Dóm­nefndin sem fjallar um hæfni umsækj­enda um hér­aðs­dóm­ara­emb­ætti hefur ekki lokið störf­um, segir í svari utan­rík­is­ráðu­neyt­is­ins við fyr­ir­spurn Kjarn­ans. Eitt embættanna er við héraðsdóm Vestfjarða. Samkvæmt frétt Kjarnans skipar ráðherra í embættin í þessum mánuði, enda á skipun dóm­ar­anna að taka gildi 1. jan­úar á næsta ári. Ekki hefur verið starfandi dómari við héraðsdóm Vestfjarða frá því í september þegar Sigríður Elsa Kjartansdóttir fluttist í héraðsdóm Reykjavíkur.

For­sæt­is­ráðu­neytið setti Guð­laug Þór Þórð­ar­son sem dóms­mála­ráð­herra til að fara með málið eftir að Sig­ríður Á. And­er­sen vék sæti í mál­in­u. Sigríður taldi sig vanhæfa þar sem einn umsækjenda er Ástráður Haraldsson. Tal­di hún að fyr­ir hendi væru aðstæður sem væru til þess falln­ar að umsækj­end­ur drægju óhlut­­drægni henn­ar í efa. Ástráður hefur átt í málaferlum vegna skipunar ráðherra á dómurum í Landsrétt fyrr á þessu ári.

Í sumar komu út þrjú ný bindi í ritröðinni Kirkjur Íslands, númer 26, 27 og 28. Með þeim lýkur útgáfunni, að frátöldu yfirlitsbindi sem áætlað er að komi út 2018. Þar með hefur verið fjallað um 214 friðaðar kirkjur, en þær eru núna 216 talsins. Nú hefur verið gefið út sérrit um Þingeyrarkirkju og er það fáanlegt hjá sóknarnefnd kirkjunnar.

Bindin þrjú fjalla um 28 kirkjur í Vestfjarðaprófastsdæmi ásamt gripum þeirra og minningarmörkum. Frá því ráðist var í útgáfuna um aldamótin 2000 hefur Hólmavíkurprestakall verið fært yfir í Vestfjarðaprófastsdæmi, einnig Staðarhólssókn og Skarðssókn á Skarðsströnd, en um friðaðar kirkjur í þeim umdæmum var fjallað í bindum 7 og 16.

Í bindi 26 er sagt frá kirkjum sem áður tilheyrðu Barðastrandarprófastsdæmi: Bíldudalskirkju, Brjánslækjarkirkju, Gufudalskirkju, Hagakirkju, Patreksfjarðarkirkju, Sauðlauksdalskirkju, Saurbæjarkirkju á Rauðasandi, Selárdalskirkju, Staðarkirkju á Reykjanesi og Stóra-Laugardalskirkju.

Í bindi 27 segir af kirkjum sem að Hólskirkju undanskilinni voru áður fyrr í Vestur-Ísafjarðarprófastsdæmi: Holtskirkju, Hólskirkju í Bolungarvík, Hrafnseyrarkirkju, Hraunskirkju í Keldudal, Kirkjubólskirkju í Valþjófsdal, Mýrakirkju í Dýrafirði, Staðarkirkju í Súgandafirði, Sæbólskirkju á Ingjaldssandi og Þingeyrarkirkju.

Loks er í bindi 28 fjallað um kirkjur við Ísafjarðardjúp, á Hornströndum og í Jökulfjörðum, sem allar heyrðu fyrrum til Norður-Ísafjarðarprófastsdæmis: Bænhúsið í Furufirði, Eyrarkirkju við Seyðisfjörð, Nauteyrarkirkju, Staðarkirkju í Aðalvík, Staðarkirkju í Grunnavík, Súðavíkurkirkju, Unaðsdalskirkju, Vatnsfjarðarkirkju og Ögurkirkju.

