Vísitala byggingarkostnaðar reiknuð um miðjan nóvember 2017 er 136,1 stig.(desember 2009=100) og hækkar um 0,3% frá fyrri mánuði. Innlent efni hækkaði um 0,3% (áhrif á vísitölu 0,1%) og innflutt efni hækkaði um 0,8% (0,2%). Á síðustu tólf mánuðum hefur vísitala byggingarkostnaðar hækkað um 4,5%. Vísitalan var sett í 100 stig í desember 2009 og hefur því hækkað um 36,1 prósent á átta árum.

smari@bb.is

Bæjarráð Ísafjarðarbæjar hefur samþykkt að ganga til samninga við Félagsvísindastofnun Háskóla Íslands um gerð íbúakönnunar vegna málefna Sundhallar Ísafjarðar. Á síðasta ári var blásið til hugmyndasamkeppni vegna endurbóta og stækkunar Sundhallarinnar og var tillaga Kanon arkitekta ehf. hlutskörpust. Ljóst að er að kostnaður við framkvæmdir hleypur á hundruðum milljónum króna. Samkvæmt upplýsingum frá Gísla Halldóri Halldórssyni bæjarstjóra gæti könnunin farið fram um miðjan desember ef undirbúningur gengur, annars yrði hún fljótlega eftir áramót.

Allir kosningabærir íbúar sveitarfélagsins eiga kost á að taka þátt í könnuninni sem verður gerð á netinu. Ísafjarðarbær gerir ráð fyrir að kostnaður við könnunina nemi um tveimur milljónum króna.

smari@bb.is

Samtök atvinnulífsins (SA) segja tímabært að skoða styttingu grunnskólans af alvöru um eitt ár. Þetta kemur fram í nýrri greiningu á vef samtakanna. Þar segir að verðmæt tækifæri kunni að felast í styttingu grunnskólanáms og að gæðum í skólastarfi hafi að einhverju leyti hrakað. Í greiningu SA segir að með vandaðri framkvæmd og að vel athuguðu máli kynni stytting grunnskólanáms að bæta gæði náms, koma til móts við nýliðunarvanda í kennarastétt, bæta starfskjör þeirra og starfsaðstæður og veita skólum aukið svigrúm til að koma til móts við ólíkar þarfir nemenda.

Þá telur SA að stytting grunnskólanáms um eitt ár gæti mildað áhrif kennaraskorts og ekki þyrfti að koma til uppsagna sökum þess að margir kennarar eru nálægt lífeyristökualdri.

Samtökin telja að stytting grunnskólanáms væri hægt að hækka laun kennara umtalsvert án aukins kostnaðar fyrir hið opinbera. Sem dæm er nefnt í greiningunni að grunnlaun umsjónarkennara með 5 ára starfsreynslu gætu hækkað úr kr. 516.846 á mánuði í kr. 568.530.

smari@bb.is

Í árslok renna út samningar umhverfis- og auðlindaráðuneytisins við sveitarfélögin um rekstur náttúrustofa. Hafinn er undirbúningur að endurskoðun samninganna þar sem meðal annars er ætlunin að fara yfir verkefni náttúrustofa í ljósi af reynslu af starfsemi þeirra og hver þau eiga að vera til framtíðar.

Í bréfi ráðuneytisins til sveitarfélaga á Vestfjörðum er lagt til að samningur um rekstur Náttúrstofu Vestfjarða verði framlengdur um eitt ár þar sem ekki gefst tími til að endurskoða samninginn fyrir árslok.

Málefni Náttúrustofu Vestfjarða hafa verið í brennidepli síðustu vikur en í fjárlagafrumvarpi Benedikts Jóhannessonar fráfarandi fjármálaráðherra er gert ráð fyrir að framlög ríkisins til stofunnar verði skorin niður um þriðjung. Fjárlögin komu ekki til afgreiðslu þingsins þar sem ríkisstjórnin féll skömmu eftir að frumvarpið var lagt fram og alls óvíst hver afdrif frumvarpsins verða.

smari@bb.is

„Fisk­eldið hef­ur líka komið mjög sterkt inn á þessu ári, og gam­an að fylgj­ast með upp­bygg­ingu at­vinnu­grein­ar­inn­ar. Sam­hliða vexti fisk­eld­is­ins hef­ur verið unnið að mót­un stefnu sem miðar að því að grein­in dafni í sátt við þjóðina, líf­ríki og nátt­úru og virðast lang­flest­ir meðvitaðir um mik­il­vægi þess að byggja fisk­eldið upp á var­kár­an og skyn­sam­leg­an máta. Við vilj­um auðvitað verða fremst í fisk­eldi líka, og get­um orðið það ef við ger­um hlut­ina rétt.“ Þetta segir Þorgerður Katrín Gunnarsdóttir sjávarútvegsráðherra í viðtali í Morgunblaðinu. Í viðtalinu fer hún yfir þetta tæpa ár sem hún hefur verið í ráðuneytinu en allar líkur eru á að hún hverfi úr ríkisstjórn innan skamms og setjist í stjórnarandstöðu.

Meðal þeirra verk­efna sem Þor­gerður er ánægð með að hafa komið af stað er stofn­un stýri­hóps sem vann til­lög­ur um end­ur­skoðun al­menna byggðakvóta­kerf­is­ins.

