Þriðjudagur 18. mars 2025
Síða 2129

Miklar rigningar um land allt

Á veðurstofunni er varað við áframhaldandi vatnavöxtum á annesjum á Norðurlandi og aukinni hættu á skriðuföllum. Í athugasemdum veðurfræðings á vedur.is segir  að skil séu að fara yfir landið í dag og að stytta muni upp syðra. Talsverð úrkoma á Ströndum og NV-lands í kvöld. Útlit fyrir talsverða eða mikla úrkomu á annesjum N-til fram laugardagsmorgun.

Norðan og norðvestan 10-18, og rigning norðanlands, talsverð á Ströndum og Mið-Norðurlandi, en styttir upp sunnanlands. Norðvestan 10-20 í kvöld, hvassast við NV-ströndina. Talsverð eða mikil rigning eða slydda um tíma á norðanverðum Tröllaskaga í nótt, en lægir og styttir upp á morgun. SV og V 5-13 annað kvöld, skúrir V-til, en annars þurrt. Hiti víða 3 til 8 stig að deginum, mildast syðst.

Í dag
Laugardagur
Sunnudagur

Á sunnudag verður komin vestlæg eða breytileg átt 3-8 m/s. Skýjað með köflum og dálitlir skúrir eða jafnvel slydduél, en léttskýjað austanlands. Hiti 2 til 7 stig yfir daginn, en líkur á næturfrosti, einkum inn til landsins.

bryndis@bb.is

Um Þormóðsslysið

Sr. Jakob Á. Hjálmarsson mun á morgun kynna nýútkomna bóka sína um Þormóðsslysið en um bókina var fjallað á bb.is, kynningin er í Bíldudalskirkju og hefst kynningin kl. 14:00. Á sunnudaginn eftir messu mun Sr. Jakob svo vera með upplestur ú bókinni í Ísafjarðarkirkju.

bryndis@bb.is

Könnun á viðhorfum til innflytjenda

Nýleg könnun á viðhorfum almennings til innflytjenda og fjölmenningarsamfélagsins var kynnt á samráðsfundi sem innflytjendaráð efndi til um framkvæmdaáætlun í málefnum innflytjenda í liðinni viku.

Samkvæmt niðurstöðum könnunarinnar eru landsmenn almennt fremur jákvæðir í garð innflytjenda og fjölmenningarsamfélagsins. Þeir sem eiga í persónulegum tengslum við innflytjendur eru jákvæðari en aðrir og jákvæðastir eru þeir sem tengjast innflytjendum innan fjölskyldu sinnar, t.d. í gegnum hjúskap eða ef þeir eiga innflytjendur að vinum.

Yngsta kynslóðin er áberandi jákvæð fyrir aukningu á innflytjendum og íbúar höfuðborgarsvæðisins voru jákvæðari gagnvart aukningu en landsbyggðin. Greinilegur munur er á afstöðu fráskilinni og einhleypra þar sem einhleypir eru jákvæðari. Jákvæðni eykst nokkuð með aukinni menntun.

Spurt var um afstöðu til fjölda innflytjenda, hvort það ætti að auka eða draga úr fjölda þeirra sem koma til landsins eða halda fjöldanum óbreyttum. Um 36% svarenda vildu auka fjöldann nokkuð eða mikið, um 30% halda honum óbreyttum en 34% vildu draga nokkuð eða mikið úr fjöldanum.

Spurt var um áhrif innflytjenda á íslenskan efnahag. Tæp 60% svarenda töldu innflytjendur hafa góð áhrif á efnahaginn, um 22% hvorki né en 18% töldu áhrif innflytjenda neikvæð.

Könnun Félagsvísindastofnunar var netkönnun og náði til 1.733 einstaklinga í netpanel stofnunarinnar sem byggist á tilviljunarúrtaki úr þjóðskrá. Við samsetningu hans hefur þess verið gætt að dreifing kyns, aldurs, búsetu, menntunar og tekna sé sem líkust því sem hún er meðal landsmanna 18 ára og eldri.

