Íslenska kalkþörungafélagið á Bíldudal hefur tekið niður og gefið Áhugamannafélaginu Gyðu það sem eftir var af Bullhúsinu svokallaða, gömlu pakkhúsi sem stóð á athafnalóð félagsins, ásamt mjög nákvæmum teikningum og myndum sem fyrirtækið lét útbúa áður en húsið var tekið niður. Gyða er áhugamannafélag um varðveislu menningarminja á Bíldudal og hefur félagið í hyggju að láta endursmíða það og reisa á ný á Bíldudal fáist til þess nægilegt fjármagn. Bullhúsið var elsta atvinnuhúsnæði Bíldudals, hluti menningarsögu bæjarins og friðað samkvæmt lögum. Það var tekið niður í samræmi við leiðbeiningar og kröfur Minjastofnunar Íslands.

Bullhúsið var upphaflega flutt til Bíldudals frá Noregi af Brödrene Bull sem reistu það 1894 við hvalveiðistöð sína á Stekkeyri í Jökulfjörðum. Um aldamótin 1900 keypti athafnamaðurinn Pétur Torsteinsson húsið og reisti á Bíldudal. Þar var það notað sem aðgerðar- og pakkhús, en einnig sem leikhús og til dansleikjahalds eftir því sem fram kemur í gögnum Minjastofnunar. Þar var einnig saltfiskur þveginn innandyra í fyrsta sinn hér á landi vegna þeirrar framsýni að leiða vatn inn í húsið sem gerði þvottinn þar mögulegan.

Timburverk nær ófúið

Áður en húsið var tekið niður skoðuðu sérfræðingar á vegum Minjastofnunar húsleifarnar ítarlega og sú skoðun leiddi í ljós að timburverk þess er nær ófúið þótt ýmsar stoðir vanti og ýmsar séu brotnar. Burðarbitarnir voru t.d. víða lásaðir saman að frönskum sið. „Skoðun sérfræðinga á okkar vegum var engu að síður sú að húsnæðið var í heild mjög bágborðið auk þess sem slysagildra stafaði af því. Það var því ekki um annað að ræða en að heimila niðurtöku þess að lokinni mjög nákvæmri uppmælingu á því og gerð samsvarandi teikninga,“ segir Einar Ísaksson minjavörður Vestfjarða hjá Minjastofnun.

„Minjastofnun var okkur til ráðgjafar um hvernig best væri að taka húsið niður, en áður lögðum við í tæplega þriggja milljóna króna kostnað til að láta mæla húsið mjög nákvæmlega upp, alveg upp á millimetra til að hægt væri að gera teikningar af húsinu og endurreisa á ný. Við gáfum síðan Gyðu húsið, teikningarnar og einnig ljósmyndir sem teknar voru meðan á niðurtöku hússins stóð. Það væri gaman fyrir Bíldudal verði húsið endurreist og fundið nýtt hlutverk betri stað hér í þorpinu,“ segir Einar Sveinn Ólafsson, nýfjárfestingastjóri Marigot, eiganda Kalkþörungafélagsins, hér á landi.

Ný bygging rís á lóðinni

Hann segir að þar sem gamla pakkhúsið stóð verði reist ný 1400 fm bygging samföst núverandi verksmiðjuhúsnæði þar sem lager Kalkþörungafélagsins verði geymdur. „Við áttum fund með hafnarstjórn og bæjarstjóra Vesturbyggðar í október þar sem við handsöluðum samkomulag um sameiningu tveggja lóða, Strandgötu 2 og Hafnarbraut 4 þar sem við hygghumst reisa lagerhúsnæðið. Að lokinni þeirri framkvæmd verðum við komin með allan afurðalager fyrirtækisins undir þak sem verður til mikilla bóta,“ segir Einar Sveinn.

smari@bb.is

Í síðustu viku voru grafnir 72,8 m í Dýrafjarðargöngum. Heildarlengd ganganna í lok viku 48 var 662,7 m sem er 12,5% af heildarlengd ganganna. Alla vikuna var grafið í gegnum samskonar basalt og var í síðustu viku. Á nokkrum stöðum lekur aðeins af vatni inn í göngin í gegnum sprungur eða drenholur.

Klöppin er nokkuð góð og því er öllu efni úr göngunum keyrt á haugsvæði þar sem það verður geymt til síðari nota þegar unnið verður í efri lögum nýja vegarins sem kemur utan ganga og í sjálfum göngunum en þörf er á sterkara bergi eftir því sem ofar kemur í sniði vegarins.

