Á föstudaginn var skrifað undir áframhaldandi styrktarsamning á milli knattspyrnudeildar Vestra og S.Helgason. S.Helgason, áður Sólsteinar, hafa verið einn af stærstu styrktaraðilum deildarinnar frá 2009 þegar þeir hófu að styrkja deildina.
Á föstudag var líka gert samkomulag við Sólon Breka Leifsson um að hann spili með Vestra á næsta tímabili en hann spilaði með Vestra sumarið 2016.
Með fréttinni má sjá viðtal við Bjarna Jóhannsson þjálfara meistaraflokks karla.
bryndis@bb.is
Undanfarnar vikur hefur töluvert verið um væga öndunarfærasýkingu meðal hunda og katta á höfuðborgarsvæðinu og nú virðist hún vera að stinga sér niður úti á landi. Ekki er enn vitað um hvaða sýkingu er að ræða en rannsókn á sýnum stendur yfir á Tilraunastöð Háskóla Íslands á Keldum. Einkenni sýkingarinnar eru oftast hnerri og hósti sem gengur yfir á nokkrum dögum. Fá dýr hafa veikst alvarlega.
Í lok september bárust Matvælastofnun upplýsingar um mögulegan grun um smitandi öndunarfærasýkingu í hundum og köttum á suðvestur horni landsins. Matvælastofnun hóf strax að kanna útbreiðslu og nokkrum vikum síðar fóru að berast fleiri tilkynningar um gæludýr með slík einkenni. Virtist smit dreifast hratt milli dýra og helstu einkenni vera hnerri, mildur hósti og önnur væg einkenni frá efri öndunarvegi. Aðallega var um að ræða hunda, en einnig var tilkynnt um einstaka ketti sem hefðu fengið svipuð einkenni. Fá dýr virðast verða það veik að þau missi matarlyst eða fái hita, þó einstaka dýr sýni slík einkenni. Í síðustu viku bárust fyrstu fréttir um einkenni í hundum og köttum á Akureyri.
Þegar ljóst var að um bráðsmitandi sjúkdóm væri að ræða, óskaði Matvælastofnun eftir sýnum úr nokkrum hundum og óskaði eftir því að Tilraunastöð Háskóla Íslands að Keldum rannsakaði þau í því skyni að kanna um hvaða smitefni væri að ræða. Niðurstaða rannsóknanna liggur ekki enn fyrir, en ef orsökin finnst mun Matvælastofnun strax tilkynna um hana.
Eigendum gæludýra sem sýna einkenni þessarar hnerripestar er ráðlagt að forðast allt álag á dýrin og fylgjast náið með heilsu þeirra. Ef þau þróa alvarlegri einkenni, svo sem lystarleysi, slappleika, mikinn hósta eða hita að þá er rétt að hafa samband við dýralækni.
Athugið að til að forðast smit á milli dýra í biðstofu skal ekki fara með dýrið á dýralæknastofu án undangengins samráðs við dýralækni.
bryndis@bb.is
Gunnar Jónsson, fyrrum fiskifræðingur hjá Hafrannsóknastofnuninni tók saman sjávardýraorðabók á 10 tungumálum og nú hefur 11. tungumálið bæst við.
Helgi Haraldsson, fyrrum prófessor hjá Stofnun bókmennta og evrópskra tungumála við Hugvísindadeild Háskólans í Osló, bauð Hafrannsóknastofnuninni til afnota rússneskt orðasafn yfir sjávardýr sem hann tók saman. Þessu orðasafni hefur verið komið í orðabókina og má þar nú finna sjávardýraheiti á 11 tungumálum, íslensku, latínu, norsku, dönsku, þýsku, frönsku, ensku, færeysku, spænsku, portúgölsku og eins og áður sagði rússnesku.
bryndis@bb.is
Samtök fiskframleiðenda og útflytjanda (SFÚ) héldu aðalfund sinn á dögunum þar sem kjörinn var nýr formaður, Arnar Atlason en hann er framkvæmdastjóri Tor fiskvinnslu í Hafnarfirði. Fyrrverandi formaður til níu ára er Jón Steinn Elíasson sem tók sæti í stjórn.
