Einn ökumaður var kærður í liðinni viku fyrir að aka undir áhrifum fíkniefna. Sá hafði verið stöðvaður við umferðareftirlit á Vestfjarðarvegi, í Arnkötludal. Lögreglan hafði auk þess mælt hraða bifreiðarinnar yfir hámarkshraða. Þá kom í ljós að ökumaðurinn hafði aldrei öðlast ökuréttindi. Við leit í bifreið mannsins fundust kannabisefni sem voru haldlögð.

Alls voru 26 ökumenn kærðir fyrir of hraðan akstur í liðinni viku í umdæmi lögreglunnar á Vestfjörðum,

Lögreglunni bárust alls þrjár tilkynningar um að ekið hafi verið á búfé í umdæminu nýliðna viku. Atvikin urðu við Arnarnes, í Hestfirði og Álftafirði.

Skráningarplötur voru teknar af þremur ökutækjum í Bolungarvík. En viðkomandi ökutæki höfðu ekki verið færð til lögbundinnar skoðunar. Bifreiðaeigendur eru hvattir til að sinna þessum þætti í tíma svo ekki komi til gjalds og eða þess óhagræðis að ökutæki séu tekin úr umferð með þessum hætti.

Tilkynnt var um 6 umferðaróhöpp í liðinni viku. Í tveimur tilvikum var um bílveltu að ræða. Slys á ökumönnum og farþegum urðu ekki alvarleg í þessum tilvikum en tjón á ökutækjum töluvert.

Í vikunni lagði lögreglan hald á eitt skotvopn og skotfæri. Umráðamaður þessa hafði farið óvarlega með vopnið og varsla þessara hluta ekki lögum samkvæmt.

Landsamband smábátaeigenda ályktaði á fundi sínum í síðasta mánuði um auknar línuívilnanir til handa smábátum undir 30 brúttótonn. Á vef samtakanna kemur fram að línuveiðar séu umhverfisvænar og að ívilnun ætti að vera bundin við stærð báta en ekki hvort línunni sé beitt eða meðhöndluð í landi.

Eftirfarandi samþykkt var birt á vef samtakanna í gær:

 Stjórn LS ítrekar fyrri ályktanir um línuívilnun fyrir alla dagróðrabáta minni en 30 brúttótonn.

 Línuveiðar dagróðrabáta eru afar umhverfisvænar og skila fiski í hæsta gæðaflokki til áframhaldandi meðhöndlunar í landi.  

 Auknar línuveiðar auka þannig gott orðspor íslensks sjávarútvegsí umgengni um náttúruna og ferskleika aflans.

bryndis@bb.is

Teitur Björn Einarsson alþingismaður telur að rétt og eðlilegt sé að Alþingi heimili framkvæmdir við vegagerð um Teigskóg með sérstökum lögum þegar í haust. Í grein sem hann ritar á bb.is í dag kemur fram að hann telji að öll efnisleg atriði liggi fyrir hvað varðar umhverfisáhrif vegna vegagerðarinnar, búið sé að taka tillit til margvíslegra athugasemda og draga verulega úr neikvæðum áhrifum framkvæmdarinnar á umhverfið. Þær tafir sem nú eru uppi snúi að stjórnsýslulegum formreglum.

Teitur segir að í ljósi gríðarlegra almannahagsmuna muni það nokkuð vandalaust að rökstyðja nauðsyn fyrir sérstakri heimild til framkvæmda með lögum.

Bryndis@bb.is

Samgönguráðherra hefur skipað starfshóp til að kanna mögulegar leiðir til að niðurgreiða innanlandsflug fyrir þá sem búa fjarri höfuðborginni.
Njáll Trausti Friðbertsson, þingmaður Sjálfstæðisflokks, er formaður starfshópsins, segir að hópurinn eigi bæði að skoða hvað gert sé í Noregi og einnig svokallaða skosku leið. „270-280 þúsund manns ef ég man rétt sem búa í dreifbýlinu fjarri helstu borgum Skotlands eru í hóp sem hefur rétt á ákveðnum afsláttarkjörum í flugi. Það eru 5-6 reglur á bak við það sem við ætlum að skoða hvernig myndu henta íslenskum aðstæðum. Þetta var 40% afsláttur en er nú komið í 50% af fullu fargjaldi. Norska leiðin er síðan kannski aðeins flóknari og snýr meira að fjármögnun flugleiða og flugvallarkerfisins,“ segir Njáll Trausti í samtali við fréttastofu RÚV.

