Bæjarstjórn Ísafjarðarbæjar óskar aðstoðar Ofanflóðasjóðs við að meta og eyða hættunni af Hádegissteini eins fljótt og kostur er. Hádegissteinninn er þekkt kennileiti í hlíð Bakkahyrnu í Hnífsdal. Sérfræðingar Veðurstofunnar greindu í lok ágúst að steinninn er á hreyfingu og gæti skapast mikil hætt af hann tæki upp á að hrynja niður hlíðina á byggðina í Hnífsdal. Sérfræðingarnir veltu upp tveimur möguleikum, annars vegar að festa hann með steyptum akkerum eða sprengja hann og fjarlægja hættuna alfarið.

Málið hefur verið kynnt stjórn hverfisráðs Hnífsdals sem ályktaði að málið þoli enga bið, annaðhvort þurfi að sprengja steininn eða ganga frá honum með öðrum hætti svo að engi hætta stafi af honum. Hverfisráðið hefur farið fram á vikulega vöktun með steininum.

smari@bb.is

Daníel Jakobsson, oddviti Sjálfstæðisflokksins, gagnrýnir að stærri útboðsverk bæjarins séu hvorki rædd né rýnd af bæjarráði áður en þau fara í útboð. Hann lagði fram bókun þess efnis á síðasta bæjarstjórnarfundi. Tilefni gagnrýni Daníels er útboð á þjónustuhúsi á tjaldsvæðinu á Þingeyri en í bókuninni kemur fram að málið sé ekki nýtt af nálinni, áður hafi verið bent á þetta, meðal annars þegar almenningssamgöngur í Ísafjarðarbæ voru boðnar út.

Daníel er síður en svo andvígur byggingu þjónustuhúss á tjaldsvæðinu og lagði sjálfur til að verkið yrði fært framar í framkvæmdaröðina við gerð fjárhagsáætlunar. En hann lýsir yfir vonbrigðum með að bæjarráð hafi ekki haft neina aðkomu að útboðinu síðan þá.

„Hvorki teikningar, hönnunarforsendur, kostnaðaráætlun eða áætlaður rekstrarkostnaður voru lögð fram í bæjarráði og útboðsgögn ekki kynnt né að til stæði að bjóða umrætt verk út. Niðurstaðan er að búið er að hanna og bjóða út umrætt þjónustuhús sem mun kosta hátt í tvöfalda þá upphæð sem upp var lagt með, þegar hönnunarkostnaður, framkvæmdakostnaður og annað ófyrirséð liggur fyrir,“ segir í bókun Daníels.

Bæjarstjórn ákvað að ganga til samninga við Vestfirska verktaka ehf. á grundvelli 32 milljóna kr. tilboðs í verkið. Verkið verður tvískipt og verður framkvæmt fyrir 20 milljónir kr. á þessu ári í samræmi við fjárhagsáætlun. Það sem stendur út af, eða 12 milljónir samkvæmt tilboði, verður framkvæmt og greitt á næsta ári. Þjónustuhúsið á að vera tilbúið og komið í rekstur fyrir næsta sumar.

smari@bb.is

Stjórn Fjórðungssambands Vestfirðinga lýsir áhyggjum af framtíð sauðfjárbúskapar á Vestfjörðum vegna fyrirsjáanlegar mikillar tekjuskerðingar í greininni. Sauðfjárrækt er víða lykilþáttur í atvinnu og samfélagsgerð sveitarfélaga á Vestfjörðum, sveitarfélaga sem hafa haft í vök að verjast með tilliti til byggða- og atvinnuþróunar. Þetta kemur fram í bókun stjórnarinnar.

