Þann 7. september opnaði vefur um íslenskar skáldkonur, www.skald.is. Að verkefninu standa Ásgerður Jóhannsdóttir og Jóna Guðbjörg Torfadóttir. Vefurinn hverfist um konur og skáldskap þeirra og verður leitast við að birta þar viðburði, fréttir, greinaskrif og fagurfræðilega texta um konur, eftir konur. Þar er einnig að finna skáldatal íslenskra kvenskálda.
Vefurinn er unninn í sjálfboðavinnu og af hugsjón einni saman og Von þeirra sem að vefnum standa er að hann eigi eftir að stækka og dafna og verða verðugur vettvangur fyrir íslenskar skáldkonur. Skáldatalið er í vinnslu og bætast ný skáld við vikulega. Allar konur sem skrifað hafa um kvennabókmenntir eða gefið út skáldskap eru hvattar til að senda inn efni til birtingar á skald@skald.is.
Ný tækni hefur rutt sér til rúms í lagningu ljósleiðara sem felst í því að í stað hefðbundinna jarðstrengja sem eru ýmist grafnir í skurði eða plægðir niður eða þá nokkuð sver rör, sem eru dregnir í strengir eru nú lögð rör sem eru tiltölulega grönn og strengjum síðan blásið í rörin með sérstakri vél.
Fyrir aðeins 3-4 árum voru notuð rör sem voru allt að 50 mm í þvermál og í þau voru síðan dregnir hefðbundnir jarðstrengir sem þýddi að fyrst þurfti að skjóta bandi í rörið og draga stenginn á því og á 2-300 metra fresti þurfti að opna inn á lögnina því að ekki var hægt að draga í meira í einu vegna þyngdar strengsins. Var því frekar tímafrekt að draga strengi í rör.
Nú er öldin önnur, rörin eru riffluð að innanverðu til að minnka núningsviðnám og vélin ýtir strengjum beint í enda rörsins og svo er blásið lofti meðfram strengnum þannig að hann fleytist áfram á því. Strengirnir sem eru notaðir eru sérstaklega hannaðir til þess að blása í rör og eru frá 2,5 mm og upp í 11 mm í þvermál. Rörin eru af nokkrum stærðum en Snerpa notar yfirleitt 8 mm rör fyrir heimtaugar og 14 mm rör fyrir stærri strengi. Þó að flestar heimtaugar séu 40-50 metrar þá er hægt að blása með þessarri vél nokkra kílómetra í einu við bestu aðstæður en lengst hefur Snerpa blásið um 900 metra í einu lagi.
Til að blása strengjum sem lengst er nauðsynlegt að hafa öfluga loftpressu og Snerpa keypti á síðasta ári loftpressu sérstaklega hannaða fyrir blástursvélina sem getur framleitt allt að 15 bör en venjulegar pressur framleiða jafnan 8-10 bör. Pressan er þó ekki stærri en svo en að hún passar ágætlega inn í sendibíl.
Blástursvélin kemur frá Bretlandi og er innan við tugur véla af þessarri gerð í notkun á Íslandi en nokkuð fleiri ljósleiðarablástursvélar eru til af smærri gerð sem er framleidd í Sviss.
Jóhann Egilsson hjá Snerpu gerir klárt til að blása í ljósleiðara á Þingeyri.
Þátttaka barna við tólf mánaða aldur og fjögurra ára aldur í almennum bólusetningum var töluvert lakari árið 2016 en árið á undan samkvæmt nýrri skýrslu sóttvarnarlæknis. Minnki þátttakan enn frekar telur hann líkur á að hér geri vart við sig sjúkdómar sem ekki hafa sést um árabil.
Í tilkynningu frá sóttvarnarlækni segir að ástæður fyrir minni þátttöku séu ekki ljósar en taldar mestar líkur á því að innköllunarkerfi heilsugæslunnar sé ófullnægjandi fyrir börn á þessum aldri. Þá hafi komið í ljós töluverður munur á þátttöku milli landssvæða.