Að mati Njáls Trausta er innanlandsflugið í raun almenningssamgöngur og geti komið í staðinn fyrir þá sem búa fjarri höfuðborginni. Hann bendir á að eins og stjórnkerfi Íslands hefur verið byggt upp undanfarin ár, hvort sem það er í heilbrigðisþjónust, mennta- eða menningarmálum þá hefur uppbyggingin verið á höfuðborgarvæðinu. „Ef þessar samgöngur eru ekki í lagi; aðgengi að borginni þá erum við ekki í góðum málum.“

Hið árlega Íslandsmót í hrútadómum fór fram á Sævangi í Steingrímsfirði um helgina. Guðbrandur Sverrisson á Bassastöðum var hlutskarpastur hrútaþuklara. Í öðru sæti í flokki vanra þuklara varð Árný Huld Haraldsdóttir á Bakka í Geiradal og í þriðja sæti varð Ragnar Bragason á Heydalsá.
Í óvana flokknum sigraði borgarbarnið Jón Kristófer Fasth. Í öðru sæti varð Sigríður Övarsdóttir og í þriðja sæti varð Elín Þóra Stefánsdóttir í Bolungarvík.

Vinninga í hrútaþuklinu gáfu Sauðfjársæðingastöð Vesturlands, Hótel Djúpavík, Hólmadrangur, Bleksmiðjan (sem gaf sigurvegara í flokki vanra inneign í húðflúr) Norðursalt, Skógrækt ríkisins (sem gaf trjáplöntur), Matthías Lýðsson, Klúkubúið, Sauðfjársetur á Ströndum og Náttúrubarnaskólinn.

Stefnt er að því að fækka sauðfé um allt að 20% hér á landi til lengri tíma í því skyni að draga úr framleiðslu á lambakjöti. Þetta kemur fram í hugmyndum Þorgerðar Katrínar Gunnarsdóttur sjávarútvegs- og landbúnaðarráðherra til þess að leysa vanda sauðfjárbænda, en þær voru kynntar atvinnuveganefnd Alþingis í dag. Ráðherra sagði samtali við fréttastofu RÚV að leysa þurfi vanda sauðfjárbænda með langtímaaðgerðum til að koma í veg fyrir að þetta verði endurtekið efni. Það verði meðal annars gert með uppkaupum ríkisins á ærgildum til þess að fækka fé og draga úr framleiðslu.

Sauðfjárbændur sjá fram á verulegan tekjumissi í haust eftir að afurðastöðvar boðuðu þriðjungs lækkun á afurðaverði sem kemur ofan í 10 prósenta lækkun í fyrra.

Landssamtök sauðfjárbænda meta samanlagðan tekjumissi bænda í ár og í fyrra upp á 2,4 milljarða kr.

Óheft ferðamennska er helsta ógn Hornstrandafriðlandsins. Þetta segir Jón Smári Jónsson, landvörður Umhverfisstofnunar í friðlandinu á Hornströndum. Ítarlegt viðtal er við hann á vef Umhverfisstofnunar. Þrátt fyrir að Umhverfisstofnun beri ábyrgð á friðlandinu leggur hann áherslu á að stofnunin geri ein og sér ekki allt og mikilvægt sé að ná sátt og samstöðu við aðra aðila.

„Hornstrandir eru stórt svæði, landverðir „týnast“ auðveldlega inni á þessum 600 ferkílómetrum og þótt við leggjum mikla áherslu á að eiga gott samtal við landeigendur og Ísafjarðarbæ sem fer með skipulagsvald svæðisins þá þarf að nást sátt með þeim sem nýta svæðin, til dæmis ferðaþjónustunni, en nýting getur aldrei verið ofar í forgangsröðunni en þau verndargildi sem lagt er upp með. Ef maður horfir til þeirra gesta sem sækja svæðið þá eru ferðamenn í raun helsta ógnin,“ segir Jón Smári og tiltekur bæði sjónrænan ágang stórra hópa sem og álag á lífríkið.

„Þarna er mjög viðkvæmt lífríki, refurinn er friðaður og okkur Íslendingum ber skylda að vernda dýrastofna sem hér eru stórt hlutfall af heimsstofni. Skandínavíski refurinn er í útrýmingarhættu fyrir utan Svalbarða og Ísland hýsir um 90% heildarstofnsins. Þegar eitt land býr yfir svo háu hlutfalli stofns ber því að sjá refnum fyrir griðlandi og Hornstandir eru mikilvægur hluti þess. Óheft ferðamennska getur í þessu tilliti verið mikil ógn, ekki síst ef gestir eru að koma á fengi- eða grenjatíma refsins.“

Hann dendir á að aukningu ljósmyndaferða til Hornstranda til að mynda refinn. „Jafnvel til að mynda yrðlinga. Það hugnast okkur ekki, enda stangast svoleiðis ferðir við á við lög um vernd, friðun og veiðar á villtum fuglum og villtum spendýrum þar sem segir að óþarfa umgangur sé óheimill við greni.  Það er á gráu svæði að selja svona ferðir,“ segir Jón Smári sem leggur þó áherslu á að langflestir ferðamenn hegði sér yfirleitt vel og almenn umgengni sé að hans mati á mikilli uppleið.