Nýr harðbotna slöngubátur Björgunarsveitarinnar Bjargar á Suðureyri er kominn í hendur björgunarsveitarmanna, en Samskip styðja sveitina með flutningi bátsins þangað frá Bretlandi. Björgunarbáturinn kom með áætlunarskipi Samskipa til Ísafjarðar um miðja þessa viku.

„Já, hann kom með Skaftafellinu núna á miðvikudag,“ segir Valur S. Valgeirsson formaður Björgunarsveitarinnar Bjargar. Bátinn, sem er harðbotna slöngubátur af gerðinni Atlantic 75, kaupir sveitin í gegn um Slysavarnafélagið Landsbjörgu frá Konunglega breska sjóbjörgunarfélaginu, RNLI, í Bretlandi.

Valur segir vissulega nokkuð fyrirtæki fyrir litla björgunarsveit að ráðast í þessa fjárfestingu, en kostnaður við bátinn sé um sjö milljónir þegar búið sé að búa hann tækjum. „Samskip gerðu vel við okkur í að flytja bátinn til landsins og hafa staðið sig mjög vel,“ segir hann. Sveitin reiði sig við kaupin á stuðning bæði fyrirtækja og einstaklinga. „En þetta náum við að kljúfa með dyggri aðstoð bæði heimamanna og fyrirtækja í kring um okkur.“

Bátur sem sveitin átti fyrir varð fyrir tjóni í sumar og þá segir Valur að ákveðið hafi verið að ráðast í endurnýjun. „Og núna er hann kominn og næstu skref að græja hann upp.“ Tækjum er þá bætt í bátinn og hann búinn undir skipaskoðun.

Valur segir reiknað með því að vígja nýja bátinn 4. nóvember næstkomandi og gefa honum þá nafn. „Við verðum með smá húllúmhæ í kring um þetta, en þá er líka afmælishelgi hjá björgunarsveitinni sem verður 87 ára, var stofnuð 1930.“ Tvö síðustu ár hafa þessa helgi verið haldin „Kótelettukvöld“ en nú verði vígslu nýja bátsins blandað í afmælisfögnuðinn.

smari@bb.is

Gunn­ar Bragi Sveins­son skip­ar efsta sæti lista Miðflokks­ins í Suðvest­ur­kjör­dæmi. Gunnar Bragi var oddviti Framsóknarflokksin í Norðvesturkjördæmi frá 2009 en sagði sig úr flokknum fyrir skemmstu í kjölfar klofnings í flokknum. Lengi vel var talið að Gunnar Bragi myndi leiða lista Miðflokksins í Norðvesturkjödæmi en það hlutverk kom í hlut í Bergþórs Ólasonar. Framsóknarflokkurinn svipti hulunni af fleiri oddvitum í dag, en Þorsteinn Sæmundsson skipar efsta sætið í Reykjavíkur S og Guðfinna Jóhanna Guðmundsdóttir í Reykjavík N. Þorsteinn var þingmaður Framsóknarflokksins á síðasta kjörtímabili og Guðfinna borgarfulltrúi flokksins til skamms tíma.

smari@bb.is

Vagna Sólveig Vagnsdóttir, trélistakona á Þingeyri, er ekki allskostar sátt við tónlistarmanninn Pál Óskar Hjálmtýsson. Málið snýst um að fyrr í sumar tilkynnti Páll Óskar að hann ætlaði að dreifa nýjustu breiðskífu sinni persónulega og í byrjun júlí sagði hann aðdáendum sínum að ef þeir pöntuðu plötuna fyrir 14. júlí þá kæmi hann með hana upp að dyrum sjálfur og skipti búseta kaupenda engu máli. Rætt er við Vögnu Sólveigu á Vísi í dag og greinir hún frá svohljóðandi tölvupósti frá Páli Óskari:

„Ég ætlaði að vera svo kúl og dreifa plötunni sjálfur til allra þeirra sem forpöntuðu hana og hlakkaði mikið til að hitta alla.  En sú vinna krefst meiri andlegrar og líkamlegrar orku en mig óraði fyrir og ég verð einfaldlega að játa mig sigraðan. Ég get ekki dreift fleiri plötum. Ég vona að þú getir fyrirgefið mér.”

