„Við óskum eftir fólki til þess að útbúa margnota poka sem síðan verður dreift í verslanir á svæðinu og notaðir í stað plastpoka“ segir í tilkynningu á vef Vesturbyggðar og í kvöld á að hittast í Húsinu, Aðalstræti 72 á Patreksfirði og sauma poka.

Einnig er óskað eftir bolum til þess að nota í pokagerðina. Koma má með boli á viðburðinn en einnig er karfa fyrir utan húsið þar sem skilja má bolli eftir fyrir verkefnið.

Ætlunin er að útbúa 300 poka næstu 4 þriðjudaga og eftir það starta verkefninu í verslunum á svæðinu.

Lesa má nánar um verkefnið á vef Hússins.

bryndis@bb.is

Fjar­skipta­fyr­ir­tækið Nova kynnti í morg­un að fyr­ir­tækið hafi sett í loftið fyrstu 4,5G send­ana. Nova áætl­ar að fjár­festa fyr­ir um 1 millj­arð á ári næstu tvö árin og að megnið af fjár­fest­ing­um fé­lags­ins mun fara í upp­bygg­ingu 4,5G kerf­is­ins.

Í frétta­til­kynn­ingu frá Nova seg­ir að það sé meðal fyrstu farsíma­fyr­ir­tækja í Evr­ópu til þess að hefja slíka þjón­ustu en áætlað er að net­hraði í farsím­um viðskipta­vina Nova muni u.þ.b. þre­fald­ast. Nova hef­ur á síðustu vik­um sett upp fyrstu 4,5G send­ana og því geta þeir sem eru með nýj­ustu farsím­ana nú þegar tengst 4,5G kerf­inu, en á af­mörkuðum svæðum til að byrja með.

Þá hef­ur verið hrint af stað sér­stöku tækni­verk­efni und­ir yf­ir­skrift­inni Nova X, sem fel­ur í sér inn­leiðingu á fjöl­mörg­um tækninýj­ung­um. Til að mynda verður inn­leidd ný tækni sem nefn­ist VoLTE (Voice over LTE) og fel­ur hún í sér að sím­töl­um er streymt yfir netið, í stað þess að þau fari um sím­kerfi.
Seg­ir í til­kynn­ing­unni að VoLTE muni stór­bæta bæði hljóm í sím­töl­um sem og gæðum myndsím­tala en um sé að ræða bæði háskerpu hljóð og mynd. Þá muni teng­ing sím­tala verða marg­falt hraðari. Stuðning­ur við VoLTE tækn­ina verði í flest­um nýj­um farsím­um en sé nú ein­göngu í Sam­sung S7 hjá Nova.

„Þetta var misskilningur milli mín og blaðamanns og ég hef beðið Fréttablaðið um leiðréttingu,“ segir Valgerður Gunnarsdóttir, formaður samgöngunefndar Alþingis. Á forsíðu Fréttablaðsins í dag er haft eftir henni að mögulega verði gjaldtaka í Dýrafjarðargöngum. „Það er af og frá að það verði gjaldtaka í Dýrafjarðargöngum,“ segir Valgerður. Hún segir að frá því að fréttin birtist í dag hafi hún fengið símtöl frá fólki að vestan þar sem hún var spurð út í málið. „Og það er vel skiljanlegt. En ég get fullvissað Vestfirðinga um að það stendur ekki til að innheimta gjald í Dýrafjarðargöngum,“ segir Valgerður.

Framkvæmdir við Dýrafjarðargöng hófust í síðasta mánuði og samkvæmt áætlunum verða þau fullbúin haustið 2020.

„Það verða ekki veggjöld í Dýrafjarðargöngum og Sjálfstæðisflokkurinn er alls ekki að leggja það til,“ segir Teitur Björn Einarsson, þingmaður flokksins í Norðvesturkjördæmi. Í Fréttablaðinu í dag er haft eftir Valgerði Gunnarsdóttur að mögulega verði gjaldtaka í Dýrafjarðargöngum. Valgerður er þingmaður Sjálfstæðisflokksins í Norðausturkjördæmi og formaður samgöngunefndar Alþingis. Í Fréttablaðinu er rætt við Valgerði um gjaldtöku í vegakerfinu og þá sérstaklega nýja skoðanakönnun þar sem almenningur var spurður um afstöðu til vegtolla á stofnbrautum til og frá Reykjavík. Valgerður segir orðrétt: „Við erum ekkert eina þjóðin sem hefur velt þessum hlutum upp. Við erum með Hvalfjarðargöngin, þar sem er gjaldtaka, Vaðlaheiðargöngin þar sem verður gjaldtaka, við erum með Dýrafjarðargöngin, mögulega með gjaldtöku.“