Í ályktun fundarins kemur fram að SFÚ leggi áherslu á að ferskur fiskur sé ekki fluttur úr landi án þess að hafa fyrst verið boðinn til sölu á opnum uppboðsmarkaði hér á landi. Sömuleiðis að markaðsverð á opnum fiskmarkaði verði látið ráða í öllum viðskiptum með fisk og verðlagsstofa skiptaverðs verði lögð niður, enda stuðli slíkt að réttu uppgjöri til sjómanna, réttum hafnargjöldum, réttum gjöldum til hins opinbera og réttu verði til neytenda. SFÚ skorar á stjórnvöld að lögbinda fjárhagslegan aðskilnað veiða og vinnslu og að stuðla að því að aukið magn hráefnis skili sér inn á fiskmarkaðina.
bryndis@bb.is
Í vonskuveðri um kl. 21:00 í gærkvöldi voru björgunarsveitir á höfuðborgarsvæðinu kallaðar út vegna rútu sem hafði farið út af á Krísuvíkurvegi og oltið. Enginn slasaðist og rúmum klukkutíma síðar var búið að ferja alla farþega úr rútunni og yfir í aðra bíla.
Í kjölfar þess að allir farþegar úr rútunni höfðu verið fluttir í hús Björgunarsveitar Hafnarfjarðar, var óskað eftir aðstoð björgunarsveita við að flytja fólk sem sat fast í bílum sínum í Vatnsskarði. Vatnsskarð er rúmum kílómetir norðan við vettvanginn og voru miklar hviður í skarðinu og hálka á veginum, þar sátu tæplega tíu bílar fastir. Um miðnætti var allt fólkið komið um borð í bíla björgunarsveita.
Ekki hafa borist fregnir af útköllum björgunarsveita á Vestfjörðum
bryndis@bb.is
Vestfirðingur ársins 2016, Katrín Björk Guðjónsdóttir, sér sem fyrr gleðina í öllu og heldur einarðlega áfram því verkefni sínu að ná bata. Á bloggsíðu sinni gefur hún okkur hinum tækifæri á að fylgjast með sigrum sínum, stórum sem smáum, sem til að mynda voru í október að geta sleikt efri vörina, geta rækst sig og hóstað. Það er upplýsandi að lesa færslur þessarar miklu baráttukonu sem mun án vafa komast þangað sem hún ætlar, hún lýsir æfingum sínum og kosningareynslu og hún rifjar upp tilfinningar sínar og minningar frá snjóflóðinu 1995.
Í nóvember pistli sínum minnist hún styrktartónleika sem haldnir voru fyrir hana og fjölskyldu hennar og má glöggt sjá hve þakklát hún er þeim stuðningi sem hún fékk. Með pistlinum eru nokkrar myndir af henni og vinkonu hennar Arnheiði Steinþórsdóttur en þær hafa margt brallað í gegnum tíðina.
Með pistlinum, og þessari frétt, er líka myndband sem gert var í tilefni þátttöku þeirra stallna, ásamt fleirum, í Samfés árið 2009. Um myndbandið segir á youtube: Lagið sem Katrín Björk söng á Samfés í Laugardalshöllinni febrúar 2009, tekið upp í studioinu hjá Önundi Pálssyni í Önundarfirði . Katrín Björk (söngur), Arnheiður (Píanó og bakrödd), Daníel Freyr (Gítar), Gauti Geirsson (Bassi) Páll Sólmundur (Gítar), Einar Óli (Trommur)
Nú líður að kjöri Vestfirðings ársins 2017 og tímabært að íhuga hver eigi skilað þennan titil.
bryndis@bb.is
Á Vestri.is segir frá Sambíómótinu þar sem þátt tóku yfir 20 körfuboltakrakkar úr Vestra á aldrinum 6-9 ára. Mótið, sem haldið er af Fjölni í Grafarvogi, er eitt af stærstu körfuboltamótum sem haldin eru hér á landi en um 600 krakkar tóku þátt í mótinu í ár.
Dagskrá helgarinnar var þéttskipuð en auk þess að bjóða upp á körfuboltaleiki er ýmislegt annað í boði s.s. bíóferð, sund og kvöldvaka. Lið Vestra sem tóku þátt á mótinu voru fimm talsins, tvö stelpulið og þrjú strákalið. Öll liðin kepptu fimm leiki, sýndu mikinn baráttuanda og stóðu sig með miklum sóma. Mátti sjá miklar framfarir hjá liðunum á mótinu en sumir þátttakendanna voru að stíga sín fyrstu skref á körfuboltamóti. Umfram allt var það þó leikgleðin sem réði ríkjum hjá Vestraliðunum því hún skein úr hverju andliti á meðan á mótinu stóð.
Krakkarnir skörtuðu í fyrsta sinn nýjum keppnisbúningi Vestra og vakti hann athygli annarra mótsgesta. Var haft á orði hversu vel heppnaður og fallegur hann væri.
