Tómas Guðbjartsson skurðlæknir hefur verið fremstu í flokki í andstöðunni við Hvalárvirkjun á Ströndum. Í Fréttablaðinu í dag birtist grein eftir Tómas þar sem hann gagnrýnir málflutning ráðamanna á Vestfjörðum sem og starfsmanna HS Orku. Tómas hefur í félagi við Ólaf Má Björnsson augnlækni staðið fyrir átakinu #fossadagatal á Ströndum þar sem þeir birta eina mynd á dag af fossum sem Hvalárvirkjun mun hafa neikvæð áhrif á.

„Það er ekkert launungarmál að við vildum ná athygli með fossadagatalinu – átaki sem við kostum að öllu leyti sjálfir. Það gleður okkur hversu margir hafa sýnt því áhuga. En því miður fylgir oft böggull skammrifi – því að umræðan um fossadagatalið, og þá sérstaklega á Vestfjörðum, hefur algjörlega snúist á hvolf og fókusinn frekar snúist um mig, starf mitt og persónu heldur en málefnið,“ skrifar Tómas og vitnar til ummæla á samfélagsmiðlum þar sem hann er sagður „lattelepjandi íbúi í 101 Reykjavík“ og „óvinur Vestfjarða“ sem ætti ekki að skipta sér af framtíð landshluta sem honum komi ekki við.

„Öllu langsóttara er þó að færni mín sem skurðlæknis eða skortur á henni sé tengd þessari umræðu eða sett spurningarmerki við kynhneigð mína eins og hún komi þessu máli við. Fyrrverandi alþingismenn og ritstjórar segja okkur Ólaf með „upplásið egó“ og forseti bæjarstjórnar Ísafjarðar hrindir af stað herferð þar sem ég er sakaður um að vera „mikilvægari en aðrir“, „tali niður Vestfirði og Vestfirðinga“, og segi þá „umhverfissóða,“ skrifar Tómas og segist ekki kannast við þessi ummæli sem honum eru eignuð. Hann stendur hinsvegar við fyrri ummæli sín, sem hann hefur margoft ítrekað, að hann telur að sumir Vestfirðingar hafi látið glepjast af fagurgala HS-Orku um ávinning og arðbærni Hvalárvirkjunar.

Hann kveinkar sér ekki undan umræðunni, enda oftsinnis tekist á um erfið málefni í fjölmiðlum, t.d. um Landspítala og fjármögnun íslenska heilbrigðiskerfisins.

„En ég er ekki tilbúinn til að kyngja því að umræðan á Íslandi sé komin á þetta lágt plan – enda verður það til þess að landsmenn veigra sér við að tjá sig um mikilvæg álitaefni. Ég tel mig í fullum rétti að hafa skoðun á því hvernig farið er með landið okkar, sérstaklega þegar ósnortin náttúra á í hlut. Sem skurðlæknir á suðvesturhorninu sinni ég vandamálum Vestfirðinga, líkt og annarra landsmanna, og vil minna á að ég hef oftsinnis áður staðið í mótmælum gegn náttúrurspjöllum í öðrum landshlutum en Vestfjörðum, t.d. í Landmannalagum og á miðhálendinu.“

Nú er undirbúningtímabil meistaraflokks karla að ná hámarki enda styttist óðum í fyrstu umferð Íslandsmótsins í 1. deild. Um helgina heldur leikmannahópur Vestra á Tálknafjörð og Patreksfjörð í æfingaferð þar sem strengir verða stilltir fyrir mót og æft af krafti.

Í tengslum við ferðina mun körfuknattleiksdeild Vestra bjóða upp á Körfuboltadag fyrir alla krakka á svæðinu. Körfuboltadagurinn fer fram í íþróttahúsinu á Patreksfirði og hefst kl. 14 á morgun laugardag. Boðið verður upp á skemmtilegar körfuboltaæfingar og leiki fyrir alla áhugasama krakka. Umsjón verður í höndum Yngva Gunnlaugssonar yfirþjálfara og leikmanna meistaraflokks.

