Síða 2132

Bjarni þjálfar Vestra

Samúel Samúelsson formaður meistaraflokks Vestra og Bjarni Jóhannsson nýr þjálfari liðsins.

Á laugardaginn var skrifað undir samning við nýjan þjálfara meistaraflokks Vestra í knattspyrnu og sá er heldur betur þekktur í íslenskum knattspyrnuheimi. Bjarni Jóhannsson mun þjálfa Vestra næstu þrjú árin og það má með sanni segja að koma Bjarna sé fengur fyrir vestfirska knattspyrnu. Hann hefur starfað við knattspyrnuþjálfun í aldarfjórðung og meðal annars þjálfað Stjörnuna, Breiðablik, KA og ÍBV.

Bjarni er ekki ókunnur knattspyrnumálum á Ísafirði þó það sé langt um liðið síðan hann lék með ÍBÍ, forvera Vestra, en hann lék með liðinu keppnistímabilin 1982 og 1983.

 

Tombólubörn

Fjórir sprækir krakkar skelltu í basar í Neistahúsinu á Ísafirði í síðustu viku og söfnuðu 13.947 krónum. Þegar þau höfðu lokið við að selja allt sem var á basarnum bættu þau peningum við úr eigin sjóðum. Þau vilja að peningarnar fari til barna í Sómalíu en Rauði krossinn styður við munaðarlaus börn þar í landi. Þetta voru þau Sæmundur Petr Pálsson, Una Margrét Halldórsdóttir, Embla Katrín Kristjánsdóttir og Sölvey Marie Tómasdóttir.

bryndis@bb.is

Ungar konur ráða byggð

Ungar konur eru lykillinn að blómlegri byggð, það er náttúrulögmál. Þar sem ungar konur velja sér að búa og eiga börnin sín, þar dafnar lífið, svo einfalt er það. Því ætti að vera kappsmál að hvetja ungar konur til þess að gefa sig að stefnumótun vítt og breitt í samfélaginu. Enda vita ungar konur manna best hvað þarf til að skapa frjósaman jarðveg fyrir ungt fólk og skapandi framtíð á landinu okkar góða.

Grunnþarfirnar

Frumskilyrði á borð við mæðravernd, fæðingarhjálp og umönnun barna er augljós byrjun. Í því felst grundvallaröryggi og þó svo foreldrar í dag hjálpist að heima fyrir og vinni báðir úti, þá munu konur alltaf leita þangað sem þær finna til öryggis með eigið líf og barna sinna.

Fjölbreytt framboð starfa til að afla sér lífsviðurværis og um leið njóta starfsævinnar á eigin forsendum og í takt við eigin löngun og áhuga, er annað meginverkefni. Hér þarf að gera meira en bara „skaffa kvennastörf“, enda afleitt að framtíðaruppbygging atvinnulífs sé gerð á forsendum kynjaskipts vinnumarkaðar. Konur eru duglegar við að afla sér menntunar og verðmætasköpun framtíðarinnar mun í síauknum mæli byggja á sterkum innviðum til að styðja við eigið frumkvæði. Framtíðin mun síður þurfa að reiða sig á staðbundin náttúrugæði, en þeim mun frekar á góðar tengingar við umheiminn. Hugvit er nefnilega hreyfanleg auðlind sem nýta má hvar og hvenær sem er og ólíkt öðrum náttúruauðlindum þá vex það þegar af er tekið. Aðstæður til að nýta eigin þekkingu og hugvit eru þannig leiðin að skapandi framtíð.

Búsetukostir

Húsnæði er frumþörf sem þarf að vera til staðar til að ungt fólk sjái sér framtíð í að stofna heimili. Við ættum að horfa til nágrannalandanna, t.d. Noregs, varðandi húsnæðisuppbyggingu í vaxandi byggðum. Það er vissulega gott að ríki og sveitarfélög skuli nú leggja til stofnframlög til nýbygginga og uppbyggingar á leiguhúsnæði, en því miður skilar það sér ekki með nógu öflugum hætti út fyrir höfuðborgarsvæðið. Nægir þar að nefna að Bjarg íbúðafélag ASÍ kemur ekki að verkefnum á landsbyggðinni. Bein ívilnun þolinmóðra fjárfesta til svæða sem þurfa mjög á húsnæði að halda til að styðja við atvinnuuppbyggingu ætti að vera algjört forgangsmál. Það húsnæði má ekki kalla á þunga fjárfestingu af hálfu unga fólksins, eða langtímabindingu á formi húsnæðiseignar, enda getur söluvænleiki húseigna sett stórt strik í reikninginn þegar ungt fólk veltir því fyrir sér að freista gæfunnar úti á landi. Hér þarf sértæka nálgun sem byggir undir vöxt bæjarfélaga og uppbyggingu sem helst í hendur við breytingar í atvinnulífinu.

