Stjórn Kkd. Vestra og barna- og unglingaráð vinna nú markvisst að því að félagið tefli fram meistaraflokki á ný. Allt bendir til þess að innan örfárra ára verði kominn góður grundvöllur fyrir endurvakningu meistaraflokks kvenna félagsins, en hann var síðast starfræktur vetur 2014-2015. Í gærkvöldi stóð félagið fyrir spjallfundi í Menntaskólanum á Ísafirði og var það liður í undirbúningi verkefnisins.

Stór hópur stúlkna er að ganga upp yngri flokka félagsins og mun hluti þeirra keppa í Stúlknaflokki á næstu leiktíð. Félagið teflir fram liðum í fimm aldursflokkum Íslandsmóts í vetur, alls um fjörutíu stelpur, og hafa liðin sjaldan eða aldrei verið fleiri.

Í gærkvöldi stóð deildin fyrir Stelpuspjalli þar sem kveniðkendur Vestra í 6.-10. bekk komu saman ásamt foreldrum sínum og hlýddu á fyrirlestra um framtíðarsýn félagsins, liðsheild og hvernig maður byggir upp karakter í liði.

Sérstaka athygli vakti fyrirlestur sem Dagbjört Ósk Jóhannsdóttir, liðsmaður í 10. flokki, flutti en hún sagði frá þátttöku sinni á ráðstefnunni „Sýnum karakter“ sem haldin var af ÍSÍ og UMFÍ í september síðastliðnum. Þar var Dagbjört Ósk fulltrúi KKÍ en flestir ráðstefnugestir voru á aldrinum 13-25 ára. Á vefslóð Sýnum karakter er að finna heilmikið efni sem nýtist bæði þjálfurum og iðkendum til uppbyggingar í íþróttum og lífinu almennt.

bryndis@bb.is

Ef gististaðir á landsbyggðinni þyrftu að taka á sig alla hækkun virðisaukaskatts úr 11 prósentum í 22,5 prósent, eins og ríkisstjórnin lagði til í fjármálaáætlun sinni til næstu fimm ára, myndi það leiða til mikils taprekstrar. Afkoma hótela á höfuðborgarsvæðinu myndi auk þess verða nálægt núlli. Þetta er á meðal þess sem fram kemur í úttekt ráðgjafarfyrirtækisins KPMG um áhrif boðaðra hækkana á virðisaukaskatti á afkomu fyrirtækja í ferðaþjónustu sem kynnt verður á fundi Samtaka ferðaþjónustunnar í dag. Greint er frá úttektinni á Vísi í dag.

Þar kemur fram að ef hækkun virðisaukaskatts úr 11% í 22,5% hefði komið til í byrjun síðasta árs hefði tekjur hótela lækkað um 1.858 milljónir kr. og þá gefa höfundar sér að hótelin hefðu tekið hækkunina á sig að öllu leyti. Það hefði þurrkað út arðsemi hótelanna og reksturinn nálægt núlli.

Að mati KPMG hefði hækkun virðisaukaskatt komið harðast niður á gististöðum á landsbyggðinni og leitti til þess að þeir hefði verið reknir með tapi. „Það er því varla valkostur fyrir félögin að taka á sig alla hækkun virðisaukaskatts, samhliða því sem þau takast á við kjarasamningsbundnar launahækkanir, þar sem verðlagning þjónustunnar er þegar komin að sársaukamörkum í alþjóðlegum samanburði,“ segir í úttektinni.

smari@bb.is

Hag­fræðideild Lands­bank­ans spá­ir því í Hag­sjá sinni að vísi­tala neyslu­verðs, sem birt verður af Hag­stofu Íslands þann 27. októ­ber, muni hækka um 0,20% á milli mánaða en ef sú spá geng­ur eft­ir mun ár­sverðbólg­an hækka úr 1,4% í 1,6%.

