Á fimmtudaginn hefst bæjarhátíð Reykhóla og það er farið bratt af stað með krakkabíói í Báta- og hlunnindasýningunni, bátastuði og brennu. Það er svo ekki minni menn en Elfar Logi og Bjartmar sem taka kvöldvaktina með leiklist og tónlist.

Á föstudaginn verður hverfakeppnin, frisbígolfmót, þarabolti, pub quiz og sundlaugarpartý, svo ekki sé minnst á tónlistarmanninn Friðrik Halldór sem ætlar að halda uppi stuðinu í Báta- og hlunnindasýningunni.

Laugardaginn taka menn snemma með Reykhólahlaupinu og í kjölfarið verður dráttarvélastuð. Allan daginn er svo fjölbreytt dagskrá þar sem iðkuð verður bæði list og lyst og deginum lýkur með stórdansleik með hljómsveitinni Bland.

Sunnudagurinn hefst með messu í Reykhólakirkju og vöffluhlaðborði og harmonikkutónlist í Króksfjarðarnesi.

Dagskrána í heild sinni má nálgast hér.

bryndis@bb.is

Nítjánda Bryggjuhátíðin á Drangsnesi fór fram um helgina og var gríðargóð mæting. Hátíðin var síðast árið 2013 og engu líkara en margir hafi beðið eftir að komast á hátíðina því talið er að um 1500 manns hafi mætt . Veðrið lék við gesti, milt og stafalogn.

Dagskráin var fjölbreytt og skemmtileg, Drengjakór íslenska lýðveldisins kom að sunnan og skemmti gestum með kraftmiklum söng inni í frystihúsi þar sem hljómburður þótti afburða fínn. Drangsnesingar buðu gestum að smakka fjölbreytt sjávarfang, til dæmis grásleppubollur, selspik og skötustöppu.

Landsleik Drangsness og Hólmvíkur lyktaði með yfirburðasigri heimamana, 7:4

Kvöldinu lauk svo með kvöldskemmtun í Félagsheimilinu Baldri, fyrir troðfullu húsi og síðan var sest út í guðsgræna náttúruna við varðeld og brekkusöng.

bryndis@bb.is

Svo virðist sem ljósleiðari Mílu hafi farið í sundur við Krossholt á Barðaströnd og hefur internetsamband verið brokkgengt frá kl. 14:00 í dag. Samkvæmt tilkynningu á heimasíðu Snerpu er viðgerð hjá Mílu yfirstandandi og mun að öllum líkindum taka um 8 klukkustundir. Varaleiðin er hins vegar virk fyrir síma og almenna netumferð en IP sjónvarp er hinsvegar úti og verður það þar til viðgerð líkur.

bryndis@bb.is

Það er MSC Priziosa sem heimsækir Ísafjörð í dag með sína 4.345 farþega og er langstærsta skemmtiferðaskipið sem stoppar hér í sumar. Þetta er reyndar annað stopp Priziosa því það var hérna líka í byrjun júní og mun koma aftur um miðjan ágúst.

Í gær voru þrjú skemmtiferðaskip í höfn með rúmlega 3.000 farþega samtals og á miðvikudaginn koma Costa Magica og Star Legend með tæplega 3.700 farþega.

bryndis@bb.is

Drög að reglugerð um áhafnir vinnuskipa sjókvíaeldisstöðva eru nú til umsagnar hjá Samgöngu- og sveitarstjórnarráðuneytinu. Reglugerðardrögin eru samin í framhaldi af breytingum sem umhverfis- og samgöngunefnd Alþingis lagði til á lögum um áhafnir íslenskra fiskiskipa, varðskipa, skemmtibáta og annarra skipa, með síðari breytingum, nr. 30/2007. Fólust þær meðal annars í breytingu á kröfum sem gerðar eru til mönnunar vinnuskipa sjókvíaeldisstöðva.

Áhafnalög gera ráð fyrir að ef um tvær aðalvélar er að ræða í skipi, eins og er í mörgum tilfellum lóðs- og dráttarskipa, sökum eðlis þeirra, þá er vélarafl þeirra lagt saman. Að hafa tvær vélar með tveimur skrúfum er æskilegt fyrir stjórnhæfi þessara skipa og er til mikilla bóta við vinnu þeirra, eykur verulega öryggi enda skiptir stjórnhæfi og snerpa öllu máli í vinnu lóðs- og dráttarskipa. Þá segir að um sé að ræða skip sem sinna afmörkuðum verkefnum um stuttar vegalengdir á takmörkuðu farsviði. Í starfi skipstjóra á slíkum vinnuskipum felst að sigla til og frá kvíum, viðhald myndavélabúnaðar, viðhald fóðurlagna, eftirlit með festingum og að sinna almennum öryggismálum stöðvanna og starfsmanna þeirra. Fyrirtækjunum hefur reynst erfitt að manna vinnuskip eins og um úthafsskip væri að ræða.

