Miðvikudagur 12. mars 2025
Síða 2149

Fyrstu æfingabúðir vetrarins

Frá æfingabúðum í fyrra.

Fádæma hitabylgja síðustu daga breytir engu um hug gönguskíðamanna, þeirra hugur eru uppi til fjalla. Fossavatnsgangan hefur opnað fyrir skráningar í fyrstu æfingabúðir vetrarins sem verða haldnar 23.-26. nóvember.  Æfinbabúðirnar eru einkar góður undirbúningur fyrir hina krefjandi Fossavatnsgöngu sem fer fram í lok apríl. Búðirnar ná yfir fjóra daga og henta fyrir lengra sem skemmra komna í þessari göfugu og heilnæmu íþrótt. Leiðbeinendur verða ekki af verri sortinni, en í stafni Fossavantsgöngunnar standa margir reyndustu skíðagönguköppum landsins.

smari@bb.is

Sjáumst í myrkrinu

Nú er haustið gengið í garð með minnkandi birtu næstu mánuðina. Af því tilefni minnir lögreglan á Vestfjörðum gangandi vegfarendur á að nota endurskinsmerki þegar birtu er tekið að halla og ekki síst foreldra á að tryggja að börnin sjáist vel í myrkrinu. Lögreglan hvetur eigendur ökutækja sem og ökumenn til að gæta þess að ljósabúnaður ökutækja sé í góðu og lögmæltu ástandi. Slíkt skiptir ekki minna máli.

„Ef einhverntímann er tilefni til að láta ljós sitt skína og vera áberandi, er það núna og á næstunni,“ segir í tilkynningu lögreglunnar.

Meðfylgjandi myndband sýnir hve miklu máli notkun endurskinsmerkja getur skipt.

smari@bb.is

Tómas á lágu plani

Kristinn H. Gunnarsson

Undanfarnar vikur hefur Tómas Guðbjartsson, stundum við annan mann,  beitt sér í ræðu og riti gegn virkjun Hvalár í Árneshreppi. Málflutningur hans hefur verið á lágu plani. Hann hefur farið með dylgjur og staðlausa stafi. Fullyrt er í grein hans í Fréttablaðinu frá 30. ágúst  að Hvalárvirkjun sé nafn sem er „úlfur í sauðargæru“ því virkjunin hafi stækkað frá því að hún var kynnt almenningi með því að bæta við áformum um að nýta vatn úr Eyvindarfjarðará og „að svo breyttri Hvalárvirkjun hafi verið laumað í gegnum“ Rammaáætlun 2. Fullyrt er í greininni að skort hafi á að almenningur hafi fengið nauðsynlegar upplýsingar og krafist er þess að úr því verði bætt með nýju umhverfismati.

Þarna er dylgjað um óheiðarleika og undirmál. Þeir sem verða fyrir dylgjunum eru framkvæmdaaðilarnir að virkjuninni, verkefnisstjórnin um rammáætlun, ráðherrarnir sem lagt hafa málið fyrir Alþingi og alþingismenn. Til þess að lauma röngum virkjunaráformum í gegnum Alþingi þarf samsæri allra þessara aðila. Þrátt fyrir framkomnar áskoranir um rökstuðning hefur Tómas ekki rökstutt mál sitt. Það mun seint verða því fullyrðingarnar eru allar rangar og dylgjurnar tilhæfulausar.

Skýrslan frá 2007

Gögnin sem varða Hvalárvirkjun og Rammaáætlun  eru öll opinber og eru til frá upphafi. Hver sem er getur kynnt sér þau. Upphafið er í  skýrslu Almennu verkfræðistofnunnar frá  2007 sem unnin er fyrir Orkustofnun. Þar strax er kynnt að nýting vatns úr Eyvindarfjarðará sé ráðgerð til viðbótar vatni úr Hvalá og Rjúkanda. Þetta er enn svo, þó  með jarðgöngum og öðrum breytingum sem ætlaðar eru til þess að draga úr umhverfisáhrifum. Þessi virkjunaráform hafa tvisvar farið í gegn verkferla Rammaáætlunar og verið kynnt almenningi og umsagnir fengnar frá hverjum þeim sem þær vildi senda. Tvisvar hefur verkefnisstjórnin lagt til að Hvalárvirkjun verði í nýtingarflokki og Alþingi hefur fallist á það í fyrra sinnið ágreiningslaust að því best verður séð í þingtíðindum, en seinni tillagan að Rammaáætlun er enn til meðferðar á Alþingi. Afl virkjunarinnar hefur aukist. Það var fyrst áætlað 35MW og 259GWh en er núna 55 MW og 320 GWh. Það er vegna þess að vatnið er nú talið meira en áður en ekki vegna breytinga á virkjuninni. Bæði verkefnisstjórnin og ráðherra segja breytingar á Hvalárvirkjun óverulegar milli áætlana. Þegar Landvernd gefur umsögn sína um Hvalárvirkjun vitna samtökin í skýrsluna frá 2007 sem sýnir að samtökunum var kunnugt um hana. Enginn sem kemur að málinu tekur undir ásakanir og dylgjur Tómasar. Það var enginn blekktur. Engu var laumað í gegn. Eini úlfurinn í sauðargæru sem orðið hefur vart við er Tómas Guðbjartsson sjálfur. Tímabært er að hann komi undan gærunni og skýri hvað honum gengur til.

