Vestfirska forlagið hefur gefið út bókina Allt þetta fólk – Þormóðsslysið 18. febrúar 1943 eftir sr. Jakob Ágúst Hjálmarsson. Þormóðsslysið er ein mesta blóðtaka sem nokkurt íslenskt byggðarlag hefur orðið fyrir. Þá fórust 31 maður, þar af 9 konur og eitt barn. Í hópnum voru 6 hjón og pör, blómi samfélagsins á Bíldudal.  Þormóður var á leið frá Patreksfirði til Reykjavíkur og fórst við Garðskaga. Enginn komst lífs af.

Slysið sló alla þjóðina óhug og harmi og umfjöllun um það fyllti öll blöð langan tíma á eftir og olli ofan á allt stjórnmáldeilum. Landsmenn fundu til ríkrar samúðar og á opinberum vettvangi voru minningarstundir. Í Dómkirkjunni var minningarstund yfir kistum fimm skipverja sem þá höfðu fundist.

Sr. Jakob er frá Bíldudal og hefur lifað með þessum minningum og að hvatningu úr hópi þeirra 56 barna sem fólkið lét eftir sig og mörgu barnabarna sem af þeim eru komin hefur hann ritað þessa bók.

Í bókinni er fjallað um byggðarlagið sem fyrir áfallinu varð og farnað þess, æviágrip fólksins sem fórst, kringumstæður ferðalagsins, skipið Þormóð og siglingu þess, rannsókn skipstapans og deilurnar sem urðu í kjölfarið. Þá eru birt minningarorð um hin látnu sem birtust í blöðunum á sínum tíma.
Bókin geymir og fjölbreytt myndefni sem sýnir þau sem í hlut áttu og það sem varðar örlagaför þeirra. 160 blaðsíður.
Hvernig hefur Þormóður getað farist með öllu þessu fólki? Þessi spurning lýsir vel viðbrögðunum við ótíðindunum sem og óhugnaði þeirra og er um leið grunnspurning bókarinnar.

Sr. Jakob þjónaði Ísafjarðarprestakalli um árabil. Að lokinni messu í Ísafjarðarkirkju á sunnudaginn ætlar sr. Jakob að kynna bókina í safnaðarheimilinu.

smari@bb.is

Skammt austan við Ísland er nú 963 millibara lægð. „Nú kunna einhverjir að hafa sopið hveljur við að heyra svo lága þrýstitölu, en merkilegt nokk sleppa flestir landsmenn nokkuð vel frá þessari lægð,“ segir í hugleiðingum veðurfræðings á Veðurstofu Íslands. Illu heilli verður mesta hvassviðrið á Vestfjörðum en aðrir landshlutar sleppa með strekking í mesta lagi.

Það verða helst Vestfirðir sem fá hvassvirði en aðrir landshlutar sleppa með strekking í mesta lagi. Lægðinni fylgir rigning og eins og vera ber í norðanátt verður hún mest á norðanverðu landinu. Það mun þó einnig rigna sunnanlands þegar myndarlegt úrkomusvæði lægðarinnar dreifir úr sér suður yfir heiðar. „Þó áttin sé norðlæg, kólnar ekki á landinu, enda er um að ræða milt loft sem ferðast hefur sunnanað með lægðinni. Þegar veðurfræðingar leyfa sér að tala frjálslega er slík norðanátt stundum nefnd „bakflæði“,“ segir veðurfræðingurinn.

Á morgun grynnist lægðin, en nær þó að viðhalda allhvössum vindi á Vestfjörðum og rigningu norðanlands. Sunnan megin á landinu verður þokkalegt veður eða fremur hægur vindur og þurrt fram eftir degi, en þar hvessir annað kvöld og fer að rigna þegar skil næstu lægðar koma inn á landið.

smari@bb.is

Engar vísbendingar eru um stóra slysasleppingu úr laxeldiskvíum á Vestfjörðum. Að beiðni Landssambands veiðifélaga kannaði Fiskistofa ástand í sjö ám á Vestfjörðum; í Dýrafirði, Arnarfirði, Súgandafirði og í Ísafjarðardjúpi. Guðni Magnús Eiríksson, sviðstjóri á lax- og silungaveiðisviði Fiskistofu, segir að verið sé að taka saman niðurstöður athugunarinnar og of snemmt að segja til um það hvort eldislaxar hafi veiðst. Ekkert bendi þó til að stórfelld slepping hafi átt sér stað. Í athuguninni voru tekin sýni úr fiskum sem verða rannsökuð nánar.

Í Morgunblaðinu í dag er greint frá að Veiðifélag Laugardalsár hafi fengið leyfi hjá fiskistofu til að draga fyrir lax neðarlega í ánni, en lax sem að öllum líkindum er eldislax veiddist í ánni seint í síðasta mánuði.

smari@bb.is

Bolungarvíkurkaupstaður opnar bókhald bæjarins og íbúar og aðrir vefnotendur geta nú farið inn á svæði sem birtir fjárhagsupplýsingar sveitafélagsins.

Þar gefst kostur á að fylgjast með hreyfingum fjármagns sem um sveitarfélagið fara. Veflausnin býður upp á myndræna framsetningu í súluritum, kökum og hlutfallsmyndum.

Þegar komið er inn á síðuna er hægt að velja fjóra yfirflokka.

