Síðustu vikur og mánuði hafa verið mikil umsvif í Ísafjarðarhöfn. Aðkomutogarar hafa verið í fastri áskrift með reglulegar landanir. „Þetta er búið að vera mjög líflegt,“ segir Guðmundur M. Kristjánsson hafnarstjóri. Ástæður fyrir tíðum löndunum aðkomutogara eru að sögn Guðmundar einfaldar, góð veiði á Vestfjarðamiðum og eftirspurn eftir ferskum fiski á mörkuðum í Evrópu. „Eftir því sem mér skilst eru ferskfiskmarkaðir í Evrópu mjög góðir og þegar menn eru að veiða á Vestfjarðamiðum munar um þann tíma sem það tekur fyrir skipin að sigla með aflann til heimahafnar og því kjósa menn að landa hér og keyra aflanum í suður,“ segir Guðmundur.

Togarar HB Granda hafa verið áberandi og einnig skip Nesfisks sem og Bergur VE, Frosti ÞH og Steinunn SF.

Guðmundur segir að landanirnar skipti miklu máli fyrir rekstur hafnarinnar. „Ég er vongóður um að við náum að halda tekjuáætlun ársins þrátt fyrir rólegt upphaf sökum sjómannaverkfalls.“

Í nóvember var landað 3.244 tonnum samanborið við 2.033 tonn í sama mánuði í fyrra.

Auglýsing

Auglýsing

Lands­fram­leiðslan á 3. árs­fjórðungi 2017 jókst um 3,1 prósent frá sama árs­fjórðungi fyrra árs. Á sama tíma juk­ust þjóðarút­gjöld, sem eru sam­tala neyslu og fjár­fest­ing­ar, um 10,7 prósent. Einka­neysla jókst um 6,7 prósent, sam­neysla um 2,9 prósent og fjár­fest­ing um 19,4 prósent.  Út­flutn­ing­ur dróst sam­an um 0,1 prósent á sama tíma og inn­flutn­ing­ur jókst um 11,6 prósent. Helstu drif­kraft­ar hagvaxt­ar er fjár­muna­mynd­un og einka­neysla, seg­ir í frétt á vef Hag­stofu Íslands.

Árstíðaleiðrétt lands­fram­leiðsla jókst að raun­gildi um 2,2 prósent frá 2. árs­fjórðungi 2017.

Á fyrstu níu mánuðum árs­ins 2017 jókst lands­fram­leiðslan um 4,3 prósent að raun­gildi borið sam­an við fyrstu níu mánuði árs­ins 2016. Á sama tíma juk­ust þjóðarút­gjöld um 7,4 prósent. Einka­neysla jókst um 7,7 prósent, sam­neysla um 2,7 prósent og fjár­fest­ing um 11,8 prósent. Út­flutn­ing­ur jókst um 3,9 prósent og inn­flutn­ing­ur nokkru meira, eða um 10,7 prósent.

Auglýsing

Auglýsing

Fjárhagsáætlun næsta árs var tekin til seinni umræðu í bæjarstjórn Vesturbyggðar í gær. Áætlunin var samþykkt samhljóða. Reksturinn fyrir fjármagnsliði er áætlaður jákvæður um 69,7 milljónir króna. Fjármagnsliðir eru 65,4 milljónir króan og rekstarniðurstaðan því jákvæð um 4,3 milljónir króna. Veltufé frá rekstri er áætlað 126,5 milljónir króna. Fjárfestingar næsta árs nema 184 milljónum króna. Afborganir af langtímalánum verða 143 milljónir króna og nýjar lántökur 189 milljónir króna.

Auglýsing

Auglýsing

Hjónin Julie Gasiglia og Aron Ingi Guðmundsson opnuðu í sumar Húsið – House of Creativity í Merkisteini, Aðalstræti 72, á Patreksfirði. Með Húsinu vilja þau efla og virkja menningar og listastarfsemina á sunnanverðum Vestfjörðum. Fjölbreytt dagskrá er í boði og eru þar listasýningar, skapandi vinnustofur, klúbbar og ýmis þemakvöld til að mynda. Ljósmyndaklúbbur Hússins er mjög vinsæll sem og Bókaklúbbur Hússins og svo eru þar vín- og vínylkvöld þar sem gestir koma með vín aeða bjór til að leyfa öðrum að smakka og einnig er gestum velkomið að koma með vínylplötur með sér svo hægt sé að hlusta á ljúfa tóna plötuspilarans þessa skemmtilegu kvöldstund. Í sumar voru nokkur námskeið í boði sem voru vel sótt og munu fleiri námskeið og vinnustofur vera á dagskrá í vetur. Aron og Julie leggja áherslu á að Húsið sé ákveðinn samkomustaður þar sem heimamenn sem og aðrir geti komið saman, skapað, lært og skemmt sér með öðrum. Þau eru einnig opin fyrir allskonar samstarfi og hvetja fólk til að hafa samband ef það vill til dæmis vera með sýningu, fyrirlestur eða kennslu í Húsinu. Saumaðir voru taupokar í Húsinu einsu sinni í viku fyrr í vetur fyrir samvinnuverkefnið um plastpokalausa Vestfirði í samstarfi við Boomerang Bags og Vesturbyggð.

