Vestri lék tvo leiki um helgina í 1. deild Íslandsmótsins í körfubolta. Á föstudag lék liðið við Breiðablik í íþróttahúsinu á Torfnesi. Vestramenn byrjuðu hræðilega illa og lentu 0-10 undir eftir aðeins eina og hálfa mínútu. Þótt Vestramenn hafi vaknað til lífsins skömmu seinna var þessi 10 stiga munur viðvarandi út megnið af hálfleiknum en varð mestur 16 stig Blikum í vil á þrettándu mínútur í stöðunni 17-33. En þá var botninum náð hjá Vestramönnum og þeir fundu magnaða viðspyrnu í gamla góða gólfinu. Það sem eftir lifði af öðrum leikhluta skoraði Vestri  28 stig gegn 6. Blikar sem höfðu hitt vel urðu staðir gegn vel heppnaðri svæðisvörn og einnig óheppnir í skotum sínum.

Eftir þetta var ekki aftur snúið. Það mátti meira að segja greina uppgjöf í Blikum þegar þeir komu út úr klefanum í hálfleik. Lið sem fagnaði af ákafa öllum körfum í fyrsta fjórðungi virtist nú uppteknara af því að hengja haus og horfa ofan í parketið sem senn heyrir sögunni til, en um helgina hófust langþráðar framkvæmdir í íþróttahúsinu þar sem skipta á um gólfefni. Vestri náði mest 26 stiga forystu en endaði leikinn sem fyrr segir með 16 stiga sigri 96-80. Lið Vestra er ósigrað á heimavelli.

Útileikirnir hafa reynst Vestra erfiðari og liðið ekki náð að landa útisigri – þangað til í gær. Gnúpverjar tóku á móti Vestra í Fagralundinum í Kópavogi í gær. Vestri hóf leikinn betur og komust fjótt í 10 stiga forystu áður en Maté Dalmay, þjálfari Gnúpverja, tók leikhlé og skammaði sína menn fyrir að hafa ekki mætt til leiks á réttum tíma. Gnúpverjar tóku sig á og fóru að skora en þá voru Vestramenn þegar komnir á bragðið og héldu áfram að skora. Leikhlutanum lauk 17-31, Ísfirðingunum í vil.

Gnúpverjar náðu að laga stöðuna í öðrum leikhlutanum með því að hitta úr nokkrum þristum og takmarka sóknarfráköst gestanna. Heimamenn voru líka duglegir að keyra í bakið á Vestramönnum eftir skoraða körfu og skora meðan gestirnir voru enn uppteknir við að fagna því að hafa skorað. Það dugði ekki til að þeir næðu forystunni og Vestri lokaði fyrri hálfleiknum 44-51.

Hálfleikshléið virtist ekki gott fyrir heimamenn þar sem að Vestri hóf seinni hálfleiknum á því að taka 13-3 áhlaup á fyrstu fimm mínútunum. Gnúpverjar tóku sig aðeins á seinni fimm og skoruðu 7 stig gegn 6 stigum hjá Vestra en skaðinn var þá skeður. Gnúpverjar áttu ágætan lokafjórðung en það reyndist ekki nóg til að vinna upp muninn alveg. Leiknum lauk 85-96, Vestra í vil.

Auglýsing

Auglýsing

Eft­ir dag­inn í dag kóln­ar nokkuð á land­inu og verður frem­ur kalt á miðviku­dag og fimmtu­dag enda vindátt norðlæg og send­ir kalt loft úr norðri. Ekki er að vænta mik­ill­ar úr­komu að þessu sinni og um næstu helgi hef­ur dregið mikið úr kuld­an­um þótt ekki sjá­ist hlý­indi í bili, seg­ir í hug­leiðing­um veður­fræðings á Veður­stofu Íslands.

Veðurstofan spáir norðaustan 8-13 m/s á Vestfjörðum í dag og dálítilli él og vægu frosti og kólnar þegar líður á daginn.

Veðurhorfur á landinu næstu daga

Á miðvikudag:

Norðaustan 10-15 m/s og víða snjókoma á köflum en léttir til sunnanlands með deginum. Talsvert frost á öllu landinu.

Á fimmtudag:

Norðvestanátt, strekkingur austast, en annars hægari. Él norðan- og austanlands en léttskýjað á Suðurlandi. Kalt í veðri.

Á föstudag:

Fremur hæg vestlæg átt og víða léttskýjað en norðvestan strekkingur austast og stöku él. Talsvert frost.

