Íslendingar ganga til kosninga um helgina eftir skammlífa ríkisstjórn sem starfaði í skugga  spilltrar stjórnmálamenningar. Upplýsingum er haldið frá almenningi, ójöfnuður fer hratt vaxandi. Hagsmunir hinna ríku ráða för en almannahagsmunir að engu hafðir.

Fátæktargildrur

Þrátt fyrir efnahagslegan uppgang þurfa margir í röðum öryrkja, eldri borgara, sjúklinga og barnafólks að óttast um afkomu sínu um hver mánaðamót. Láglaunafólk og leigjendur eru fastir í fátæktargildru með þeim afleiðingum að mörg börn búa við fátækt og skort. Ungt fólk kemst ekki úr foreldrahúsum. Næsta ríkisstjórn verður að taka afgerandi skref til þess að bæta kjör þessa fólks.

Okkar ásetningur er að auka verulega stuðning við barnafjölskyldur með tvöfalt hærri barnabótum og auknum húsnæðisstuðningi. Við ætlum að stuðla að byggingu þúsunda leiguíbúða á vegum félaga sem starfa án hagnaðarsjónarmiða.Við ætlum að færa skattabyrði frá milli- og lágtekjufólki til þeirra sem hana geta borið.Við viljum tryggja að þjóðin fái réttlátan arð af sameiginlegum auðlindum og við leggjum höfuðáherslu á að bæta  lífsgæði aldraðra og öryrkja, hækka lífeyri og draga verulega úr tekjuskerðingu lífeyris.

Reisum flaggið

Stórauknum framlögum var lofað til heilbrigðisþjónustu, vegagerðar og löggæslu í síðustu kosningabaráttu. Um 86 þúsund manns skrifuðu undir áskorun um að endurreisa heilbrigðiskerfið. Fráfarandi stjórnarflokkar lofuðu að setja þessi mál í algjöran forgang en ekkert hefur verið gert með þennan vilja þjóðarinnar. Í fjárlagafrumvarpi næsta árs er þjónusta við sjúklinga á spítölum skorin niður en útgjöld aukast vegna starfsemi einkafyrirtækja.

Við höfnum einkavæðingu heilbrigðiskerfisins og leggjum alla áherslu á að bæta heilbrigðisþjónustu í opinberri eigu.  Við ætlum að draga verulega úr  heilbrigðiskostnaði fólks, ekki síst fjölskyldna á landsbyggðinni og auðvelda aðgengi að sálfræðiþjónustu. Við munum ráðast í átak í geðheilbrigðismálum og heilsueflingu almennt.

Lykill að framtíðinni

Menntun er lykillinn að aukinni verðmætasköpun og betri lífskjörum. Við stöndum á þröskuldi tæknibyltingar þar sem starfshættir eiga eftir að gjörbreytast. Miklar breytingar verða á vinnumarkaði og skólarnir  þurfa að búa nemendur undir þær með því að leggja áherslu á grunnþætti á borð við félagsfærni, sköpun og gagnrýna hugsun.

Við viljum gefa nemendum tækifæri til þess að þroska hæfileika sína í skapandi greinum, listum, rannsóknum og nýsköpun til að mæta nýjum áskorunum í lífi og starfi.  Við leggjum áherslu á að auka virðingu fyrir kennarastarfinu, hvort sem er á leikskólastigi eða framhaldsskólastigi. Við leggjum áherslu á að fjármagna háskólana sómasamlega og við munum styðja betur við fjölbreytta framhaldsskóla, ekki síst verknámsbrautir og vinna gegn brottfalli nemenda með markvissum aðgerðum.

 Mannúð

Við höfum kynnt átak gegn ofbeldi, hvort sem það er af kynbundnum toga eða því beitt með öðrum hætti í samfélaginu.  Við viljum líka sýna flóttafólki mannúð og taka aukinn þátt í þessu fjölþjóðlega viðfangsefni og vanda móttöku hælisleitenda, sérstaklega barna.

Bætum lífsgæði – treystum byggðir

Við viljum stórauka fjárfestingu í vegagerð með fjármögnun samgönguáætlunar og hrinda í framkvæmd kröftugri byggðastefnu.  Við þurfum að taka markviss skref til þess að standa við skuldbindingar okkar í baráttunni gegn hlýnun jarðar og súrnun sjávar.  Nauðsynlegt er að flýta orkuskiptum í samgöngum með skipulagi og hleðslustöðvum um allt land.

Hverjum er treystandi?
Traust er einn mikilvægasti þáttur stjórnmálanna. Til að vinna sér traust meðal þjóðarinnar verða alþingismenn að treysta þjóðinni sem gaf þeim umboð, hlusta á hana og virða. Við óttumst ekki afstöðu þjóðarinnar, hvorki í stjórnarskrármálum né Evrópumálum.  Við ætlum að vinna af krafti á nýju kjörtímabili að nýrri stjórnarskrá á grunni vandaðrar vinnu stjórnlagaráðs.