Aron og Julie eru spennt fyrir komandi vetri og bjóða alla velkomna í Húsið. Viðburðir þar eru ókeypis og selja þau heita og kalda óáfenga drykki fyrir gesti og gangandi. Verð á vinnustofum og námskeiðum eru misjöfn eftir viðfangsefnum. Þau hjón eru með áform um að víkka út hugmyndina um Húsið og hefja starfsemi í gamalli verbúð við höfnina á Patreksfirði með sama markmiði, um að efla og virkja lista og menningarstarfsemi svæðisins. Þau vonast til að opna þar næsta vor. Þar munu m.a. vera vinnustofur fyrir listamenn og hönnuði, tónleikarými og æfingahúsnæði fyrir hljómsveitir og handiðnaðarverslun. Starfsemin þar verður rekin samhliða dagskránni í Húsinu í Merkisteini.

Auglýsing

Auglýsing

Veðurstofan spáir hæg austlægri átt og léttskýjuðu á Vestfjörðum í dag, en suðvestan 3-8 m/s og skýjað annað kvöld. Frost 3 til 8 stig. Í hugleiðingum veðurfræðings segir að norðanáttir verði ríkjandi á landinu um helgina með fremur björtu og köldu veðri, en éljum eystra. Spáð er skammvinnri suðaustanátt með slyddu eða snjókomu á þriðjudag og hlýnar þá í bili, en annars áfram norðanáttir og talsvert frost. Í stuttu máli er því ekki að sjá nein almennileg hlýindi á næstunni.

Á Vestfjörðum er hálka eða snjóþekja á flestum vegum. Ófært er norður í Árneshrepp.

Veðurhorfur á landinu næstu daga

Á sunnudag:

Hvöss norðanátt austast á landinu, en mun hægari vindur vestantil. Él norðan- og austanlands, en léttskýjað að mestu sunnan- og vestanlands. Frost 0 til 10 stig, kaldast inn til landsins, en mildast við austurströndina.

Á mánudag:

Minnkandi norðanátt og dregur úr éljum fyrir austan, en hægviðri og bjart vestantil. Kalt í veðri. Snýst í vaxandi suðaustanátt og þykknar upp suðvestantil um kvöldið og dregur úr frosti.

Á þriðjudag:

Suðaustlæg átt og snjókoma eða slydda og hiti kringum frostmark, en úrkomulítið norðan- og austanlands og frost 1 til 7 stig.

Á miðvikudag og fimmtudag:

Útlit fyrir norðaustlæga átt með éljum víða um land, en yfirleitt þurrt og bjart um landið suðvestanvert. Frost um allt land.

Auglýsing

Auglýsing

Sigurður Ingi Jóhannsson, nýr samgöngu- og sveitarstjórnarráðherra segir umbætur í samgöngum brýnustu verkefnin í ráðuneytinu. Hann segir von á auknu fjármagni til þeirra verkefna, sem verði kynnt á næstunni. Þá segir hann ljóst að ekki sé hægt að færa flugvöllinn úr Vatnsmýri fyrr en fyrir liggur önnur leið fyrir innanlandsflugið.

Sigurður Ingi var gestur á Morgunvaktinni á Rás eitt í morgun. Hann segir að þó að byggðamálin séu mikilvægur og stór þáttur af verkefnum hans ráðuneytis, séu brýnustu verkefnin nú umbætur í samgöngum, ekki síst í vegakerfinu.