Á laugardag:

Austlæg átt með snjókomu eða slyddu SV-til um kvöldið, en annars yfirleitt þurrt. Hlýnandi veður.

Á sunnudag:

Útlit fyrir stífri austanátt með ringningu á láglendi sunnanlands og hita 0 til 5 stig en skýjað og úrkomulítið norðantil og vægt frost.

smari@bb.is

Auglýsing

Auglýsing

Guðmundur Ingi Guðbrandsson umhverfisráðherra segir skynsamlegt að bera saman kosti Hvalárvirkjunar í Ófeigsfirði og að stofna þar þjóðgarð. Umhverfisráðherra var í viðtali í Morgunútvarpi Rásar 2 fyrir helgi. Hann sagði virkjun og þjóðgarð ekki fara sérlega vel saman en áréttaði að Hvalárvirkjun er í nýtingarflokki rammaáætlunar og næstu skref virkjunarinnar eru hjá sveitarstjórn Árneshrepps og hjá Orkustofnun.

„Á þessum tímapunkti er þetta heimamanna að skoða. Mér finnst að það ætti að bera þessa tvo möguleika kirfilega saman og hvað þeir þýða fyrir samfélagið í Árneshreppi,“ sagði Guðmundur í viðtalinu. „Hvort er líklegra til að skapa fleiri störf og meiri verðmæti til framtíðar?“ spurði Guðmundur.

Guðmundur nefndi að ein af ástæðum þess að virkjunin fór í nýtingarflokk rammaáætlunar á sínum tíma hafi verið sú að tilkoma hennar myndi bæta raforkuöryggi á Vestfjörðum. Sú skýring er langsótt, að hans mati. Til að bæta afhendingaröryggi raforku á Vestfjörðum vill umhverfisráðherra sá horft til að skoða hvaða möguleikar eru til staðar að setja raflínur í jörð og segir að þetta þurfi að kanna áður en hafist verður handa við byggingu Hvalárvirkjunar.

smari@bb.is

Auglýsing

Auglýsing

Einn miðahafi var með allar tölur réttar í Lottóinu á laugardag og hlýtur sá heppni rúmlega 24 milljónir í vinning. Miðinn var keyptur hjá N1 á Ísafirði. Einn var með fjórar réttar tölur auk bónustölunnar og fær hann rúmlega 429 þúsund krónur í vinning. Miðinn var keyptur hjá Samkaup-strax í Mývatnssveit.

Sex voru með fjórar réttar tölur í Jóker og hlýtur hver þeirra 100 þúsund krónur í vinning. Miðarnir voru keyptir hjá N1, Lækjargötu Hafnarfirði, Happahúsinu, Kringlunni, Reykjavík, Ice Boost and Burgers, Mosfellsbæ,  Kríu veitingasölu, Eskifirði, N1, Borgartúni, Reykjavík og í áskrift.

smari@bb.is

Auglýsing

Auglýsing

Kostnaður vegna tannlækninga barna verður greiddur að fullu af Sjúkratryggingum Íslands frá og með 1. janúar 2018. Foreldrar þurfa að skrá börn sín hjá heimilistannlækni og greiða árlega 2500 króna komugjald. Þetta er lokahnykkurinn á innleiðingu samninga Sjúkratrygginga Íslands og Tannlæknafélags Íslands um tannlækningar barna, sem hefur verið komið á í skrefum frá árinu 2013.

Markmið samningsins er að börn yngri en 18 ára fái nauðsynlega tannlæknaþjónustu óháð efnahag foreldra.

smari@bb.is

Auglýsing

Auglýsing

Mikael Sigurður Kristinsson er 18 ára nemi við Menntaskólann á Ísafirði. Hann sker sig ekki mikið úr nemendahópnum en munurinn á Mikael og vísitölunemanum er að hann er með einhverfu. Á vísindadögum Menntaskólans sem voru haldnir á dögunum sagði Mikael frá einhverfu og hvernig hún hefur markað líf hans. Kynning Mikale var verðlaunuð sem besta kynningin á vísindadögum. „Ég fjallaði fyrst um hvað einhverfa er og hversu mismunandi hún getur verið. Manneskja sem er með dæmigerða einhverfu eins ég og getur talað og hagað sér eðlilega en það eru til fleiri afbrigði af einhverfu,“ segir Mikael.

Hann fór einnig yfir hvað við getum tengt einhverfu, fordóma sem einhverfir verða fyrir og hvað skólar geta gert fyrir fólk með einhverfu.

