. Ærslabelgurinn er staðsettur neðst á Höfðastígnum hjá Tónlistarskólanum, stutt er að skreppa í sund í Musteri vatns og vellíðunar og til stendur að opna inn á leikvöllinn sem er við hliðina. Að sögn Jóns Páls Hreinssonar bæjarstjóra verða líka settir upp bekkir svo þreyttar fætur foreldra sem ekki endast eins lengi við hoppið geti hvílt lúin bein.
Hér má sjá facebook myndband sem Baldur Smári Einarsson tók þegar talið var í og glöggt má sjá gleðina. Sá hávaxni er þó allra glaðastur, jafnvel þrátt fyrir glæsilega magalendingu á blautum belgnum (ærslabelgnum).
Suðureyri þrifin á Act alone 2013. Mynd: Ágúst Atlason
Nú hefur Elfar Logi og hans samstarfsfólk birt dagskrá einleikjahátíðarinnar á Suðureyri Act alone. Sem fyrr er dagskráin fjölbreytt og skemmtileg og flestir ættu að finna eitthvað við sitt hæfi.
Það er Fjallkonan sem ríður vaðið fimmtudagskvöldið 10. ágúst en það er einleikur Heru Fjord sem gerir lífi langalangömmu sinnar Kristínar Dahlstedt skil en hún fæddist í Botni í Dýrafirði. Strax í kjölfarið stígur Gísli á Uppsölum á stokk en Elfar Logi hefur gert garðinn frægan víða um land á liðnu ári með þessum frábæra einleik. Kvöldinu lokar svo Eyrún Ósk Jónsdóttir með ljóðalestri á Sumarróló, viðburðinn kallar hún Góðfúslegt leyfi til sígarettukaupa.
Dýrðin hefst svo aftur á föstudegi kl. 19:30 með Hún pabbi sem Hannes Óli Ágústsson hefur samið og sett á svið um reynslu sína af því að eiga pabba sem breyttist skyndilega úr Ágústi Már í Önnu Margréti. Í kjölfar hennar pabba stígur ekki síðri kjarnakona á svið þar sem Þórunn Erna Clausen gerir Ferðasögu Guðríðar skil. Áfram eiga konur sviðið því kl. 22:30 flytur Ólöf Arnalds Einstaka tónleika. Það er svo Þorsteinn Guðmundsson sem ætlar kitla hláturtaugarnar fyrir svefninn með því að leika sjálfan sig.
Að venju hefst dagskrá Act alone á laugardeginum kl. 13:00 með dagskrá fyrir börnin er Íslenski fíllinn mætir með aðstoð sögumannsins Hildar M. Jónsdóttur. Þegar Íslenski fíllinn yfirgefur Suðureyri hefst götusprellið Basketball Jones en því er lýst svona í dagskrá: „sameinar freestyle körfubolta hæfileika, hefðbundnar sirkuslistir og gamanleik“. Áfram verður veisla fyrir yngri kynslóðina því Búkolla mætir upp úr klukkan 15:00 og það er Greta Clough sem túlkar hana í brúðugervi og jafnframt mun hún kenna brúðugerð. Klukkan 16:00 hefst svo sýning sem kallast Útvarps einleikir í heimahúsum þar er um að ræða þrjá einleiki: Ausa Steinberg, Djúpið og Kvöldstund með Ódó. Það er svo ekki minni maður en hann Ove sem stígur á stokk kl. 19:00 og það Sigurður Sigurjónsson sem ætlar að túlka þennan sérstaka ljúfling. Kristín Eiríksdóttir tekur við af Sigurjóni og flytur ljóð úr ljóðabókinni Kok. Eyjólfur Kristjánsson tekur í gítarinn kl. 22:30 en kvöldinu lokar una Björg Bjarnadóttir með Einstakri danssýningu.
Þetta er fjórtánda árið sem í röð sem Act alone er haldið á Suðureyri og rétt að taka fram að það er ókeypis á allar sýningar. Nálgast má allar upplýsingar um hátíðina á vefsíðu hennar.
Hér eru nokkrar myndir frá fyrri hátíðum.
Suðureyri þrifin á Act alone 2013. Mynd: Ágúst Atlason
Pistill dagsins á vedur.is fyrir Vestfirði er hægviðri og úrkomulítið, en fer að rigna í kvöld. Styttir upp á morgun. Hiti 10 til 15 stig. En þeir sem vilja komast í alvöru sumarveður skulu leggja strax af stað norður, þar verður bongóblíða í dag og svo áfram austur og ná blíðviðrinu þar á morgun. Ef spár ganga eftir er stuttbuxnaveður á norðausturlandi um helgina.
Nú líður að lokum landssöfnunarinnar Vinátta í verki, komnar eru um 40 milljónir í kassann og að sögn aðstandenda stendur söfnunin út næstu viku. Á vefsíðu söfnunarinnar er íslandskort þar sem sjá má hvaða sveitarfélög hafa lagt sitt að mörkum og nú er landið orðið fagurrautt. Örfá sveitarfélög hafa ekki svarað kallinu en hafa ennþá tækifæri til að bregðast við.
Landssöfnunin Vinátta í verki hófst mánudaginn 19. júní þegar fréttist af hamförunum á Grænlandi er flóðbylgja gekk yfir smáþorpið Naarsuuriaq. Fjórir fórust og mikið eignatjón var. Íslendingum rennum blóðið til skyldunnar því þegar yfir okkur hafa dunið náttúruhamfarir hafa grannar okkar brugðist vel við. Mörgum er í fersku minni þegar Jónathan Motzfeld sem þá var fulltrúi á grænlenska Landsþinginu afhenti rausnarlega peningagjöf í mars 1996 með þeirri ósk að þeir yrðu nýttir í þágu barna á Flateyri.
Enn má hringja í 907 2003 og leggja 2.500 í söfnunina eða leggja inn á reikning Hjálparstarfs kirkjunnar 0334-26-056200, knt. 450670-0499