Ungar konur eiga og þurfa að koma að ákvarðanatöku á öllum stigum þjóðlífsins. Þær eru lykillinn að framtíð lands og bæja. Hlustum á þær og kjósum þær á þing, við munum ekki sjá eftir því.

Höfundar skipa 3 efstu sæti Bjartrar framtíðar í Norðvesturkjördæmi í Alþingiskosningunum 2017

Guðlaug Kristjánsdóttir, Kristín Sigurgeirsdóttir, Elín Matthildur Kristinsdóttir

Vel heppnuð æfing

Hátt í annað hundrað sjálfboðaliðar tóku þátt í flugslysaæfingu á Ísafjarðarflugvelli á laugardaginn og að sögn skipuleggjenda gekk flest að óskum en svona æfingar eru ætíð rýndar vel að lokum og þær eru til þess gerðar að læra af þeim. Væntanlega hefur eitthvað komið úr pokahorninu sem mátti fara betur, í það minnsta kvartaði einn sjúklingur yfir því að hafa aldrei fengið að tala við lækni og aldrei tekinn blóðþrýstingur.

„Slysið“ átti sér stað fyrir enda flugbrautarinnar og þar hafði verið komið fyrir ýmsum hlutum sem léku flugvélaparta, til að mynda þrír bílar, grunsamlegir kútar og rör. Mikið slösuðu fólki hafði verið komið fyrir ýmist í „flugvélapörtunum“ eða á flötunum í kring og létu margir sjúklingar ófriðlega enda á þeim mörgum mikil svöðusár. Klippa þurfti fjölmarga úr bílunum og flytja af mikilli varfærni úr flökunum og yfir í sjúkrabíl. Einn flugfarþegi var svo óheppinn að fljóta út í sjó á bút úr flugvélinni og mátti bíða talsverða stund eftir að vera bjargað í land og undir læknishendur, glöggt mátti heyra af hljóðunum að viðkomandi var mikið slasaður.

Mikill eldur braust út á fjórum stöðum en vaskir liðsmenn slökkviliðsins réðu niðurlögum hans.

Í flugstöðinni var bækistöð heilbrigðisstarfsfólks sem greindi og læknaði af miklum móð, eitthvað var þó um að ekki tækist að bjarga þeim sem náðu undir læknishendur.

Skipuleggjendur æfingarinnar voru afar ánægðir með viðbrögð björgunarfólks á svæðinu og kunnu vel að meta alla þá aðstoð sem hinn almenni borgari veitti sömuleiðis.

bryndis@bb.is

Ásmundur Einar og Halla Signý efst hjá Framsókn

Fimm efstu á lista Framsóknarflokksins.

Framsóknarflokkurinn í Norðvesturkjördæmi hélt í gær tvöfalt kjördæmisþing á Bifröst í Borgarfirði. Þar var kosið um hverjir skipa fimm efstu sæti á framboðslista fyrir kosningarnar 28. október nk. Raðað var í önnur sæti listans. Ásmundur Einar Daðason fv. alþingismaður í Borgarnesi bauð sig einn fram í forystusætið og var kjörinn. Í öðru sæti er Halla Signý Kristjánsdóttir fjármálastjóri í Bolungarvík, í þriðja sæti Stefán Vagn Stefánsson yfirlögregluþjónn á Sauðárkróki, í fjórða sæti Lilja Rannveig Sigurgeirsdóttir háskólanemi í Bakkakoti og fimmta sæti Guðveig Anna Eyglóardóttir hótelstjóri í Borgarbyggð.

 

Mikil breyting er á lista Framsóknarflokksins frá því í kosningunum í fyrra þegar flokkurinn fékk tvo menn kjörna í Norðvesturkjördæmi. Gunnar Bragi Sveinsson, fyrrverandi oddviti flokksins, sagði sig úr flokknum í síðustu viku og er genginn til liðs við Miðflokk Sigmundar Davíðs Gunnlaugssonar. Elsa Lára Arnardóttir var í öðru sæti en hún hefur dregið sig í hlé frá stjórnmálaþátttöku.