Í Hag­sjánni kem­ur fram að vísi­tala neyslu­verðs hafi hækkkað um 0,14% á milli mánaða í sept­em­ber en það var minni hækk­un en bú­ist var við þegar Hag­sjá­in spáiði 0,28% hækk­un. Sagt er að mun­ur­inn skýrist fyrst og fremst að því að mat­ur og drykkja­vara lækkaði tölu­vert mikið eða um 1,3% á milli mánaað en sú lækk­un var óvænt í ljósi þeirr­ar geng­is­veik­ing­ar sem orðið hafði síðustu mánuði á und­an en gera má ráð fyr­ir að til­koma Costco hafi þar haft tölu­verð áhrif.

Töluverð óvissa ríkir um verðbólguþróunina um þessar mundir að því er segir í Hagsjánni og þar kemur fram að innkoma Costco inn á íslenskan neytendamarkað hefur nú þegar haft töluvert mikil áhrif á verðlag ýmissa vara en óljóst er að hversu miklu leyti þau eru komin fram og hversu mikil þau verði litið fram á veginn. Í þessu sambandi er bent á að innkoma Costco hefur leitt til þess að margir aðrir smásalar hafa náð betri samningum við sína birgja. Þessu til viðbótar eru vísbendingar um að gengisbreytingar krónunnar séu ekki að skila sér með sama hætti inn í verðlag eins og verið hefur raunin á síðustu árum. Þannig virðast kaupmenn tregari til að hækka verð hjá sér í kjölfar gengisveikingar. Þar kann að skipta máli að verðbólguvæntingar eru nú um stundir lægri en þær hafa áður verið hér á landi.

smari@bb.is

Samspil smálægða sunnan og vestan við landið og hæðarhryggs fyrir austan veldur því að hvass vindstrengur liggur með suður- og vesturströndinni. Dálítil væta fylgir lægðaganginum, einkum sunnan- og vestanlands, en annars verðu lengst af þurrt og jafn vel bjart veður. Þetta kemur fram í hugleiðingum veðurfræðings um veðrið í dag og næstu daga.

Í spá Veðurstofunnar segir að heldur dragi úr vindi í kvöld og nótt, en á morgun leggst í allhvassa eða hvassa austanátt og rignir talsvert suðaustanlands. Á Vestfjörðum verður hægari vindur og að mestu þurrt.  Áfram milt veður fram að helgi, en þá lægir síðan og léttir víða til, en kólnar jafn framt.

smari@bb.is

Í tæp sjö ár hafa sveitarfélögin á Vestfjörðum rekið Byggðasamlag Vestfjarða um málefni fatlaðs fólks (BsVest) sem veitir þjónustu til fólks með fötlun. Ísafjarðarbær hefur lagt til við hin sveitarfélögin að bærinn taki yfir málaflokkinn. Gísli Halldór Halldórsson, bæjarstjóri Ísafjarðarbæjar, segir að Ísafjarðarbær sjái tækifæri fyrir þjónustu ef öll þjónustusvæðin sem dreifast um Vestfirði verði gert kleift að starfa sem eitt teymi. Hann tekur fram að Ísafjarðarbæ sjái í dag um 80% af þjónustunni sem er veitt innan samlagsins.

„Megin markmiðið er að stjórnunarlega ábyrgðin liggi hjá Ísafjarðarbæ og allir starfmennirnir verði hluti af einu teymi og við teljum að þjónustan verði betri og markvissari. Sá sparnaður sem við sjáum fyrir okkur er á bilinu 30-50 prósent af stöðugildi í stjórnun. Önnur fjárhagsleg hagræðing næst ekki nema með betri samvirkni þjónustunnar og það tekur lengri tíma,“ segir Gísli Halldór.

Aðspurður um viðbrögð annarra sveitarfélaga við tillögu Ísafjarðarbæjar segir Gísli Halldór að umræðan sé fyrst að komast á skrið núna. „Í byrjun nóvember verður haldið málþing um tillöguna og það er verið að ræða þetta innan sveitarstjórna núna. Það er búið boða til aukafundar aðildarsveitarfélaganna í BsVest þann 17. nóvember þar sem tillagan verður tekin fyrir formlega.“

Í tillögunni er gert ráð fyrir að allir starfsmenn sem vinna í málaflokknum á Vestfjörðum verði starfsmenn Ísafjarðarbæjar og sveitarfélögin geri þjónustusamning við Ísafjarðarbæ um að veita þjónustuna.

smari@bb.is