Stjórn Fjórðungssambands Vestfirðinga telur að mótvægisaðgerðir sjávarútvegs og landbúnaðarráðherra við erfiðri stöðu sauðfjárbúskapar, gangi of skammt til að mæta sérstæðum aðstæðum á Vestfjörðum. Stjórn FV bendir á að vegna fábreytni atvinnulífs og strjálbýlis er erfitt að finna eða sækja í aðra atvinnu til að styðja við rekstur sauðfjárbúa, því sé veruleg hætta á að sauðfjárbúum fækki á Vestfjörðum. „Slík þróun er í raun ótæk með tilliti til hagsmuna sauðfjárræktar á Íslandi, þar sem Vestfirðir eru hreint svæði með tilliti til sauðfjársjúkdóma. Vestfirðir eru einnig sá landshluti þar sem vandi vegna ofbeitar er lítt til staðar og gæti landið í raun þolað meira beitarálag.“

Stjórn Fjórðungssambands Vestfirðinga hvetur því sjávarútvegs og landbúnaðarráðherra að gera úttekt á þeim tækifærum sem felast í sérstöðu sauðfjárbúskaps á Vestfjörðum. Slík úttekt verði nýtt til að vinna nýjar tillögur sem verði til að efla sauðfjárbúskap á Vestfjörðum í stað þess að draga úr honum.

smari@bb.is

Geisladiskur Tómasar R., Bongó, var í hópi mest seldu geisladiska síðasta árs og lög af honum verið mikið spiluð á öldum ljósvakans. Fjórir meðlimir Bongóbandsins gera nú víðreist um landið og halda tónleika á sjö stöðum og miðvikudagskvöldið geta Ísfirðingar notið tóna þessa einvalaliðs í Edinborgarhúsinu. Bongóbandið skipa söngvararnir Sigríður Thorlacius og Bogomil Font, gítarleikarinn Ómar Guðjónsson, Sigtryggur Baldursson lemur á kóngatrommur og Tómas R. plokkar að sjálfsögðu bassann. Diskurinn hefur hlotið mjög lofsamleg ummæli bæði hérlendis og á fjölmörgum vefmiðlum latíntónlistarinnar í Evrópu og Ameríku.

Jón Gunnarsson samgönguráðherra telur rétt að skoða sérstaka lagasetningu sem heimilar vegagerð í Teigsskógi. Þrír þingmenn Norðvesturkjördæmis hafa hvatt til lagasetningar og segja hana einu færu leiðina til að þoka málinu áfram.
„Ég skoða það með þeim og mér finnst margt vera sem geti stutt það að þetta sé þannig tilvik að það sé nokkuð einstakt og réttlæti slíka málsmeðferð,“ sagði Jón í fréttum RÚV í gær um lagasetningu sem Gunnar Bragi Sveinsson, Elsa Lára Arnardóttir og Teitur Björn Einarsson hafa hvatt til.

Jón sagði vonbrigði að stjórnsýslan geti tafið vegaframkvæmdir eins lengi og raun er á í Gufudalssveit og fór ekki í grafgötur með ástand veganna á svæðinu. „Ástandið er líklega hvað verst þarna á sunnanverðum Vestfjörðum. Algerlega óboðlegt og það verður ekki við það unað. Aukin atvinnuuppbygging og íbúafjölgun auðvitað krefst þess að samgöngur séu með sómasamlegum hætti.“

Það verður ekki einfalt mál fyrir Reykhólahrepp að rökstyðja að fara gegn áliti Skipulagsstofnunar á umhverfismati Vegagerðarinnar á Vestfjarðavegi 60, oftast kallaður vegurinn um Teigsskóg. Í skipulagsvinnu hreppsins eru tvær veglínur til skoðunar, um Teigsskóg annars vegar og jarðgöng undir Hjallaháls hins vegar.

Skipulagsstofnun skikkaði hreppinn til ráðast í gagngera endurskoðun á aðalskipulagi sveitarfélagsins þrátt fyrir að veglína um Teigsskóg hafi verið til staðar í gildandi skipulagi. Sú veglína miðast við eldra umhverfismat sem Skipulagsstofnun úrskurðaði gegn fyrir um áratug síðan og þáverandi samgönguráðherra felldi úrskurðinn úr gildi. Sú ákvörðun var kærð til dómstóla og á endanum staðfesti Hæstiréttur að ákvörðun Skipulagsstofnunar skildi standa.

Þegar Vegagerðin ákvað að gera annað umhverfismat var veglínunni hnikað til að hlífa Teigsskógi í meiri mæli en áður. Skipulaggstofnun telur að vegna breyttrar veglínu, og þá gildir einu þó að um lítilsháttar breytingar sé að ræða, þurfi að ráðast í gerð nýs aðalskipulags. Skipulagsstofnun gaf álit sitt á seinna umhverfismatinu í mars 2017 og þar var aftur lagst gegn veglagningu um Teigsskóg.