 

Framboðslisti Framsóknarflokksins í Norðvesturkjördæmi:

  1. Ásmundur Einar Daðason, Borgarnesi
  2. Halla Signý Kristjánsdóttir, Bolungarvík
  3. Stefán Vagn Stefánsson, Sauðárkróki
  4. Lilja Rannveig Sigurgeirsdóttir, Borgarbyggð
  5. Guðveig Anna Eyglóardóttir, Borgarnesi
  6. Lilja Sigurðardóttir, Patreksfirði
  7. Þorgils Magnússon, Blönduósi
  8. Eydís Bára Jóhannsdóttir, Hvammstanga
  9. Einar Guðmann Örnólfsson, Borgarbyggð
  10. Jón Árnason, Patreksfirði
  11. Heiðrún Sandra Grettisdóttir, Dalabyggð
  12. Gauti Geirsson, Ísafirði
  13. Kristín Erla Guðmundsdóttir, Borgarnesi
  14. Jóhanna María Sigmnundsdóttir, Borgarbyggð
  15. Elsa Lára Arnardóttir, Akranesi
  16. Elín Sigurðardóttir, Stykkishólmi

20% barna 5-8 ára eiga snjallsíma

Meira en helmingur barna undir eins árs aldrei hafa aðgang að spjald­tölvu og yfir 20% barna 5-8 ára eiga eig­in snjallsíma. Þetta er meðal þess sem kem­ur fram í nýrri rann­sókn um miðlanotk­un ungra barna á Íslandi. Rann­sókn­in er gerð að sænskri fyr­ir­mynd og skoðað var hvaða tæki og miðla börn­in nota, hvaða tæki þau eiga eða hafa aðgang að og hversu oft mis­mun­andi miðlar eru notaðir ásamt viðhorfi for­eldra til notk­un­ar­inn­ar.

Net,- síma- og tölvu­notk­un var meðal þess sem könnuð var meðal barn­anna. Þá var tækja­eign einnig skoðuð þar sem kem­ur m.a. í ljós að yfir 20% barna 5-8 ára eiga eig­in snjallsíma. Niðurstöður könnunarinnar eru í samræmi við þróun í nágrannalöndunum.

smari@bb.is

Búðin opnar á ný

Verslunin í Norðurfirði. Ágreiningur um lögheimilisskráningu kom upp í Árneshreppi stuttu fyrir kosningar í vor. Myndin tengist fréttinni ekki.

Tekist hefur að finna nýjan rekstraraðila í verslun í Árneshreppi á Ströndum en útibúi Kaupfélags Steingrímsfjarðar í Norðurfirði var lokað um mánaðamótin. Frá 1. nóvember þurfa íbúar því ekki lengur að aka 100 kílómetra í næstu verslun. Eva Sigurbjörnsdóttir, oddviti Árneshrepps, segir í samtali við fréttastofu RÚV, að vinna sveitarfélagsins við að finna nýjan rekstaraðila hafi tekist og stefnt að því að verslun opni á ný þann 1. nóvember og innan tíðar verði veittar nánari upplýsingar um fyrirkomulag rekstarins.

Ætla í eldi á geldfiski

Eldislaxinn er drjúg tekjulind fyrir ríkissjóð.

Fisk­eldi Aust­fjarða áætl­ar að auka ár­lega slátrun úr fisk­eld­inu úr 11 þúsund tonn­um í 21 þúsund tonn í Beruf­irði og Fá­skrúðsfirði. Fyr­ir­tækið met­ur erfðablönd­un við villt­an lax ólík­lega. Þetta kem­ur fram í frummati á um­hverf­isáhrif­um, sem fyr­ir­tækið hef­ur lagt fram. Þetta er fyrsta tilkynnta framleiðsluaukningin í laxeldi sem kemur fram eftir að áhættumat Hafrannsóknastofnunar kom fram.

Áætlanir fyrirtækisins taka mið af áhættumatinu og í fyrsta skipti í sögu íslensks laxeldis er sótt um eldi á geldfiski.

