Jón Gunnarsson samgöngu- og sveitarstjórnarráðherra hefur beint þeim tilmælum til Vegagerðarinnar að ferðum Breiðafjarðarferjunnar Baldurs verði fjölgað í vetur í samræmi við óskir heimamanna á sunnanverðum Vestfjörðum. Jafnframt verður bætt við ferðum í flugáætlun milli Bíldudals og Reykjavíkur frá 1. febrúar á næsta ári. Í frétt á vef ráðuneytisins segir að þetta sé gert til þess að bregðast við miklum vexti í atvinnulífinu á svæðinu og aukinnar þarfar fyrir almenningssamgöngur.

Í fréttinni kemur einnig fram að frá því í lok júlí hafi ráðherra haft til skoðunar að fjölga ferðum yfir Breiðafjörð. Fulltrúar bæjaryfirvalda Vesturbyggðar og atvinnurekenda á sunnanverðum Vestfjörðum áttu síðan fund í september með fulltrúum Vegagerðarinnar og ráðuneytisins þar sem fram komu óskir heimamanna um að styrkja samgöngur við sunnanverða Vestfirði. Var þess óskað að ferðum Baldurs yrði fjölgað. Bætt yrði við morgunferð á föstudögum til að koma fiskafurðum á erlendan markað og bætt við ferð á þriðjudögum. Vegagerðinni hefur verið falið að ganga frá þessum breytingum.

Þá hefur verið óskað eftir að fjölgað verði ferðum í áætlunarflugi milli Bíldudals og Reykjavíkur þannig að morgun- og kvöldferðir verði fimm daga vikunnar í stað einnar ferðar á dag eins og nú er. Er flugfélagið Ernir reiðubúið að bæta við ferðum og hefja þær 1. febrúar næstkomandi. Myndi kostnaður verða kringum 8 milljónir króna fyrir sex mánaða tímabil. Er fjármögnun tryggð með fé sóknaráætlunar Vestfjarða með viðaukasamningi sem gerður er í samræmi við tillögur í Vestfjarðaskýrslu.

smari@bb.is

Veiðigjöld útgerða í Bolungarvík þrefaldast milli ára og verða rúmlega 300 milljónir á yfirstandandi fiskveiðiári. Bolungarvíkurkaupstaður lét gera úttekt út­tekt á áhrif­um veiðigjalda á bæj­ar­fé­lagið en á síðustu fimm fisk­veiðiár­um hafa bol­vísk­ar út­gerðir borgað sam­tals 469 millj­ón­ir króna til rík­is­ins í formi veiðigjalda.

Baldur Smári Einarsson, formaður bæjarráðs Bolungarvíkurkaupstaðar, skrifar í pistli á Facebook að við blasi að veiðigjöld bolvískar útgerða verði 300 milljónir fiskveiðiárinu sem hófst í september og jafngilda um þriðjungi af árstekjum bæjarins. „Þetta eru gríðarlegar fjárhæðir sem eru að hverfa úr hagkerfinu í Bolungarvík og þessir peningar fara bara beint suður og nýtast ekki til uppbyggingar hér á svæðinu,“ skrifar Baldur Smári.

Í sumar var unnin stefnumörkun um framtíð fiskeldis og þar var lagt til að helmingur auðlindagjalda þeirrar starfsemi fari til uppbyggingar innviða þar sem eldið er stundað. Baldur Smári skrifar um þetta: „Er ekki kominn tími á að helmingur auðlindagjalda sjávarútvegsins renni til þeirra samfélags sem byggja afkomu sína á fiskveiðum og fiskvinnslu?“

smari@bb.is

Það verður hvasst víða á landinu í dag og spáð er stormi á Vestfjörðum, Norðurlandi og Suðausturlandi með kvöldinu. Vindur gæti náð fjörutíu metrum á sekúndu við fjöll. Veðurstofa hvetur ferðamenn til að hafa varann á næsta sólarhring. Veðurstofan spáir vaxandi suðvestanátt á Vestfjörðum í dag , 15-23 m/s og súld í kvöld. Hvassast verður á norðanverðum Vestfjörðum. Talsverð rigning um tíma í nótt, en dregur úr vindi og úrkomu í fyrramálið. Suðvestan 5-10 og úrkomulítið upp úr hádegi á morgun. Hiti 3 til 8 stig.

smari@bb.is

Ísfirska fyrirtækið Dress Up Games ehf. hefur hagnast um ríflega hálfan milljarða króna síðastliðinn áratug. Dress Up Games rekur samnefnda leikjavefsíðu þar sem notendur geta klætt dúkkulísur upp í búninga auk fylgihluta. Samanlagðar arðgreiðslur fyrirtækis frá árinu 2009 nema um 350 milljónum króna. Frá þessu er greint í Viðskiptablaðinu. Síðustu ár hefur hagnarður fyrirtækisins dregist saman frá því þegar best lét og hagnaðurinn í fyrra var 5,3 milljónir kr.

Stofnandi og eigandi Dress Up Games er Inga María Guðmundsdóttir.

Á vef­síð­unni eru tölvu­leikir þar sem dúkkulísur eru klæddar í föt safnað sam­an. Mark­hóp­ur­inn eru stúlkur í ensku­mæl­andi lönd­um, ekki síst Banda­ríkj­un­um, Bret­landi og Ástr­al­íu. Dress Up Games er síðan með aug­lýs­inga­samn­ing við Google sem tryggir því tekj­ur. Vef­síðan fær millj­ónir inn­lita, og er með tug­millj­ónir flett­inga, í hverjum mán­uði og því hafa tekj­urnar verið mikl­ar.

smari@bb.is

Síðasta blað fyrir kosningar er á leið í bréfalúgurnar hér á norðanverðum Vestfjörðum og ber svo sannarlega þess merki að enn og aftur göngum við til kosninga. Blaðið hefur reynt eftir fremsta megni að vera farvegur frambjóðenda til kjósenda og þeir sem ekki hafa komist fyrir í blaðinu fara beint á vefinn. Að mörgu leyti er um endurtekið efni að ræða og var til dæmis leiðarinn að hluta til endurnýttur milli ára.

