Bæjarstjórn Bolungarvíkurkaupstaðar hefur samþykkt að fela bæjarstjóra að kanna kostnað við að láta gera úttekt á arðsemi og kostnaði við að setja upp varmadælur við helstu stofnanir sveitarfélagsins í þeim tilgangi að draga úr orkunotkun og kostnaði sveitarfélagsins.

Varmadælur eru mjög víða um heim notaðar til upphitunar og fara vinsældir þeirra vaxandi. Loftvarmadælur eru þar lang útbreiddastar og eru þá notaðar til upphitunar með heitu lofti á vetrum og kælingar með svölu lofti á sumrin. Loftvarmadælur nýta lofthita sem varmagjafa og eru slíkar varmadælur mjög algengar í Skandinavíu og þá sérstaklega í Svíþjóð og Noregi. Eru þær bæði notaðar í sumarhúsum og íbúðarhúsum. Á Íslandi hafa loftvarmadælur einna helst verið notaðar í sumarhúsum og í dreifbýli á köldum svæðum.

Í sem stystu máli virkar varmadæla þannig að varmaorka er flutt frá lághita yfir í háhita. Þetta kann að virðast öfugsnúið enda í andstöðu við náttúrulögmálin. Það sem gerir þetta kleift er utanaðkomandi afl í ferlinu sem notað er til að „knýja varmadæluna sjálfa”. Í sjálfu sér virkar varmadæla ekki ósvipað ísskápi eða loftkælingu, nema hvað heiti hluti kerfisins er það sem „skiptir máli” í stað þess kalda eins og ef um ísskáp væri að ræða.

smari@bb.is

Í dag opnar sýning á verkum Kristins Péturssonar í sal Listasafns Ísafjarðar. Sýningin er samvinnuverkefni Listasafnsins og Listasafns ASÍ. Á opnuninni mun Jón Sigurpálsson fjalla um Kristinn og verk hans.

Kristinn fæddist 17. nóvember 1896 á Bakka í Hjarðardal í Dýrafirði. Hann var snemma ákveðinn í því að leita sér mennta og hneigðist að myndlist þrátt fyrir erfið ytri skilyrði svo sem veikindi og takmarkaðan myndlistaraðgang. Að loknu kennaraprófi frá Kennaraskólanum sótti Kristinn tíma í teikningu hjá Þórarni B. Þorlákssyni og einnig Guðmundi Thorsteinssyni (Mugg) áður en hann hélt til Noregs 1923. Þar nam hann fyrst eitt ár við listiðnaðarskólann í Voss en komst þá inn í Listaakademíuna í Osló og lauk þaðan námi 1927. Í Noregi lagði Kristinn fyrst stund á höggmyndalist en snéri sér síðan að málverkinu og valdi þá framsækna deild Axel Revold. Kristinn kynnti sér líka grafík og vann eirstungur, fyrstur Íslendinga. Hann sótti nám til Parísar og Kaupmannahafnar, fór reglulega utan til þess að sjá helstu samtímalistviðburði auk þess að ferðast til að kynna sér listasöguna af eigin raun í Evrópu, Egyptalandi og Austurlöndum nær.

Kristinn settist að í Hveragerði árið 1940 líkt og fleiri listamenn á þeim tíma.  Þar hélt hann sína síðustu sýningu árið 1945 en eftir það hélt hann sig til hlés og vann að verkum sínum í kyrrþey. Allnokkurt safn málverka og teikninga liggur eftir Kristin, en síðustu skúlptúrar hans – ef til vill þau verk sem helst myndu vekja forvitni í dag – eru með öllu horfnir. Stærsta safn verka hans er í eigu Listasafns ASÍ.  Kristinn lést árið 1981.

Kristinn byggði sér hús í Hveragerði sem hann kallaði Seyðtún, sjálfur kallaði hann húsið „innhverfa höggmynd“ þar sem allt innanstokks var orðið hluti af listinni. Meðfylgjandi myndir eru úr Ljósmyndasafni Reykjavíkur.

Sýningaropnunin er kl. 16.30 og verður sýningin aðgengileg á opnunartíma Safnahússins fram til 18. nóvember.

smari@bb.is

Styrking á gengi krónunnar hefur þrengt töluvert mikið að rekstri íslenskra sjávarútvegsfyrirtækja sem eiga nær allt tekjustreymi sitt undir útflutningi á sjávarafurðum. Verð á íslenskum sjávarafurðum í erlendri mynt hefur farið hækkandi á sama tíma og hefur það mildað höggið sem gengisþróunin veldur. Þetta kemur fram í Hagsjá Landbankans.

