Undanfarnar vikur hafa nokkrir tugir barna æft og leikið í Bolungarvík því þar skal í lok nóvember frumsýna söngleik um hana Matildu, stórskemmtilega stúlku sem Roald Dahl skrifaði inn í tilveruna. Matilda er ekki metin að verðleikum heima hjá sér og í skólanum horfir hún upp á óþolandi óréttlæti. Matilda hlýðir ekki alltaf reglum þegar berjast þarf gegn óréttlætinu.

Það er Halldóra Jónasdóttir sem stendur að sýningunni en hún bæði leikstýrir verkinu og hefur þýtt leiktextann og alla söngtextana. Halldóra stundar nám við kennaradeild Háskóla Íslands og er sýningin hluti af útskriftarverkefni hennar úr grunnnáminu næsta vor.  Höfundur sögunnar er eins og áður sagði Roald Dahl en Dennis Kelly samdi söngleikinn með tónlist Tim Minchen.

Söngleikurinn Matilda verður sýndur í Félagsheimili Bolungarvíkur í lok nóvember.

SaveSave

Hinir nýju verslunarrekendur á Norðurfirði í Árneshreppi opnuðu verslun sína á miðvikudaginn. Að svo stöddu gengur verslunin undir nafninu Gamla kaupfélagið. Þegar tíðindamann Litlahjalla bar að garði voru verslunareigendur, þau Ólafur Valsson og Sif Konráðsdóttir að raða upp vörum og koma öllu fyrir.

Kaupfélag Steingrímsfjarðar lokaði útibúi sínu í Norðufirði í september og um tíma leit út fyrir að hreppurinn yrði án verslunar sem hefði verið þungt högg fyrir byggðina. Ólafur og Sif svöruðu kalli hreppsnefndar sem auglýsti eftir nýju fólki til að taka við búðinni. Ólafur er dýralæknir að mennt og Sif er lögfræðingur.

Héraðsdómur Reykjavíkur hefur vísað málshöfðun Náttúrverndar 1 frá dómi. Náttuvernd 1 er málsóknarfélag sem stefndi Arnarlaxi hf., Matvælastofnun og Umhverfisstofnun vegna laxeldis Arnarlax í Arnarfirði. Stofnfélagar málsóknarfélagsins eru eigendur Haffjarðarár á Snæfellsnesi, veiðifélag Laxár á Ásum í Húnavatnsssýslu og þrír landeigendur í Arnarfirði.

Málinu var vísað frá dómi með þeim rökum að málshöfðunin uppfylli ekki skilyrði laga um málsóknarfélög. Í þeim lögum er m.a. kveðið á um að lögvarðir hagsmunir hvers og eins félaga þurfi að vera með einsleitum hætti, en því er ekki að heilsa í tilfelli Náttúruverndar 1 og í úrskurði dómara er t.d. bent á að Haffjarðará er í 200 km fjarlægð frá eldissvæðum Arnarlax í Arnarfirði.

Umhverfisstofnun stóð nýlega fyrir eftirlitsverkefni með merkingum á vörum sem innihalda hættuleg efni og náði umfang þess til algengra neysluvara fyrir almenning eins og uppþvottavélaefna, uppþvottalaga, stíflueyða, uppkveikilaga og salernis-, uppþvottvéla-, bletta, ofna- og grillhreinsa. Farið var í 12 matvöruverslanir á höfuðborgarsvæðinu, Akranesi og Akureyri og skoðað úrtak með 60 vörum í ofangreindum vöruflokkum, sem þar voru í sölu, til að athuga hvort merkingar þeirra væru í samræmi við reglur.

Einungis 15% varanna sem lentu í úrtaki reyndust standast allar kröfur um merkingar. Á kökuritinu sem fylgir fréttinni má sjá hvernig frávikin skiptust en algengasta frávikið var að vörurnar vantaði algerlega íslenskar merkingar, eða í 38% tilfella. Um 42% varanna voru merkt á íslensku samkvæmt núgildandi reglugerð en með einhver misalvarleg frávik. Þá reyndust þrjár vörur (5%) vera merktar samkvæmt eldri reglum.

Öllum birgjum sem ábyrgir voru fyrir vörum sem báru ófullnægjandi merkingar var sent bréf þar sem krafist var viðeigandi úrbóta. Langflestir brugðust við á fullnægjandi hátt innan frestsins sem gefinn var, en í nokkrum tilfellum kom þó til eftirfylgni. Voru þeim birgjum send áform um áminningu, en þar sem þeir brugðust við kröfum stofnunarinnar innan tilsettra tímamarka kom ekki til frekari eftirfylgni.

Niðurstöður eftirlitsins gefa til kynna að merkingum á efnavörum hér á landi sé verulega ábótavant og að þörf sé á átaki til lagfæringa hjá birgjum sem bera ábyrgð á því að þessar vörur séu rétt merktar. Umhverfisstofnun mun áfram fylgjast náið með merkingum hættulegra efnavara á markaði og standa fyrir eftirliti til að fylgja því eftir að farið sé að reglum hvað þetta varðar.

Merkingar á hættulegum efnavörum koma til skila upplýsingum um eðli hættunnar og hvernig eigi að bregðast við eða komast hjá henni og skulu þær vera á íslensku. Þeir sem setja á markað vörur sem innihalda hættuleg efni eru ábyrgir fyrir því að umbúðir varanna séu rétt merktar. Seljendum er óheimilt að hafa í sölu hættulegar vanmerktar vörur.

