Í dag kl. 13:00 hófst stofnfundur Vestfjarðastofu ses að viðstöddu fjölmenni í Edinborgarhúsinu. Í stofnsamþykkt stofunnar segir:

Tilgangur Vestfjarðastofu ses. er að vinna að hagsmunamálum íbúa, sveitarfélaga, stofnana og fyrirtækja á Vestfjörðum og veita samræmda og þverfaglega ráðgjöf og þjónustu tengda atvinnu- og byggðaþróun, frumkvöðlastarfsemi og menningu í víðum skilningi.

Markmið Vestfjarðastofu ses. er að efla atvinnulíf á Vestfjörðum, stuðla að velferð íbúa og styrkja Vestfirði sem búsetukost og áfangastað ferðamanna. Markmiði sínu hyggst Vestfjarðastofa ses. ná með öflugu samstarfi atvinnulífs, sveitarfélaga, ríkisvalds og stoðkerfis hins opinbera.

Undirbúningur Vestfjarðastofu hefur staðið um nokkurt skeið og mun hún taka yfir þau verkefni sem Fjórðungssamband Vestfirðinga og Atvinnuþróunarfélag Vestfjarða hafa sinnt hingað til.

Í stjórn Vestfjarðastofu skal skipa 9 einstakling og skulu 5 tilnefndir af sveitarfélögum og fjórir af svið atvinnulífs og menningar. Í þessa fyrstu stjórn og varastjórn stofunnar voru kosnir:

Stjórn

Pétur G. Markan, sveitarfélag

Jón Örn Pálsson, sveitarfélag

Ingibjörg Emilsdóttir, sveitarfélag

Margrét Jónmundsdóttir, sveitarfélag

Sigurður Hreinsson, sveitarfélag

Víkingur Gunnarsson, atvinnulíf og menning

Hólmfríður Vala Svavarsdóttir, atvinnulíf og menning

Ágústa Ýr Sveinsdóttir, atvinnulíf og menning

Kristján G Jóakimsson, atvinnulíf og menning

Varastjórn

Óskar Hálfdánarson, atvinnulíf og menning

Jón Jónsson, atvinnulíf og menning

Inga Hlín Valdimarsdóttir, atvinnulíf og menning

Aðalbjörg Óskarsdóttir, atvinnulíf og menning

Áslaug Guttormsdóttir, sveitarfélag

Daníel Jakobsson, sveitarfélag

Jónas Þór Birgisson, sveitarfélag

Nanný Arna Guðmundsdóttir, sveitarfélag

Magnús Jónsson, sveitarfélag

bryndis@bb.is

Önfirðingurinn María Rut Kristinsdóttir hefur verið ráðin aðstoðarmaður formanns Viðreisnar, Þorgerðar Katrínar Gunnarsdóttur. Þetta kemur fram í tilkynningu frá Viðreisn.

María Rut er með BS-gráðu í sálfræði frá Háskóla Íslands og stundar nú meistaranám í opinberri stjórnsýslu við sama skóla. Hún lætur af störfum sem sérfræðingur í dómsmálaráðuneytinu þar sem hún hefur leitt samráðshóp ráðherra um meðferð kynferðisbrota innan réttarvörslukerfisins síðastliðin tvö ár.

Áður starfaði hún sem markaðsstjóri GOMOBILE og formaður Stúdentaráðs Háskóla Íslands. Þá var hún talskona Druslugöngunnar 2013 til 2015 þar sem hún lagði ríkar áherslur á úrbætur í ofbeldismálum.

„Hún tók virkan þátt í stúdentapólitík þar sem hún sat m.a. í háskólaráði, jafnréttisnefnd HÍ og sinnti ýmsum öðrum trúnaðarstörfum fyrir skólann. Var hún tilnefnd af JCI Íslandi sem framúrskarandi ungur Íslendingur árið 2014 fyrir afrek á sviði menntamála. María gegndi embætti varaformanns Samtakana ’78 árið 2015-2016 og er stofnandi Hinseginleikans, ásamt unnustu sinni.

Hinseginleikinn er fræðsluvettvangur fyrir ungt fólk sem hefur það að markmiði að brjóta upp staðalmyndir og fjölga fyrirmyndum hinseginfólks í samfélaginu. Verkefnið fékk heiðursviðurkenningu KYNÍS fyrir framúrskarandi starf á sviði kynfræðslu 2016. Þá er María einnig í skipulagsteymi rokkhátíðarinnar Aldrei fór ég suður, sem haldin er á Ísafirði ár hvert.

