Veðurgvuðinn ætlar heldur betur að haga sér þessa vikuna og þeir sem öllu ráða á Veðurstofunni segja að hitinn á Vestfjörðum geti farið upp í 20 stig. Ekki sést rigning í kortunum svo langt sem augað eygir út vikuna heldur einungis logn og blíða, með sárt saknaðri sumarsól.

bryndis@bb.is

Halla Signý Kristjánsdóttir skrifstofu- og fjármálastjóri Bolungarvíkurkaupstaðar sendir Tómasi Guðbjartssyni eftirfarandi áskorun á facebook síðu sinni:

Ég skora á Tómas að taka slaginn með okkur og hjá okkur.
Ekki bara á sumrin heldur árið um kring,.
Okkur Vestfirðinga vantar skurðlækni, okkur vantar líka öfluga menn til að starfa í samfélaginu, taka þátt í því og berjast fyrir það í stóru og smáu.

Hér fengi hann að lifa með náttúrunni , njóta hennar og lúta henni líka .

Það gerum við vestfirðingar allt árið ekki bara í sumarfríum.
TÓMAS

Hvaða landssvæði á Íslandi stendur fremst hvað varðar ósnortið landssvæði? Svari hver fyrir sig?

Tómas taktu slaginn, ég skora á þig,

Mýrarboltalið Kerecis hefur gengið frá leikmannakaupum fyrir komandi leiktíð. Um er að ræða leikmenn frá Herði, KR, Breiðabliki og FC Kareoki. Frá Herði koma Tómas Emil Guðmundsson Hansen, Axel Sveinsson, Sigurður Hannesson and Haraldur Hannesson. Frá KR Helgi Magnússon, frá Breiðabliki Guðrún Sóley Gunnarsdóttir og frá FC Kareoki Pétur Magnússon. Helgi og Guðrún eiga að baki áralangan feril í íslenska landsliðinu og mun Helgi leika á miðju og Guðrún sem framherji í liði Kerecis.

“Lið okkar er ótrúlega sterkt og býr að mikilli leikreynslu“ segir fyrirliði liðs Kerecis, Atli Þór Jakobsson og bætir við „Ég vona að þetta sterka lið okkar komi ekki í veg fyrir að lið 3X og Buddubananna mæti til leiks“.

Lið Kerecis undirbýr nú þátttöku í Evrópumótinu í Mýrarbolta sem fram fer á stór-Ísafjarðarsvæðinu um verslunarmannahelgina.

„Dómgæsla á Evrópumótinu hefur verið afburðarléleg undanfarin ár og hafa óréttmætir dómar írekað komið í veg fyrir sigur okkar. Við teljum því best að við dæmum sjálf í okkar eigin leikum og erum í viðræðum við mótsstjórn um þessa sanngjörnu kröfu.“ segir liðsstjóri liðs Kerecis Dóra Hlín Gísladóttir

bryndis@bb.is

Eftir glæsilega frammistöðu íslenska landsliðsins á móti frökkum er kominn tími á undirbúning fyrir næsta leik. Það er Sviss sem við viljum að lúti í gras á morgun kl. 16:00 og liðið okkar komist í betri stöðu í riðlinum.

Þingeyrarakademín hefur löngum haft skoðanir á landsins gagni og nauðsynjum og eftir hið umdeilda víti sem dæmt var á Ísland í frakkaleiknum var kallað til neyðarfundar í akademíunni og eftirfarandi ályktun hefur verið send fjölmiðlum:

Þingeyrarakademían sendir íslenska kvennalandsliðinu í knattspyrnu sérstakar baráttukveðjur að vestan. Jafnframt lýsir hún aðdáun sinni á þeirri fallegu framkomu, baráttuhug og leikgleði sem kom glöggt fram í leiknum við Frakka.

    Akademían telur að ítalska konan hafi ekki haft neinar forsendur til að dæma stroffí í lok leiks. Það sá enginn neitt brot. Sú franska lét sig bara detta. Það sáu allir. Þetta var ekki einu sinni fríspark!

   Svo sleppti sú gamla stroffíinu í fyrri hálfleik sem íslensku kjarnorkustelpurnar áttu greinilega að fá, að dómi allra spekinga hér fyrir vestan. En það þýðir ekkert að röfla við dómarann. Hann dæmir og ræður.

