Einleikjahátíðinni Act alone lauk á Suðureyri á laugardag. Elfar Logi Hannesson, stjórnandi Act alone, segir að hátíðin hafi tekist með eindæmum vel í ár. „Það sóttu yfir þrjú þúsund manns viðburðina 18 sem voru í boði. Það var fullt hús á fyrsta degi og svo hélt það bara áfram til síðasta dag,“ segir Elfar Logi.

Hann segir aðsóknina vera nýtt „lúxusvandamál“. „Ekki verður félagsheimilið stækkað og við færum okkur ekki í íþróttahúsið, hjarta og sál Act alone er í Félagsheimili Súgandafjarðar og við verðum þar áfram. Svo er ákveðinn sjarmi við það að húsið fyllist og fólk standi eða sitji á gólfinu.“

Hann telur upp þrjár ástæður fyrir því að aðsóknin í ár var svona góð. „Þetta var gott einleikjaár og við vorum með sterkar og þekktar sýningar eins og Maður sem heitir Ove og Hún pabbi. Sú gula var ekki að skemma fyrir okkur og þó að þetta sé innihátíð þá skapast meiri stemmning þegar veðrið er svona gott. Í sumar var heimildarmyndin um hátíðina sýnd á RÚV og hún hefur eflaust ýtt við mörgum. Heimamenn á Suðureyri og í nágrannabyggðarlögunum hafa alltaf verið duglegir að mæta á Act alone en núna tók ég eftir mörgum frá sunnanverðum Vestfjörðum svo við getum rétt ímyndað okkur hverju Dýrafjarðargöngin eiga eftir að breyta fyrir menningarlíf á Vestfjörðum.“

Þrátt fyrir að hafa verið potturinn og pannan í einleikjahátíðinni frá upphafi er Elfar Log hvergi nærri hættur eða farinn að lýjast. „Nú kemur nokkra daga pása og á föstudaginn hefst undirbúningur fyrir næsta ár. Fyrsta umsóknin barst á laugardaginn, en ætli ég bíði ekki fram á föstudag með að svara henni.“

smari@bb.is

Við hátíðlega athöfn á Suðureyri í kvöld var Ágúst G. Atlason ljósmyndari tilnefndur bæjarlistamaður Ísafjarðarbæjar árið 2017.

Í tilkynningu frá Ísafjarðarbæ er tilnefning rökstudd með þessum hætti:

 „Ágúst G. Atlason er ljósmyndari frá Mediaskolerne i Viborg og hefur um nokkurra ára skeið lagt ljósmyndalistinni til hæfileika sína og skrásett á mynd jafnt mannlíf, landslag, veðurfar og mannvirki í bæjarfélaginu og víðar með mikilli natni, svo að víða er tekið eftir.

 Atvinnu- og menningarmálanefnd Ísafjarðarbæjar telur að þótt ljósmyndalistinni hafi verið vel sinnt í bæjarfélaginu í gegnum tíðina og að nokkrir þekktustu ljósmyndarar landsins hafi verið og séu úr bæjarfélaginu og hafi skilið eftir sig mikla sögu sem mun varðveitast til framtíðar, hafi Ágúst síst látið sitt eftir liggja þegar kemur að einstökum ljósmyndum úr náttúru og mannlífi Vestfjarða.

 Ágúst hefur næmt auga fyrir fegurðinni sem er í kringum okkur og hefur jafnframt verið afkastamikill við að vekja athygli á henni og á fyrir það skilið sérstaka viðurkenningu sem nefndin veitir hér með með þakklæti auk þess sem Ágúst er hvattur til að halda áfram góðu starfi.“

bb.is sendir Ágústi innilegar hamingjuóskir með verðskuldaðan heiður.

bryndis@bb.is