Raforkuspá Orkustofnunar gerir ráð fyrir því að raforkuþörf almennings á Íslandi aukist um 100 megavött á áratug til ársins 2050. Til að mæta aukinni þörf sé annað hvort nauðsynlegt að fjölga virkjunum á Íslandi eða taka orku frá stórnotendum og ráðstafa til almennings.

Orkustofnun gefur út nýja raforkuspá fyrir Ísland á hverju ári. Spáin tekur aðeins til þarfar almennra notenda eins og heimila og þjónustufyrirtækja, en ekki stórnotenda á borð við álver eða stórar verksmiðjur.

„Bara það sem þarf fyrir þessa almennu notkun, þá verðum við kannski komin upp í 715 MW, förum úr um 600 MW upp í 715 á tæpum tíu árum. Ef við horfum til 2030 þá erum við komin í um það bil 800. Þegar við horfum til 2050 þá eru þetta orðin tæp ellefu hundruð MW,“ segir Sverrir Jan Norðfjörð,  formaður raforkuspárhóps Orkustofnunar, í samtali við fréttastofu RÚV.

Vestri og Knattspyrnufélag Vesturbæjar mættust á Torfnesvelli á Ísafirði á laugardag. Vestri komst yfir á 24. mínútu með marki Péturs Bjarnasonar og leikurinn var að mestu algjör einstefna af hálfu heimamanna og Vesturbæingarnir voru sjaldan líklegir til að skora. En allt kom fyrir ekki og í upphafi síðari hálfleiks jafnaði Enok Ingþórsson leikinn (mín. 48) og fimm mínútum síðar tók KV leikinn með marki Júlí Karlssonar. Markvörður KV var í feiknastuði og kom oftar en einu sinni í veg fyrir að Vestramenn kæmust inn í leikinn á ný. Á 79. mínútu var Hjalta Hermanni Gíslasyni, leikmanni Vestra, vikið af velli með rautt spjald.

Eftir leikinn er Vestri í sjöunda sæti deildarinnar með 19 stig. Næsti leikur liðsins er útileikur við Völsung á fimmtudag.

Mikil umræða hefur verið um að franska skemmtiferðaskipið Le Boreal hafi hleypt um 200 farþegum í land í Jökulfjörðum, en skipið var að koma frá Grænlandi og var því ótollskoðað. Í samtali við Morgunblaðið sagði umboðsmaður skipsins, Jóhann Bogason hjá Gára, sem er skipaumboðsskrifstofa, að um leiðan misskilning væri að ræða á milli sín og skipstjórnenda og telur hann málið hafa verið blásið upp í fjölmiðlum. „Skipstjórnendur voru í góðri trú. Þeir töldu að þeir hefðu fengið leyfi eins og þegar farið er í t.d. Grímsey, en þá er hægt að fá undanþágu til að tollafgreiða í næstu höfn, sem í þessu tilfelli var á Akranesi,“ sagði Jóhann og bætti við að honum hafi ekki verið kunnugt um að skipstjórinn ætlaði að setja fólk í land í Hornstrandafriðlandinu og taldi að skipið ætlaði að sigla meðfram ströndinni áleiðis til Akraness.

Herdís Erna Matthíasdóttir bóndi á Miðjanesi í Reykhólasveit segir í samtali við bb.is að bændur í sveitinni séu að verða fyrir talsverðu tjóni því loksins þegar hægt var að slá fór að blása svo hressilega að slægjan liggur meira og minna í skurðum. Til að kóróna vandræðin bilaði dráttarvélin á Miðjanesi en Herdís á von á nýrri vél í dag. Hún segir að spáin segi að það muni lægja þegar líður á daginn og þá verður hægt að ná einhverju saman, af túnum og uppúr skurðum.

Bændur voru orðnir langeygir eftir þurrkinum hér á norðanverðum Vestfjörðum segir Helga Guðný Kristjánsdóttir stórbóndi á Botni í Súgandafirði. Hún segir að grasið sé að spretta úr sér og nú líti úr fyrir mikil hey en sennilega minni að gæðum. Bændur í Botni eru nú búin með allt heima fyrir og langt komin í Önundarfirði, svo er Skutulsfjörður og Álftafjörður eftir.