„Þitt atkvæði skiptir máli er frasi sem þarf að endurtaka í sífellu því með kosningum tökum sameiginlega ákvörðun um hvað það er sem skiptir máli í okkar samfélagi. Þó margir haldi því fram að þeir séu ekki „pólitískir“ hafa allir skoðanir á samfélaginu okkar, með einum eða öðrum hætt svo öðrum frasa sé slegið á loft. Hverjum er slétt sama um aðgang að heilbrigðisþjónustu eða menntun, hver hefur enga skoðun á samgöngum, mokstri og hvað það er dýrt að fljúga suður, hvort við séum með eða móti fiskeldi og hvort ferðaþjónustan sé málið. Að finna svo skoðunum sínum farveg í þeim valkostum sem bjóðast er annað mál og hvort valkostirnir standa svo við stóru orðin er líka annar handleggur. Það er hins vegar ekkert vit í öðru en að reyna, finna framboð sem fellur best að lífsýninni, er trúverðugt og býður til starfans gott og heiðarlegt fólk.“

Næsta blað kemur út þann 9. nóvember.

bryndis@bb.is

Sjálfstæðisflokkurinn yrði stærsti flokkurinn ef kosið væri nú. Hann fengi rúm 24 prósent atkvæða. Vinstri græn yrðu næststærsti flokkurinn með rúm 19 prósent atkvæða. Þetta kemur fram í í nýrri könnun Fréttablaðsins í dag. Samfylkingin fengi 14,3 prósent. Miðflokkurinn er með tæp 10 prósent og Píratar með rúm 9 prósent. Þá er Viðreisn með tæp 8 prósent og Framsóknarflokkurinn með rúm 6 prósent. Flokkur fólksins mælist svo með rúmlega 4 prósenta fylgi og Björt framtíð með tæplega 2 prósent.

Ef það á að gera tilraun til að útnefna „sigurvegara kosninganna“ verði útkoman á þennan veg er augljósast að benda á Samfylkingu og Miðflokkinn. Samfylkingin tæplega þrefaldar fylgi sitt frá síðustu kosningum og Miðflokkur Sigmundar Davíðs Gunnlaugsson afgreiðir sínar fyrstu kosningar með miklum krafti. Og ef það þarf að benda á „tapara kosninganna“ blasir Björt framtíð við en flokkurinn þurrkast út og Framsóknarflokkurinn tapar 5,5 prósentustigum frá síðustu kosningum. Sjálfstæðisflokkurinn er stærstur en fylgi hans er sögulega lágt og flokkurinn tapar rúmum fjórum prósentustigum milli kosninga. Þrátt fyrir þriggja prósenta fylgisaukningu VG frá síðustu kosningum vonaðist fólk þar á bær eftir meira fylgi í ljósi skoðanakannana síðustu vikur. Viðreisn tapar um þremur prósentustigum en kemur mun betur út en skoðanakannanir hafa gefið til kynna til þessa.

smari@bb.is

Rjúpnaveiðar hefjast á morgun og ljóst að margir veiðimenn hafa fengið sig lausa úr vinnu til að halda á fjöll. Í ár er heimilt að veiða 12 daga líkt og í fyrra. Það eru umtalsvert færri dagar en rjúpnaveiðimenn áttu að venjast hér áður fyrr þegar veiðitímabilið stóð í 69 daga. Umhverfisstofnun hvetur veiðimenn til sýna hófsemi og veiða ekki fleiri rjúpur en þörf er á og minnir stofnunin á að sölubann er í gildi á rjúpum og rjúpnaafurðum.

Náttúrufræðistofnun Íslands metur að stofninn þoli veiðar á 57.000 rjúpum og er það aukning frá fyrra ári. Hófsemissjónarmið auka líkurnar á að hægt verði að stunda sjálfbærar rjúpnaveiðar um ókomna tíð. Það skiptir því máli að umgangast þessa náttúruauðlind af virðingu og standa um leið vörð um þau forréttindi sem felast í að geta stundað skotveiðar í íslenskri náttúru. Veiðimenn eru hvattir til góðrar umgengni um landið.

smari@bb.is

Sveitarstjórn Tálknafjarðarhrepps mótmælir harðlega fyrirhuguðum niðurskurði á framlögum til Náttúrustofu Vestfjarða og telur eðlilegt að framlög hækki til eflingar starfseminni frekar en hitt. Þetta kemur fram í bókun sveitarstjórnar. Í fjárlagafrumvarpi sem var lagt fram áður en ríkisstjórnin féll er lagt til að skera niður fjárframlög til stofunnar um 10,1 milljón króna.

Í bókun sveitarstjórnar segir að niðurskurður til þessa málaflokks kemur beint niður á menntatörfum á svæðinu og er þar af leiðandi bein atlaga að menntastörfum á landsbyggðinni. Þar segir enn fremur: „Náttúrustofa Vestfjarða er mikilvægur þáttur í uppbyggingu þess iðnaðar og starfa sem unnið er að á sunnanverðum Vestfjörðum og er þar af leiðandi algerlega ólíðandi að vegið sé að stofnuninni með þessum hætti.“

smari@bb.is