Kristinn H. Gunnarsson

Sérstakur flokkur fyrir alþingiskosningar

Til einföldunar fyrir lesendur bb.is hefur verið settur upp sérstakur flokkur á valmynd fyrir fréttir og aðsendar greinar sem tengjast beinlínis alþingiskosningum 2017. Þar geta lesendur nálgast á einum stað allar fréttir vegna kosninganna og aðsendar greinar frambjóðenda verða líka tengdar þar inn.

bryndis@bb.is

Eva Pandóra sækist áfram eftir fyrsta sætinu

Eva Pandora Baldursdóttir

Nú liggur það fyrir að kostið verður í lok október eða byrjun nóvember og stjórnmálaflokkar þurfa að hafa hraðar hendur með að raða á lista sínu fólki. Það er stutt frá síðustu kosningum og sitjandi þingmenn margir hverjir nýbúnir að ganga í gengum prófkjör eða forvöl á sínum heimavöllum. Næstu daga má því búast við að fréttir berist af fyrirætlunum sitjandi þingmanna og þeirra sem sækjast eftir sæti á framboðslistum.

Eva Pandóra Baldursdóttir þingmaður Pírata í Norðvesturkjördæmi ríður á vaðið og hefur gefið út yfirlýsingu um að hún sækist eftir að leiða lista Pírata í kjördæminu. Í fréttatilkynningu frá Evu segir að hún hafi lagt áherslu á aukið gengsæi í stjórnsýslunni, aukið traust og áhuga almennings á stjórnmálum og verkefnum Alþingis. Í stefnuræðu sinni í við upphaf nýsetts þings þann 13. september hafi henni verið tíðrætt um mikilvægi þess að ástunda góða og opna stjórnsýslu, heiðarlega umræðu og virðingu fyrir skoðunum annara. Eva heitir því að berjast af einurð gegn leyndarhyggju, frændhygli, sérhagsmunagæslu og spillingu.

bryndis@bb.is

Erlendir nemar læra um loftslagsbreytingar

Nemendahópurinn við komuna til Ísafjarðar.

Fyrir helgi kom hópur 17 bandarískra nemenda til Ísafjarðar til að taka þátt í annarlöngu vettvangsnámi á vegum School for International Training (SIT) í Vermont í Bandaríkjunum. Námsleiðinni, Iceland and Greenland Climate Change and the Arctic var hleypt af stokkunum haustið 2016 í samvinnu við Háskólasetur Vestfjarða og eru viðfangsefni hennar loftslagsmál á Norðurslóðum. Nemendur verja þrettán vikum á Íslandi og dvelja meðal annars á Ísafirði, á Akureyri og í Reykjavík. Einnig er farið í tveggja vikna heimsókn til Grænlands.

Á Ísafirði dvelur hópurinn í rúmlega þrjár vikur og líkt og nemendur sumarskóla SIT gista þessir nemendur hjá fjölskyldum og fá þannig tækifæri til að kynnast fólki á svæðinu náið. Dvöl í heimahúsum hefur verið í boði frá því sumarið 2012 en í gegnum árin hafa rúmlega 70 fjölskyldur tekið að sér að hýsa nemendur SIT skólans. Heimagistingin hefur því gefist mjög vel; margir hafa tengst sterkum böndum og sumar fjölskyldur hafa tekið þátt ár eftir ár, önn eftir önn. Háskólasetrið kann vel að meta framlag þessara fjölskyldna.

