Á laugardaginn fór fram lokahóf knattspyrnudeildar Vestra. Þrátt fyrir að gengi liðsins í sumar hafi verið vonbrigði gátu leikmenn, stjórn og velunnarar skemmt sér vel um kvöldið og lögðu línurnar fyrir næsta keppnistímabil. Þrír leikmenn fengu viðurkenningar, þeir Pétur Bjarnason sem var markahæstur í sumar, Daði Freyr Arnarsson sem var valinn leikmaður ársins og Þórður Gunnar Hafþórsson sem var valinn efnilegasti leikmaður meistaraflokks.
smari@bb.is
Handbendi er brúðuleikhús með höfuðstöðvar á Hvammstanga og á sunnudaginn kl. 17:00 sýnir Handbendi brúðuverkið Tröll eftir Gretu Clough í Félagsheimili Bolungarvíkur.
Síðar mun verkið verða sýnt á nokkrum stöðum á Norðurlandi, og eftir að sýningum á Íslandi lýkur mun verkið fara til South Bank Centre í Lundúnum. Það er einstakur viðburður að verk frá atvinnuleikhúsi sem rekið er í litlu þorpi eins og Hvammstanga sé að fara að sýna í jafn glæsilegu húsi og South Bank Centre er, við bakka Thames í miðborg Lundúna. Tröll hefur verið sýnt rúmlega 30 sinnum nú þegar, og mun fá 40 sýningar í viðbót áður en október rennur sitt skeið. Tröll verða sýnd í Tjarnarbíó þann 30. september og fara leikferð um Norðurland til 5. október þegar sýningin heldur til Lundúna til mánaðarloka, og lýkur leikferðinni í South Bank Centre. Handbendi er líka að sýna Kúrudag víða um heim, og býður upp á brúðusýninguna Búkollu fyrir skóla á Íslandi í gegnum verkefnið List fyrir alla.
bryndis@bb.is
Nú í dag föstudaginn 29 september lokar Kaupfélag Steingrímsfjarðar útibúi sínu á Norðurfirði, og er þetta síðasti dagur sem hægt er að versla þar. Lilja Björk Benediktsdóttir sem hefur verið verslunarstjóri frá fyrsta júní lætur þá af störfum. Hún hefur staðið í ströngu undanfarið að fara yfir allan lager og skrá allt og hafa útsölur á ýmsum vörum. Að sögn kaupfélagsstjóra er ekki grundvöllur fyrir að reka þetta útibú áfram.
Ekki er vitað hvað tekur við en Eva Sigurbjörnsdóttir oddviti Árneshrepps segir að tveir aðilar séu heitir með að taka við rekstrinum í einhverri mynd. En hvort verður úr því veit engin enn. Nú verður fólk að keyra til Hólmavíkur í aðalverslun Kaupfélags Steingrímsfjarðar þar. En það er um hundrað kílómetra leið önnur leiðin eða alls um 200 KM.
Þetta kemur fram á Litla Hjalla í dag.
bryndis@bb.is
Það er annasöm helgi hjá blakstúlkum Vestra um helgina. 2. Flokkur stúlkna spilar við Þrótt Reykjavík kl. 11:00 á laugardaginn í Íþróttahúsinu á Þingeyri og er það í fyrsta sinn sem 2. flokkur spilar leiki heima og að heiman.
Á sunnudaginn kl. 14:00 tekur meistaraflokkur kvenna á móti ÍK a á Torfnesi en meistaraflokkur er að mestu byggður upp á yngri leikmönnum sem spila enn með 2. flokki.
bryndis@bb.is
Gunnar Bragi Sveinsson, þingmaður Framsóknarflokksins og fyrrverandi ráðherra flokksins, greinir frá því á Facebook-síðu sinni að hann hafi ákveðið að yfirgefa flokkinn. „Ég kveð flokkinn minn með mikilli sorg en sáttur við framlag mitt til hans. Ég mun sakna alls þess frábæra fólks sem þar er en margir þeirra hafa verið mér samferða þennan tíma,“ skrifar Gunnar Bragi á Facebook. Gunnar Bragi hefur verið oddviti Framsóknarflokksins í Norðvesturkjördæmi síðan 2009.
Gunnar Bragi greinir frá því, að nú sé svo komið „að hreinlyndið er á undanhaldi í flokknum mínum. Einhver annarleg öfl virðast hafa tekið forystu í flokknum, öfl sem ég hef líklega ekki verið nógu undirgefinn. Kafbátahernaður er stundaður.“
Hann sóttist eftir oddvitasætinu í Norðvesturkjördæmi fyrir kosningarnar í lok október, en fékk óvænt mótframboð frá Ásmundi Einari Daðasyni, fyrrverandi þingmanni flokksins.
Gunnar Bragi skrifar:
„Framsóknarfélagið mitt er klofið og ég sé að fólki er skipt í fylkingar. Gamla góða vinalega kveðjan er í sumum tilfellum orðin í besta falli kurteisisleg. Þetta á ekki að vera svona, þetta þarf ekki að vera svona. Öllu þessu mátti forða hefðu menn hlustað eða komið hreint fram. Því miður er það nú að rætast sem ég og fleiri vöruðum við og ég sagði við marga vini mína síðla sumars 2016 í upphafi innanflokksátakanna.