Í Berufirði er áætlað að ala 6.000 tonn af frjóum laxi og 4.000 tonn af geldlaxi. Í Fáskrúðsfirði verða alin 6.000 tonn af frjóum laxi og 5.000 tonn af geldlaxi.

Eins og kunnugt er lagðist Hafrannsóknastofnun gegn laxeldi í Ísafjaðrardjúpi í samræmi við niðurstöðu áhættumatsins. Það á hins vegar ekki við um eldi á geldfiski.

smari@bb.is

Eftirlaun og atvinnuþátttaka

Ásmundur Einar Daðason

Talsverðar breytingar urðu á lífeyriskerfinu um síðustu áramót. Ýmislegt jákvætt hefur áunnist með þessum breytingum en það eru þættir sem þarf að lagfæra. Einn af þeim þáttum sem þarfnast breytinga er sú staðreynd að nýja kerfið er atvinnuletjandi fyrir þá sem komnir eru á eftirlaun. Þetta er þáttur sem mikilvægt er að breyta.

Við endum öll á því að verða gömul en sem betur fer eldast mörg okkar mjög vel og halda starfsorku langt fram yfir lífeyrisaldur. Það er sorglegt þegar samfélagið lítur svo á að um leið og fólk komist á lífeyrisaldur þá sé þeirra hlutverk það eitt að bíða eftir endalokunum. Við þurfum að virkja þennan hóp, þeir sem vilja vinna eiga að geta það og allir hvatar þurfa að vera í þá átt.

Virkjum fólk til vinnu

Margir sem komnir eru á eftirlaun vilja áfram vera hluti af íslenskum vinnumarkaði en gera það ekki vegna þess hve lág mörk eru fyrir skerðingum á lífeyristekjum. Mér er ómögulegt að skilja hvernig það getur verið samfélagslega hagkvæmt að einstaklingar sem hafa fulla starfsorku séu fjötraðir heima í stað þess að taka þátt í samfélaginu. Það þjóðhagslega hagkvæmt að virkja fólk til vinnu.

 Hvati til atvinnuþátttöku

Atvinnuleysi á Íslandi er innan við 2% sem er með því lægsta sem þekkist í heiminum. Það hefur verið mikil spenna á vinnumarkaði undanfarin ár og því er mikið af erlendu starfsfólki sem starfar á Íslandi. Þrátt fyrir að þessir erlendu starfsmenn greiði skatta þá taka þeir oft á tíðum ekki jafn mikinn þátt í íslensku hagkerfi. Tekjur sem eldri borgarar vinna fyrir eflir íslenskt hagkerfi mun meira.  Það má því með sanni segja að það sé þjóðhagslega hagkvæmt að hvetja til þess að fólk fari í vinnu ef aðstæður leyfa.

Aukin atvinnuþáttaka er heilbrigðismál

Í stefnumótun um heilbrigðismál er ævilega lögð áhersla á fyrirbyggjandi aðgerðir. Það er fátt meira fyrirbyggjandi heldur en hvetja til þess að fólk haldi áfram að taka þátt í samfélaginu eftir að það hefur náð eftirlaunaaldri.

 Forgangsmál að breyta frítekjumörkum

Þeir sem komnir eru á lífeyrisaldur eru einstaklingarnir sem mótuðu þá nútíð sem við lifum og störfum í. Við eigum að bera virðingu fyrir þessu. Það á að nýta krafta þessa hóps og virkja til þátttöku á íslenskum vinnumarkaði. Framsókn leggur áherslu á að það verði eitt af fyrstu verkefnum nýrrar ríkisstjórnar að breyta frítekjumörkum þannig að eldra fólk sjái hag í því að fara út á vinnumarkaðinn.

Ásmundur Einar Daðason

 

Rífandi gangur í blakinu

Meistaraflokkur kvenna í blaki fer vel af stað í 1. deild Íslandsmótsins og lagði ÍK sannfærandi í fyrstu tveimur leikjum mótsins 3 – 0. Fyrsti leikur á útivelli var leikin á laugardaginn,  leikar fóru þannig að fyrri tvær hrinurnar fóru báðar 25 – 20 en sú þriðja 25 – 10.

Næst mætir liðið HK B 20. október á útivelli.

Meistaraflokkur karla á sinn fyrsta leik í Íslandsmótinu sunnudaginn 22. október á heimavelli þegar BF frá Siglufirði mætir á Ísafjörð.

bryndis@bb.is

Nýjustu fréttir