Nærri 380 þúsund gistinætur voru skráðar á hótelum í síðasta mánuði samkvæmt tölum Hagstofunnar. Það er þriggja prósenta aukning frá því í september í fyrra. Flestar gistinætur voru á höfuðborgarsvæðinu, eða ríflega helmingur allra gistinátta. Á Vestfjörðum og Vesturlandi, en landshlutarnir eru taldir saman í gögnum Hagstofunnar, voru 21.724 gistinætur og fjölgaði um 7 prósent milli ára. Mest fjölgaði gistinóttum á Suðurnesjum eða um tíu af hundraði. Erlendir ferðamenn eru langstærstur hlutinn en níu af hverjum tíu gistinóttum eru skráðar á erlenda ferðamenn.

Gistinætur á hótelum frá október 2016 til loka síðasta mánaðar eru 18 prósent fleiri en sömu mánuði árið á undan.

Misvægi atkvæða er að aukast og er mest milli Norðvesturs- og Suðvesturkjördæmis. Við endurskoðun á kosningalögum árið 2000 var kjördæmum fækkað úr átta í sex og jafnframt var misvægi atkvæða sett mörk í stjórnarskrá þannig að vægi atkvæða í einu kjördæmi megi ekki vera tvöfalt meira en í öðru kjördæmi. Í fréttaskýringu RÚV kemur fram að frá því 2000 hafa tveir þingmenn færst úr Norðvesturkjördæmi í Suðvesturkjördæmi, fyrst í kosningunum 2003 og svo árið 2009.

Í kosningunum á laugardag voru 2.690 kjósendur að baki hverju þingsæti í Norðvesturkjördæmi, samanborið við 5.346 í Suðvesturkjördæmi. Hlutfallið er 199% og á barmi þess að fara yfir stjórnarskrárbundin mörk, sem eru 200%.

Helstu rökin fyrir meira vægi atkvæða í dreifðair byggðum er að vega upp á móti valdi þéttbýlis og valdamiðstöðva og þetta er fyrirkomulag sem þekkist í nágrannalöndunum en Ísland hefur þó gengið lengra í þessa átt en önnur lönd.

Jöfnunarmenn eiga að tryggja að þingstyrkur flokkanna sé í samræmi við atkvæðafjölda en þeir eru ekki nógu margir, eða níu. Í kosningunum á laugardag stingur í augun að Framsóknarflokkurinn fékk einum fleiri þingmann en Samfylkingin þrátt fyrir að Framóknarflokkurinn hafi fengið 10,7 prósent á landsvísu en Samfylkingin 12,1 prósent. Fleir jöfnunarmenn hefðu fært einn þingmann frá Framsókn til Samfylkingar. Að öðru leyti er þingstyrkur flokkanna í samræmi við fylgi.

Vestfirsku tónlistarkonurnar Katla Vigdís Vernharðsdóttir og Ásrós Guðmundsdóttir sem komu, sáu og sigruðu Músíktilraunir í byrjun árs láta nú ljós sitt skína á tónlistarhátíðinni Iceland Airwaves, dagskáin er þétt og hefst í dag:

31.10.17- Hitt húsið- 18:30
1.11.17- Grund dvalar- og hjúkrunarheimilið- 10:15
1.11.17- KEX Hostel- 13:00
1.11.17- Sólon Bistro- 19:00
2.11.17- Víking Brewery Reykjavík- 14:00
3.11.17- Bíó Paradís- 13:00
3.11.17- Hitt Húsið- 19:30
3.11.17- Fríkirkjan (on venue) 21:00
4.11.17- Landsbankinn (Reykjavík)- 15:00
5.11.17- Gaukurinn (on venue) 22:30

Fylgjast má með tónlistarviðburðum Between Mountains á Facebooksíðu hljómsveitarinnar.

Það stefnir í frekar tíðindalítið veður í dag, suðvestlæga átt og dálitla vætu S- og V-lands, en úrkomulítið NA-til. Síðdegis fara skil yfir landið frá vestri til austurs og eykst þá úrkoman V-lands um tíma en skilin munu líklega ekki færa neina úrkomu að ráði á NA- og A-land. Þetta kemur fram í hugleiðingum veðurfræðins.

Í kvöld snýst í norðlæga átt og kólnar nokkuð hratt með henni, fyrst um landið V-vert. Það má búast við slydduéljum á Vestfjörðum fram eftir nóttu, en éljum NA- og A-til á morgun. Norðanáttin verður einna hvössust á SA- og A-landi í fyrramálið þar sem hviður við fjöll geta auðveldlega farið yfir 30 m/s, einkum suður af Vatnajökli og á sunnanverðum Austfjörðum. Á sama tíma léttir til fyrir sunnan og vestan og eru ágætis líkur á björtu veðri þar á morgun. Það lægir síðan og styttir upp á landinu um og eftir hádegi.

Tíðin er heldur rysjótt þessa dagana en annað kvöld er útlit fyrir vaxandi suðlæga átt og rigningu V-lands eftir nokkuð fallegan og svalan dag á þeim slóðum.