   En þetta stendur allt til bóta. Spámaður akademíunnar hefur gefið það út að að Ísland muni sigra Frakkland í undanúrslitum 2-1. Þangað munum við nefnilega komast segir í spádómnum. Það getur allt skeð. Trúum á stelpurnar okkar, en heimtum ekki neitt.

bryndis@bb.is

Ísafjarðarbær hefur nú auglýst eftir athugasemdum við breytingar á deiliskipulagi á Torfnesi og frestur til að skila athugasemdum er til 1. september.

Deiliskipulagsbreytingin felur í sér að að hluti núverandi gervigrasvallar verði felldur út og þar verði byggingarreitur fyrir fjölnotahús. Hæsta brún mænis skal ekki vera hærri en 13.75 m yfir hæð núverandi grasvallar og hámarkshæð útveggja á langhlið 6m. Flatarmál húss skal vera að hámarki 3.200 fermetrar. Hönnun byggingarinnar skal miðast við að viðhalda heildaryfirbragði bygginganna á Torfnesi, með dökkrauðu þaki og þykkum þakkanti.

bryndis@bb.is

Viðskiptavinir Orkubús Vestfjarða geta nú hlaðið smáforriti eða appi inn á snjallsímana sína og fengið þar allar upplýsingar um skipulögð eða fyrirvaralaus straumrof. Oft er það óþægilegt þegar rafmagnið fer að vita ekki hvort búast má við löngu rafmagnsleysi og talsvert fljótlegra að renna yfir appið í símanum til að finna upplýsingar en leita eftir símanúmeri og hringja í Orkubúið. Smáforritin eru handhæg og fljótvirk leið til að fylgjast með mikilvægum upplýsingum.

Hægt er að nálgast smáforritin á Google PlayStore fyrir Android snjalltæki og á Apple AppStore fyrir iPhone og Ipad.

bryndis@bb.is

Í ljósi íslenskrar hitabylgju sem von er á á Norðausturlandi telur Matvælastofnun rétt að minna á nauðsyn þess að halda matvöru við rétt hitastig, eða að minnsta kosti að halda kælivöru kaldri. Það getur verið vandkvæðum bundið á löngum akstursdögum en það má leysa með kæliboxum eða að pakka matvælum vel inn.

Í fréttatilkynningu frá Matvælastofnun segir:

„Þegar haldið er af stað í ferðalag í leit að hita og sól er mikilvægt að gera ráðstafanir svo kælivara haldist köld á leiðinni og á ákvörðunarstað.  Mikilvægt er að kæla viðkvæm matvæli vel niður áður en lagt er af stað.  Einnig er hægt er að að frysta kjöt sem ekki á nota strax, nota frosin kælielement og pakka matvælum þannig í kæliboxin þannig að ekki þurfi að opna þau oft.

Vissulega er það oft svo, að ekki fer milli mál hvort matvælin eru orðin skemmd en því miður er ekki alltaf hægt að treysta á skynfærin við mat á öryggi þeirra.  Fái matvælin ekki rétta meðferð geta þau verið orðið hættuleg neytendum áður en þau fara að skemmast.“

bryndis@bb.is

„Hefur þú heyrt af að það hafi veiðst hnúðlax = pink salmon = Oncorhynchus gorbuscha í íslenskum ám í sumar“ þannig hljóðar facebook færsla Björns Þrándar Björnssonar og í ljósi umræðna á Vestfjörðum um eldisfiska og erfðablöndun vakti færslan athygli tíðindamanns bb.is.  Björn Þrándur er þátttakandi í Evrópsku samvinnuverkefni um framandi laxfiskastofna ásamt einum fremsta sérfræðingi á svið erfðablöndunar Kjetil Hindar. Það er Kjetil sem hefur nú áhuga á að kanna útbreiðslu hnúðlax og hefur óskað eftir að veiðimenn hafi varann á og láti vita ef hann veiðist í íslenskum ám.

Senda má upplýsingar í laks@nino.no og láta fylgja með mynd, dagsetningu, veiðistað, lengd og þyngd.

Í bréfi sem Kjetil Hindar sendir samstarfsaðilum sínum kemur fram að sprenging hafi orðið í veiði á hnúðlaxi í ám í Noregi, Bretlandi og Írlandi en um 300 hnúðlaxar eru skráðir í Noregi síðustu 10 daga.