Þolinmæðin þrotin

„Við þurfum að rökstyðja okkar ákvörðun mjög vel og þess vegna erum við meðal annars að láta gera rannsókn á samfélagsþættinum sem við teljum að hljóti að vega þungt. En fyrst og fremst þarf Vegagerðin að rökstyðja afhverju hún vill fara þessa leið umfram aðra,“ segir Ingibjörg Birna Erlingsdóttir, sveitarstjóri Reykhólahrepps. Endanlegrar ákvörðunar Reykhólahrepps er að vænta um áramótin.

Hún leggur áherslu á að vel þurfi að vanda til verka og betra að flýta sér hægt. „Í svona flókinni vinnu er hætt við að gera mistök sem aftur geta verið tilefni dómsmála og því borgar sig að flýta sér hægt og þrátt fyrir að þolinmæðin sé fyrir löngu þrotin þá þýðir ekkert að gefast upp. Það verður að halda áfram og vanda sig,“ segir hún.

Teigsskógur gæti orðið prófsteinn

Teigsskógssagan rekur sig hátt á annan áratug aftur í tímann og frá því að fyrsta umhverfismatið féll í meðförum Skipulagsstofnunar og síðar í Hæstarétti hafa tekið gildi ný náttúrverndarlög þar sem kveðið er á um verndun vistkerfa eins og t.d. náttúrlegra birkiskóga sem þykja hafa sérstakt gildi. Ekki má raska þeim nema brýna nauðsyn beri til og sýnt þykir að aðrir kostir séu ekki fyrir hendi. „Það er svo ekki skilgreint nánar hvað eru brýnir hagsmunir og lögin eru nýleg og það hefur ekki reynt á þetta ákvæði enn,“ segir Ingibjörg Birna. Fari það svo að Reykhólahreppur ákveði að veglínan skuli liggja um Teigsskóg gæti þessi lagagrein verið tilefni málsóknar. „Við óttumst að við gætum orðið prófsteinn á þessa grein náttúruverndarlaga.“

Alþingismenn í Norðvesturkjördæmi hafa síðustu vikur talað um lagasetningu sem heimili vegagerð í Teigskógi. Sveitarstjórinn hefur fullan skilning á þeim röddum. „En það er ekki okkar slagur, fyrir okkur er ekki neitt annað í boði en að vanda sig og vinna eftir þeim leikreglum sem Alþingi setur okkur,“ segir Ingibjörg Birna að lokum.

Ráðherra hef­ur skipað starfs­hóp sem falið verður að finna ásætt­an­lega lausn á framtíð Reykja­vík­ur­flug­vall­ar. Þetta kom fram á fundi sam­göngu- og sveit­ar­stjórn­ar­ráðuneyt­is um ör­ygg­is­hlut­verk Reykja­vík­ur­flug­vall­ar sem fram fór í Iðnó fyrr í dag.

Nefnd­ina skipa Hreinn Lofts­son hæsta­rétt­ar­lögmaður, sem er jafn­framt formaður nefnd­ar­inn­ar, Dag­ur B. Eggerts­son borg­ar­stjóri, Eyrún Ingi­björg Sigþórs­dótt­ir fyrr­ver­andi sveit­ar­stjóri á Tálknafirði, Ró­bert Guðfinns­son at­hafnamaður á Siglufirði og Linda Gunn­ars­dótt­ir flug­stjóri.

Jón seg­ir í samtali við mbl.is að skip­an nefnd­ar­inn­ar vera í sam­ræmi við stefnu­yf­ir­lýs­ingu rík­is­stjórn­ar­inn­ar. Þar seg­ir meðal ann­ars að rík­is­stjórn­in muni beita sér fyr­ir lausn á ára­tuga­deilu um framtíð Reykja­vík­ur­flug­vall­ar með því að stofna til form­legra viðræðna sam­göngu­yf­ir­valda, heil­brigðis­yf­ir­valda, Reykja­vík­ur­borg­ar, annarra sveit­ar­fé­laga og hags­munaaðila.