Höfundar bókanna eru sautján: Dr. Árni Björnsson þjóðháttafræðingur ritar sögu allra kirkjustaða í bindi 26. Valdimar H. Gíslason sagnfræðingur skrifar um níu kirkjustaði í bindi 27 og er auk þess höfundur að byggingarsögu Mýrakirkju. Einar Ísaksson, minjavörður Vestfjarða, ritar sögu sjö kirkjustaða við Djúp og einnig kafla um Staðarkirkju í Súgandafirði. Auk hans skrifa sjö höfundar um kirkjur, sögu þeirra, lýsingu og list. Verkaskipting þeirra er þessi: Júlíana Gottskálksdóttir listfræðingur skrifar um fjórar kirkjur í bindum 26 og 27. Þór Hjaltalín, minjavörðu Norðurlands Vestra, sömuleiðis um fjórar, allar í bindi 27. Þá skrifar Sigríður Björk Jónsdóttir listfræðingur um þrjár í bindi 26 og arkitektarnir Elísabet Gunnarsdóttir og Stefán Örn Stefánsson um sína kirkjuna hvort, hin fyrrnefnda í bindi 28, sá síðarnefndi í bindi 26. Hjörleifur Stefánsson arkitekt skrifar um fimm kirkjur í bindi 28 og Guðmundur L. Hafsteinsson arkitekt um sex í bindum 26 og 27 og ritar að auki alfarið um kirkjurnar þrjár á Hornströndum og í Jökulfjörðum, um kirkjustaði, kirkjur, gripi og áhöld, kirkjugarð og minningarmörk. Þór Magnússon, fyrrverandi þjóðminjavörður, lýsir gripum og áhöldum allra kirkna í bindi 26, einnig minningarmörkum í sömu kirkjugörðum og í garðinum í Hrauni. Séra Guðrún Edda Gunnarsdóttir lýsir gripum og áhöldum fimm kirkna í bindi 27 og einni betur, Núpskirkju, sem ekki er friðuð. Þá rekur hún einnig byggingarsögu Þingeyrarkirkju. Þau Jóna Símonía Bjarnadóttir, forstöðumaður Safnahússins Ísafirði, og † Björn Baldursson safnvörður skrifa saman um gripi og áhöld fjögurra kirkna í bindi 27, en Jóna Símonía skrifar ein um gripi fimm kirkna í bindi 28, eftir að Björn féll frá í árslok 2016. Þá ritar Lilja Árnadóttir, sviðsstjóri munasafns Þjóðminjasafns, um gripi og áhöld Vatnsfjarðarkirkju. Guðmundur Rafn Sigurðsson, framkvæmdastjóri kirkjugarðaráðs, lýsir 25 kirkjugörðum, og Guðlaug Vilbogadóttir, sérfræðingur á Minjastofnun Íslands, greinir frá minningarmörkum í fjórtán þeirra.

bryndis@bb.is

Bolungarvíkurkaupstaður ætlar að mynda sé stefnu og viðbragðsáætlun vegna eineltis, ofbeldis og kynferðislegrar og kynbundinnar áreitni. Þetta kemur fram í samþykkt bæjarráðs.  Stjórn Sambands íslenskra sveitarfélaga hefur hvatt sveitarstjórnir landsins til að ræða leiðir gegn kynferðisofbeldi og –áreitni í stjórnmálum og á vinnustöðum sveitarfélaga. Halldór Halldórsson, formaður sambandsins, fjallaði á stjórnarfundi þess um frumkvæði stjórnmálakvenna „Í skugga valdsins“ og mikilvægi þess að sveitarfélög láti sig málið varða.

Var á stjórnarfundinum einnig bent á nauðsyn þess, að öll sveitarfélög setji sér formlega stefnu og viðbragðsáætlun vegna eineltis, ofbeldis og kynferðislegrar og kynbundinnar áreitni enda sé slík hegðun ólíðandi með öllu.

smari@bb.is

Yfirstjórn slökkviliðs Súðavíkurhrepps mun færast til slökkviliðs Ísafjarðarbæjar samkvæmt þjónustusamningi sem sveitarfélögin vinna að. Pétur G. Markan, sveitarstjóri Súðavíkurhrepps, segir að áfram verði starfrækt slökkvilið í Súðavík. „Eina breytingin verður sú að það verður ekki slökkviliðsstjóri í Súðavík heldur verður yfirumsjón liðsins hjá slökkviliði Ísafjarðarbæjar sem mun sjá um æfingar, halda utan um útkallslista og þess háttar,“ segir Pétur.