Samkvæmt reglugerðardrögunum þarf skipstjóri á vinnuskipi sjókvíaeldisstöðva að hafa lokið smáskipanámi og hafa 12 mánaða staðfestan siglingatíma. Að því gefnu að vinnuskipið sé 15 metrar eða styttri og undir 30 brúttórúmlestum að stærð.

Hér má nálgast reglugerðardrögin og frestur til að skila athugasemdum er til 4. ágúst.

bryndis@bb.is

Ef hringt er úr löngu skrítnu símanúmeri, byrjar til dæmis á 881 þá er því miður ekki um að ræða nýjan vin heldur svokallaða símaóværu. Lögreglan kallar þetta svikanúmer sem gæti haft þann tilgang að hafa fé af fólki sem svarar eða hringir til baka. Ráðlagt er að svara ekki og alls ekki hringja til baka því það gæti það leitt til kostnaðarfærslu á símareikningi.

Samkvæmt upplýsingum frá Símanum er ekki vitað um viðskiptavini sem hafa orðið fyrir barðinu á óværunni og eru hugsanleg fórnarlömb hvött til að hafa samband við sína þjónustuaðila.

Snerpa sendir líka út viðvörun þar sem einhverjir viðskiptavinir þeirra hafa fengið tölvupósta um helgina þar sem þeir eru beðnir um að fara inn á ákveðna slóð og slá inn lykilorði. Beint er til þeirra sem opnuðu slóðina að skipta þegar í stað um lykilorð og hafa samband við tölvuþjónustu sína.

bryndis@bb.is

Á ruv.is kemur fram að héraðssaksóknari hafi ákært skipstjóra dragnótabáts fyrir að valda almannahættu og stórfelldum eignaspjöllum. Forsaga málsins er sú að dragnótabáturinn togaði rækjutroll þvert yfir rafstreng sem lá neðansjávar yfir fjörðinn. Strengurinn slitnaði og við það fór rafmagnið af fjarskiptamastri á Laugabólsfjalli.

Öll eftirlitskerfi með skipaferðum duttu út í meira enn sólarhring og segir í ákæru að skipstjórinn hafi með þessu raskað öryggi skipa á svæðinu.

Neyðarlínan og Orkubú Vestfjarða kærðu í byrjun árs 2015 þrjá rækjuskipstjóra til lögreglu fyrir að vinna skemmdarverk á sæstrengnum, þetta kemur fram á Vísi.

Rækjusjómenn voru mjög ósáttir við sæstrenginn og sögðu hann lagðan yfir gjöful rækjumið, eins voru áhöld um hvort leyfi hefði verið gefið fyrir lagningu hans. Ólöf Guðný Valdimarsdóttir þáverandi skipulags- og byggingarfulltrúi Ísafjarðarbæjar segir í umsögn sinni um málið að ekkert formlegt leyfi hafi verið gefið út og undir það tekur Daníel Jakobsson fyrrverandi bæjarstjóri Ísafjarðarbæjar, núverandi bæjarfulltrúi.

Haft er eftir Þórhalli Ólafssyni framkvæmdastjóra Neyðarlínunnar og Kristjáni Haraldssyni þáverandi orkubússtjóra Orkubús Vestfjarða að þeir telji öll tilskilin leyfi hafi legið fyrir og að skipstjórarnir þrír hafi tekið lögin í sínar hendur og siglt vísvitandi á bátum sínum yfir strenginn og togað hann í sundur.

bryndis@bb.is

Að sögn forsvarsmanna Ögurballsins fór það fram með miklum sóma, eilítið tusk milli ungra manna sem var stoppað í fæðingu, að sveitasið. Rabarbaragrautnum var að venju vel tekið og nóg var til handa öllum. Seldir voru um 300 miðar sem er svipað og undanfarin ár en reikna má með að um 400 manns hafi verið á svæðinu. Þau Halli og Þórunn héldu uppi stuðinu fram á rauða nótt og þó ekki hafi skinið sólin var veðrið gott.

Meðfylgjandi eru nokkrar myndir sem gestir hafa sent bb.is

bryndis@bb.is

Veðurgvuðinn ætlar heldur betur að haga sér þessa vikuna og þeir sem öllu ráða á Veðurstofunni segja að hitinn á Vestfjörðum geti farið upp í 20 stig. Ekki sést rigning í kortunum svo langt sem augað eygir út vikuna heldur einungis logn og blíða, með sárt saknaðri sumarsól.

bryndis@bb.is