Verðlag íslenskra sjávarafurða í erlendri mynt hefur haldið áfram að hækka á þessu ári og var í sumar hærra en það hefur áður mælst. Verðið náði tímabundnu hámarki í kringum áramótin 2011 og 2012. Uppfrá því tók það að lækka og náði tímabundnu lágmarki í janúar 2014 og hafði þá lækkað um 6% á tveimur árum. Frá því í janúar 2014 hefur verðið hækkað um tæplega fjórðung mælt í erlendri mynt. Skipta má útflutningi sjávarafurða í annars vegar botnfisk og hins vegar uppsjávarfisk. Botnfiskurinn hefur lengi vegið umtalsvert meira en uppsjávarfiskur en verð á botnfiski hefur hækkað töluvert á síðustu misserum og er það helsta skýringin á hækkandi verðlagi íslenskra sjávarafurða í heild sinni.

smari@bb.is

Viðreisn myndi fá þrjá menn kjörna á þing ef niðurstöður kosninga yrðu í samræmi við nýja skoðanakönnun Fréttablaðsins, Stöðvar 2 og Vísis. VG fær mest fylgi samkvæmt könnuninni og Flokkur fólksins tapar fylgi milli kannana og myndi ekki fá kjörna menn.

Fylgi VG mælist 27 prósent sem er í takt við síðustu kannanir Fréttablaðsins og Sjálfstæðisflokkurinn mælist með 22 prósent og breytist lítið frá fyrri könnunum blaðsins. Miðflokkurinn mælist með tæplega 11 prósenta fylgi, Samfylkingin með rúmlega 10 prósent og Píratar mælast með slétt 10. Viðreisn bætir við sig fylgi og mælist með 5 prósenta fylgi, Flokkur fólksins með tæp 4 prósent og Björt framtíð með rúmlega 2 prósent.

Tæpar tvær vikur eru til kosninga og yrðu þetta niðurstöður þeirra myndi VG fá 19 þingmenn kjörna, Sjálfstæðisflokkurinn 15, Miðflokkurinn, Samfylkingin og Píratar myndu fá sjö menn kjörna hver flokkur. Þá myndi Framsóknarflokkurinn fá fimm menn kjörna og Viðreisn þrjá menn.

smari@bb.is

Sveitarstjórn Súðavíkurhrepps leggur ríka áherslu á að staðsetning kalkþörungaverksmiðju í Súðavík verði utan hljóðmengunarmarka og starfsemi verksmiðjunnar verði ávallt undir eftirliti hvað varðar ryk- og hljóðvistarmengun. Þetta kemur fram í umsögn sveitarstjórnar um umhverfismat Íslenska kalkþörungfélagsins ehf. vegna kalkþörunganáms í Ísafjarðardjúpi og vinnslu kalkþörunga í Súðavík.

Gert er ráð fyrir að verksmiðjan verði á Langeyri og samkvæmt hljóðmengunarkorti í frummatsskýrslunni er hávaðamengun innan marka.

Sveitarstjórn leggur áherslu á efnistaka auðlindarinnar verði ávallt með sjálfbærum hætti og fyllstu varúðar gætt í allri framkvæmd og umgengni og að mótvægisaðgerðir vegna efnistöku auðlindarinnar verði settar fram og sannreyndar.

Í umsögninni kemur einnig fram að Súðavíkurhreppur leggur áherslu á haft verði samband við alla helstu hagsmunaaðila, hvort sem um ræðir efnistökusvæði í Ísafjarðadjúpi eða á Langeyri þar sem verksmiðjan á að rísa.

smari@bb.is

Fiskafli íslenskra skipa í september var 125.857 tonn sem er 11% meiri afli en í september 2016. Botnfiskafli nam tæpum 33 þúsund tonnum sem er samdráttur um 8%. Þorskafli dróst saman um 4%, ýsuafli um 5% og afli í ufsa dróst saman um 18% miðað við september í fyrra. Uppsjávarafli nam tæpum 90 þúsund tonnum í september sem er aukning um 21% miðað við september 2016, þar af jókst makrílafli um 32%. Flatfiskaflinn var 1.926 tonn sem er 12% minna en í september 2016. Skel og krabbadýraafli nam 1.198 tonnum  samanborið við 1.096 tonn í september 2016.