Þegar svona er komið þá veltir maður framtíðinni fyrir sér. Vil ég vinna í þessu umhverfi? Get ég unnið með fólki sem starfar með þessum hætti eða lætur það viðgangast? Ég hef undanfarið hitt eða hringt í fjöldann allan af frábæru fólki sem ýmist hvetur mig til að taka slaginn, „ekki láta þá komast upp með þetta“, eða þá að það hvetur mig til að draga mig í hlé vegna ástandsins í flokknum.“
smari@bb.is
Á miðvikudaginn í næstu viku verður haldinn kynningarfundur vegna áforma Íslenska kalkþörungafélagsins efh. að reisa kalkþörungaverksmiðju í Súðavíku. Fyrirtækið hóf fyrir nokkru vinnu við gerð umhverfismats og á fundinum, sem verður í Samkomuhúsinu í Súðavík, verður frummatsskýrslan kynnt.
Áætlað er að kynna tilhögun framkvæmdarinnar og úttekt á hagrænum og félagslegum áhrifum kalkþörungaverksmiðju fyrir Súðavík og önnur byggðarlög við Djúp.
Eftir kynningar verður opnað fyrir spurningar frá íbúum, aukinheldur sem fulltrúar fundarins verða til skrafs og svara eftir fundinn.
Í tilkynningu frá Súðavíkurhreppi er íbúar sveitarfélagsins og nágrannasveitarfélaga hvattir til að mæta og kynna sér efni fundarins.
Fundurinn verður eins og áður segir í Samkomuhúsinu í Súðavík á miðvikudaginn og hefst kl. 17.
smari@bb.is
Á dögunum fór fram fyrirtækjamót í pútti hjá Kubba, íþróttafélagi eldir borgara í Ísafjarðarbæ. Í mótinu tóku þátt 21 fyrirtæki og félög. Keppendur fyrirtækjanna voru bæði félagar úr Kubba og frá fyrirtækjunum sjálfum.
Fyrirtækjamótið er ein helsta fjáröflun félagsins og hefur verið haldið undanfarin átta ár.
Sigurvegari þetta árið var Fos.Vest á Ísafirði og lék Heiðar Guðmundsson fyrir þeirra hönd. Það var Finnur Magnússon sem landaði öðru sæti fyrir Hótel Ísafjörð og í þriðja sæti var Halldór Margeirsson fyrir hönd Tannsa á Torfnesi. Í fjórða sæti var Kristinn Kristjánsson sem keppti fyrir hönd Hraðfrystihússins Gunnvör.
bryndis@bb.is
Haraldi Benediktssyni, oddvita Sjálfstæðisflokksins í Norðvesturkjördæmi, var boðið að sæti á lista Miðflokksins í komandi kosningum. Frá þessu er greint á vef RÚV. Haraldur þáði ekki boðið, en hann ætlar að bjóða sig fram aftur fyrir Sjálfstæðisflokkinn og allar líkur á að hann muni áfram leiða listann í kjördæminu. Miðflokkurinn er nýr flokkur Sigmundar Davíðs Gunnlaugsson, fyrrverandi formann Framsóknarflokksins. Haraldi var boðið 1. sæti í Norðvesturkjördæmi, sem í frétt RÚV er sagt „öruggt sæti á lista Miðflokksins“.
„Þetta var nú ósköp vel meint og ég vona sannarlega að þeim gangi vel í sínu,“ er haft eftir Haraldi í fréttinni og jafnframt að það komi honum ekki á óvart að Miðflokkurinn beri í hann víurnar í ljósi áherslna hans í byggða- og landbúnaðarmálum sem eru í anda skandinavískar miðflokka.
smari@bb.is
Meðalrekstrarkostnaður á hvern nemanda í grunnskólum landsins hefur aukist um 126 þúsund krónur á milli ára, miðað við september 2016 og sama mánuð í ár.
Samkvæmt tölum frá Hagstofunni er meðalkostnaður á hvern grunnskólanema 1.806.951 kr. í þessum mánuði en var 1.680.683 kr. í september 2016, hækkun um 7,5%.
Við útreikninga sína tekur Hagstofan mið af almennum launahækkunum starfsmanna grunnskóla og breytingum á vísitölu neysluverðs, að teknu tilliti til vægis hvors þáttar fyrir sig í rekstrarkostnaði grunnskólanna.
smari@bb.is
Í síðustu umferð Íslandsmótsins í knattspyrnu fengu tveir ungir leikmenn tækifæri til að spreyta sig með meistaraflokki Vestra. Þetta eru Guðmundur Arnar Svavarsson og Ívar Breki Helgason, báðir fæddir árið 2002 og eru því rétt staðnir upp úr strigaskónum. Ívar Breki var 15 ára og 265 daga gamall þegar leikurinn fór fram og Guðmundur Arnar 14 ára og 329 daga gamall.
Drengirnir stóðu sig vel og munu væntanlega og vonandi festa sig í sessi sem reglulegir leikmenn meistaraflokks í framtíðinni. Það er ekki algengt að svo ungir leikmenn fái tækifæri í knattspyrnunni, enda mikil líkamleg átök í þessum leikjum. Það verður forvitnilegt að sjá hvernig þeir félagar, og allir þeirra liðsfélagar í 3. flokki Vestra, þroskast í náinni framtíð í þeirri von að Vestri geti stillt upp fleiri heimamönnum í liði sínu.
Á myndinni má sjá þá félaga í svokallaðri Hæfileikamótun KSÍ, en þangað eru valdir leikmenn sem líklegir þykja til framtíðarverka í yngri landsliðum Íslands í knattspyrnu.
smari@bb.is