Með tilkomu þessa nýja vettvangsskóla urðu til ný rannsóknar- og kennslutengd stöðugildi á Vestfjörðum. Daniel Govoni, doktorsnemi sem búsettur er á Ísafirði, er nú fagstjóri námsins og með honum starfa þær Jennifer Smith og Alexandra Tyas sem báðar hafa útskrifast úr meistaranáminu í haf- og strandsvæðastjórnun.

smari@bb.is

Áfram lítið atvinnuleysi

Skráð at­vinnu­leysi í sein­asta mánuði var nán­ast hið sama og í júlí eða 1,9% og jókst aðeins um 0,1 pró­sentu­stig milli mánaða skv. nýbirtri skýrslu Vinnu­mála­stofn­un­ar. Í sama mánuði í fyrra mæld­ist 2% at­vinnu­leysi á vinnu­markaði. Sér­fræðing­ar Vinnu­mála­stofn­un­ar gera ráð fyr­ir að at­vinnu­leysi í sept­em­ber­mánuði verði á bil­inu 1,7- 1,9% í sept­em­ber.

Að jafnaði voru 3.519 at­vinnu­laus­ir ein­stak­ling­ar á skrá í ág­úst. Af þeim hafa 847 verið án at­vinnu í meira en 12 mánuði og hef­ur þeim fækkað um 126 frá sama mánuði í fyrra þegar þeir voru 973.

smari@bb.is

ADHD spila í Edinborg

ADHD flokkurinn er öllum jazzgeggjurum vel kunnur eftir ríkulegt framlag hans til íslenskrar jazzsenu í hartnær áratug. Kvartettinn er skipaður sannkölluðum landsliðsmönnum, bræðrunum Ómari og Óskari Guðjónssonu, Davíð Þór Jónssyni og Magnúsi Tryggvasyni Eliassen. Á morgun ætla fjórmenningarnir að heiðra Ísfirðinga og nærsveitunga með ljúfum tónum á tónleikum í Edinborgarhúsinu.

ADHD  hefur frá stofnun gefið út sex plötur. Sú sjötta og nýjasta, ADHD6, kom út síðasta haust á geisladisk og svo var hún gefin út á vínylplötu nú í vor. ADHD-liðar hafa verið duglegir við tónleikahald erlendis undanfarin ár en ekki eins duglegir að spila heima á Íslandi.

Tónleikarnir hefjast klukkan 21 og miðaverð er 3.000 kr. og 2.500 kr. fyrir eldri borgara og nema.

smari@bb.is

Vestri hólpinn

Leikmenn Vestra og Magna óska hverjum öðru til hamingju í leikslok.

Það brutust út fagnaðarlæti þegar blásið var til leiksloka í leik Vestra og Magna, en liðin mættust á laugardaginn á heimavelli Magna á Grenivík. Bjartsýnustu stuðningsmenn Vestra bjuggust ekki við þeim stjörnuleik sem liðið sýndi gegn feiköflugu liðið Magna sem ætlaði að tryggja sér sæti í 1. deildinni á næsta ári með sigri á heimavelli. Leikurinn var engu síður mikilvægur fyrir Vestramenn sem voru að berjast við falldrauginn sem hefur herjað á liðið síðustu vikur. Lið Vestra var að mestu skipað heimamönnum, en sjö byrjunarliðsmenn eru uppaldir hjá Vestra.

Ekki voru nema sex mínútur liðnar af leiknum þegar Michael Saul Halpin kom Vestra yfir og staðan í leikhléi var 1-0 fyrir Vestra. Á 53. mínútu var brotið á Pétri Bjarnasyni í vítateig Magna og Vestri fékk víti sem Pétur skoraði sjálfur úr. Boltinn söng í netinu eftir örugga spyrnu Péturs og barst aftur út í teig og markaskorarinn fagnaði með því að sparka í boltann. Dómari leiksins var af smásmugulegu gerðinni og fann sig knúinn til að þakka Pétri fyrir með því að gefa honum gult spjald. Það reyndist vera annað gula spjaldið hans í leiknum og því fauk hann út af á sömu mínútu og hann skoraði eitt af mikilvægari mörkum í sögu Vestra.

Þrátt fyrir að vera manni færri létu Vestramenn árar ekki í bát og á 64. mínútu var Michael Saul Halpin aftur á ferð með sitt annað mark og þriðja mark Vestra og staðan orðin 0-3. Victor Da Costa klóraði í bakkann fyrir heimamenn á 72. mínútu, en fleiri urðu mörkin ekki og Vestri landaði glæsilegum sigri og hafði falldrauginn undir þegar ein umferð er eftir.