„Sér­tæki byggðakvót­inn er á könnu Byggðastofn­un­ar en al­menni byggðakvót­inn hjá ráðuneyt­inu. Mjög áhuga­verðar hug­mynd­ir komu út úr starfi stýri­hóps­ins og von­andi verður þeim fylgt eft­ir,“ seg­ir hún.

„Meg­in­inn­takið er það að færa meira vald yfir byggðakvót­an­um yfir til sveit­ar­fé­lag­anna svo að þau sjálf – en ekki miðstýrt vald í Reykja­vík – ákveði hvernig kvót­an­um verður best ráðstafað. Sum myndu vilja láta kvót­ann ganga beint til ákveðinna út­gerða, en á öðrum stöðum gæti orðið ofan á að selja kvót­ann og nota ágóðann til annarr­ar upp­bygg­ing­ar.“

smari@bb.is

Þrír menn hafa verið ákærðir af embætti lög­reglu­stjór­ans á Vest­fjörðum fyr­ir að hafa í fyrra brotið gegn lög­um um nátt­úru­vernd og aug­lýs­ingu um friðland á Horn­strönd­um með því að hafa laug­ar­dag­inn 28. maí í fyrra komið í friðlandið og dvalið þar í viku­tíma án þess að til­kynna Um­hverf­is­stofn­un um ferðalag sitt. Frá þessu er greint á mbl.is.

Málið komst í hámæli í fyrra er starfsfólk Borea Adventures kom að mönnunum í Hornvík þar sem þeir voru með skotvopn og ýmsan veiðibúnað, en meðferð skotvopna er bönnuð í friðlandinu.

Greint var frá því í janú­ar að fallið hafi verið frá ákæru gegn mönn­un­um, en þá hafði verið ákveðið að beita þá sekt­armeðferð. Karl Ingi Vil­bergs­son, hjá lög­regl­unni á Vest­fjörðum, staðfest­ir í sam­tali við mbl.is að menn­irn­ir hafi hins veg­ar neitað að skrifa und­ir slíka sekt­armeðferð og því hafi verið ákært í mál­inu. Það er aft­ur á móti ekki ákært fyr­ir veiði í friðland­inu.

Í síðustu viku féll sýknudóm­ur í Héraðsdómi Vest­fjarða í meiðyrðamáli þar sem GJÁ útgerð ehf, ferðaþjónustufyrirtækið sem flutti menn­ina og veiðibúnað þeirra til Horn­vík­ur, hafði höfðað á hendur  Rúnari Óla Karlssyni hjá Borea Adventures vegna ummæla hans í fjölmiðlum um atburðina í Hornvík í fyrra.

smari@bb.is

Síðastliðinn fimmtudag var dagur íslenskrar tungu haldinn hátíðlegur í Menntaskólanum á Ísafirði en 16. nóvember er jafnframt fæðingardagur Jónasar Hallgrímssonar. Nemendur skólans voru með sérstaka hátíðardagskrá á sal skólans í tilefni dagsins. Þar var boðið uppá kynningar á skáldum, upplestur og söng. Lesið var upp úr bókunum Ástin, drekinn og dauðinn og Auður eftir Vilborgu Davíðsdóttur og bókinni Saga Ástu eftir Jón Kalman Stefánsson. Þá voru nemendur einnig með kynningar á báðum skáldunum.

Ljóðið Ferðalok eftir Jónas Hallgrímsson var einnig flutt á íslensku og frönsku. Hilda Sigurðardóttir flutti það á íslensku en Baptiste Griffaton, franskur nemandi skólans, sá um flutning þess á frönsku. Hann flutti einnig franskt ljóð en einnig var íslensk þýðing á ljóðinu flutt. Dagskránni lauk með fjöldasöng á laginu Á íslensku má alltaf finna svar en þar sameinast góður texti Þórarins Eldjárns við þekkt lag Atla Heimis Sveinssonar.

bryndis@bb.is

Vegna bilunar í aðalvél Baldurs falla allar ferðir ferjunnar niður en viðgerð hefur staðið yfir frá því í gær og var unnið í alla nótt. Að sögn forsvarsmanna ferjunnar er ekki ljóst á þessari stundu hve langt stopp ferjunnar verður.

Farþegabáturinn Særún mun sigla eitthvað í fjarveru Baldurs.

bryndis@bb.is

Í gær var haldin minningathöfn við um þá sem hafa látist í umferðarslysum. Minningarathöfnin var haldin við þyrlupall Landspítalans í Fossvogi. Forseti Íslands, Guðni Th. Jóhannesson, flutti ávarp, einnig Jón Gunnarsson, samgöngu- og sveitarstjórnarráðherra, Þórir Guðmundsson, lögreglumaður á Ísafirði og Ágúst Mogensen, sem um árabil starfaði við rannsóknir á umferðarslysum hjá rannsóknarnefnd umferðarslysa og síðar rannsóknarnefnd samgönguslysa og er nú ráðgjafi í slysavörnum.

Þórir sagði frá reynslu sinni þegar Þórey tvíburasystir hans lést í umferðarslysi á Hnífsdalsvegi í janúar 2006 þegar bíll hennar fór útaf veginum og lenti í sjónum. Sagði hann sárt að vita til þess að ein aðalorsök slyssins hafi verið farsímanotkun hennar við stýrið. Hann hafi iðulega bent á alvöru þess að nota ekki símann um leið og ekið er og kvaðst trúa því að þetta hafi verið eina skiptið sem hún gerði það. Það hafi hins vegar verið einu sinni of oft.

smari@bb.is