Á sunnudaginn kl. 14 verður svo boðið upp á svokallaðan „hvítir á móti bláum“ æfingaleik í íþróttahúsinu á Patreksfirði þar sem leikmenn  meistaraflokks etja kappi í tveimur liðum. Allir eru velkomnir á leikinn og vonust við til að íbúar á sunnanverðum Vestfjörðum fjölmenni.

Lands­fram­leiðslan á 2. árs­fjórðungi 2017 jókst að raun­gildi um 3,4% frá sama árs­fjórðungi fyrra árs. Á sama tíma juk­ust þjóðarút­gjöld, sem eru sam­tala neyslu og fjár­fest­ing­ar, um 6,7%. Einka­neysla jókst um 9,5%, sam­neysla um 2,8% og fjár­fest­ing um 5,8%. Þetta kemur fram í tölum Hagstofunnar.

Út­flutn­ing­ur jókst um 8,0% á sama tíma og inn­flutn­ing­ur jókst um 16,2%. Helstu drif­kraft­ar hag­vaxt­ar er einka­neysla ásamt fjár­muna­mynd­un og sam­neyslu. Árstíðaleiðrétt lands­fram­leiðsla dróst sam­an að raun­gildi um 1,1% frá 1. árs­fjórðungi 2017.

Lands­fram­leiðslan á fyrstu sex mánuðum árs­ins 2017 jókst um 4,3% að raun­gildi borið sam­an við fyrstu sex mánuði árs­ins 2016. Á sama tíma juk­ust þjóðarút­gjöld um 5,2%. Einka­neysla jókst um 8,3%, sam­neysla um 2,2% og fjár­fest­ing um 5,2%. Út­flutn­ing­ur jókst um 5,2% og inn­flutn­ing­ur um 10%.

Þau eru mörg gullkornin sem hrutu af vörum Guðbjarts Jónssonar stofnanda Vagnsins á Flateyri, „Það er ekki lengi verið að beita í hálftíma“ og „Fínn kall kerlingin hans“ eru enn á allra vörum og „margt smátt gerir lítið eitt“ á vel við núna þegar nýir eigendur vinna af kappi við lagfæringar á þreyttu húsnæði þessa fræga veitingastaðar.

Nú hefur Úlfar Önundarson boðið fjögur sérmerkt armbandsúr til sölu, væntanlegir kaupendur þurfa að skrá kaupverðið sem framlag á Karolina fund þar sem fer fram söfnun fyrir nýju þaki á Vagninn. Úlfar telur úrin vera framleidd um síðustu aldamót en hann fékk þau með í kaupunum þegar hann, ásamt fleirum, keypti Vagninn árið 2004. Úrin eru áletruð „Vagninn – Eflum byggð á Vestfjörðum“, slagorð sem virðist alltaf vera í fullu gildi.

Tilboð skal senda á ulli@simnet.

bryndis@bb.is

„Mér sýnist að bæjarstjóri Ísafjarðarbæjar sé kominn út á afar hálar brautir,“ segir Óðinn Sigþórsson um orð Gísla Halldórs Halldórssonar, bæjarstjóra Ísafjarðarbæjar, í gær þar sem hann tók fyrir að biðjast afsökunar á ummælum sínum á bæjarstjórnarfundi í lok ágúst. Gísli Halldór sagði að hann hafi ekki sakað fulltrúa veiðiréttarhafa og fiskeldisfyrirtækja um að hafa starfað af óheilindum og óheiðarleika. Óðinn segir í samtali við bb.is að Gísli Halldór hafi í ræðu sinni ásakað fulltrúa veiðiréttarhafa og fiskeldismanna um að hafa gert samkomulag um skiptingu eldissvæða til handa fyrirtæjum fulltrúa í nefndinni og skilið Ísafjörð útundan.

