Um mánaðarmótin gekk vaskur hópur sjálfboðaliða um hinn fagra Rauðasand og er þetta þriðja sumarið sem sandurinn er genginn og hreinsaður. Á vef Umhverfisstofnunar kemur fram að gengnir hafi verið um 18 kílómetrar og söfnuðust 25 rúmmetrar af rusli. Metþátttaka var í sumar en 27 einstaklingar mættu til verksins. Blíðskaparveður var þennan dag sem endaði svo í selaskoðun og sjósundi.

Hreinsunin er samstarfsverkefni Vesturbyggðar, Umhverfisstofnunar og landeigenda á Rauðsandi.

Í frétt Umhverfisstofnunar kemur fram að hluti af fjöruhreinsuninni sé unnin í tengslum við OSPAR samninginn og er Rauðisandur ein þeirra fjara á Íslandi sem árlega eru vaktaðar í tengslum við hann. OSPAR hluti verkefnisins er unninn á þann hátt að afmarkaður hefur verið 100 metra kafli á ströndinni sem hreinsaður er árlega, allt rusl greint og talið og niðurstöðurnar skráðar í gagnagrunn OSPAR að því loknu. Náttúrustofa Vestfjarða sér um vettvangsvinnuna fyrir hönd Umhverfisstofnunar.

OSPAR samningurinn gengur út á verndun hafrýmis Norðaustur-Atlantshafsins, meðal annars með því að draga úr mengun frá landi og uppsprettum á hafi. Á hverju ári berst mikið af rusli í hafið og safnast saman á hafsbotni, úti á opnu hafi eða rekur upp í fjörur og þarf mjög víðtækt samstarf að koma til við lausn á vandamálinu, meðal annars með forvörnum.

bryndis@bb.is

Næstkomandi laugardag skipuleggur Ferðafélag Ísfirðinga gönguferð á Galtarvita undir leiðsögn Þrastar Jóhannessonar.

Lagt af stað klukkan 10 frá Sundlauginni í Bolungarvík.

Leiðin er rúmir 6 km og hækkun um 450 m sem gengin er fram og til baka. Gert er ráð fyrir að ferðin taki 7 -8 klst. með stoppi og akstri til og frá Bolungarvík. Farið fram og til baka yfir Bakkaskarð og gengið á Öskubak á heimleiðinni ef aðstæður leyfa.

Kunnugir telja erfiðleikastuðulinn vera tveggja skóa.

bryndis@bb.is

Á vef Fiskifrétta kemur fram að reiknað er með að árið 2021 verði framleiðsla í fiskeldi í heiminum orðin meiri en fiskveiði. Árlegur vöxtur í fiskeldi hefur verið 5,3% á ári undanfarin ár en reiknað er með hægist á vexti og að hann verði um 2,6% á ári næstu ár.

Þetta kemur fram í nýrri skýrslu frá Efnahags- og framfarastofnun Evrópu og Matvæla- og landbúnaðarstofnun Sameinuðu þjóðanna um horfurnar í landbúnaði og sjávarútvegi á heimsvísu næsta áratuginn. Þar er því spáð að fiskneysla á heimsvísu muni aukast og að uppúr 2020 muni fiskverð hækka.

bryndis@bb.is

Nú stendur yfir kosning íbúa ársins í Reykhólahreppi og skulu tilnefningar sendar á tómstundafulltrúa hreppsins.  Í tilnefningunni þarf að koma fram fyrir hvað tilnefningin er og hver nefnir.

Í fyrra hlaut fyrrum frumkvöðull og starfsmaður bb.is Hlynur Þór Magnússon útnefninguna „íbúi ársins“ fyrir umsjón með vefsíðu Reykhólahrepps, þar áður Ingibjörg Kristjánsdóttir héraðshjúkrunarfræðingur. Á vef Reykhólahrepps kemur fram að bæði hafi þau lagt meira í sín störf en starfslýsing beinlínis kveður á um og samfélagið notið góðs af í ríkum mæli.

Íbúi ársins 2017 verður heiðraður á Reykhóladögum sem haldnir eru næstu helgi og skila þarf tilnefningum fyrir kl. 22:00 í kvöld.

bryndis@bb.is

Evrópusambandið gerir árlega könnun á aðstæðum barna og nýverið voru birtar niðurstöður Eurostat um húsnæðisaðstæður barna í Evrópu. Af 34 löndum situr Ísland í 29. sæti með 25% allra barna í húsnæði sem telst skemmt vegna raka. leka og myglu. Það er Bændablaðið sem birtir þessar niðurstöður í nýjasta tölublaði sínu og dregur þá ályktun að óvönduð vinnubrögð við húsbyggingar og röng hönnun beri að mestu ábyrgð á þessu ástandi. Þessi slæma staða Íslands í rannsóknum Eurostat hefur verið viðvarandi frá árinu 2008

Bestar eru aðstæður í Finnlandi en þar teljast 4,6% barna búa við óviðunandi húsnæðiskost en Tyrkland hefur vermt botninn til fjölda ára en þar hefur 43-46% barna búið við slæmar aðstæður. Í Noregi og Svíþjóð er staðan betri en í Damörku eru um 20% barna sem teljast búa við óviðunandi aðstæður.

