Norræna bókasafnavikan er nú haldin í 21. sinn dagana 13.-19. nóvember. Um er að ræða verkefni á vegum Sambands Norrænu félaganna og hefur Norræna Bókasafnavikan sem markmið að efla áhuga á lestur og um leið að vekja athygli á norrænum bókmenntum og frásagnarlist.  Gert er ráð fyrir að yfir 2.000 bókasöfn taki þátt og mun Bókasafnið Ísafirði ekki skorast undan.

Finnland fagnar í ár 100 afmæli sjálfstæðis og í tilefni af því var ákveðið að Finnland skyldi vera þemað okkar að þessu sinni. Áhersla verður lögð á finnskar bókmenntir og er þeim gert hærra undir höfði þessa viku með útstillingu og kynningu á finnskum rithöfundum. Einnig verður getraun um Finnland sem við hvetjum gesti okkar til að taka þátt í. Vinningar eru að sjálfsögðu í stíl við þemað. Við ætlum ekki að gleyma börnunum, en fyrir þau verður náttfatasögustund fimmtudaginn 16. nóvember kl. 18. Hvetjum alla til að mæta á náttfötunum, líka mömmu og pabba – og bangsa!

bryndis@bb.is

Fræðslumiðstöð Vestfjarða býður að venju upp á fjölbreytta dagskrá í nóvember. Í samstarfi við Rauðakrossdeildir á norðanverðum Vestfjörðum er námskeið um sálrænan stuðning og skyndihjálp. Það er hægt að læra um innsæi stjórnandans og um vinnutengda streitu og kulnun, í boði er sömuleiðs grunnnámskeið í WordPress og í ensku fyrir pólskumælandi fólk. Fræðast má um innleiðingu persónuverndarlaga og um ávana- og fíknilyf. Og í tilefni jólanna er í boði námskeið um hvernig skal hjúpa, fylla og meðhöndla súkkulaði við konfektgerð.

bryndis@bb.is

Í síðustu viku stóðu bæjarstjórnir Vesturbyggðar og Tálknafjarðarhrepps fyrir opnu námskeiði fyrir íbúa um þátttöku í sveitarstjórnum en það var Ráðrík ehf sem stóð fyrir skipulaginu. Námskráin var fjölbreytt og miðaði að því að leiðbeina og styrkja íbúa til að taka þátt í störfum sinna sveitarfélaga. Að sögn Gerðar Bjarkar Sveinsdóttur, verkefnastjóra samfélagsuppbyggingar heppnaðist námskeiðið mjög vel og þátttak framar björtustu vonum. „Inntakið var „Þátttaka í sveitarstjórnum“ en það nýtist vel, hvort sem áhugi er á beinni þátttöku eða einfaldlega til að öðlast betri skilning á því í hverju þátttaka felst.  Vesturbyggð og Tálknafjarðarhreppur stóðu saman að námskeiðinu sem tók um fjóra tíma. Boðið var uppá léttan kvöldverð og var námskeiðinu skipt upp í fyrirlestra, stutt verkefnum og hópefli.„

bryndis@bb.is

Þingflokkar Vinstri grænna, Framsóknarflokks og Sjálfstæðisflokks hafa allir samþykkt að ganga til formlegra stjórnarmyndunarviðræðna eftir nokkurra daga óformlegar viðræður. Ekkert hefur verið gefið upp um hvernig væntanlegur stjórnarsáttmáli muni líta út eða hvernig ráðherraskipan mun verða en þó virðist liggja fyrir að Katrín Jakobsdóttir verði forsætisráðherra og verður það í annað sinn í sögu lýðveldisins að kona gegni þeirri stöðu. Ekki var eining um þessar viðræður hjá þingflokki Vinstri grænna og greiddu tveir þingmenn atkvæði á móti áframhaldandi viðræðum, það voru þau Andrés Ingi Jónsson og Rósa Björk Brynjólfsdóttir.

bryndis@bb.is

Árleg skýrsla Efnahags- og framfarastofnunarinnar (OECD) um stöðu heilbrigðismála í aðildarríkjum stofnunarinnar, Health at a Glance 2017 er komin út. Í skýrslunni koma fram margvíslegar upplýsingar um heilbrigðismál í aðildarríkjum stofnunarinnar sem eru 35 talsins, auk fleiri landa. Skýrslan skiptistí ellefu kafla sem fjalla um heilbrigðisástand, áhrifaþætti heilbrigðis aðra en læknisfræðilega, aðgengi, gæði, heilbrigðisútgjöld, mannafla, starfsemi heilbrigðisþjónustunnar, lyfjamál og öldrun og langtíma umönnun. Sérstakur kafli er um ástæður ávinnings síðustu áratuga í auknum lífslíkum. Í ritinu er einnig svonefnt mælaborð þar sem löndin eru borin saman við meðaltal OECD út frá nokkrum þáttum.

