Á kjördegi gerir fólk sér glaðan dag með ýmsum hætti enda er mikilvægt að fólk fagni og takist á við lýðræðið með bros á vör. Í Reykhólahreppi mætti fólk á kjörstað á farartækjum sem ekki sjást á götunum á hverjum degi. Reykhólavefurinn greinir frá að kaupmannshjónin Ása Fossdal og Reynir Róbertsson komu á kjörstað á virðulegum 55 ára gömlum Land Rover. Ásta Sjöfn Kristjánsdóttir og Ingimar Ingimarsson mættu að sjálfsögðu hvort á sínum Farmall ásamt mökum, Guðmundi Ólafssyni og Silvíu Kristjánsdóttur.

Kjörsókn í hreppnum var léleg, eða 69,2 prósent sem er talsvert undir kjörsókn í Norðvesturkjördæmi sem var 83 prósent.

Formaður Lionsklúbbs Patreksfjarðar, Leiknir Thoroddsen, afhenti Bókasafninu á Patreksfirði glæsilega gjöf á föstudag. Gjöfin er styrkur fyrir bókasafnið til kaupa á húsgögnum fyrir yngsta kúnnahóp bókasafnsins.

Krakkarnir úr lengdu viðverunni í grunnskólanum heimsækja bókasafnið alltaf á fimmtudögum og tóku við gjöfinni fyrir hönd allra krakka á Patreksfirði. Með þessu hefur aðstaðan fyrir börnin batnað mikið og á Lionsklúbburinn þakkir skildar fyrir þessa rausnarlegu gjöf.

Nofima – rannsóknastofnun norska matvælaiðnaðarins – hefur kynnt mikilvægt skref í áttina til þess að mögulegt sé að ala geldan lax. Um 2000 tilraunafiskar hafa nú þegar náð 300 grömmum og vaxa og dafna eins og aðrir laxar, að því undanskildu að þeir mynda ekki kynfæri. Frá þessu er greint á vef Fiskifrétta. Núna er verið að fylgjast með fiskinum og vinna að því að þróa skilvirka aðferð sem hægt er að nota á iðnaðarskala. Ef hvortveggja er í lagi eru 3-5 ár þangað til að hægt sé að framleiða geldfisk í miklu magni.

Beri það árangur að rækta geldfisk á iðnaðarskala reynast það stórfréttir í laxeldinu og allar áhyggjur af erfðablöndun verða fyrir bí. Sem kunnugt er hefur verið lagst gegn laxeldi í Ísafjarðardjúpi vegna hættu á erfðablöndun í laxveiðiám í Djúpinu.

Knattspyrnudeild Vestra hefur samið við Andrew James Pew um að vera spilandi aðstoðarþjálfari meistaraflokks karla. Hann mun starfa við hlið Bjarna Jóhannssonar yfirþjálfara Vestra. Andrew kemur til Vestra frá Selfossi þar sem hann hefur spilað síðastliðin ár við góðan orðstír í Inkasso deildinni. Hann kom fyrst til landsins árið 2006 og á að baki 179 leiki á Íslandi og í þeim náð að skora 10 mörk.

Andrew er hávaxinn miðvörður og mun koma til með að styrkja varnarleikinn enda varnarmaður með mikla reynslu úr íslenska boltanum.

Stjórn meistaraflokksráðs Vestra lýsir yfir mikilli ánægju með þjálfarateymið sem félagið hefur krækt í og er ætlast til mikils af þessum reynslumiklu mönnum og er stefnan sett á toppbaráttu næsta sumar.

Kristín Þorsteinsdóttir sundkona er nú stödd í Bobigny Frakklandi og keppir á Evrópumeistaramóti DSISO. Fyrsti keppnisdagur er í dag og keppir Kristín í tveimur greinum 50 metra flugsundi og 100 metra baksundi. DSISO er alþjóðasundsamband fólks með Downs heilkenni.

Eins og flestum er kunnugt um er Kristín ákaflega sigursæl íþróttakona og var kjörin Vestfirðingur ársins 2015 af lesendum bb.is og í þrígang hefur hún verið útnefnd íþróttamaður Ísafjarðarbæjar.

Sætustu sigrar Kristín voru fyrir tveimur árum á Evrópumeistaramóti DSISO þegar Kristín setti heimsmet í 25 metra flugsundi og 100 metra skriðsundi, sem og tíu Evrópumet. Hún kom heim af mótinu með fimm gullverðlaun, auk silfurverðlauna og bronsverðlauna.