Þjálfarar Vestrakrakkanna í 6-9 ára hópunum í vetur eru þeir Ingimar Aron Baldursson, Gunnlaugur Gunnlaugsson og Yngvi Páll Gunnlaugsson. Samtals spiluðu krakkarnir 25 leiki um helgina og engin leið fyrir þá félaga að stýra öllum þeim leikjum því margir sköruðust. Aðstoðarþjálfarar hlupu því í skarðið ásamt foreldrum og gekk allt ljómandi vel upp. Myndarlegur hópur foreldra fylgdi krökkunum eftir allt mótið og skemmtu allir sér hið besta.
Næsta stórmót þessa aldurshóps er hið margrómaða Nettómót í Reykjanesbæ sem fram fer fyrstu helgina í mars 2018.
bryndis@bb.is
Landslið kvenna í körfubolta mætir Svartfjallalandi á morgun í undankeppni EM og er leikurinn sýndur beint á RUV. Útsending hefst kl. 15:40 en leikurinn kl. 16:00.
Leikjaplanið í undankeppni EM
Þann 8. nóvember var opnuð í Háskóla Íslands ljósmyndasýningin Alvöru karlmenn. Sæbjörg Freyja Gísladóttir þjóðfræðingur á Flateyri vann sýninguna sem er blanda af gömlum og nýjum myndum sem endurspegla hugmyndir um karlmennsku. Sæbjörg kynnti hugmyndafræði og vinnuna við sýninguna og stýrði leiðsögn um hana á opnunardegi, en hún hangir áfram uppi á göngum Háskólatorgs (niðri) og er fólk hvatt til að skoða hana. Sýningin í HÍ er haldin í samvinnu Sæbjargar og Námsbrautar í þjóðfræði og safnafræði við Háskóla Íslands og Rannsóknarseturs HÍ á Ströndum – Þjóðfræðistofu. Eftirfarandi er kynning á sýningunni:
Alvöru karlmenn
Vaskir sjómenn, vígreifir bankamenn, krúttleg lopatröll, léttfættir séntilmenn, þrekmiklir bændasynir: Það er misjafnt hvað þykir karlmannlegt, breytilegt eftir stað, stund og stétt. En hvernig hefur karlmennskan þróast í tímans rás og hvernig bera menn sig karlmannlega í dag? Þjóðfræðingurinn Sæbjörg Freyja Gísladóttir hefur rannsakað hvernig karlmennska birtist í ljósmyndum frá árunum 1914 til 2014, hvaða líkamsstaða þykir karlmannleg á hverjum tíma og hvernig líkamar karlmanna endurspegla samfélagsbreytingar.
Sæbjörg safnaði og greindi um eitt þúsund ljósmyndir frá Skjalasafni Austfirðinga og Skjalasafninu á Ísafirði frá fyrstu áratugum 20. aldar. Hún ljósmyndaði einnig þrjátíu karlmenn sem eru búsettir á Egilsstöðum, Reykjavík og Önundarfirði. Afrakstur þessa er ljósmyndasýningin Alvöru karlmenn sem þegar hefur verið sýnd víða um land og ratar nú á veggi Háskóla Íslands.
bryndis@bb.is
Á laugardag mætir kvennalið Vestra í 2. flokki stúlkna í blaki Aftureldingu á heimavelli Aftureldingar í Mosfellsbæ. Þetta er fyrsti leikur Aftureldingar í mótinu en sjötti leikur Vestra. Vestri hefur sigrað HK og Völsung en tapað fyrir Þrótti R og báðum leikjum við Þrótti Neskaupstað.
Íslandsmót 5. – 6. flokks fer einnig fram um helgina og þar á Vestri hrausta fulltrúa.
Í 6. flokki, 6-8 ára er Vestri með tvö lið, Vestri X og Vestri Y og í 5. flokki, sem eru krakkar 9-11 ára, á Vestri sömuleiðis 2 lið. Það eru þau Tihomir Paunovski þjálfari Vestra og Harpa Grímsdóttir sem fylgja keppendum suður og stýra leikjum þeirra.
Tihomir þarf þó að bregða sér frá á laugardeginum því fyrir utan að stýra 2. flokki stúlkna í sínum leik er líka leikur meistaraflokks karla í Mosfellsbæ við Aftureldingu þann daginn en hann er spilandi þjálfari í karlaliðinu. Þetta er annar leikur Vestra í 1. deildinni en liðið tapaði fyrir BF í október. Þess má geta að karlalið Vestra sigraði 1. deildina í fyrra með yfirburðum, tapaði aðeins þremur leikjum.
bryndis@bb.is