Vagna Sólveig er verulega sár út í goðið, sem hún hefur haft í hávegum um árabil. „Hann er að plata fólk til að kaupa plötu sem hann er að gefa út. Sagðist ætla að koma og afhenda hana og margir keyptu plötuna bara vegna þess. Nú sendir hann tölvupóst og segist ætla að senda hana í pósti. Hvað kallast svona sölumennska?“ spyr hún.

Hún var búin að undirbúa komu Páls Óskar og ætlaði að færa honum að gjöf útskorna rjúpu, en ekkert verður úr því. „Hann fær rjúpuna ekki úr þessu. Ég gef ekki fólki sem svíkur mig,“ segir Vagna Sólvegi í samtali við blaðamann Vísis.

smari@bb.is

Ferðakostnaður foreldra með mikið veik börn var talsvert til umræðu í gær í kjölfar færslu Þóris Guðmundssonar á facebook en það er gríðarlegur kostnaður sem mætir foreldrum sem fylgja börnum sínum í læknismeðferðir til Reykjavíkur. En fyrir utan ferðakostnað þarf að leysa húsnæðismál í Reykjavík meðan dvalið er þar og það er stundum snúið.  Hægt er að sækja um íbúðir hjá Styrktarfélagi Krabbameinssjúkra barna en alls ekki gefið að til laus íbúð þegar á þarf að halda. Sjúkratryggingar greiða 80% af húsnæðiskostnaði þeirra daga sem barnið er inniliggjandi en ekki meðan beðið er eftir aðgerð eða þegar dvelja þarf nálægt Landspítalanum eftir aðgerðir en það geta verið margir dagar.

Þegar svo háttar til að fleiri börn eru á heimilinu þarf að „setja upp meiriháttar aðgerðarplan“ eins og fjögurra barna móðir orðaði það í færslu á facebook um þau verkefni sem blasa við hennar fjölskyldu vegna læknisferða veika barnsins á heimilinu. Aðeins annað foreldrið fær niðurgreiddan ferðakostnað, aðeins annað foreldrið má vera hjá barninu á spítalanum í einu og því þarf að útvega húsnæði í Reykjavík.

bryndis@bb.is

Á veðurstofunni er varað við áframhaldandi vatnavöxtum á annesjum á Norðurlandi og aukinni hættu á skriðuföllum. Í athugasemdum veðurfræðings á vedur.is segir  að skil séu að fara yfir landið í dag og að stytta muni upp syðra. Talsverð úrkoma á Ströndum og NV-lands í kvöld. Útlit fyrir talsverða eða mikla úrkomu á annesjum N-til fram laugardagsmorgun.

Norðan og norðvestan 10-18, og rigning norðanlands, talsverð á Ströndum og Mið-Norðurlandi, en styttir upp sunnanlands. Norðvestan 10-20 í kvöld, hvassast við NV-ströndina. Talsverð eða mikil rigning eða slydda um tíma á norðanverðum Tröllaskaga í nótt, en lægir og styttir upp á morgun. SV og V 5-13 annað kvöld, skúrir V-til, en annars þurrt. Hiti víða 3 til 8 stig að deginum, mildast syðst.

Á sunnudag verður komin vestlæg eða breytileg átt 3-8 m/s. Skýjað með köflum og dálitlir skúrir eða jafnvel slydduél, en léttskýjað austanlands. Hiti 2 til 7 stig yfir daginn, en líkur á næturfrosti, einkum inn til landsins.

bryndis@bb.is

Sr. Jakob Á. Hjálmarsson mun á morgun kynna nýútkomna bóka sína um Þormóðsslysið en um bókina var fjallað á bb.is, kynningin er í Bíldudalskirkju og hefst kynningin kl. 14:00. Á sunnudaginn eftir messu mun Sr. Jakob svo vera með upplestur ú bókinni í Ísafjarðarkirkju.

bryndis@bb.is