Heildarafli á 12 mánaða tímabili frá október 2016 til september 2017 var 1.133 þúsund tonn sem er 6% aukning miðað við sama tímabil ári fyrr.

Verðmæti afla í september metið á föstu verðlagi var 9,7% minna en í september 2016.

smari@bb.is

Umræðan um Hvalár­virkj­un minni um margt á þá sem varð í kring­um Kára­hnjúka. Byggðapóli­tík­inni sé enn beitt af afli til að rétt­læta óaft­ur­kræf­ar fram­kvæmd­ir. Kára­hnjúka­virkj­un naut stuðnings stjórn­mála­manna sem vildu snúa byggðaþróun við með mik­illi inn­spýt­ingu í at­vinnu­lífið á Aust­ur­landi. Þetta er mat Guðmundar Inga Guðbrandssonar, framkvæmdastjóra Landverndar, og kemur fram í viðtali í Morgunblaðinu. Síðustu daga hefur Morgunblaððið birt ítarlega umfjöllun um Hvalárvirkjun. Guðmundur Ingi telur að horft til lengri tíma fái hvorki Árnes­hrepp­ur né Vest­f­irðir neina inn­spýt­ingu með Hvalárvirkjun.

„Eins og mál­in líta út núna þá mun Hvalár­virkj­un og teng­ing­ar henn­ar við flutn­ingsnetið engu máli skipta hvað varðar raf­orku­ör­yggi á Vest­fjörðum nema ráðist verði í hring­teng­ingu raf­magns á Vest­fjörðum sem kæm­ist senni­lega aldrei á fyrr en að 15-20 árum liðnum ef vel gengi,“ seg­ir Guðmund­ur Ingi.

Á aðal­fundi sín­um í vor setti Land­vernd fram hug­mynd um þjóðgarð á svæðinu. Hún var svo kynnt fyr­ir heima­mönn­um á íbúa­fundi í júní. Miðað við reynslu af öðrum þjóðgörðum á Íslandi myndu skap­ast 1-2 heils­árs­störf í upp­hafi auk þess sem ráða þyrfti tölu­verðan fjölda til land­vörslu og fleiri starfa yfir sum­ar­tím­ann. „Það væri því mjög öfl­ug byggðaaðgerð,“ seg­ir Guðmund­ur um mögu­leika til upp­bygg­ing­ar í Árnes­hreppi. „Það er hægt að beita friðlýs­ing­um til að bæði vernda nátt­úr­una og búa til fjöl­breytt at­vinnu­tæki­færi. Svo hún get­ur vissu­lega verið arðbær.“

smari@bb.is

Héraðssamband Vestfirðinga (HSV) hvetur bæjaryfirvöld til að vinna áfram að því að tryggja aðgang almennings á Ísafirði að líkamsræktaraðstöðu. Þetta kemur fram í ályktun stjórnar HSV. Stúdíó Dan á Ísafirði hættir rekstri innan skamms og í ályktun stjórnar HSV kemur fram að mikilvægt sé að tryggja aðgengi íbúanna að líkamsrækt til skemmri tíma og ekki síður að finna framtíðarlausn á málaflokknum. „Gott aðgengi að líkamsræktaraðstöðu allt árið um kring er afar brýnt fyrir heilsu og lífsgæði íbúanna,“ segir í ályktuninni.

Bæjaryfirvöld á Ísafirði hafa verið með til skoðunar með hvaða hætti bærinn geti komið að eða aðstoðað við rekstur á líkamsræktarstöð.

smari@bb.is

Ofanflóðanefnd hefur samþykkt beiðni Ísafjarðarbæjar um fjárstuðning og sérfræðiaðstoð vegna Hádegissteinsins í Hnífsdal. Sérfræðingar Veðurstofunnar töldu í lok sumars að hætta stafaði af steininum sem er þekkt kennileiti ofan byggðarinnar í Hnífsdal. Við eftirlitsferð fundust vísbendingar um að steinninn, sem vegur marga tugi tugi tonna, hefði færst úr stað.

Ofanflóðanefnd mun óska eftir því við Framkvæmdasýslu ríkisins að hún annist það að fá nauðsynlega ráðgjöf til að eyða hættunni sem af steininum stafar og haldi utan um framkvæmdina í samvinnu við Ísafjarðarbæ og starfsmann Ofanflóðasjóðs.

smari@bb.is