Íslenskir unglingar reykja miklu minna en unglingar í OECD ríkjunum, 3% 15 ára íslenskra unglinga reyktu að minnsta kosti einu sinni í viku en 12% unglinga í OECD. Almennt hefur dregið úr reykingum og áfengisneyslu meðal 15 ára unglinga. Ísland er þó meðal 13 ríkja þar sem almenn áfengisneysla jókst á tímabilinu 2009 – 2015.

Unglingarnir okkar neyta hlutfallslega meira af ávöxtum og grænmeti en að meðaltali í OECD ríkjum 2013-2014.

Árlegur meðalvöxtur heilbrigðisútgjalda á mann á árunum 2009 til 2016 var 1,4% að meðaltali í ríkjum OECD, en 1% á Íslandi. Á árunum 2003-2009 var árlegur meðalvöxtur heilbrigðisútgjalda á mann að meðaltali 3,6% í ríkjum OECD en 0,4% á Íslandi.

Árið 2015 var fjöldi starfandi lækna á þúsund íbúa 3,8 hér á landi en 3,4 að meðaltali fyrir OECD-ríkin. Á hinum Norðurlöndunum var hlutfallið lægst í Finnlandi (3,2) og hæst í Noregi (4,4). Hlutfall kvenna af starfandi læknum hefur hækkað en er mjög breytilegt eftir löndum eða frá 20% í Japan til 74% í Lettlandi. Hér á landi er hlutfall kvenna af starfandi læknum rúm 37%.

Fjöldi sjúkrahúsarýma á Íslandi var 3,1 á þúsund íbúa árið 2015 en 4,7 að meðaltali fyrir OECD lönd. Fjöldi útskrifta af sjúkrahúsi (legur) var 114 á þúsund íbúa hérlendis árið 2015 en 156 að meðaltali í ríkjum OECD. Meðallegutími á sjúkrahúsum var 6,3 dagar á Íslandi eða svipaður og í Noregi (6,7) og Svíþjóð (5,9) en 7,8 dagar að meðaltali í OECD.

Árið 2015 voru 16 keisaraskurðir framkvæmdir hér á landi á hundrað lifandi fædda og aðeins í Hollandi (15,9) og Finnlandi (15,5) var hlutfallið lægra. Hæst var hlutfallið í Tyrklandi (53) en meðaltal OECD-ríkja var 28.

Hér á landi fjármagnaði hið opinbera 38% af lyfjaútgjöldum í smásölu en heimilin 58% (aðrir 4%) árið 2015. Aðeins í Lettlandi og Póllandi var hlutur heimilanna hærri. Á hinum Norðurlöndunum var hlutfallið 42-51%.

Skýrsluna má nálgast hér.

Samstarfshópur um gerð stjórnunar- og verndaráætlunar fyrir friðlandið á Hornströndum boðar til opins fundar um áætlunargerðina miðvikudaginn 15. nóvember klukkan 17:00-19:00 í Háskólasetri Vestfjarða á Ísafirði.

Markmið fundarins er að upplýsa íbúa, hagsmunaaðila og landeigendur um gerð stjórnunar- og verndaráætlunar fyrir Hornstrandafriðlandið og kalla eftir skoðunum heimamanna um þau málefni sem fjallað verður um í áætluninni.

Stjórnunar- og verndaráætlunin er unnin skv. 81. gr. laga um náttúruvernd 60/2013 en þar segir m.a.

Í stjórnunar- og verndaráætlun skal m.a. fjallað um landnýtingu, landvörslu, vöktun, uppbyggingu, fræðslu og miðlun upplýsinga, verndaraðgerðir og aðgengi ferðamanna, þar á meðal aðgengi fatlaðs fólks. Ef ekki hafa verið settar sérstakar reglur um umferð manna og dvöl á viðkomandi svæði í auglýsingu um friðlýsingu er heimilt að setja slíkar reglur í stjórnunar- og verndaráætlun svo og reglur um önnur atriði er greinir í IV. kafla.
bryndis@bb.is

Tónlistarfélag Ísafjarðar hefur nú starfað í tæp 70 ár en á síðustu árum hefur af ýmsum orsökum félögum fækkað og nú skorar félagið á íbúa að ganga til liðs við félagið.

Hér að neðan er áskorun frá Tónlistarfélaginu:

Áskorun frá Tónlistarfélagi Ísafjarðar

Tónlistarfélag Ísafjarðar hefur nú starfað í tæp 70 ár af miklum krafti og metnaði. 

Meginverkefni félagsins alla þessa áratugi hefur verið starfsemi Tónlistarskóla Ísafjarðar, að hlúa að skólastarfinu og ekki síst tryggja skólanum gott húsnæði sem tókst loks með miklum ágætum fyrir tæpum 20 árum. 

En Tónlistarfélagið hefur líka haldið uppi gríðarlega metnaðarfullu tónleikahaldi gegnum tíðina og veitt Ísfirðingum og nágrönnum tækifæri til að hlýða á sumt það besta í íslensku tónlistarlífi auk þess að hingað hafa komið fjölmargir erlendir listamenn í heimsklassa og leikið á vegum félagsins. Og Ísafjörður hefur löngum haft einstaklega gott orð á sér meðal tónlistarmanna, sem sækjast eftir að leika í yndislega salnum okkar.