„Svo sagði ég mína sögu og hvernig ég lifi með einhverfu. Ég var lagður í einelti og átti erfitt í skóla vegna þunglyndis. Nú er ég á starfsbraut í Menntaskólanum og gengur frekar vel, eiginlega alveg fáránlega vel,“ segir Mikael.

Leiðin liggur upp á við hjá þessum efnilega unga manni en hann fer ekki í grafgötur með það að barnæskan hafi verið erfið. „Ég var greindur mjög seint með einhverfu og þetta var verst þegar ég var yngri, þá vissi ég ekki hvað var að mér. Ég vissi að ég væri öðruvísi en ekki af hverju.“

Á næstu önn ætlar Mikael að halda áfram námi. „Ég held áfram á starfsbraut en tek einhverja áfanga á náttúrufræðibraut. Markmiðið er að klára stúdentinn.“

Hér má horfa á fyrirlestur Mikaels.

Smari@bb.is

Auglýsing

Auglýsing

Jólaljósin verða tendruð á Ísafirði og Flateyri um helgina. Klukkan 15.30 á morgun hefst jólatorgsala Tónlistarskólans á Silfurtorgi þar sem lúðrasveit skólans blæs jólaandanum í gesti. Eftir að ljósin hafa verið kveikt syngur barnakór Tónlistarskólans nokkur falleg jólalög.

Á Flateyri hefst vöfflu- og kakósala Grettis í Félagsbæ á sunnudag klukkan 14, en ljósin verða kveikt á jólatrénu klukkan 16 áður en börn úr Grunnskóla Önundarfjarðar taka lagið.

Eins og venjulega má telja nokkuð öruggt að vaskir sveinar úr fjöllunum láti sjá sig þegar ljósin hafa verið tendruð.

smari@bb.is

Auglýsing

Auglýsing

Í dag kl. 13:00 hófst stofnfundur Vestfjarðastofu ses að viðstöddu fjölmenni í Edinborgarhúsinu. Í stofnsamþykkt stofunnar segir:

Tilgangur Vestfjarðastofu ses. er að vinna að hagsmunamálum íbúa, sveitarfélaga, stofnana og fyrirtækja á Vestfjörðum og veita samræmda og þverfaglega ráðgjöf og þjónustu tengda atvinnu- og byggðaþróun, frumkvöðlastarfsemi og menningu í víðum skilningi.

Markmið Vestfjarðastofu ses. er að efla atvinnulíf á Vestfjörðum, stuðla að velferð íbúa og styrkja Vestfirði sem búsetukost og áfangastað ferðamanna. Markmiði sínu hyggst Vestfjarðastofa ses. ná með öflugu samstarfi atvinnulífs, sveitarfélaga, ríkisvalds og stoðkerfis hins opinbera.

Undirbúningur Vestfjarðastofu hefur staðið um nokkurt skeið og mun hún taka yfir þau verkefni sem Fjórðungssamband Vestfirðinga og Atvinnuþróunarfélag Vestfjarða hafa sinnt hingað til.

Í stjórn Vestfjarðastofu skal skipa 9 einstakling og skulu 5 tilnefndir af sveitarfélögum og fjórir af svið atvinnulífs og menningar. Í þessa fyrstu stjórn og varastjórn stofunnar voru kosnir:

Stjórn

Pétur G. Markan, sveitarfélag

Jón Örn Pálsson, sveitarfélag

Ingibjörg Emilsdóttir, sveitarfélag

Margrét Jónmundsdóttir, sveitarfélag

Sigurður Hreinsson, sveitarfélag

Víkingur Gunnarsson, atvinnulíf og menning

Hólmfríður Vala Svavarsdóttir, atvinnulíf og menning

Ágústa Ýr Sveinsdóttir, atvinnulíf og menning

Kristján G Jóakimsson, atvinnulíf og menning

Varastjórn

Óskar Hálfdánarson, atvinnulíf og menning

Jón Jónsson, atvinnulíf og menning

Inga Hlín Valdimarsdóttir, atvinnulíf og menning

Aðalbjörg Óskarsdóttir, atvinnulíf og menning

Áslaug Guttormsdóttir, sveitarfélag

Daníel Jakobsson, sveitarfélag

Jónas Þór Birgisson, sveitarfélag

Nanný Arna Guðmundsdóttir, sveitarfélag

Magnús Jónsson, sveitarfélag

bryndis@bb.is

Auglýsing

Auglýsing