Hjartað á réttum stað

Við fáum að nota okkar dýrmæta lýðræðislega rétt eftir fáa daga í kosningum til Alþingis.  Baráttumál okkar jafnaðarmanna eru enn á sömu lund, vörn og sókn fyrir venjulegt fólk en ekki þrönga sérhagsmuni.   Er ekki tækifærið einmitt núna, að taka nýja ákvörðun, ferska og djarfa – já, og láta hjartað ráða för.

Guðjón Brjánsson

Ég fagna því að allt ísland fari að virka saman sem ein heild.

Ég fagna því að geta notið fullkominnar læknisþjónustu nær heimabyggð, sem stórlækkar kostnað fólks.

Ég fagna bættri geðheilsugæslu um allt land.

Ég fagna því að vörður verði staðinn um sjávarútveg og landbúnað.

Ég fagna því að starfsöryggi sauðfjárbænda verði tryggt.

Ég fagna því að tryggingagjald, sem kemur verst niður á minni fyrirtækjum, verði lækkað.

Ég fagna því að landið verði allt ljósleiðaravætt.

Ég fagna áherslu á nýsköpun á öllum sviðum og um allt land.

Ég fagna því að skattar verði ekki hækkaðir.

Ég fagna lækkun vaxta og afnám verðtryggingar á lánum ungs fólks.

Ég fagna aukinni áherslu á iðn- og tækninám á framhalds- og háskólastigi.

Ég fagna því að stuðningur við námsmenn verði lagaður að fyrirkomulagi á Norðurlöndunum.

Ég fagna því að lífeyrissjóðirnir hætti að halda uppi vaxtastigi í landinu og fari að vinna fyrir sér í útlöndum.

Ég fagna því að fjármálakerfi landsins fari að þjónusta almenning en ekki öfugt.

Ég fagna sveigjanleika í starfslokaaldri.

Ég fagna því að lágmarkslífeyrir verði látinn fylgja lágmarkslaunum og tryggi tekjur, sem hægt er að lifa á.

Ég fagna Miðflokknum.

Daníel Þórarinsson

Tveir dagar í kosningar. Kosningar sem komu nokkuð óvænt til okkar og rifu okkur upp að værum blundi. Mörgum finnst þeir ekki hafa verið teknir alvarlega þegar þeir settu krossinn með sannfæringu á kjörseðilinn fyrir ári.  Hvað er þá til ráða?

Hér í NV kjördæmi höfum við úr að velja níu framboðum sem bjóða fram krafta yfir hundruð einstaklinga, öll til góðra verka skulum við halda. Það er úr vöndu að ráða. Það sem fólk kallar eftir er stöðuleiki í stjórnmálum, fólk setjist niður og hefji samtal um hvernig hægt sé að ná góðum árangri og að þjóðarskútan fari nú að sigla lygnan sjó.
Það er augljóst að núna í þessum kosningum er horft til Framsóknarflokksins sem sterkt afl til að koma inn í ríkisstjórn sem hefur það að leiðarljósi að horfa fram og vera þátttakandi í pólitísku samtali inn á Alþingi. Það hefur sýnt sig í umræðunni undanfarna daga að fólk ber mikið traust til  Sigurðar Inga og Lilju Alfreðsdóttur til góðra verka, því er mikilvægt að þau fái öflugt fylgi inn á þing .

Byggðamál

Það er mjög mikilvægt að kjördæmin eigi sterkar raddir sem skila þeim baráttumálum sem að okkur snúa inn í umræðuna. Hvert landssvæði hefur ákveðna sérþarfir og það er ljóst að við þurfum kröftuga raddir til að standa fyrir þeim. Við erum óhrædd við að benda á að það sérstakar aðgerðir í byggðarmálum að norskri fyrirmynd. Lægri skattar þeirra sem búa á ákveðnum skilgreindum stöðum á landsbyggðinni og líka við viljum fella niður afborgun námslána fyrstu fimm árin fyrir þá sem eru búsettir  á landsbyggðinni.  Þetta eru alvöru hugmyndir sem við viljum tala fyrir.

Hverjar eru kröfur kjósenda til okkar?

• Við eigum að hlusta.
• Við eigum að þora.
• Við eigum að vera áræðin.
• Við eigum að vera með.

Ég býð mig fram til þátttöku og treysti á að atkvæði þitt kæri kjósandi skili mér inn á Alþingi. Þar sem ég legg mig fram við að taka þátt í samtali og skila rödd okkar inn á Alþingi.

Halla Signý Kristjánsdóttir, höfundur skipar 2. sæti á lista Framsóknarflokksins í NV kjördæmi.

Greinin birtist fyrst í 24. tbl. Bæjarins besta