• Hvert fara peningarnir – allir flokkar.
• Hvaðan koma peningarnir og þar er hægt að sjá skiptinguna á skatttekjum.
• Hvert fara peningarnir – greining en þar er hægt að fara inn á hverja deild til að skoða bæði tekjur, vörukaup og þjónustukaup og hverjir eru helstu lánadrottnar.
• Hvert fara peningarnir – lánadrottnar en þar má sjá alla lánadrottna eftir stærð.

Hægt er að takmarka val við nokkra þætti í stað allra með því að nota  „ctrl“-takka lyklaborðsins til að velja viðkomandi þætti. Til að hreinsa er ýtt á strokleðrið fyrir ofan valgluggana.

bryndis@bb.is

Jón Gunnarsson, samgöngu- og sveitarstjórnarráðherra hefur ákveðið að verja samtals 100 milljónum króna af fjárveitingu byggðaáætlunar árið 2018 til að gera strjálbýlum sveitarfélögum hægara um vik við lagningu ljósleiðarakerfa. Sambærilegur styrkur var veittur vegna slíkra framkvæmda árið 2017.

Að þessu sinni verður 14 sveitarfélögum boðinn styrkur, samtals að upphæð 90 milljónir króna. Styrkupphæð hvers sveitarfélags ræðst af fjárhagsstöðu og meðaltekjum íbúa, byggðaþróun síðastliðin 10 ár, þéttleika og hlutfalli ótengdra staða sem og fjarlægð byggðar frá þjónustukjarna og ástandi vega.

Á Vestfjörðum eru það Strandabyggð, Vesturbyggð og Tálknafjarðarhreppur sem munu eiga þess kost að sækja um styrki í þennan sjóð árið 2018.

Að auki verður samtals 10 miljónum úthlutað beint til tiltekinna byggðalaga sem falla undir verkefnið Brothættar byggðir.

Styrkupphæð til hvers sveitarfélags er á bilinu 1,0 – 15,1 m.kr.

Markmið byggðastyrksins er að bæta samkeppnisstöðu tiltekinna sveitarfélaga gagnvart umsóknum þeirra í samkeppnispott fjarskiptasjóðs. Umsóknarferli fjarskiptasjóðs vegna 2018 verður kynnt á næstunni.

smari@bb.is

Ólafur Valsson dýralæknir tekur við versluninni í Norðurfirði í Árneshreppi en búðin mun opna á nú þann 1. nóvember. Kaupfélag KSH á Hólmavík ákvað að leggja niður útibúið í Norðurfirði og auglýsti hreppsnefnd nú í september eftir nýjum rekstraraðila.

Ólafur svaraði kallinu en hann starfaði við dýralækningar um árabil á sínum yngri árum, m.a. í Strandasýslu með aðsetur á Hólmavík. Hann þekkir því nokkuð til svæðisins. Hann hefur enn fremur verið héraðsdýralæknir í Eyjafjarðarsýslu og víðar í um hálfan annan áratug. Hann starfaði í áratug við framfylgni reglna um matvælaöryggi og fleira á erlendri grund og síðustu fimm ár við ráðgjafarstörf á sviði matvælaframleiðslu og landbúnaðarmála víða um lönd. Sem ungur maður starfaði hann með námi við ostagerð. Frá þessu er greint á fréttavefnum Litlahjalla.

Ólafur hefur áhuga á að brydda upp á nýjungum í byggðarlaginu og stuðla jafnvel að framleiðslu matvæla í heimabyggð sem er áhugasvið hans.

Það er þungu fargi létt af íbúum Árneshrepps við þessi tíðindi og fögnuður yfir því að fá nýtt fólk í sveitina.

smari@bb.is

Í Vísindaporti Háskólaseturs Vestfjarða á föstudag verður fjallað um málefni sem mörgum kann að þykja viðkvæmt en er engu að síður mikilvægt umfjöllunarefni. Ísfirðingurinn Veiga Grétarsdóttir fæddist í líkama drengs en fann snemma að þar átti hún ekki heima. Hún mun deila reynslu sinni í Vísindaporti og fjalla m.a. um kynleiðréttingarferlið hér á landi, sem hún hóf fyrir u.þ.b. þremur árum.

Í erindi sínu mun Veiga, sem áður hét Grétar Veigar Grétarsson, einnig fjalla um þunglyndið, fordómana og vanlíðanina sem fylgir því að geta ekki verið maður sjálfur og þá ánægju sem fylgdi því þegar hún gat loks verið hún sjálf. Einnig mun hún segja frá muninum á því að vera kona í stað karls í samfélagi.

Veiga Grétarsdóttir er fædd á Ísfirði og ólst þar upp sem strákur. Hún flutti búferlum frá Ísafirði rétt eftir tvítugt en er nú flutt aftur heim eftir tuttugu ára fjarveru og starfar við Grunnskólann á Ísafirði. Í millitíðinni hefur hún búið á Akureyri, í Reykjavík, Noregi og nú síðast á Reyðafirði. Veiga er menntaður rennismiður og hefur unnið sem slíkur megnið af starfsævinni eða í um tvo áratugi. Einnig hefur hún starfað við smíðar og bílaviðgerðir ásamt því að vera menntuð sem förðunarfræðingur.

Vísindaportið fer fram í kaffistofu Háskólaseturs Vestfjarða  á föstudaginn frá kl 12.10-13.00 og er opið öllum áhugasömum.

smari@bb.is

Það er komið að því, grátt á fjallatoppum og það er farið að kólna.

Spáin hljóðar upp á norðaustan 5-13 m/s og þurrt að kalla, en fer að rigna í fyrramálið. Norðaustan 10-18 síðdegis á morgun og 13-20 annað kvöld. Hiti 3 til 8 stig.