Ljóst er að þátttaka í bólusetningum við 12 mánaða og 4 ára aldur hér á landi er ekki ásættanleg og ef fram heldur sem horfir, þá geta blossað hér upp bólusetningasjúkdómar sem ekki hafa sést um árabil. Í því samhengi má minna á að nú geisar mislingafaraldur í Evrópu og gætu stök tilfelli sést hér ef þátttöku hrakar.
Í skýrslunni kemur fram að við endurbólusetningu 4ja ára barna árið 2016 skilar sér í bólusetningu að meðaltali 85% af árgangi 2011, hér á Vestfjörðum er hlutfallið 97%, lökust er staðan í Vestmannaeyjum með 79%. Hvað varðar endurbólusetningu 14 ára barna eru skilin á Vestfjörðum 93% og vermir þar botnsætið ásamt Suðurnesjum. Í flestum tilvikum er árangurinn á Vestfjörðum yfir landsmeðaltali.
Eva Dögg Jóhannesdóttir oddviti Tálknafjarðarhrepps
Á fundi hreppsnefndar Tálknafjarðarhrepps þann 19. september var Eva D. Jóhannesdóttir kjörin oddvita nefndarinnar með þremur atkvæðum. Sitjandi oddviti Indriði Indriðason bauð sig einnig fram.
Í upphafi fundar gerði Eva Dögg athugasemdir við boðun fundarins, fundurinn hefði átt að vera haldinn í ágúst enda væri engin hefð fyrir því að sveitarstjórn væri í fríi í tvo mánuði. Síðasti fundur var haldinn í júní. Indriði óskaði eftir afbrigði við dagskrá og að við bættust kjör oddvita og varaoddvita en þeim liðum hafði verið frestað á síðasta fundi.
Að sögn Evu Daggar hefur samkomulagið í sveitarstjórn ekki verið með besta móti en er að batna núna. Mikilvægt þótti að dreifa valdinu en Indriði hefur bæði verið sveitarstjóri og oddviti. Hún þvertekur fyrir að komin sé kosningaskjálfti, nýtt oddvitakjör hafi einungis verið þáttur í að bæta samskipti, upplýsingaflæði og samvinnu innan sveitarstjórnar.
Byggðasamlag Vestfjarða um málefni fatlaðs fólks vekur athygli á rétti fólks til að sækja um námsstyrki. Byggðasamlaginu er heimilt að veita styrk til greiðslu námskostnaðar sem ekki er greiddur samkvæmt ákvæðum annarra laga, enda telst námið hafa gildi sem hæfing eða endurhæfing. Einnig er heimilt að veita þeim sem eru 18 ára og eldri styrk til verkfæra- og tækjakaupa í sambandi við heimavinnu eða sjálfstæða starfsemi, enda teljist starfsemin hafa gildi sem félagsleg hæfing eða endurhæfing sem miði að því að auðvelda fötluðu fólki að skapa sér atvinnu.
Umsóknafrestur er til 20. október 2017 og skulu umsóknir berast til félagsþjónustu lögheimilisveitarfélags.
Það er langt frá því að vera ókeypis að blása til alþingiskosninga. Samkvæmt svari innanríkisráðuneytisins við fyrirspurn fréttastofu RÚV kosta kosningarnar um 350 milljónir króna. Kosningar til Alþingis haustið 2016 kostuðu 350 milljónir króna og ráðuneytið gerir ráð fyrir að kostnaður verði svipaður við komandi kosningar.
Í dómsmálaráðuneytinu er undirbúningur hafinn með hefðbundnum hætti. Utankjörfundarkosning getur hafist frá og með deginum í dag og skrá yfir listabókstafi framboða síðustu kosninga á að birtast í dag.
Vefurinn kosning.is verður virkjaður vegna kosninganna og má búast við að hann geti farið af stað eigi síðar en í vikulok.
Kosning utankjörfunar hófst í dag og verður hægt að greiða atkvæði hjá sýslumönnum og erlendis á skrifstofu sendiráðs, í sendiræðisskrifstofu eða í skrifstofu kjörræðismanns samkvæmt nánari ákvörðun utanríkisráðuneytisins.