Á síðustu árum hefur félögum í Tónlistarfélaginu fækkað nokkuð vegna brottflutnings fólks o.fl,  en nú vill félagið styrkja samband sitt við þá fjölmörgu sem hafa áhuga á tónlist, vilja fjölbreytt og metnaðarfullt tónleikahald og vilja viðhalda þeim menningarbrag sem tónleikahaldið hefur sett á bæinn. Til þess þarf það stuðning ykkar, tónlistarunnendanna. 

Stjórn félagsins vill hvetja ykkur til að ganga í félagið nú þegar og fá um leið áskrift að fernum tónleikum félagsins.  Fyrstu áskriftartónleikarnir verða sunnudaginn 19.nóvember með hinum glæsilega tenórsöngvara Elmari Gilbertssyni og Helgu Bryndísi Magnúsdóttur píanóleikara. (Miðaverð er 3.000 kr., með afsl. 2.000). Aðrir áskriftartónleikar verða á nýju ári og verða kynntir síðan en víst er að um áhugaverða listamenn verður að ræða.

Félagsgjaldið er 7.500 kr. (4 áskriftartónleikar innifaldir), en verð á staka tónleika er oftast á bilinu 2.500-3.000 kr.  

Ef þið viljið ganga í félagið er hægt að leggja inn á reikning félagsins 0156-26-002626, kt. 6502690209. Líka verður hægt að skrá sig á fyrstu tónleikunum eða hringja í undirrituð og þá er hægt að senda reikning.

Rétt er að benda á að áskrift gildir ekki á alla tónleika sem félagið kemur að. Stundum eru tónleikarnir á vegum listafólksins sjálfs og félagið er stuðningsaðili, en hefur ekki ráð yfir aðgangseyri o.s.frv.

Þeir sem hafa áhuga á að leggja Tónlistarfélaginu lið með þessu móti eru líka velkomnir að starfa með félaginu á ýmsan hátt og geta haft áhrif á stefnu þess og starf enda eru félagsmenn mikilvægt bakland og stuðningshópur.

Þeir sem ekki vilja fá sendan tölvupóst  um tónleika félagsins, ættu líka endilega að láta vita af því.

Með kveðju og von um góðar viðtökur,

f.h. stjórnar Tónlistarfélags Ísafjarðar

Steinþór Bjarni Kristjánsson form. duik@simnet.is

Sigríður Ragnarsdóttir, stjórnarm. smidjugata5@gmail.com

Undanfarnar vikur hefur töluvert verið um væga öndunarfærasýkingu meðal hunda og katta á höfuðborgarsvæðinu og nú virðist hún vera að stinga sér niður úti á landi. Ekki er enn vitað um hvaða sýkingu er að ræða en rannsókn á sýnum stendur yfir á Tilraunastöð Háskóla Íslands á Keldum. Einkenni sýkingarinnar eru oftast hnerri og hósti sem gengur yfir á nokkrum dögum. Fá dýr hafa veikst alvarlega.

Í lok september bárust Matvælastofnun upplýsingar um mögulegan grun um smitandi öndunarfærasýkingu í hundum og köttum á suðvestur horni landsins. Matvælastofnun hóf strax að kanna útbreiðslu og nokkrum vikum síðar fóru að berast fleiri tilkynningar um gæludýr með slík einkenni. Virtist smit dreifast hratt milli dýra og helstu einkenni vera hnerri, mildur hósti og önnur væg einkenni frá efri öndunarvegi. Aðallega var um að ræða hunda, en einnig var tilkynnt um einstaka ketti sem hefðu fengið svipuð einkenni. Fá dýr virðast verða það veik að þau missi matarlyst eða fái hita, þó einstaka dýr sýni slík einkenni.  Í síðustu viku bárust fyrstu fréttir  um einkenni í hundum og köttum á Akureyri.

Þegar ljóst var að um bráðsmitandi sjúkdóm væri að ræða, óskaði Matvælastofnun eftir sýnum úr nokkrum hundum  og óskaði eftir því að Tilraunastöð Háskóla Íslands að Keldum rannsakaði þau í því skyni að kanna um hvaða smitefni væri að ræða. Niðurstaða rannsóknanna liggur ekki enn fyrir, en ef orsökin finnst mun Matvælastofnun strax tilkynna um hana.

Eigendum gæludýra sem sýna einkenni þessarar hnerripestar er ráðlagt að forðast allt álag á dýrin og fylgjast náið með heilsu þeirra. Ef þau þróa alvarlegri einkenni, svo sem lystarleysi, slappleika, mikinn hósta eða hita að þá er rétt að hafa samband við dýralækni.

Athugið að til að forðast smit á milli dýra í biðstofu skal ekki fara með dýrið á dýralæknastofu án undangengins samráðs við dýralækni. 

bryndis@bb.is