Niðurstöður könnunarinnar eru greindar eftir kyni, búsetu, menntun, tekjum, hjúskaparstöðu, fjölskyldustærð og stöðu á vinnumarkaði og líklegrar afstöðu í kosningum til Alþingis á þeim tíma sem könnunin var lögð fram.

bryndis@bb.is

Bróðir gangbrautarinnar á Ísafirði

Starfsfólk Casa Ceramica í Manchester hannaði og lagði þetta villugjarna gólf á ganginn hjá sér til að koma í veg fyrir hlaup á ganginum. Hvers vegna fólk var hlaupandi um ganga hjá þessu tiltekna flísafyrirtæki er ekki ljóst, hugsanlega er gangurinn bara vel heppnað sýningarherbergi fyrirtækisins.

bryndis@bb.is

Eflum byggðir landsins

Björn Leví Gunnarsson og Eva Pandora Baldursdóttir

Eitt aðalmarkmið Pírata er valddreifing og sjálfsákvörðunarréttur. Að hver og einn geti haft aðkomu að málum sem hann varðar. Af því leiðir sú stefna okkar Pírata að gera eigi sveitarfélög fjárhagslega sjálfstæð til þess að þau geti staðið undir þeirri þjónustu sem þau eiga að veita. Stóra spurningin er, hvernig förum við að því?

Í dag fá sveitarfélög aðallega tekjur frá útsvari einstaklinga og í gegnum fasteignargjöld. Þessum tekjum er ætlað að standa undir þeirri þjónustu sem sveitarfélögum er skylt að veita. Undanfarið hefur ríkið fært ýmis verkefni yfir til sveitarfélaganna án þess að viðeigandi fjármagn fylgi.

Lausnin við þessu er að gera hluta tekjuskatts fyrirtækja og virðisaukaskatt að útsvari til sveitarfélags. Þannig myndi hluti af hagnaði fyrirtækis sem og sala af vöru eða þjónustu fyrirtækis renna til nærsamfélagsins. Hér er nauðsynlegt að taka fram að ef þú kaupir olíu á bensínstöð í Varmahlíð þá myndi hluti virðisaukaskattsins af olíugjaldinu renna til Skagafjarðar en ekki til sveitarfélagsins þar sem bensínstöðin er með höfuðstöðvar. Þeir sem þekkja til í kerfinu telja þetta vera erfitt í framkvæmd, kerfið virkar ekki svona, en við látum slíkt ekki stöðva okkur. Kerfið er mannanna verk og það er hægt að bæta.

Það besta við þessa breytingu er ekki bara að tekjustofnar sveitarfélaganna verða sterkari heldur verður einnig til hvati til þess að laða að annars konar atvinnustarfsemi en þá sem skilar miklum fasteignargjöldum. Ferðamenn sem flakka um landið og kaupa alls kyns þjónustu myndu skila hagnaði beint í sjóði sveitarfélagsins. Veffyrirtækið út í bílskúr færi allt í einu að standa undir rekstri leikskólans.

Þessi breyting er á kostnað ríkissjóðs en afurðin eru öflugri og sjálfstæðari sveitarfélög. Það gagnast okkur öllum, líka ríkissjóði.

Eva Pandora Baldursdóttir og Björn Leví Gunnarsson

Höfundar eru þingmenn og frambjóðendur Pírata í Norðvesturkjördæmi og Reykjavíkurkjördæmi suður

 

Bleiki dagurinn er í dag

Föstudaginn 13. október er Bleiki dagurinn! Þennan dag hvetur Krabbameinsfélagið alla landsmenn til að sýna samstöðu með þeim konum sem greinst hafa með krabbamein. Stuðningur okkar allra skiptir máli. Félagið hvetur fyrirtæki til að skipuleggja bleikt kaffi í vinnunni og bjóða samstarfsfélögum og auðvitað að klæðast bleikum fötum í tilefni dagsins.

Krabbameinsfélagið hvetur alla til að senda skemmtilegar, bleikar myndir af sér, fjölskyldunni, vinahópnum, og vinnufélögunum á netfangið bleikaslaufan@krabb.is og munum við birta þær hjá okkur á Facebook síðu Bleiku slaufunnar. Merkið myndirnar #bleikaslaufan

bryndis@bb.is

Kosið um uppbyggingu á Vestfjörðum

Hafdís Gunnarsdóttir og Teitur Björn Einarsson

Uppbygging fiskeldis, afhendingaröryggi raforku og vegur um Teigsskóg. Þetta eru baráttumálin þrjú sem Vestfirðingar hafa sett á oddinn eftir kröftugar umræður í fjölmiðlum í sumar og fjölmennan borgarafund á Ísafirði fyrir stuttu. Vestfirðingar vita að með afgreiðslu þessara mála er loksins komið tækifæri til að hefja viðsnúning sem hefði í för með sér aukin atvinnutækifæri, bætt búsetuskilyrði, jákvæðan hagvöxt og fjölgun íbúa á svæðinu.