„Nú telur hann að um eitthvað allsherjarplott sé að ræða en þorir ekki að tilgreina hverjir aðrir áttu þar hlut að máli,“ segir Óðinn og vísar í orð Gísla Halldórs frá því í gær þegar hann sagði að fleiri en fulltrúar veiðiréttahafa og fiskeldisfyrirtækja hafi komið að „plottinu“.

„Það vekur óneitanlega undrun að bæjarstjórn grípi ekki í taumana áður en bæjarstjórinn setur bæjarfélagið frekar niður með framgöngu sinni,“ segir Óðinn.

Óðinn sat sem fulltrúi fyrir Landssamband veiðifélaga í starfshópi um endurskoðun á fiskeldi. Hann ásamt öðrum nefndarmönnum, þeim Kjartani Ólafssyni stjórnarformanni Arnarlax og Guðmundi Gíslasyni stjórnarformanni Fiskeldis Austfjarða, hafa farið fram á afsökunarbeiðni frá bæjarstjórn Ísafjarðarbæjar vegna orða Gísla Halldórs. Því hefur verið hafnað af Örnu Láru Jónsdóttur formanni bæjarráðs, en bréf þremenninganna til bæjarstjórnar verður tekið fyrir á bæjarráðsfundi á mánudag.

„Það kemur mér undarlega fyrir sjónir að þessi ásökun hans sem finna má á Facebooksíðu sveitarfélagsins og svörum hans í gær teljist ekki til ávirðinga um óheilindi og óheiðarleika.  Við sendum þetta bréf í trausti þess að bæjarfulltrúar haldi í heiðri siðareglur kjörinna fulltrúa Ísafjarðarbæjar. Ég fæ ekki séð hvernig þessi framkoma, að bera ósannindi á menn samræmist þeim. Ég verð einnig að segja að viðbrögð formanns bæjarráðs valda vonbrigðum og hljóta að vera Ísfirðingum íhugarefni,“ segir Óðinn Sigþórsson.

Búðin í Bolungarvík þar sem allt er til á 90 ára afmæli á sunnudaginn og hlýtur það teljast einstakt. Á vefnum vikari.is kemur fram að það hafi verið þann 10. september sem Bjarni Eiríksson fékk leyfi til að reka verslun í Bolungarvík hefur hún verið starfrækt frá þeim degi. Fullu nafni heitir hún Verslun Bjarna Eiríkssonar en í daglegu tali ætíð nefnd Bjarnabúð.

Í Bjarnabúð fæst allt milli himins og jarðar, matvara, vefnaðarvara, bækur, gjafavörur, skrifstofuvörur, o.fl. o.fl.

Það er Stefanía Birgisdóttir sem stendur nú í stafni í Bjarnabúð en hún og eiginmaður hennar Olgeir Hávarðarson tóku við versluninni þann 1. janúar 1996. Nánar má lesa um Stefaníu og Bjarnabúð í 10. tölublaði Bæjarins besta.

bryndis@bb.is

Undanfarnar vikur hefur Safnahúsið Ísafirði fengið afnot af veggjum hjá Fræðslumiðstöðinni fyrir ljósmyndasýningu um heimsókn Grænlendinga til Ísafjarðar árið 1925.

Föstudaginn 15. september mun Sumarliði R. Ísleifsson sagnfræðingur fjalla um þessa heimsókn í erindi sem Fræðslumiðstöðin og Safnahúsið standa saman að. Erindið verður í húsakynnum Fræðslumiðstöðvarinnar að Suðurgötu 12 á Ísafirði og hefst kl. 14. Aðgangur er ókeypis og allir velkomnir en þátttakendur eru beðnir að skrá sig á vef miðstöðvarinnar. 

