Á afskekktum sveitabæ við Arnarfjörð hafa menn tekið upp á því að ala refi sem gæludýr. Bóndinn segir að eftir nokkrar vikur í tamningu fylgi refurinn þér eins og hundur. Í fréttum Stöðvar 2 í gær var viðtal við Árna B. Erlingsson á Laugarbóli í Arnarfirði og Mari Kemppainen, finnska vinnukonu á bænum.

„Við höfum bara oft haft yrðlinga hér sem gæludýr og við höfum oft getað haft þá í nokkur ár,” segir Árni bóndi á Laugabóli.

Yrðlingarnir tveir, sem nú eru á bænum, komu úr greni sem refaskyttur unnu í vor, – þeir einu sem fengu að lifa af sjö.

„Við biðjum nú bara refaveiðimenn, sem eru að vinna greni, um að hlífa einum eða tveimur fyrir okkur. Og þeir færa okkur þetta. Svo höfum við þá bara hér eins og gæludýr, núna aðallega fyrir ferðamennina, því núna erum við komin í ferðaþjónustu. Ásamt lauginni hefur þetta bara töluvert aðdráttarafl,” segir Árni.

smari@bb.is

Veður­fræðing­ur Veður­stofu Íslands mæl­ir með því að fólk sem hygg­ur á ferðalög um helg­ina hafi til ör­ygg­is regn­föt og hlýj­an fatnað með í fartesk­inu. Veður­spá­in er ágæt fyr­ir helg­ina.

Veður­spá fyr­ir næstu daga

Hæg breyti­leg átt eða haf­gola, en norðaust­an 5-10 m/​s við NV-strönd­ina á morg­un. Skýjað með köfl­um og sums staðar skúr­ir, einkum inn til lands­ins síðdeg­is. Hiti 9 til 16 stig, hlýj­ast SV-lands.

Á laug­ar­dag og sunnu­dag:
Hæg breyti­leg átt eða haf­gola. Skýjað með köfl­um og lík­ur á síðdeg­is­skúr­um í flest­um lands­hlut­um, einkum inn til lands­ins. Hiti 10 til 16 stig um há­dag­inn, en mun sval­ara að næt­ur­lagi.

Á mánu­dag (frí­dag­ur versl­un­ar­manna) og þriðju­dag:
Lík­ur á norðanátt með vætu öðru hvoru á N- og A-landi, en ann­ars bjartviðri. Hiti 7 til 16 stig, hlýj­ast syðst.

Á miðviku­dag og fimmtu­dag:
Lík­lega hægviðri, skýjað með köfl­um og milt veður, en skúr­ir á víð og dreif.

„Bú­ist er við þokka­legu ef ekki ágætis­veðri um helg­ina, frem­ur hæg­um vind­um, en skúr­um á víða og dreif og sums staðar síðdeg­is­demb­um. Hiti verður á bil­inu 10 til 16 stig að deg­in­um, en mun sval­ara að næt­ur­lagi, jafn vel næt­ur­frost á stöku stað. Sum­ar tölvu­spár gera ráð fyr­ir norðanátt á frí­degi versl­un­ar­manna með rign­ingu á Norður- og Aust­ur­landi, en spá­in ætti ekki að fæla neinn frá úti­vist né úti­leg­um í nátt­úru lands­ins, sem skart­ar sínu feg­ursta um þess­ar mund­ir. Til að spilla ekki gleðinni er þó viss­ara að hafa hlý og vatns­var­in föt meðferðis þegar haldið er á vit æv­in­týr­anna,“ seg­ir í hug­leiðing­um veður­fræðings á vef Veður­stofu Íslands.

smari@bb.is

Eins og flestir vita verður Evrópumeistaramótið í mýrarbolta haldið í Bolungarvík í ár, en frá upphafi hefur mótið haft heimilisfesti á Ísafirði. Benedikt Sigurðsson er drullusokkur Mýrarboltans og mótið leggst vel í hann. „Mér sýnist að skráningar séu fleiri en í fyrra og það eru komin 20 lið. Vanir mýrarboltamenn segja að oft bætast við lið á síðustu stundu svo liðunum gæti fjölgað,“ segir Benedikt. Leikið verður á tveimur splunkunýjum völlum og Benedikt hefur staðið í ströngu við að vökva vellina í þeirri þurrkatíð og brakandi sól sem hefur verið fyrir vestan síðustu daga. „Drullan er að ná príma ástandi og veðurspáin fyrir morgundaginn er góð svo það stefnir í hörkumót,“ segir Benedikt.

Blásið verður til leiks á morgun á slaginu tólf og Benedikt segir að mótið klárist á morgun. Hann vill koma á framfæri áskorun. „Það er enginn Mýrarbolti án Fallega smiðsins, Péturs Magnússonar. Hann var fæddur til að spila mýrarbolta. Ég skora á Pétur og lið hans, FC Kareoke, að mæta á morgun og verja titilinn frá því í fyrra.“

smari@bb.is

Lögreglan á Vestfjörðum hefur eflt umferðareftirlit í umdæminu öllu með hliðsjón af aukinni umferð. Allt er þetta gert í þágu umferðaröryggis og eru ökumenn hvattir til að fara að lögum enda er það farsælast og öruggast.

Átján ökumenn voru kærðir í gær fyrir að aka yfir leyfilegum hámarkshraða. Flestir þessara ökumanna voru stöðvaðir í Ísafjarðardjúpi en einnig í Strandasýslu. Einn þessara ökumanna var kærður í tvígang fyrir hraðakstursbrot í Djúpinu.

smari@bb.is

Fleiri tug­ir hnýðinga stukku og léku sér í Stein­gríms­firði í gær gest­um hvala­skoðun­ar­fyr­ir­tæk­is­ins Láki Tours frá Hólma­vík til mik­ils yndis­auka. Hnýðing­ar eru smá­hval­ir, eða allt að tveir metr­ar að stærð og eru af höfr­unga­kyni.

Líkt og höfr­ung­ar sjást þeir gjarn­an við Íslands­strend­ur og eru oft marg­ir sam­an í hjörð. Þá er það ekki gefið að þeir séu í svona miklu stuði eins og í gær.

Ungmennafélagið Geisli í Súðavík á fertugsafmæli um þessar mundir og haldin verður afmælisveisla af því tilefni samhliða gönguhátíð í Súðavík um verslunarmannahelgina. Afmælisdagskráin verður á laugardag, 5. ágúst,  kl. 14 í Samkomuhúsi Súðavíkur. Þar verður risastór afmæliskaka í boði og kaffi og gos fyrir alla. Fyrsti formaður Geisla, Egill Heiðar Gíslason, mun fara yfir vel valin brot úr sögu félagsins. Þjálfari Geisla, Halldór Jónbjörnsson, mun segja nokkur orð og formaður Geisla, Birgir Ragnarsson, mun afhenda viðurkenningar og peningastyrk í tilefni afmælisins. Eftir ræðuhöld þá verður slegið upp dansleik fyrir börnin, þar sem hinir eldri eru líka hvattir til að sýna hvað í þeim býr. Um kvöldið verður svo dansleikur í Samkomuhúsinu kl. 22, með karaoke og fjölbreyttri tónlist að því loknu þar sem ballgestir fagna afmælinu inn í nóttina. Félagar í Geisla munu grilla pylsur utan við Samkomuhúsið eftir miðnætti til að tryggja að enginn fari svangur út í nóttina.