Sjálfstæðisflokkurinn mun beita sér fyrir því að öll þessi mál nái fram að ganga og ætla frambjóðendur flokksins að taka pólitíska forystu í þeim efnum. Það höfum við sýnt í riti og aðgerðum. Þetta ætlum við að gera:

  1. Rjúfa þá kyrrstöðu sem veglagning um Teigsskóg er í. Þingmenn Sjálfstæðisflokksins lögðu fram frumvarp í haust um nákvæmlega það ásamt öllum öðrum þingmönnum kjördæmisins að undanskildum þingmanni VG. Málið verður aftur lagt fram á þingi strax eftir kosningar fáum við til þess umboð frá kjósendum.
  2. Halda áfram með uppbyggingu á fiskeldi, þar með talið í Ísafjarðardjúpi. Allar forsendur er fyrir hendi til þess að byggja upp öfluga atvinnugrein sem byggir á vísindalegri þekkingu og reynslu annarra þjóða. Sjálfstæðisflokkurinn mun hafa forystu um að eldi hefjist án tafa í Ísafjarðardjúpi þar sem mögulegt er að nota raunhæfar mótvægisaðgerðir. Þetta verður gert með ábyrgum hætti þar sem hinn samfélagslegi ávinningur er metinn, eins og umhverfisþátturinn, með réttum og sanngjörnum hætti.
  3. Tryggja að áform um bætt afhendingaröryggi raforku nái fram að ganga. Hvalárvirkjun er í nýtingarflokki rammaáætlunar og er virkjunin nauðsynlegur hlekkur til að byggja skynsamlega upp burðugt flutningskerfi raforku á Vestfjörðum. Ekki kemur að okkar mati til greina að hnikað verði frá þeim áformum og það þarf pólitíska staðfestu til að halda stjórnkerfinu við efnið.

Vestfirðingar hafa vissulega þétt raðirnar sem aldrei fyrr, þvert á pólitískar línur og eru þeir með skýra sýn á hvað þurfi að gera svo Vestfirðir eigi öfluga framtíð. En hér er ekkert sjálfgefið þrátt fyrir vilja og baráttuhug Vestfirðinga til að koma þessum þremur málum í gegn. Pólitíkin þarf að spila með. Vestfirðingar þurfa því að kjósa stjórnmálaflokk sem ætlar að taka slaginn fyrir Vestfirði, taka forystu í baráttumálum svæðisins og sér hvers svæðið er megnugt. Aldrei hefur það verið jafn mikilvægt og núna að kjósendur kynni sér vel hver afstaða stjórnmálaflokkanna er varðandi málefni Vestfjarða því afturhaldssinna má finna víða. Við frambjóðendur Sjálfstæðisflokksins erum klár í þennan slag og ætlum að tryggja öfluga framtíð Vestfjarða fáum við umboð til þess. Við kjósum Vestfirði.

Teitur Björn Einarsson, þingmaður og skipar 3. sæti á lista Sjálfstæðisflokksins í Norðvesturkjördæmi

Hafdís Gunnarsdóttir, varaþingmaður og skipar 4. sæti á lista Sjálfstæðisflokksins í Norðvesturkjördæmi

Okkar fólk á skjánum í kvöld

Fréttastofa Stöðvar 2 ræðir við oddvita stjórnmálaflokkana í Norðvesturkjördæmi og þar munu sitja fyrir svörum Arna Lára Jónsdóttir fyrir hönd Samfylkingar, Gylfi Ólafsson fyrir hönd Viðreisnar og Lilja Rafney Magnúsdóttir fyrir hönd VG, það má því leiða að því líkum að íbúar á norðanverðum Vestfjörðum muni fylgjast grannt með sjónvarpinu í kvöld.

Fyrir hönd Sjálfstæðisflokksins mætir Haraldur Benediktsson, Ásmundur Einar Daðason fyrir Framsóknarflokkinn, Guðlaug Kristjánsdóttir fyrir Bjarta Framtíð, Magnús Þór Hafsteinsson fyrir Flokk fólksins og Bergþór Ólason fyrir Miðflokkinn.