Laxveiðin í sumar var 10% yfir langtímameðaltali (1974-2016) og 14% lakari en í fyrra. Laxveiðitímabilinu er nú lokið í flestum ám landsins. Enn er þó veitt í ám þar sem uppistaðan í veiðinni er lax úr sleppingum gönguseiða, en þar stendur veiði til 20. október. Þetta kemur fram á vef Hafrannsóknastofnunar.

Bráðabirgðatölur yfir stangveiði á laxi sumarið 2017 sýna að alls veiddust um 46.500 laxar. Í heild var fjöldi stangveiddra laxa um 10% yfir langtímameðaltali áranna 1974-2016 sem er 41.880 laxar. Veiðin 2017 var um 6.800 löxum minni en hún var 2016, þegar 53.329 laxar veiddust á stöng. Í tölum um heildarlaxveiði eru þeir laxar sem upprunnir eru úr sleppingum gönguseiða og einnig þeir laxar sem er sleppt aftur í stangveiði, oftast kallast veitt og sleppt.

Veiði á suðvest­ur­landi var meiri en í fyrra en veiði á Vest­ur­landi svipuð og 2016. Í öðrum lands­hlut­um hafi veiðin dreg­ist sam­an á milli ára. Veiðin í ár hafi verið best í mörg­um ám seinni hluta veiðitíma­bils­ins. Veiði á stór­laxi hafi þó verið með minna máti. Sama hafi gilt um smá­laxa, nema á Vest­ur­landi.

Í frétt­inni seg­ir að breyti­leiki á milli ára sé meiri síðustu ár en áður séu dæmi um. Ástæðurn­ar megi rekja til breyt­inga á af­föll­um laxa í sjó. Fæðuskil­yrði ráði þar miklu um.

„Þetta eru í besta falli hugmyndir á blaði og ég sé ekki hvernig þessi nálgun á mikilvægt mál á að gagnast okkur í framtíðinni,“ segir Pétur G. Markan, sveitarstjóri Súðavíkurhrepps, um skýrslu verkefnastjórnar um stöðu og framtíð íslenskra sveitarfélaga. Í skýrslunni er lagt til að hækka lág­marks­fjölda íbúa í skref­um þannig að ekki verði færri en 1.000 íbú­ar í hverju sveit­ar­fé­lagi í árs­byrj­un 2026 og að sam­ein­ing­ar vegna þess verði ekki born­ar und­ir íbúa í at­kvæðagreiðslu.

Verk­efn­is­stjórn­in set­ur fram tólf til­lög­ur í skýrsl­unni. Ein þetta er að hækka lág­marks­fjölda íbúa í þrep­um. Í árs­byrj­un 2020 skuli lág­marks­í­búa­fjöldi vera 250 íbú­ar, 500 í árs­byrj­un 2022 og 1.000 árið 2026.

Í Súðavíkurhreppi búa um 200 manns og verði tillögurnar að veruleika mun sveitarfélagið verða þvingað til sameiningar á næstu tveimur árum.

Pétur segir að hann skilji ekki þá nálgun að setja öll lítil sveitarfélög undir sama hatt, óháð því hvernig þau standa. „Súðavíkurhreppur er frábært dæmi um lítið sveitarfélag sem stendur á traustum fótum rekstrarlega og veitir góða þjónustu. Við rekum góðan grunnskóla, leikskóla, tónlistarskóla og veitum félagslega þjónustu í samvinnu við Bolungarvíkurkaupstað. Ég vona hreinlega að ríkið hafi ekki greitt of mikið fyrir þessa nefndarvinnu því skýrslan er gagnslaust plagg, því miður,“ segir Pétur.