Sigurður Ingi var spurður hvort hann vilji festa innanlandsflugvöllinn í sessi í Vatnsmýri. Hann segir mikilvægt að ná fólki upp úr skotgröfunum í því máli. „Það er öllum ljóst að umræðan um þetta mál getur ekki verið í þeim skotgröfum að einn aðili segir að einn aðili segir að það eigi að loka flugvellinum eftir örfá ár á meðan að annar segir að það komi ekki til greina,“ segir Sigurður Ingi. „Auðvitað verðum við að finna út úr því, þú lokar ekki innanlandsflugi, sjúkraflugi, fyrr en einhver annar staður liggur fyrir.“

„Ég hef viljað skoða aðra kosti, við höfum viljað hafa Reykjavíkurflugvöll þar sem hann er þangað til að það liggur fyrir samkomulag um hvert við erum að fara og hvernig við ætlum að fjármagna það og byggja það upp og hvernig að það – ef við færum flugvöllinn – hvernig hann myndi tryggja með nákvæmlega sambærilegum hætti til að mynda sjúkraflug og aðgengi landsbyggðanna að stjórnsýslu landsins,“ segir Sigurður Ingi.

Honum hugnast ekki að færa innanlandsflugið til Keflavíkur. „Nei, mér hefur ekki þótt það vera ásættanlegt eins og er. Annars vegar er Keflavíkurflugvöllur ekki byggður upp sem sá millilandaflugvöllur sem hann er að þróast í og hvernig eigum við að koma innanlandsfluginu þá fyrir þar samhliða? Hvernig ætlum við að tryggja að þessar samgöngur, að þær séu nægilega fljótar?“ Hann bendir á að það sé kostur fyrir fólk af landsbyggðinni að ferðatíminn til höfuðborgarinnar sé sem stystur. „Og það sama gildir auðvitað um sjúkraflugið, þannig að það þarf að skoða alla þessa þætti heildstætt.“

Auglýsing

Auglýsing

Í gær hóf göngu sína nýtt blað um vestfirsk málefni. Blaðið heitir Vestfirðingur og kemur í stað blaðsins Vestfirðir. Það verður í ritstjórn Kristins H. Gunnarssonar sem einnig ritstýrði Vestfjörðum en útgáfa þess var stöðvuð í kjölfar gjaldþrots Pressunnar ehf. Í fyrsta blaði Vestfirðings er haft eftir Ámunda Ámundasyni, sem stofnaði blaðið ásamt fleirum landhlutablöðum og seldi útgáfuréttinn til Pressunnar ehf. fyrir tveimur árum, stóðu blöðin alla tíð undir sér. Hann segir vanda Pressunnar því ekki tilkominn vegna útgáfu blaðanna. Ámundi hefur ákveðið að hefja útgáfu nýrra blaða með svipuðu sniði og verið hefur.

Vestfirðingur mun koma út aðra hverja viku og verður dreift í hvert hús á Vestfjörðum. Blaðið mun einbeita sér að vestfirskum fréttum og öðru því sem ætla má að eigi erindi til Vestfirðinga og annarra landsmanna.

Auglýsing

Auglýsing

Ef lausn finnst á húsnæðismálum gætu 20-30 sýrlenskir flóttamenn flust vestur í Djúp innan ekki langs tíma. Gísli Halldór Halldórsson, bæjarstjóri Ísafjarðarbæjar, segir að koma flóttamannanna verði á grunni samþykktar bæjarstjórnar frá árinu 2015. Á sama tíma gerðu bæjarstjórnir Bolungarvíkurkaupstaðar og Súðavíkurhrepps sambærilegar samþykktir. Gísli Halldór segir að bæjarstjórar sveitarfélaganna hafi fundað í gær með Rauða krossinum og Fjölmenningarsetri um stöðuna. „Eina fyrirstaðan er húsnæðismál, það er þröngt um húsnæði hjá okkur öllum. Við ætlum að gefa okkur viku til að komast að því hvort við getum leyst úr því,“ segir Gísli Halldór. Sveitarfélögin við Djúp munu vinna þetta saman að sögn Gísla Halldórs og um miðjan mánuðinn ætti að liggja fyrir hvort flóttamennirnir komi.

„Við ætlum meðal annars að leita til eigenda frístundahúsa sem standa mikið auð og biðla til þerra um að gera við okkur leigusamning til tveggja ára. Það væri mjög fallegt framlag þeirra að gera við okkur leigusamning og liðka þannig til,“ segir Gísli Halldór.

Aðspurður hvenær flóttamennirnir komi, ef af verður, segir Gísli Halldór að stjórnvöld hafi talað um miðjan janúar. „Þannig að þetta verður nokkuð bratt og allt þarf að ganga upp.“

Styrjöldin í Sýrlandi er á sínu sjöunda ári, en hún hófst í mars 2011. Landið er í rúst og talið að 340 þúsund manns hafi látið lífið í átökunum, þar af 100 þúsund óbreyttir borgarar. Á sjöttu milljón manns eru flótta vegna stríðsins og neyðin er mikil.