Það má ekki dragast úr hófi að kanna ítarlega mótvægisaðgerðir í Ísafjarðardjúpi til að laxeldi geti hafist þar án þess að stefna laxveiðiánum í hættu. Þetta segir Þórdís Kolbrún Reykfjörð Gylfadóttir, ferðamála-, iðnaðar- og nýsköpunarráðherra og þingmanns Norðvesturkjördæmis, í grein í Morgunblaðinu um helgina. Hún segir stóru fréttirnar í áhættu mati Hafrannsóknastofnunar vera að unnt er að auka eldi á Vestfjörðum án þess að stofna villtum laxastofnum í öðrum landshlutum í hættu.

„Aftur á móti var það áfall fyrir byggðina við Ísafjarðardjúp að eldi þar teldist ekki óhætt, vegna hættu á að innblöndun í þremur laxveiðiám við Djúp færi yfir öryggismörk. Það er erfitt fyrir utanaðkomandi að gera sér í hugarlund höggið sem þetta var, eftir að væntingar höfðu verið uppi um álíka uppgang og orðið hefur annars staðar,“ segir í grein Þórdísar Kolbrúnar.

Hún bendir á að ekki sé víst að allir átti sig á að hagvöxtur á Vestfjörðum var neikvæður um 6% á árunum 2008-2015, líkt og fram kemur í nýrri skýrslu Byggðastofnunar um hagvöxt landshlutanna.

„Enginn annar landshluti upplifði samdrátt á þessu tímabili. Veruleiki Vestfjarða á þessu tiltekna tímabili er því einstakur á landsvísu. Það er inn í þetta samhengi sem setja þarf vonir fólks um aukin umsvif í atvinnulífi.“

Vestfjarðagöngum verður lokað fyrir umferð kl. 13.45 í dag. Lokunin stendur yfir í um það bil klukkustund. Ástæða lokunarinnar eru umfangsmiklir þungaflutningar frá Ísafirði til Arnarfjarðar þar sem flytja á tæki og tól til sem verða notuð við gröft Dýrafjarðarganga. Fyrsta jarðgangasprengingin verður á fimmtudaginn en starfsmenn Suðurverks hafa verið að störfum við undirbúning og aðstöðusköpun frá því í sumar.

Bæjarráð Ísafjarðarbæjar ætlar ekki að biðjast afsökunar á ummælum Gísla Halldórs Halldórssonar bæjarstjóra sem hann lét fall um störf starfshóps um endurskoðun í fiskeldi. Þrír nefndarmenn fóru fram á afsökunarbeiðnina, þeir Kjartan Ólafsson stjórnarformaður Arnarlax, Guðmundur Gíslason stjórnarformaður Fiskeldis Austfjarða og Óðinn Sigþórsson fulltrúi Landssambands veiðifélaga í starfshópnum. Í bréfi þremenninganna til bæjarráðs, sem var tekið fyrir á fundi ráðsins í dag, er tekið fram að ef bærinn biðji þá ekki opinberlega afsökunar áskilji þeir sér rétt til að fá ummælin ómerkt með öðrum úrræðum, sem getur ekki þýtt annað en málshöfðun.

Á sérstökum bæjarstjórnarfundi um fiskeldismál í lok ágúst fjallaði Gísli Halldór um störf starfshópsins og sagði að þar hafi farið fram hrossakaup hagsmunaaðila og þeir plottað um að skipta landinu upp í sjókvíaeldissvæði.

Bæjarráð bendir á og áréttar að bæjarstjóri Ísafjarðarbæjar ber ábyrgð á eigin ummælum á bæjarstjórnarfundi, en ekki bæjarstjórn.

Bæjarráð vekur athygli á að það hefði ekki átt að þurfa að koma nefndarmönnum á óvart að tillaga þeirra um að loka Ísafjarðardjúpi fyrir laxeldi væri umdeild og myndi skapa miklar umræður. Nefndarmenn hljóta að hafa gert sér grein fyrir því.

Bæjarráð vill jafnframt hvetja alla aðila þessa máls til þess að missa ekki sjónar á aðalatriðinu sem er að tryggja að laxeldi hefjist í Ísafjarðardjúpi eins fljótt og auðið er. Til að svo sé þurfa allir hagsmunaaðilar að vinna saman og hugsa í lausnum.