Sundkonan Kristín Þorsteinsdóttir bætti tveimur Evrópumeistaratitlum í safnið sitt á fyrsta degi Evrópumeistaramóti DSISO sem er haldið í París. Á fyrsta keppnisdegi í gær tók hún þátt í tveimur greinum, 50 metra flugsundi og 100 metra baksundi. Flugsundið var æsispennandi sem Kristín sigraði mjög naumlega og ekki nema 6 sekúndubrotum á undan næsta keppanda.

Seinnipartinn í gær var komið að 100 metra baksundi en það er grein sem Kristín óttaðist eilítið fyrirfram eftir að hafa gert ógilt í sömu grein á móti í Malmö í vor. Kristín Þorsteinsdóttir er íþróttakona sem lætur ekkert stoppa sig og hélt ótrauð til sunds og landaði að sjálfsögðu öðrum Evrópumeistaratitli.

Kom­ist hef­ur á sam­komu­lag um kaup Inner­gex Renewable Energy á Alterra Power Corp. sem er stærsti hlut­haf­inn í HS Orku. Frá þessu er greint á mbl.is. Bæði Innergex Renewable Energy og Alterra Power Group eru kanadísk orkufyrirtæki og það síðarnefnda ræður yfir 66,6% hlut í HS Orku. Vesturverk ehf. á Ísafirði sem áformar að Hvalárvirkjun í Ófeigsfirði er í meirihlutaeigu HS Orku.

Kaup­verðið nemur 1,1 millj­arði Banda­ríkja­dala, eða tæp­um 116 millj­örðum ís­lenskra króna og fela í sér 25% reiðufé og 75% hluta­fé í Inner­gex. Þau eru háð samþykki hlut­hafa Alterra.

Verslunin á Norðurfirði í Árneshreppi opnar á ný á morgun en engin verslun hefur verið í hreppnum frá því að útibúi Kaupfélags Steingrímsfjarðar var lokað í september. Nýir verslunarstjórar eru hjónin Ólafur Valsson og Sif Konráðsdóttir og komu þau með búslóð sína í hreppinn í gær. Á morgun kemur flutningabíll frá Strandafrakt með fyrstu vörur í nýja verslun. Á vef Litla hjalla segir ritstjórinn Jón Guðbjörn Guðjónsson opnunar verslunarinnar sé mikill léttir fyrir íbúa hreppsins.

Í fjarveru Evu Sigurbjörnsdóttur, oddvita Árneshrepps, var það fyrrnefndur Jón Guðbjörn sem tók á móti kaupmannshjónunum og bauð þau velkomin í hreppinn og afhenti lykla að verslunarhúsinu og að íbúð sem Ólafur og Sif fá til afnota, en íbúðin er í sömu byggingu og verslunin er í, á efstu hæð kaupfélagsbygginganna.

Björgunarsveitir frá Vesturlandi, Ströndum, Vestfjörðum og við Húnaflóa voru kallaðar út í kvöld til að leita að týndum smölum í Selárdal á Ströndum. Uggur vaknaði með fólki þar sem smalarnir höfðu ekki skilað sér til byggða á tilætluðum tíma. Þeir fundust þó fljótlega eftir að björgunarsveitir fóru til leitar. Fyrstu hóparnir fóru úr húsi klukkan níu í kvöld og hálftíma síðar var búið að finna smalana heila á húfi.

Fimmtán manna hópur frá Björgunarfélagi Ísafjarðar var í þann mund að leggja af stað á Strandir þegar smalarnir fundust.

„Undirritaður leggur því til á þessum tímamótum að Árneshreppur staldri örlítið við, áður en ákvörðun um framhald varðandi framkvæmdir til undirbúnings Hvalárvirkjunar er tekin,“ segir Sigurður Gísli Pálmason, stjórnarformaður IKEA á Ísland, í athugasemd til hreppsnefndar Árneshrepps vegna fyrirhugaðar Hvalárvirkjunar í Ófeigsfirði.

Sigurður Gísli vill stofna þjóðgarð á Ströndum sem hann sér fyrir sér að gæti orðið burðarás í samfélaginu, ekki aðeins í Árneshreppi heldur á norðanverðum Vestfjörðum.

Í bréfinu segir um m.a. um þjóðgarð á Ströndum:

„Ef vel er haldið á spöðunum myndir hann ekki aðeins skapa störf fyrir umsjónarmenn hans, heldur einnig stuðla að afleiddri atvinnustarfsemi s.s. ferðaþjónustu, uppbyggingu fræðaseturs og annarri nýsköpun.“

Hann segist gera sér grein fyrir að hugmynd um þjóðgarð virðist sem fugl í skógi meðan virkjunin er í hendi. „Mestu skiptir að ef hægt er að gera hugmynd um þjóðgað að veruleika með aðkomu áhugasamra aðila, bæði í atvinnulífi, stjórnsýslu og heimafyrir, þá verði sá möguleiki ekki sleginn af borðinu að óathuguðu máli,“ segir í bréfinu.

Sigurður Gísli er einn af kunnari kaupsýslumönnum á Íslandi og hefur einbeitt sér að náttúruvernd með ýmsum hætti.