Auglýsing

Auglýsing

Fyrir ári skipaði Alþingi nefnd til að undirbúa hátíðahöld í tilefni hundrað ára afmælis sjálfstæðis og fullveldis Íslands árið 2018. Afmælisnefnd leitaði til landsmanna eftir tillögum að verkefnum á dagskrá afmælisársins. Hundrað verkefni voru valin úr 169 innsendum tillögum. Þau voru tilkynnt í Safnahúsinu við Hverfisgötu í dag. Fjögur vestfirsk verkefni hlutu styrk frá afmælisnefndinni.

Safnahúsið á Ísafirði fær 700 þúsund króna styrk vegna ráðstefnu og sýningar næsta sumar. Sýningin fjallar um heimsókn hóps fólks frá Angmagssalik á austurströnd Grænlands til Ísafjarðar árið 1925 og á hún að verða liður í að auka samskipti þjóðanna.

Hópurinn sem kom til Ísafjarðar 1925 dvaldi í fáeina daga í bænum, nokkrir gestanna sýndu listir sínar á kajökum á höfninni og heimamenn kynntu gestunum allt það helsta sem þótti markvert. Þessi heimsókn markar fyrstu tengsl Íslendinga og Grænlendinga á síðari tímum. Á ráðstefnunni er ætlunin að taka fyrir margvíslegar hliðar á tengslum Íslands og Grænlands, m.a. hvernig stjórnskipunarleg staða þeirra hefur verið svipuð og ólík í gegnum aldirnar og á hvaða hátt reynsla Íslendinga sem fullvalda þjóðar getur nýst Grænlendingum í leit þeirra að fullveldi.

Menningarsetrið á Hrafnseyri fær 600 þúsund króna styrk til að minnast aldarafmælis fullveldis og sjálfstæðis Íslands með tónverki eftir ísfirska tónskáldið Halldór Smárason. Tónverkið verður frumflutt verður á Hrafnseyri á þjóðhátíðardag Íslands þann 17. júní 2018. Verkefnið verður 10 mínútur að lengd og verður flutt af „Strokkvartettinum Sigga“ sem stofnaður var árið 2012.

Verkefnið Strandir 1918 fær 500 þúsund króna styrk til að setja upp sögusýningu í Sauðfjársetrinu á Ströndum. Áhersla verður lögð á að nýta persónulegar heimildir Strandamanna á sýningunni, sendibréf, dagbækur, sjálfsævisögur, minningarþætti og það litla sem til er af ljósmyndum af svæðinu frá fyrstu áratugum 20. aldar við hönnun og uppsetningu. Í tengslum við sýninguna og fullveldisafmælið verða einnig skipulagðir þrír viðburðir haustið 2018 með þátttöku sérfræðinga á sviði þjóðfræði, sagnfræði, bókmenntafræði og náttúruvísinda. Náttúrubarnaskólinn verður með innlegg á dagskránni og leitað verður samstarfs við Grunnskólann á Hólmavík.

Sunnukórinn á Ísafirði er elsti starfandi blandaði kór á Íslandi, hefur verið starfandi hartnær alla fullveldistíð Íslands og komið víða að viðburðum tengdum fullveldissögu Íslands. Nú hyggst Sunnukórinn setja upp dagskrá með tónlist tíðarandans sem lifði með þjóðinni þetta 100 ára tímabil og fær til þess 500 þúsund króna styrk. Við dagskrána verði fléttað söguskýringu með frásögnum og myndefni sem tengjast fullveldinu og dagskrárefninu. Hver áratugur verður teiknaður upp í tónum og tali. Auk Sunnukórsins verða nemendur og barnakórar Tónlistarskóla Ísafjarðar þátttakendur í dagskránni.

Auglýsing

Auglýsing

Framkvæmdir við lagningu nýs gólfs í íþróttahúsinu á Torfnesi hófust um síðustu helgi. Gamla gólfið var rifið upp og sömuleiðis grindin sem parkettið sat á. Grindin var farin að gefa sig enda nærri aldarfjórðungur síðan húsið var tekið í notkun og gólfið er upprunalegt. Ofan á botnplötu hússins eru lagðir kubbar eftir kúnstarinnar reglum og á þá koma leiðarar með demperum og að endingu sjálft parkettið. Sjálfri gólflagningunni á að vera lokið á sólstöðum þann 21. desember og en þá á eftir að merkja gólfið og lakka. Íþróttahúsið verður tilbúið til notkunar síðasta lagi 10. janúar.

Auglýsing

Auglýsing