Á vísindavef Háskóla Íslands segir svo um hnúðlax:

 Hnúðlaxar (Oncorhynchus gorbuscha) hafa lengi veiðst í íslenskum ám. Þeirra varð fyrst vart í evrópskum ám upp úr miðri 20. öld. Þann 12. ágúst 1960 veiddist einn slíkur í Hítará á Mýrum og var það fyrsti hnúðlaxinn sem kom á land úr íslenskri á. Hnúðlaxana í Evrópu má rekja til tilrauna Rússa til að koma á legg hnúðlaxastofnum í rússneskum ám. Í framhaldi af því fór fljótlega að bera á hnúðlöxum í öðrum ám í Evrópu, þar á meðal í íslenskum ám.

 Hnúðlaxinn, sem einnig er nefndur bleiklax, tilheyrir ættkvísl Kyrrahafslaxa. Stofnar hnúðlaxa eru þeir stærstu af tegundum Kyrrahafslaxa. Náttúrleg heimkynni tegundarinnar eru við strendur norðanverðs Kyrrahafs og við strendur Norður-Íshafsins. Asíu-megin nær útbreiðslan frá Lenu-fljóti við strendur Síberíu og allt suður til fljóta á Kóreuskaga og til Hondo-eyju í Japan en Ameríku-megin frá Mackenzie-á í Kanada suður til Sacramento-ár í norðurhluta Kaliforníu. Fyrir utan náttúrleg heimkynni hefur hnúðlaxastofnum verið komið upp víða um heim, svo sem í vötnunum miklu á landamærum Bandaríkjanna og Kanada, í vestanverðu Rússlandi og í Íran.

Ýmsar heimildir eru til um að hnúðlax hafi veiðst hér við land, til dæmis veiddist einn í Ytri Rangá árið 2015 og má lesa nánar um það í frétt á DV.

Í september 2001 berast fréttir af hnúðlax í Húseyjarkvísl og í frétt Morgunblaðsins kemur fram að þetta sé þriðji hnúðlaxinn það sumar á Íslandi, svo vitað sé.

Hér má lesa nánar um þennan sérkennilega lax

bryndis@bb.is

Skipulags- og mannvirkjanefnd Ísafjarðarbæjar ályktaði á fundi sínum þann 12. júlí að fyrirhuguð stækkun á afrennslissvæði Mjólkárvirkjunar sé ekki háð mati á umhverfisáhrifum. Um er að ræða stækkun á framkvæmdasvæði úr 19 ferkílómetra í 29 og fer inn á svæði sem er á náttúruminjaskrá.

Í ályktun nefndarinnar segir: Skipulags- og mannvirkjanefnd ályktar sem svo að framkvæmdin sé ekki háð mati á umhverfisáhrifum, áhrif framkvæmda eru einna helst sjónræn eðlis, áætlað er að fjórir veituskurðir verði grafnir og tvær stíflur, lokuhús og yfirbygging spenna. Ef vel tekst til með vísan í umsögn Umhverfisstofnunar dags. 12.12.2016 þá er mikilvægt að fella þá að umhverfinu og ekki hafa þá þráðbeina, þá megi draga töluvert úr sjónrænum áhrifum framkvæmdar. Framkvæmdasvæði stækkar úr 19 km² í 29 km², skipulagssvæðið nær að mestu inn á hverfisverndarsvæði H1 og inn á svæði sem er á náttúruminjaskrá. Stærsti hluti skipulagssvæðisins er uppi á Glámuhálendinu og áhrif stækkunar hafa lítil áhrif á gróður þar sem framkvæmdasvæði er gróðursnautt, jafnframt eru áhrif á dýralíf takmörkuð m.t.t. stækkunar. Ekki er um að ræða neina fiskgengd í Mjólká, umferð ferðamanna og útivistarfólks um Glámuhálendið er lítil og mannvirki ekki mjög sýnileg frá leiðum ferðamanna. Nægilega er gerð grein fyrir framkvæmd, umhverfi, mótvægisaðgerðum og vöktum.

 bryndis@bb.is

Veðurstofan segir 11°hita vera á Ísafirði og þykir það jafnvel gott á þessu annars sérstaka sumri. Það má búast við hægviðri og súld í dag en líkur eru á þurrum degi á morgun og jafnvel 15°hita þó ekki sé búist að sólin láti mikið sjá sig.

Hið vestfirska logn hefur ekki svikist um þrátt fyrir allt og meðfylgjandi mynd tók Davíð Davíðsson af svartalogni Dýrafjarðar í gær.

bryndis@bb.is