Hann segir að á kjörtímabilinu hafi Súðavíkurhreppur lagt áherslu á og verið forystu um að mynda brunasamlag Ísafjarðarbæjar, Súðavíkuhrepps og Bolungarvíkurkaupstaðar og hann telur þjónustusamning Ísafjarðarbæjar og Súðavíkurhrepps vera eitt skref í því.

smari@bb.is

Bæjarráð Ísafjarðarbæjar leggur áherslu á að fundin verði staðsetning fyrir flugvöll á norðanverðum Vestfjörðum sem þjónað geti farþegaflugi með ásættanlegu öryggi. Þetta kemur fram í ályktun ráðsins. Einnig leggur bæjarráð til að farin verði svokölluð skosk leið í innanlandsflugi varðandi niðurgreiðslur á flugfargjöldum.

Ástæða ályktunarinnar er að undanfarna mánuði hefur vinnuhópur á vegum samgöngu- og sveitarstjórnarráðuneytisins verið með  til umfjöllunar rekstur flugsamgöngukerfisins innanlands. Markmiðið með vinnuhópnum er að ná fram hagkvæmari rekstri á innanlandsflugi og skilvirkari rekstri flugvalla sem skilar sér til neytenda í lægri flugfargjöldum. Unnið er út frá tillögum fyrri vinnuhóps ráðuneytisins frá árinu 2016. Ráðuneytið óskaði eftir viðbrögðum frá sveitarfélögunum vegna erindisins.

smari@bb.is

Veðurstofan spáir norðaustanátt, víða allhvöss eða hvöss í dag en stormur SA-lands síðdegis. Snjókoma eða él, en úrkomulítið á SV-landi þegar líður á daginn. Frost 0 til 6 stig. Fer að lægja um landið vestanvert á morgun. Éljagangur NA- og A-lands, en víða léttskýjað á S- og V-landi. Harðnandi frost. Hægur vindur á föstudag, bjartviðri og kalt, en norðvestan strekkingur A-lands.

Veðurhorfur næstu daga

Á fimmtudag:

Norðan 10-18 en 18-23 m/s SA-til, dregur úr vindi með deginum, fyrst V-lands. Él á NA- og A-landi, en bjartviðri S- og V-lands. Talsvert frost.

Á föstudag:

Norðvestan 8-15 m/s A-lands, en hægviðri V-til á landinu. Él austast, annars léttskýjað. Áfram kalt í veðri.

Á laugardag:

Hæg breytileg átt, bjartviðri og talsvert frost, en suðaustan strekkingur og hiti um frostmark við SV-ströndina síðdegis.

Á sunnudag og mánudag:

Norðaustan- og austanátt með dálitlum éljum, en víða léttskýjað V-til á landinu. Kalt í veðri.

Á þriðjudag:

Austlæg átt og víða él.

Færð á vegum:

Á Vestfjörðum er víða strekkingsvindur og skafrenningur og hálka eða snjóþekja á flestum leiðum. Þæfingsfærð er á Steingrímsfjarðarheiði og Klettshálsi og ófært á Þröskuldum en þar er unnið að hreinsun. Vegurinn fyrir Hrafnseyrar- og Dynjandisheiði er ófær. Eins er ófært norður í Árneshrepp.

smari@bb.is

Bæjarráð Ísafjarðarbæjar hefur hafnað samningsboði Umhverfisstofnunar um refaveiðar. Samkvæmt samningnum eru hámarksgreiðslur ríkisins 300 þúsund krónur á ári. Í umsögn bæjarráðs er óskað eftir betra boði frá Umhverfisstofnun og bent á að hlutdeild ríkisins þurfi að vera miklu hærri í refaveiðum á Íslandi, auk þess sem gæta þarf meira jafnræðis milli sveitarfélaga í endurgreiðslum. Á síðustu árum hefur bærinn varið 2,5 milljónum króna á ári til refaveiða og hálfri til einni milljón til minkaveiða. Bærinn hefur samið við Félag refa- og minkaveiðimanna í Ísafjarðarbæ og félagið hefur séð Ísafjarðarbæ fyrir tófuskyttum á öll svæði Ísafjarðarbæjar. Á síðasta ári fékk bærinn 278 þúsund endurgreitt frá Umhverfisstofnun vegna veiðanna.