Árið 1925 kom hópur Grænlendinga til Ísafjarðar, alls um 90 manns. Tilefni heimsóknarinnar var að dönsk stjórnvöld höfðu ákveðið að stofna nýja „nýlendu“ í Scoresbysundi – Ittoqqortoormiit – á austurströnd Grænlands og flytja þangað allmarga íbúa frá Ammassalik, sem bjuggu um 800 km sunnar. Ástæða þessa var sú að dönsk stjórnvöld vildu sporna við landakröfum Norðmanna til Austur-Grænlands. Förinni var heitið til Ísafjarðar til þess að fá nýja staðarprestinn vígðan og sækja vetrarvistir.

Þessi gestakoma vakti mikla athygli, bæði á Ísafirði og um land allt og mikið var fjallað um hana í blöðum á þessum tíma. Gestakoman var einnig ljósmynduð og eru þær myndir varðveittar á Ljósmyndasafni Ísafjarðar. Markmiðið með erindinu er að gera grein fyrir tengslum landanna og þeim viðhorfum sem voru algeng á milli þjóðanna. Af hverju einkenndust þau? Hvaða ímyndir birtust? Hafði heimsóknin áhrif á samskipti þjóðanna?

bryndis@bb.is

Þrátt fyrir að Kjartan Ólafsson, stjórnarformaður Arnarlax og Guðmundur Gíslason, stjórnarformaður Fiskeldis Austfjarða, hafi setið í starfshópi um stefnumótun í fiskeldi fyrir hönd Landssambands fiskeldisstöðva segir formaður sambandsins að krafa þeirra um afsökunarbeiðni frá Ísafjarðarbæ komi frá þeim, en ekki sambandinu. „Þeir eru höfundar bréfsins og það er sent á þeirra vegum. Það var ekki borið undir mig og ekki sent í nafni sambandsins og því ekki eðlilegt að ég tjái mig um það,“ segir Einar K. Guðfinnsson, formaður Landssambands fiskeldisstöðva.

Kjartan og Guðmundur hafa auk Óðins Sigþórssonar, fulltrúa Landssambands veiðifélaga í starfshópnum, krafist opinberrar afsökunarbeiðni frá Ísafjarðarbæ vegna ummæla Gísla Halldórs Halldórssonar bæjarstjóra um störf starfshópsins.

Það kemur engan veginn til greina að bæjarstjórn Ísafjarðarbæjar biðjist opinberlega afsökunar á ummælum Gísla Halldórs Halldórssonar bæjarstjóra um störf starfshóps um stefnumótun í fiskeldi. Þetta segir Arna Lára Jónsdóttir, oddviti Í-listans og formaður bæjarráðs. Þeir Kjartan Ólafsson stjórnarformaður Arnarlax, Guðmundur Gíslason stjórnarformaður Fiskeldis Austfjarða og Óðinn Sigþórsson frá Landssambandi veiðifélaga hafa krafist opinberrar afsökunar Ísafjarðarbæjar á orðum Gísla Halldórs. Þremenningarnir sátu í starfshópnum fyrir hönd Landssambands fiskeldisstöðva og Landssambands veiðifélaga

„Bæjarstjórn tekur enga ábyrgð á málflutningi bæjarstjóra enda er hann fullfær um það sjálfur. Það stendur alveg skýrt að hann hefur fullt málfrelsi á fundum bæjarstjórnar,“ segir Arna Lára og bætir við henni þykja þær ályktanir sem Gísli Halldór hefur dregið af störfum nefndarinnar ekki vera úr lausu lofti gripnar.

Ummælin sem fóru fyrir brjóstið á þremenningunum féllu á fundi bæjarstjórnar í lok ágúst. Ef Ísafjarðarbær verður ekki við kröfu þeirra, sem í ljósi orða Örnu Láru verður að teljast útilokað, áskilja þeir sér rétt til að fá ummælin ómerkt með öðrum úrræðum.

„En fyrst og fremst finnst mér ótrúlegt að menn séu komnir niður á þetta plan og laxeldinu engan veginn til bóta,“ segir Arna Lára.

Bréf þremenninganna verður tekið fyrir á fundi bæjarráðs á mánudaginn.

Hér má lesa bréfið.

smari@bb.is