Óvænt viðbót uppgötvaðist í salati á veitingastað í Reykjavík í gær, agnarsmár músarungi, aðeins 6 grömm að þyngd. Viðbótin vakti ekki mikla lukku og er þessi smávaxna skepna nú til rannsóknar og beinist hún nú helst að því að finna ríkisfang ungans. Til öryggis hefur Innnes ehf innkallað Azora spínat vegna gruns um að unginn litli hafi svindlað sér inn í landið með því. Í fréttatilkynningu Matvælastofnunar segir „Um er að ræða innköllun í varúðarsjónarmiði með tilliti til neytendaverndar“.
Eftirfarandi upplýsingar auðkenna vöruna sem innköllunin einskorðast við:
Vöruheiti: Azora spínat.
Strikanúmer: 8436539071136 og 8436539070764
Nettómagn: 150 g og 500 g.
Best fyrir: 17.09.17 og 24.09.17.
Framleiðandi: Verdimed.
Framleiðsluland: Spánn.
Innflytjandi: Innnes ehf., Bæjarflöt 2, 112 Reykjavík.
Dreifing: Sölustaðir um land allt.
Vörunni má skila í þeirra verslun sem hún var keypt.
Vísitala byggingarkostnaðar reiknuð um miðjan september 2017 hefur hækkað um 1,5% frá fyrri mánuði. Innlent efni hækkaði um 4,1% (áhrif á vísitölu 1,5%), vélar, flutningur og orkunotkun hækkaði um 0,7% milli mánaða (0,1%) en verð á innfluttu efni lækkaði um 0,6% (-0,1%). Á síðustu tólf mánuðum hefur vísitala byggingarkostnaðar hækkað um 3,0%, segir í frétt á vef Hagstofu Íslands.
Samþjöppun í sjávarútvegi hefur haldið áfram á síðustu 12 árum. Útgerðarfyrirtækjum með aflahlutdeild hefur fækkað um næstum 60% á 12 árum. Alls áttu 946 útgerðarfyrirtæki aflahlutdeild á fiskveiðiárinu 2005/2006 en nú deila 382 fyrirtæki hlut í aflanum. Fjöldi úthlutaðra þorskígildistonna er þá næstum sá sami, eða um 400 þúsund tonn. Þetta kemur fram á vef Fiskistofu.
Litlar breytingar eru á hvaða fyrirtæki eru í efstu sætunum frá því sams konar upplýsingar voru birtar í mars síðastliðnum, í kjölfar úthlutunar aflamarks í deilistofnum um áramótin og viðbótarúthlutunar á loðnu, að því er segir í tilkynningu Fiskistofu.
Eins og undanfarin ár eru HB Grandi og Samherji í tveimur efstu sætunum. HB Grandi er með um 10,4% af hlutdeildunum en var í mars með 11,3%. Samherji er með 6,2%. Samanlagt ráða þessi tvö stærstu útgerðarfyrirtæki landsins því yfir 16,6% af hlutdeildunum í kvótakerfinu. Í 3. til 5. sæti eru Síldarvinnslan í Neskaupstað, Þorbjörn í Grindavík og FISK-Seafood Sauðárkróki. Efninu tengd, má geta þess að fyrir örfáum dögum keypti FISK-Seafood allt hlutafé í Soffaníasi Cecilssyni hf. á Grundarfirði en fyrirtækið ræður yfir 3.200 tonna kvóta í þorskígildum talið.
Laugardaginn 16. september 2017 opnaði Ingibjörg Magnadóttir sýninguna ,,Ég svaraði og sýndi þeim rauða mynd“ í Gallerí Úthverfu á Ísafirði.
Ingibjörg Magnadóttir býr og starfar í Reykjavík. Hún útskrifaðist úr fjöltæknideild Listaháskóla Íslands árið 2000 og var einnig við nám í Kaupmannahöfn 1999. Hún lagði stund á sviðslistanám í Fredriksstað í Noregi 2001-2 og útskrifaðist með MA í ritlist frá Háskóla Íslands 2015. Hún hefur komið víða við og tekið þátt í fjölmörgum listsýningum og listviðburðum hér heima og erlendis undanfarin ár. Heimasíða: imagnadottir.com
Sýning Ingibjargar Magnadóttur í Gallerí Úthverfu opnar kl. 16 á laugardaginn og stendur til sunnudagsins 22. október.