Þetta er megininntakið í reglum um merkingar hættulegra efna sem gilda innan Evrópska efnahagssvæðisins og öðluðust fullt gildi þann 1. júní 2017 eftir langt aðlögunartímabil. Það þýðir að merkingar samkvæmt eldri reglum skulu nú alfarið heyra sögunni til.

Norðlæg átt verður á landinu í dag, 5-13 m/s og víða él. Hiti verður 1 til 6 stig syðst á landinu en annars staðar verður hitastig við frostmark. Þetta segir í veðurspá Veðurstofunnar. Á Vestfjörðum er spáð norðaustan 8-13 m/s og frost verður 0-4 stig.

Samkvæmt veðurspánni fer kólnandi næstu daga. Á morgun er von á norðanátt og éli. Frost yfirleitt 0 til 5 stig.
Á sunnudag snýst hann í suðaustanátt og hvessir, 20-25 m/s og rigning eða slydda um kvöldið. Hægari vindur og þurrt norðaustan- og austanlands.

Hálka og snjóþekja er á flestum vegum á Vestfjörðum.

Útlit er fyr­ir kröft­ug­an hag­vöxt í ár en að það hægi á gangi hag­kerf­is­ins þegar líður til árs­ins 2023. Þetta kem­ur fram í þjóðhags­spá Hag­stofa Íslands sem gef­in var út í dag. Spá­in nær yfir árin 2017 til 2023.

Gert er ráð fyr­ir að á ár­inu 2017 auk­ist lands­fram­leiðslan um 4,9%, einka­neysla um 7,8% og fjár­fest­ing um 8,8%. Árið 2018 er reiknað með að hag­vöxt­ur verði 3,1%, einka­neysla auk­ist um 5,3% og fjár­fest­ing um 3,1%. Talið er að sam­neysla auk­ist um 2,2% árið 2017 og 1,3% árið 2018. Árin 2019–2023 er gert ráð fyr­ir að vöxt­ur lands­fram­leiðslu verði í kring­um 2,6%, einka­neyslu­vöxt­ur minnki úr 3,6% árið 2019 í 2,5% árið 2023, fjár­fest­ing auk­ist um 2,1–3,9% og sam­neysla ná­lægt 1,8% á ári.

Fjár­fest­ing eykst hæg­ar á næst­unni en und­an­far­in ár. Spáð er mikl­um vexti íbúða­fjár­fest­ing­ar og op­in­berr­ar fjár­fest­ing­ar en sam­drátt­ur verður meðal ann­ars í stóriðju­tengdri fjár­fest­ingu árið 2018 og síðar. Viðskipta­jöfnuður verður áfram já­kvæður en versn­ar held­ur þegar líður á spá­tím­ann. Gengi krón­unn­ar styrkt­ist fram­an af ári en gaf eft­ir þegar á leið. Tólf mánaða verðbólga er enn lág en bú­ist er við að hún auk­ist nokkuð þegar áhrifa geng­is­styrk­ing­ar hætt­ir að gæta. Íbúðaverð hef­ur hækkað skarpt frá miðju ári 2016 en bú­ist er við að aukið fram­boð fast­eigna á næstu árum dragi úr spennu á íbúðamarkaði.

Mikið grjót­hrun varð á Ketildala­vegi vest­an Bíldu­dals á sunnu­dag­inn. Í frétt á vef Vega­gerðar­inn­ar seg­ir að „mynd­ar­leg­ir stein­ar“ hafi fallið á veg­inn og þá hafi þurft að fjar­lægja með stór­virk­um vinnu­vél­um. Sem bet­ur fer var eng­inn á ferð þarna þegar grjót­hrunið átti sér stað, seg­ir í frétt­inni.

Ketildala­veg­ur ligg­ur út í Selár­dal og á leiðinni eru tveir bæir þar sem er bú­seta; Hvesta og Græna­hlíð. Grjót­hrunið varð við Svart­hamra, ekki langt frá Bíldu­dal, áður en komið er í Hvestu­dal. Sjá á kort­inu hér fyr­ir neðan. Grjót­hrun er al­gengt á þessu svæði en sjald­gæft að svo stór­ir stein­ar hafni á veg­in­um.

Búið er að hreinsa allt af veg­in­um.

Á vef Landssambands smábátaeigenda (LS) er bent á að eftir hækkun veiðigjalda um síðustu kvótaáramót eru veiðigöld félagsmanna um 9 prósent af aflaverðmæti. Fyrsti gjalddagi eftir hækkunina var nú þann 1. nóvember og er sá reikningur fyrir afla sem veiddist í september. Veiðgjöld í ýsu og þorski, sem er uppistaðan í afla smábáta, hækkuðu um 107 til 127 prósent milli ára.

Í frétt á vef LS segir að sambandið hafi talað fyrir daufum eyrum þegar vakin er athygli á rúmlega tvöföldun veiðigjalda.

„Alþingismenn virtust og virðast þó hafa á hreinu að eitthvað þarf að gera til að koma til móts við litlar og meðalstórar útgerðir.  LS hefur bent á leið sem hægt er að fara og væntir þess að nýkjörnir alþingismenn láti málið til sín taka strax og þingstörf hefjast,“ segir á vef LS.

Í fréttinni er haft eftir ónafngreindum smábátasjómönnum að hækkunin sé „brjálæði“ og einhverjar útgerðir eru við það að gefast upp. Einn sjómaðurinn grípur til líkinga þegar hann tjáir sig um hækkunina: „Við erum 2 um borð, nú hefur fjölgað um einn og hálfan háseta sem ekki láta sjá sig, en þiggja fulla greiðslu.“