Þær stöllur Katla Vigdís Vernharðsdóttir og Ásrós Helga Guðmundsdóttir í hljómsveitinni Between Mountains halda ótrauðar áfram á tónlistarbrautinni og nú er verið að framleiða tónlistarmyndband við lagið „Into the Dark“. Það er Haukur Björgvinsson hjá Sagafilm sem leikstýrir myndabandinu en framleiðandi er Chanel Björk og segir hún að mikill metnaður sé lagður í myndbandið.

Upptökur fara fram á Vestfjörðum helgina 9.-12. nóvember og nú leita þær Katla Vigdís og Ásrós Helga að aukaleikurum á aldrinum 6 til 80 ára og vilja þær sjá sem flesta vestfirsk andlit í myndbandinu. „Fólk þarf ekki að vera laust alla helgina og mögulegt að bóka sig í senur á föstudag, laugardag eða sunnudag“ segir Chanel Björk og biðlar til vestfiskra vina að hafa samband í netfangið chanelbjork@gmail.com, sérstaklega vantar fullorðna leikara.

bryndis@bb.is

Þingmannasveit Norðesturkjördæmis tók miklum breytingum í kosningunum á laugardag. Tveir þingmenn misstu sæti sitt, Píratinn Eva Pandora Baldursdóttir og Teitur Björn Einarsson úr Sjálfstæðisflokki. Bæði þingsætin fóru til Miðflokks Sigmundar Davíðs Gunnlaugssonar. Teitur Björn var inni í fyrstu tölum og þeim næstu en þegar líða tók á nóttina var ljóst að hann átti við ramman reip að draga. Eva Pandora var ekki inni þegar tölur tóku að berast úr kjördæminu en undir morgun sýndu útreikningar að hún yrði jöfnunarþingmaður kjördæmisins. Þegar síðustu tölur komu úr Borgarnesinu datt hún út og jöfnunarþingmaður Pírata færðist til Reykjavíkurkjördæmis suður. Í stað Evu Pandoru var jöfnunarþingmaður Norðvesturkjördæmis Sigurður Páll Jónsson, annar maður á lista Miðflokksins.

Nýir þingmenn kjördæmisins eru Bergþór Ólason og Sigurður Páll Jónsson úr Miðflokki og Ásmundur Einar Daðason og Halla Signý Kristjánsdóttir Framsóknarflokki. Ásmundur Einar er að koma aftur inn sem þingmaður í kjördæminu en hann sat á þingi frá 2009 til 2013 fyrir Vinstri græn og síðar Framsóknarflokk.

Kosningakerfið með sínum kostum og kynjum gerir það að verkum að Miðflokkurinn sem hlaut 14,2 prósent atkvæð fékk tvo menn kjörna en Vinstri græn sem fengu 17,8 prósent fengu einn þingmann kjörinn. Þetta atvikast vegna þess að annar maður Miðflokksins kemur inn sem landskjörinn jöfnunarmaður.

Sjálfstæðisflokkurinn tapaði 5 prósentustigum frá því í kosningunum í fyrra. Fékk 29,5 prósent 2016 en 24,5 nú. Píratar töpuðu einnig talsverðu fylgi, fóru úr 10,9 prósentum í 6,8 prósent. Fylgi VG hélst í stað, var 18,1 prósent fyrir ári en 17,8 prósent í kosningunum á laugardaginn. Framsóknarflokkurinn tapaði fylgi en flokkurinn fékk 20,8 prósent í kosningunum í fyrra en 18,4 prósent nú. Samfylkingin bætti duglega við sig, fóru úr 6,3 prósentum í 9,8 prósent.

Viðreisn tapaði fylgi í Norðvesturkjördæmi og fór fylgið úr 6,2 prósent í 2,5 prósent og Björt framtíð fékk einnig minna fylgi en flokkurinn fékk 3,5 prósent fyrir ári en 0,8 prósent nú. Flokkur fólksins fékk 5,3 prósent og hækkaði um 2,8 prósentustig milli kosninga.

Þrír síðastnefndu flokkarnir náðu ekki manni inn á þing.

Þingmenn Norðvesturkjördæmis:

Haraldur Benediktsson og Þórdís Kolbrún Reykfjörð Gylfadóttir, Sjálfstæðisflokki Ásmundur Einar Daðason og Halla Signý Kristjánsdóttir, Framsóknarflokki
Berþór Ólason og Sigurður Páll Jónsson, Miðflokki
Lilja Rafney Magnúsdóttir, VG
Guðjón S. Brjánsson, Samfylkingu