Á meðfylgjandi mynd sést í einn arm borsins vera að bora í stafn ganganna.

smari@bb.is

Bæjarráð Ísafjarðarbæjar krefst þess að bílastæðin við Flugstöðina við Ísafjarðarflugvöll verði malbikuð á næsta ári í samræmi við loforð sem gefið var á fundi stjórnar Isavia með bæjarstjórn Ísafjarðarbæjar í Edinborgarhúsinu 26. ágúst 2016. Í bókun bæjarráðs segir að það sé algjörlega óásættanlegt að bílastæðin séu enn ómalbikuð eftir að flugstöðin hefur verið í rekstri í meira en hálfa öld. Bæjarráð telur einnig brýnt að malbik verði endurnýjað á flugbrautinni og er lag að gera það sumarið 2018 þar sem malbikunarstöð verður í sveitarfélaginu.

Tilefni bókunarinnar eru þær upplýsingar sem hafa borist frá Isavia um að fjármagn á samgönguáætlun hafi verið af skornum skammti og Isavia forgangsraði framkvæmdum sem þjóni fluginu sem slíku. Á það er bent að nú standi yfir framkvæmdir á Ísafjarðarflugvelli þar sem verið er að laga grjótgarð sem hefur skemmst á undanförnum árum.

smari@bb.is

Engar áætlanir eru um innheimtu veggjalda á helstu samgönguleiðum við höfuðborgina. Þetta kemur fram í viðtali RÚV við Sigurð Inga Jóhannsson samgönguráðherra. Ríkisstjórnarfundur var haldinn í morgun og var nýtt fjárlagafrumvarp og áherslur hvers ráðherra til umræðu.

Sigurður Ingi segir helstu áherslur ríkisstjórnarinnar vera á uppbyggingu innviða; heilbrigðismál, menntamál og samgöngumál. Áherslur hans  inn í fjárlagafrumvarpið í samgöngumálum lúta að öryggisþáttum, einbreiðum brúm og fleiru. Hann segir að rætt hafi verið um aukið fjármagn til samgöngumála. Forveri hans í starfi var með áætlanir um að leggja á veggjöld á helstu samgönguleiðir við höfuðborgina, en Sigurður Ingi segir að það sé ekki inni í myndinni lengur.

smari@bb.is

Um 40 prósent leigj­enda þiggja hús­næðis­bæt­ur sam­kvæmt könn­un­um Íbúðalána­sjóðs. Töl­ur um greidd­ar hús­næðis­bæt­ur sýna að í októ­ber fengu um 14.100 heim­ili hús­næðis­bæt­ur, eða sam­tals um 26 þúsund manns, 8 prósent allra lands­manna.

Hús­næðis­bæt­ur eru bú­bót fyr­ir mörg heim­ili, sér­stak­lega þau tekju­lægri. Um 70 prósent heim­ila sem þiggja hús­næðis­bæt­ur eru með lægri heim­ilis­tekj­ur en 400 þúsund krón­ur á mánuði, og á meðal þess­ara heim­ila nema hús­næðis­bæt­ur að meðaltali 34 prósent af greiddri leigu.

Milli apríl og októ­ber lækkaði meðal­greiðsla hús­næðis­bóta úr 31.700 krón­um í 30.400 krón­ur, eða um 4 pró­sent. Eigna- og tekju­skerðing­ar ásamt grunn­fjár­hæðum hús­næðis­bóta héld­ust þó óbreytt yfir tíma­bilið. Leigu­verð fór hins veg­ar hækk­andi á sama tíma­bili. Meðalleigu­fjár­hæð meðal bótaþega hús­næðis­bóta var um 1.560 krón­ur á fer­metra í októ­ber og hafði hækkað um 3,2 prósent síðan í apríl, eða um 6,5% á árs­grund­velli. Til sam­an­b­urðar hækkaði leigu­verðsvísi­tala Þjóðskrár Íslands um 0,9 prósent á sama tíma­bili eða 1,8 prósent á árs­grund­velli.

Kon­ur eru í mikl­um meiri­hluta meðal um­sækj­enda um hús­næðis­bæt­ur. Það á jafnt við um þá um­sækj­end­ur sem búa ein­ir og þá sem búa með fleir­um á heim­ili. Á meðal þeirra um­sækj­enda sem bjuggu ein­ir þáðu 4.300 kon­ur og 3.600 karl­ar hús­næðis­bæt­ur í sept­em­ber. Alls búa 56 prósent bótaþega hús­næðis­bóta ein­ir á heim­ili.

smari@bb.is

„Of­hleðsla báta er mjög al­var­legt mál sem virðist því miður vera allt of al­gengt. RNSA hvet­ur fjöl­miðla, sam­fé­lags­miðla og aðra til að hætta því að upp­hefja hátt­semi sem þessa, það er of­hleðslu báta, sem hetju­dáð og/ eða af­rek,“ seg­ir meðal ann­ars í skýrslu Rannsóknarnefndar samgönguslysa. at­vik sem varð á Breiðafirði fyrr á þessu ári. Þá munaði minnstu að veru­lega of­hlaðinn bát­ur, Hjör­dís HU 16, sykki en um borð voru tveir menn.