María Rut er fædd árið 1989 og er trúlofuð Ingileif Friðriksdóttur, laganema og fjölmiðlakonu og eiga þær soninn Þorgeir Atla, 10 ára,“ segir í tilkynningu Viðreisnar.

smari@bb.is

Opnað hefur verið fyrir umsóknir um Eyrarrósin og er umsóknarfrestur er til 15. janúar 2018. Eyrarrósin er viðurkenning fyrir framúrskarandi menningarverkefni á starfssvæði Byggðastofnunar. Markmið Eyrarrósarinnar er að beina sjónum að og hvetja til menningarlegrar fjölbreytni, nýsköpunar og uppbyggingar, á sviði menningar og lista. Byggðastofnun, Air Iceland Connect og Listahátíð í Reykjavík hafa staðið saman að verðlaununum frá upphafi, eða frá árinu 2005.

Umsækjendur um Eyrarrósina geta meðal annars verið stofnun, tímabundið verkefni, safn eða menningarhátíð. Valnefnd, skipuð fulltrúum Byggðastofnunar, Listahátíðar í Reykjavík og Flugfélags Íslands ásamt einum menningarfulltrúa á starfssvæði Byggðastofnunar tilnefnir þrjú verkefni og hlýtur eitt þeirra Eyrarrósina ásamt veglegum peningaverðlaunum. Hin tvö tilnefndu verkin hljóta einnig peningaverðlaun.

Verndari Eyrarrósarinnar er Eliza Reid, forsetafrú.

Í tvígang hefur Eyrarósin verið veitt vestfirskum menningarverkefnum. Árið 2007 fékk Strandagaldur verðlaunin og árið eftir kom Eyrarósin í hlut Aldrei fór ég suður.

smari@bb.is

Guðmundur Ingi Guðbrandsson tók við lyklavöldum í umhverfisráðuneytinu í morgun. Guðmundur er utanþingsráðherra en hann hefur starfað sem framkvæmdastjóri Landverndar. Málaflokkur ráðuneytisins er stór og hefur snertifleti á mál sem Vestfirðingar hafa sett á oddinn. Í frétt á vef Morgunblaðsins er Guðmundur spurður um ýmist hitamál, fiskeldi meðal annars nefnt og hvernig nýjum ráðherra hugnist að takast á við þau mál. „Mér hugn­ast það ágæt­lega,“ svarar Guðmundir Ingi og bætir við: . „Ég held að þarna þurfi að fara að mik­illi gát til þess að passa áhrif­in á sér­stak­lega villta laxa­stofna og það þarf að vinna málið út­frá því; að gæta að þeirri auðlind okk­ar þegar verið er að huga að þróun fisk­eld­is á Íslandi.“

Í vor sendi Landvernd frá sér eindregna ályktun þar sem stjórnvöld voru krafin um að banna laxeldi á frjóum laxi í sjó. Í ályktuninni stóð meðal annars að áhættan sem fylgir stórauknu laxeldi í sjó hér við land, og þeim aðferðum sem hér eru notaðar, sé geigvænleg og óboðleg fyrir íslenska náttúru.

smari@bb.is

Hvað er spunnið í opinbera vefi er könnun sem hefur verið framkvæmd annað hvert ár frá 2005. Niðurstöður í könnuninni 2017 voru kynntar á UT-deginum í gær á Grand hóteli í Reykjavík og óhætt að segja að Bolungarvíkurkaupstaður deili toppnum í könnunni með öðrum stofnunum. Vefur Bolungarvíkkaupstaðar skorar 90 stig í könnuninni en 35 stofnanir skora 90 stig eða hærra af 239 stofnunum.

Af sveitarfélögum fá 13 félög 90 stig eða hærra. Hin sveitarfélögin 12 eru:

• Akureyri
• Dalvíkurbyggð
• Fjarðabyggð
• Fljótsdalshérað
• Garðabær
• Hornafjörður
• Kópavogsbær
• Reykjanesbær
• Reykjavíkurborg
• Seltjarnarneskaupstaður
• Skagafjörður
• Ölfus

Vefur Ísafjarðarbæjar skoraði ekki hátt í könnuninni og fékk 65 stig og vefur Vesturbyggðar fékk 78 stig.

smari@bb.is

Í dag, 1. desember, minnist íslenska þjóðin að 99 ára eru frá fullveldi Íslands. Þann 1. desember 1918, tóku gildi milli Íslands og Danmerkur Sambandslögin, sem voru lög um það hvernig Ísland stóð í sambandi sínu við Danmörku. Í þeim kom meðal annars fram viðurkenning Danmerkur á því að Ísland væri fullvalda og frjálst ríki. Dagurinn varð smám saman að almennum þjóðhátíðardegi fram að lýðveldistíma og var Íslenski fáninn dreginn að húni í fyrsta sinn sem fullgildur þjóðfáni þennan dag.