Á ruv.is er haft eftir Nilsínu Larsen Einarsdóttur, réttindafræðslufulltrúa hjá Unicef að það sé brýnt að stjórnvöld bregðist við. Unicef hafi vakið athygli á þessu og bendir á að börn leigjenda og börn á foreldra sem eru á biðlistum eftir húsnæði séu í sérlega slæmri stöðu. Íslendingar hafa skrifað undir Barnasáttmála Sameinuðu þjóðanna og samkvæmt honum eigi börn „rétt á því að alast upp við bestu lífskilyrði sem hægt er að bjóða upp á hverju sinni“. Nilsína telur okkur geta gert betur og brugðist hraðar við.

bryndis@bb.is

Hægviðri eða hafgola, en norðaustan 5-10 síðdegis á morgun. Bjart með köflum, en sums staðar þokubakkar í nótt. Hiti 12 til 22 stig að deginum, hlýjast inn til landsins. Þetta er spáin á Veðurstofunni og þegar þokan í Skutulsfirði  mjakaði sér í burtu blasir við blár himinn og hér við ysta haf er framundan fallegur dagur.

Þessar myndir voru teknar í morgun af Guðrún Hönnu Óskarsdóttir kaffistjóra á Kaffi Sól í Önundarfirði.

bryndis@bb.is

Á fiskifrettir.is er viðtal við dr. Hrönn Egilsdóttir vegna nýrrar rannsóknar í Ástralíu um áhrif súrnunar hafsins á vistkerfið. Niðurstaða þeirrar rannsóknar er að súrnun hafsins valdi því að fisktegundum fækki í kjölfar súrnunar. Hrönn segir rannsóknina áhugaverða og spennandi kost að framkvæma sambærilega rannsókn hér við land.

Hingað til hafa svona rannsóknir aðallega verið gerðar í fiskabúrum og á einni tegund í einu en ekki á heilu vistkerfi.

Ástralska rannsóknin bendir til þess að veiðiálag á ákveðnar tegundir geti haft talsvert að segja um breytingar á vistkerfi og með rannsóknum og þekkingu á viðfangsefninu væri hægt að stjórna veiðiálaginu til að lágmarka umhverfisáhrif.

Hrönn hefur rannsakað eldvirk svæði í sjó með uppstreymi koltvíoxíðs og hefur til dæmis kafað í Breiðafirði en þar er líklegt að slík svæði finnist. En sýrustig sjávar er hærra á svæðum með mikilli eldvirkni og kolstvísýringur streymir upp úr hafsbotninum, þau henta því vel til rannsókna.

Viðtal Fiskifrétta við Hrönn má nálgast hér.

bryndis@bb.is

Viðgerð á tveimur ljósleiðurum sem fór í sundur við Krossholt á Barðaströnd lauk á níunda tímanum í gærkvöldi en slitið á strengnum olli truflunum á símkerfum og netsambandi. Netsamband var um varaleið á meðan og stóð að lokum þokkalega undir álaginu.

Að sögn upplýsingafulltrúa Mílu var farið strax af stað með viðgerðarteymi en tíma taki að komast á staðinn og verkefnið tímafrekt, verkinu lauk kl. 20:30 og samband komið á. Annar strengurinn var í eigum Mílu, hinn Vodafone en viðgerðarteymi Mílu gerði við báða strengina.

Athygli vekur að engar tilkynningar eða fréttir um hnökra á netsambandi eru á heimasíðum Vodafone eða Mílu, sem var þó svo alvarlegt að Húsasmiðjan lokaði verslun sinni um miðjan dag. Frétt um málið er á heimasíðu Snerpu, ef vel er gáð.

bryndis@bb.is

Hið árlega golfmót Blakknes ehf. fór fram á Syðridalsvelli laugardaginn 22.  júlí 2017 í blíðskapar veðri en Blakknes ehf hefur staðið fyrir mótinu í tæpan áratug.

58 keppendur mættu til leiks en það er örlítil fækkun frá í fyrra en þá voru 63 sem tóku þátt.

Úrslit urðu þessi:

Í karlaflokki:

1. 1.sæti Ernir Steinn Arnarson GR á 74 höggum
2. sæti Chatchai Phothiya GÍ á 76 höggum
3. sæti Janusz Pawel Duszak GÍ á 77 höggum

Í kvennaflokki:

1. sæti Alma Rún Ragnarsdóttir GKG á 87 höggum
2. sæti Bjarney Guðmundsdóttir GÍ á 90 höggum
3. sæti Sólveig Pálsdóttir GÍ á 95 höggum.

Í unglingaflokki:

1. sæti Ásgeir Óli Kristjánsson GÍ á 92 höggum
2. sæti Jón Gunnar Kanishka Shiransson GÍ á 108 höggum
3. sæti Hjálmar Helgi Jakobsson GÍ  á 132 höggum

Sérstök verðlaun voru veitt fyrir 5 punktahæstu keppendurna:

1. sæti Páll Guðmundsson GBO á 34 punktum
2. sæti Ernir Steinn Arnarson GR á 34 punktum
3. sæti Kristinn Þórir Kristjánsson GÍ á 33 punktum
4. sæti Bjarney Guðmundsdóttir GÍ á 33 punktum
5. sæti Högni Gunnar Pétursson GÍ á 33 punktum.

Neðangreindir fengu verðlaun fyrir að vera næstir holu á par þrjú holum:

• Ásgeir Óli Kristjánsson GÍ
• Magnús Jónsson GÞ
• Tryggvi Sigtryggsson GÍ
• Víðir Arnarson GÍ

bryndis@bb.is