En það verður væntanlega á Evu Pandóru Baldursdóttir sem flest augu munu hvíla því hún mætir í ekta Píratagerfi. Hún lenti í óhappi með annað augað og þarf að hafa lepp.

Þeir frambjóðendur sem ekki eru í oddvitasætum hafa færri tækifæri að koma sér á framfæri og þurfa að vera hugmyndarík. Rúnar Gíslason hefur birt á facebook síðu sinni hvernig það getur verið að berjast við bráttusætið.

 

Og Jónína Björg Magnúsdóttir fiskverkakona tjaldar ekki kökuskreytingarhæfileikum munninn hefur hún fyrir neðan nefið.

 

 

bryndis@bb.is

Bæjarstjóri og sveitarstjóri hjá Viðreisn

Gylfi Ólafsson.

Gylfi Ólafsson, heilsuhagfræðingur og aðstoðarmaður fjármála-og efnahagsráðherra, leiðir lista Viðreisnar í Norðvesturkjördæmi fyrir alþingiskosningarnar í lok október. Gísli Halldór Halldórsson bæjarstjóri Ísafjarðarbæjar er í 7. sæti og Indriði Indriðason sveitarstjóri Tálknafjarðarhrepps í 13. sæti.

Framboðslisti Viðreisnar í Norðvesturkjördæmi er eftirfarandi:

  1. Gylfi Ólafsson, heilsuhagfræðingur
  2. Lee Ann Maginnis, lögfræðingur
  3. Haraldur Sæmundsson, matreiðslumeistari
  4. Sigrún Helga Lund, dósent í tölfræði
  5. Jón Ottesen Hauksson, framkvæmdastjóri
  6. Ása Katrín Bjarnadóttir, nemi
  7. Gísli Halldór Halldórsson, bæjarstjóri
  8. Ragnheiður Jónasdóttir, verkefnastjóri
  9. Sturla Rafn Guðmundsson, svæðisstjóri RARIK
  10. Arnheiður Steinþórsdóttir, sagnfræðinemi
  11. Ragnar Már Ragnarsson, byggingarfræðingur
  12. Unnur Björk Arnfjörð, skólastjóri
  13. Indriði Indriðason, sveitastjóri
  14. Berglind Long, matreiðslumaður
  15. Pálmi Pálmason, fv. framkvæmdastjóri
  16. Jóhanna Guðrún Jónasdóttir, leikskólakennari

bryndis@bb.is

Styrkir til meistaranema

Byggðastofnun auglýsir styrki til meistaranema sem vinna að lokaverkefnum á sviði byggðaþróunar. Kostur er ef verkefnin hafa skírskotun til byggðaáætlunar. Til úthlutunar er allt að 1.000.000 kr. og stefnt að því að veita fjóra styrki.

Umsækjendur þurfa að stunda meistaranám við viðurkenndan háskóla. Í umsókn skal meðal annars koma fram greinargóð lýsing á verkefninu, markmiðum þess og hvernig það styður við byggðaþróun.  Við mat á umsóknum verður fyrst og fremst litið til tengsla við byggðaþróun, nýnæmi verkefnis og hvort til staðar séu möguleikar á hagnýtingu þess.

Þetta er í fjórða skipti sem Byggðastofnun veitir styrki til meistaranema og hafa tvö verkefni hér að vestan hlotið styrk.

Annars vegar verkefnið „Hagkvæmni nýtingar sjávarhita á norðurslóðum: raundæmi Önundarfjörður“. Styrkþegi var Majid Eskafi nemandi hjá Háskólasetri Vestfjarða. Og hins vegar verkefnið „Eldri íbúar á sunnanverðum Vestfjörðum: Athafnir, þátttaka og viðhorf til þjónustu. Styrkþegi var Margrét Brynjólfsdóttir nemandi  Háskólans á Akureyri.

Hér má nálgast upplýsingar um styrkina.

bryndis@bb.is

1...2.1282.1292.130...2.381Síða 2.129 af 2.381

Nýjustu fréttir

Bæjarins besta
Allt um Vestfirði og Vestfirðinga Hafið samband: bb(hja)bb.is
Hafa samband: bb@bb.is
© Steig ehf