Bát­ur­inn er rúm 10 brútt­ót­onn og hleðsla um­fram burðargetu hans reynd­ist vera 4,5 tonn. Skip­stjór­inn taldi hins veg­ar að burðargeta báts­ins væri nægi­leg miðað við aðstæður.

Í ábendingu rannsóknarnefndarinnar til fjölmiðla og annarra er vísað til að oft og tíðum birtast í fjölmiðlum myndir af drekkhlöðnum bátum að koma til hafnar sem merki um sérlega eftirtektarverða og aðdáunarverða aflasæld áhafnarinnar.

smari@bb.is

Menntamálaráðherra hyggst kanna kosti þess að nýta námslánakerfið til að hvetja fólk til að setjast að í dreifðum byggðum, í samræmi við stjórnarsáttmála ríkisstjórnarinnar. Þetta kemur fram í viðtali við Lilju Alfreðsdóttur menntamálaráðherra í Fréttablaðinu. „Þetta gengur út á að fólk sem býr og vinnur á svokölluðum aðgerðasvæðum og er með námslán gæti sótt um afslátt af námslánum,“ segir Lilja.

Hún vísar til reynslu Norðmanna af þessari leið þar sem fólk getur fengið tíu prósenta lækkun á námslánum árlega hafi það búið á tilgreindum svæðum í tólf mánuði.

„Þar hefur þessu úrræði verið beint inn á svæði þar sem skortur hefur verið á sérfræðimenntuðu fólki,“ segir Lilja. Úrræðið hafi skilað töluverðum árangri í Norður-Noregi og laðað til dæmis lækna og tæknimenntað fólk á strjálbýl svæði.

smari@bb.is

Í dag verður róleg norðaustanátt með éljum norðan- og austantil á landinu. Snjókoma eða él víða um land í kvöld og nótt, jafnframt herðir á norðaustanáttinni.

Á morgun verður svo norðaustanátt, 10-18 metrar á sekúndu, og éljagangur, en úrkomulítið suðvestanlands eftir hádegi. Frost yfirleitt 0 til 8 stig. Á föstudag er svo útlit fyrir hægan vind, léttskýjað og kalt veður en norðvestanstrekking og él austast á landinu.

Hálka er á vegum á Vestfjörðum og snjóþekja á Hrafnseyrarheiði og Dynjandisheiði og veginum norður í Árneshrepp.

smari@bb.is

Rannsóknasetur HÍ á Ströndum – Þjóðfræðistofa stendur fyrir verkefni þar sem dálítill hópur Strandamanna ætlar að skrifa upp dagbóki Sighvatar Grímssonar Borgfirðings frá þeim tíma er hann bjó á Klúku í Bjarnarfirði.

Verkefnið er unnið í samvinnu við handritasafn Landsbókasafns Íslands – Háskólabókasafns og er ætlunin að taka fyrir fleiri heimildir að þessu verkefni loknu, sem nú er verið að ljósmynda á safninu.

Á vefsíðu verkefnisins sem finna má á þessari slóð segir að öll sem áhuga hafi megi gjarnan slást í hópinn og taka þátt í uppskriftinni. Dagbókin er í heild sinni aðgengileg á handrit.is og á vefsíðu verkefnisins er ritvinnsluskjal sem tengilinn getur unnið í. Aðrir áhugasamir geta svo skoðað hvernig uppskriftinni miðar.

Sighvatur Borgfirðingur var merkasti alþýðufræðimaður landsins á sínum tíma. Hann fæddist á Akranesi árið 1840 og ólst upp í sárri fátækt og átti engan kost til menntunar þótt hugurinn stæði snemma til bókar. Hann bjó í Flatey, í Gufudalssveit og á Klúku áður en hann fluttist að Höfða í Dýrafirði 32 ára og bjó þar til dauðadags 1930. Sighvatur var gríðarlega afkastamikill fræðimaður og merkasta verk hans er Prestaæfir á Íslandi.

Síða verkefnisins

smari@bb.is

Félagsmálanefnd Ísafjarðarbæjar hefur lagt til við bæjarstjórn að nafni fjölskyldusviðs Ísafjarðarbæjar verði breytt í velferðarsvið. Tillaga nefndarinnar byggir á greinargerð Margrétar Geirsdóttur, sviðstjóra fjölskyldusviðs. Félagsmálanefnd leggur jafnframt til að nafni nefndarinnar verði breytt úr félagsmálanefnd í velferðarnefnd Ísafjarðarbæjar.

smari@bb.is