Helga er ekki bara snjallur hagyrðingur og bóndi heldur eru hún líka iðin með myndavélina og deilir gjarnan myndum sínum af bóndans daglega amstri á facebook. Hér að neðan er nokkrar sem hún hefur tekið við heyskapinn í sumar.

bryndis@bb.is

Hjónin Katrín Pálsdóttir og Þorsteinn Másson gerðu aldeilis garðinn frægan um síðustu helgi er þau tóku þátt í Járnkarlinum eða í Challenge Iceland.

Keppnin heitir Challenge Iceland og er ein af fjölmörgu Challenge þríþrautarkeppnum sem haldnar eru um allan heim. Keppt var í svokallaðri hálfri vegalengd eða hálfum járnkarli sem er 1900m sund, 90km hjólreiðar og 21km hlaup.

Keppnin fór fram við Meðalfellsvatn í Hvalfirði þar sem keppendur þreyttu sundið.  Eftir að sundinu lauk var stokkið á hjólin og hjólað í Hvalfirðinum. Þegar keppendur höfðu lagt 90km hjólreiðar að baki var hlaupið 21km við Meðalfellið og þar í kring.

Járnfrúin Katrín Pálsdóttir gerði sér lítið fyrir og varð 3 í sínum flokki á tímanum 6:05 (30-40ára konur) og járnkarlinn Þorsteinn varð 9 í sínum flokki á tímanum 5:40

Alls tóku 250 manns þátt í mótinu og þar af voru 200 erlendir keppendur. Jafnframt voru 12 atvinnumenn og 8 atvinnukonur þátt.

Hjónin Justin Metzler og Jeanni Seymour sigruðu karla og kvennaflokk meðal atvinnumanna.

bryndis@bb.is

Það færist líf í tuskurnar í  The Blue bank á Þingeyri á mánudaginn er starfsmenn miðstöðvarinnar mæta til starfa. Nýráðinn forstöðumaður bankans er Arnar Sigurðsson en hann hefur mikla reynslu af nýsköpun og stuðningi við skapandi verkefni. Hann er einn stofnenda hópfjármögnunarfyrirtækisins Karolina fund. Hann stofnaði einnig Klapp samvinnufélag, sem styður við grasrótarstarf í kvikmyndagerð og unnið sjálfstætt í menningar- og tækniverkefnum.

Arnhildur Lilý Karlsdóttir hefur verið hefur verið ráðin þjónustufulltrúi hjá Blábankanum en hún er mikil áhugamanneskja um bókmenntir og listir en hún er bókmenntafræðingur að mennt. Síðustu ár hefur hún starfað við verkefnastjórnun og hefur jafnframt langa reynslu af þjónstustörfum. Arnhildur Lilý er einnig jógakennari og hefur kennt um árabil bæði slökunarjóga og kundalini jóga.

Blábankinn er afrakstur samtals milli Nýsköpunarmiðstöðvar, Ísafjarðarbæjar, Landsbankans og einkaaðila, honum er ætlað að vera vettvangur til að veita og þróa þjónustu fyrir íbúa svæðisins og gefa þeim og gestum þeirra tækifæri til að hittast, læra, uppgötva, skapa og vinna saman.

Formleg opnun bankans er áformuð 20.september.

bryndis@bb.is

Ef elta á veðrið í útilegu þessa helgina er rétt að skella sér suður. Fyrir landið í heild segir veðurfréttamaðurinn vedur.is „Norðaustan 5-13 m/s, hvassast norðvestanlands og með austurströndinni. Skýjað og væta á köflum norðan- og austanlands, annars yfirleitt bjartviðri en líkur á þokulofti með suðurströndinni, einkum að næturlagi. Heldur kólnandi, hiti 13 til 18 stig víða sunnan- og vestanlands en 6 til 12 stig norðan- og austanlands.

Á Vestfjörðum verður norðaustan 8-13 m/s og léttskýjað að mestu. Hiti 11 – 18 stig.

bryndis@bb.is

Þau eru glæsileg skemmtiferðaskipin sem núna liggja við höfn á Ísafirði. Minna skipið sem liggur við akkeri er Pinsendam með 800 farþega og það stærra er Magellan og þar munu vera 1.860 farþegar um borð. Það er Insignia sem liggur við bryggju og þar eru 824 farþegar.

Á miðvikudaginn var stórskipið Costa Magica með 3.470 farþega og lá það við akkeri, við bryggjuna var aftur á móti Star Legend með sína 208 farþega.

Um verslunarmannahelgina mun verða gestkvæmt á höfninni því þá eru áætluð 4 skip með samtals um 4.300 farþega.

bryndis@bb.is