Magnamenn voru ekki síður kátir að leikslokum, því úrslit annarra leikja höguðu því þannig að þrátt fyrir tap gegn Vestra fara Grenvíkingarnir upp um deild ásamt meisturunum í Njarðvík og spila í 1. deild á næsta ári.

smari@bb.is

 

 

 

Brugðist við erfiðri stöðu.

F.v. Helga Björt Möller tónlistar- og útvistarráðherra, Ásgerður Þorleifsdóttir ráðherra tísku og frjálsra viðskipta, Arna Lára Jónsdóttir fjárveitingaráðherra, Katrín Pálsdóttir afreksmannaráðherra, Heiða ferðalagaráðherra, Hólmfríður Vala Svavarsdóttir afþreyingarráðherra, Þórdís Sif Sigurðardóttir veislumálaráðherra, og Ólöf Dómhildur ráðherra menningar og lista. Á myndina vantar Nanný Örnu Guðmundsdóttir forseta, Hafdísi Gunnarsdóttir fossa- og laxamálaráðherra, Höllu Míu upplýsingaráðherra og Elínu Mörtu Eiríksdóttur framkvæmdamálaráðherra.

F.v. Helga Björt Möller tónlistar- og útvistarráðherra, Ásgerður Þorleifsdóttir ráðherra tísku og frjálsra viðskipta, Arna Lára Jónsdóttir fjárveitingaráðherra, Katrín Pálsdóttir afreksmannaráðherra, Heiða ferðalagaráðherra, Hólmfríður Vala Svavarsdóttir afþreyingarráðherra, Þórdís Sif Sigurðardóttir veislumálaráðherra, og Ólöf Dómhildur ráðherra menningar og lista. Á myndina vantar Nanný Örnu Guðmundsdóttir forseta, Hafdísi Gunnarsdóttir fossa- og laxamálaráðherra, Höllu Míu upplýsingaráðherra og Elínu Mörtu Eiríksdóttur framkvæmdamálaráðherra.

 

Þegar neyðin er stærst, er hjálpin næst. Afrekskvennahópurinn Gullrillurnar héldu neyðarfund í hádeginu vegna ástandsins í þjóðfélaginu og gangast við ábyrgð sinni. Hafa þær stillt upp ríkisstjórn sem mun taka við um leið og færi gefst.

Þær sendu frá sér eftirfarandi fréttatilkynningu:

Eftir fjölmargar áskoranir höfum við ákveðið að gangast við þeirri ábyrgð og trausti sem okkur hefur verið sýnd og mynda nýja ríkisstjórn. Ljóst má þykja að við munum gera veigamiklar breytingar á verkefnum og verkaskiptingu ríkisstjórnarinnar til hins betra.

Ný ráðuneyti verða stofnuð og önnur lögð niður. Erum á fullu að skipta bittlingunum á milli okkar. 

Nanný Arna Guðmundsdóttir verður að sjálfsögðu nýr forseti enda með mikla reynslu, Hólmfríður Vala Svavarsdóttir hefur samþykkt að verða nýr afþreyingaráðherra. Leitað verður til Hafdísar Gunnarsdóttur að taka að sér nýtt embætti laxeldis-og drykkjumála, Ólöf Dómhildur mun sinna menningu og listum, Heiða er nýr ferðalagaráðherra, Katrín Pálsdóttir verður afreksmálaráðherra, Þórdís Sif Sigurðardóttir mun verða veislumálaráðherra og sjá um einhverja pappírsvinnu nýrrar ríkisstjórnar, Arna Lára Jónsdóttir tekur að sér það vandasama verk fjárveitingaráðherra, Helga Björt Möller verður tónlistar- og útivistarráðherra, Ásgerður Þorleifsdóttir verður ráðherra tísku og frjálsra viðskipta. Halla Mia verður upplýsingaráherra og til að stýra heila klabbinu ætlar Elín Marta Eiríksdóttir að taka að sér verkstjórn og verður nýr framkvæmdaráðherra.

Þessi ríkisstjórn lofar eintómri gleði og hamingju.

bryndis@bb.is

1...2.1482.1492.150...2.376Síða 2.149 af 2.376

Nýjustu fréttir

Bæjarins besta
Allt um Vestfirði og Vestfirðinga Hafið samband: bb(hja)bb.is
Hafa samband: bb@bb.is
© Steig ehf