Þrátt fyrir að áralangri baráttu hafi verið lokið með fullveldi landsins var lítið um hátíðahöld þegar haldið var upp á fullveldisdaginn í fyrsta sinn árið 1918, enda veturinn með eindæmum harður og oftast kallaður frostaveturinn mikli. Katla gaus einnig frá 12. október til 4. nóvember og seint í október barst drepsótt sú sem kölluð var spánska veikin til landsins og létust hundruð manna. Loks brast á nýtt kuldakast þegar veikin stóð sem hæst og ekki þótti ráðlegt að hafa langa útisamkomu við þessar aðstæður.

Á næsta ári verða 100 ár frá fullveldi landsins og Alþingi samþykkti í fyrra halda upp á aldarafmælið með víðtækum hætti.

smari@bb.is

Jólaskilti Vesturbyggðar í Geirseyrarmúla fauk í illviðri í fyrra en hefur nú verið endurreist bæjarbúum nú til sérstakrar gleði. Ekki bara vegna þess að jólaandanum líkar ljósadýrðin heldur urðu framkvæmdaraðilum á örlítil mistök og brosa vegfarendur út í annað þegar litið er upp í hlíðina.

bryndis@bb.is

Vestri tekur á móti Breiðabliki í 1. deild karla í kvöld og fer leikurinn fram á heimavelli Vestra. Að vanda hefst klukkan 19:15. Þetta er jafnframt síðasti heimaleikur liðsins á þessu ári og um leið síðasti leikurinn á gamla parketinu á Torfnesi en strax í næstu viku verður hafist handa við að endurnýja gólfið.

Það má gera ráð fyrir að hart verði barist því Blikar sitja í öðru sæti deildarinna og Vestramenn í því fjórða. Liðin mættust snemma í haust í Kópavogi og þá höfðu Blikar betur. Vestri er þó enn ósigraður á heimavelli ætla strákarnir að sjálfsögðu að halda því þannig. Til að það sé tryggt þarf þó góðan stuðning áhorfenda og hvetjum við alla til að mæta á Jakann og styðja strákana.

smari@bb.is

Nóv­em­ber sem nú er að kveðja hef­ur verið kald­ur, sá kald­asti síðan 1996 en þá var mun kald­ara en nú. Þetta seg­ir Trausti Jóns­son veður­fræðing­ur á vefsíðu sinni. Hins veg­ar má segja á mánuður­inn kveðji með nokkr­um hlý­ind­um. Meðal­hiti var rétt ofan frost­marks í Reykja­vík í mánuðinum og um -1,5 stig á Ak­ur­eyri. Úrkoma í Reykja­vík var í rúmu meðallagi, en tals­vert ofan þess á Ak­ur­eyri eða um 40 pró­sent. Snjór var með meira móti norðan­lands og aust­an og einnig á stöku stað á Vest­ur­landi, seg­ir Trausti.

Nóv­em­ber sker sig nokkuð úr öðrum mánuðum árs­ins, sem flest­ir hafa verið hlý­ir.

smari@bb.is

Við könnun ummerkja um snjóflóð sem féllu í snjóflóðahrinu á Vestfjörðum í síðustu viku kom í ljós að nokkuð stórt flóð hefur fallið úr Innra-Bæjargili á ytri væng varnargarðsins ofan Flateyrar. Flóðið sveigði á leiðigarðinum og rann langleiðina niður með honum. Á vef Snjóflóðaseturs Veðurstofunnar segir að líkt og í mörgum öðrum flóðum í þessari snjóflóðahrinu þá var neðri hluti tungunnar ekki efnismikill. Líklega var flóðið mjög loftblandað eins og gjarnan er þegar snjórinn sem fer af stað er þurr og kaldur og flóðið hrífur ekki með sér mikinn snjó á leið sinni niður fjallshlíðina. Slík flóð skilja ekki eftir sig efnismikla tungu en geta farið hratt yfir og eyðileggingarmátturinn verið mikill. Flóðið úr Bæjargili reif með sér grjót, m.a. nokkra stóra hnullunga, og braut greinar. Ummerki um flóðið má sjá á garðinum og vantaði um 4 m upp á garðtoppinn þar sem það náði hæst. Ekki er vitað nákvæmlega hvenær flóðið féll en líklega var það um miðja síðustu viku.

smari@bb.is