Þrátt fyrir að vera andsnúinn tillögum sem koma fram í skýrslunni er Pétur ekki mótfallinn sameiningum sveitarfélaga. „Það hefur komið fram hjá mér áður að ég sé fyrir að einhvern tímann í framtíðinni verði eitt sveitarfélag við Djúp. En sú ákvarðanataka þarf að byggja á betri vinnu en þessari skýrslu. Það er til að mynda frumskilyrði að innviðir í sameinuðu sveitarfélagi séu í lagi. Ég nefni göng milli Álftafjarðar og Skutulsfjarðar, það sé hver maður að það gengur ekki í sameinuðu sveitarfélagi að íbúar þurfi að keyra um hættulegasta veg landsins til að sækja grunnþjónustu.“

Útibúi Kaupfélags Steingrímsfjarðar í Norðurfirði í Árneshreppi var lokað um mánaðamótin og hreppurinn því án verslunar. Um 100 km leið er í næstu verslun á Hólmavík, um veg sem teppist í fyrstu snjóum og er ekki ruddur yfir háveturinn. Sveitarstjórn Árneshrepps hefur leitað að nýjum aðila til að reka verslunina og í samtali við fréttastofu RÚV staðfestir Eva Sigurbjörnsdóttir oddviti að sú vinna hafi borið árangur.Stefnt er að því að nýr rekstur hefjist frá 1. nóvember og innan tíðar verða veittar nánari upplýsingar um fyrirkomulag rekstarins.

Það var svalt í morgunsárið en spáð er hægri breytilegri átt næsta sólarhringinn, en norðaustan 5-13 síðdegis á morgun. Skýjað með köflum og yfirleitt þurrt. Hiti 4 til 9 stig, en svalara í nótt.

Það eru hálkublettir á Mikladal og Hálfdán og hálka á Steingrímsfjarðarheiði og Þröskuldum. Hálkublettir eru einnig á Drangsnesvegi og vegum í kringum Hólmavík.

bryndis@bb.is

Mögulega verður innheimt gjald fyrir að aka í gegnum Dýrafjarðargöng. Þetta kemur fram í viðtali við Valgerði Gunnarsdóttur, þingmann Sjálfstæðisflokksins og formann umhverfis- og samgöngunefndar Alþingis. Í Fréttablaðinu í dag er rætt við hana um gjaldtöku í vegakerfinu og þá sérstaklega nýja skoðanakönnun þar sem almenningur var spurður um afstöðu til vegtolla á stofnbrautum til og frá Reykjavík. Valgerður segir orðrétt: „Við erum ekkert eina þjóðin sem hefur velt þessum hlutum upp. Við erum með Hvalfjarðargöngin, þar sem er gjaldtaka, Vaðlaheiðargöngin þar sem verður gjaldtaka, við erum með Dýrafjarðargöngin, mögulega með gjaldtöku.“

Þjóðin tvískipt í afstöðu til vegtolla

Samkvæmt niðurstöðum skoðanakönnunar Fréttablaðsins, Stöðvar 2 og Vísis segjast 56 prósent þeirra sem afstöðu taka ekki vera reiðubúnir til að greiða veggjöld ef stofnbrautir frá Reykjavík verða tvöfaldaðar. Um 44 prósent segjast vera reiðubúin til að greiða veggjöld. Séu svörin skoðuð í heild segjast 38 prósent vera reiðubúin til að greiða veggjöld, 48 prósent segjast ekki reiðubúin til þess, 13 prósent segjast óákveðin en eitt prósent svarar ekki spurningunni.

Dagana 30.september til 6.október dvöldust 8 grunnskólanemendur úr Ísafjarðarbæ ásamt fararstjórum, í Kaufering í Þýskalandi, sem er vinabær Ísafjarðarbæjar. Nemendur héldu til á einkaheimilum og tóku þátt í daglegu lífi heimilisfólksins. Farið var í Montesureskóla þar sem skólastarfið er nokkuð frábrugðið því sem krakkarnir eiga að venjast. Til að mynda er enginn nemandi með síma á meðan skóli stendur yfir frá kl. 8 -15. Frá þessu segir á vef Grunnskóla Ísafjarðar.

Það var farið í margar skoðunarferðir t.d í Neuschwanstein sem er ævintýrakastali frá 19. öld, októberfest í Munchen og til Dachau sem voru fangabúðir nasista í seinni heimstyrjöldinni.