smari@bb.is

Íslenska kalkþörungafélagið á Bíldudal hefur tekið niður og gefið Áhugamannafélaginu Gyðu það sem eftir var af Bullhúsinu svokallaða, gömlu pakkhúsi sem stóð á athafnalóð félagsins, ásamt mjög nákvæmum teikningum og myndum sem fyrirtækið lét útbúa áður en húsið var tekið niður. Gyða er áhugamannafélag um varðveislu menningarminja á Bíldudal og hefur félagið í hyggju að láta endursmíða það og reisa á ný á Bíldudal fáist til þess nægilegt fjármagn. Bullhúsið var elsta atvinnuhúsnæði Bíldudals, hluti menningarsögu bæjarins og friðað samkvæmt lögum. Það var tekið niður í samræmi við leiðbeiningar og kröfur Minjastofnunar Íslands.

Bullhúsið var upphaflega flutt til Bíldudals frá Noregi af Brödrene Bull sem reistu það 1894 við hvalveiðistöð sína á Stekkeyri í Jökulfjörðum. Um aldamótin 1900 keypti athafnamaðurinn Pétur Torsteinsson húsið og reisti á Bíldudal. Þar var það notað sem aðgerðar- og pakkhús, en einnig sem leikhús og til dansleikjahalds eftir því sem fram kemur í gögnum Minjastofnunar. Þar var einnig saltfiskur þveginn innandyra í fyrsta sinn hér á landi vegna þeirrar framsýni að leiða vatn inn í húsið sem gerði þvottinn þar mögulegan.

Timburverk nær ófúið

Áður en húsið var tekið niður skoðuðu sérfræðingar á vegum Minjastofnunar húsleifarnar ítarlega og sú skoðun leiddi í ljós að timburverk þess er nær ófúið þótt ýmsar stoðir vanti og ýmsar séu brotnar. Burðarbitarnir voru t.d. víða lásaðir saman að frönskum sið. „Skoðun sérfræðinga á okkar vegum var engu að síður sú að húsnæðið var í heild mjög bágborðið auk þess sem slysagildra stafaði af því. Það var því ekki um annað að ræða en að heimila niðurtöku þess að lokinni mjög nákvæmri uppmælingu á því og gerð samsvarandi teikninga,“ segir Einar Ísaksson minjavörður Vestfjarða hjá Minjastofnun.

„Minjastofnun var okkur til ráðgjafar um hvernig best væri að taka húsið niður, en áður lögðum við í tæplega þriggja milljóna króna kostnað til að láta mæla húsið mjög nákvæmlega upp, alveg upp á millimetra til að hægt væri að gera teikningar af húsinu og endurreisa á ný. Við gáfum síðan Gyðu húsið, teikningarnar og einnig ljósmyndir sem teknar voru meðan á niðurtöku hússins stóð. Það væri gaman fyrir Bíldudal verði húsið endurreist og fundið nýtt hlutverk betri stað hér í þorpinu,“ segir Einar Sveinn Ólafsson, nýfjárfestingastjóri Marigot, eiganda Kalkþörungafélagsins, hér á landi.

Ný bygging rís á lóðinni

Hann segir að þar sem gamla pakkhúsið stóð verði reist ný 1400 fm bygging samföst núverandi verksmiðjuhúsnæði þar sem lager Kalkþörungafélagsins verði geymdur. „Við áttum fund með hafnarstjórn og bæjarstjóra Vesturbyggðar í október þar sem við handsöluðum samkomulag um sameiningu tveggja lóða, Strandgötu 2 og Hafnarbraut 4 þar sem við hygghumst reisa lagerhúsnæðið. Að lokinni þeirri framkvæmd verðum við komin með allan afurðalager fyrirtækisins undir þak sem verður til mikilla bóta,“ segir Einar Sveinn.

smari@bb.is