Íþróttamaður Ísafjarðarbæjar 2017 verður útnefndur 21. janúar 2018. Á sama tíma verður efnilegasti íþróttamaðurinn heiðraður. Það er íþrótta- og tómstundanefnd sem sér um valið. Nefndin óskar eftir tilnefningum frá íþróttafélögunum í sveitarfélaginu og þurfa þær að berast fyrir föstudaginn 12. janúar í lokuðu umslagi til HSV.

Sundkonan Kristín Þorsteinsdóttir hefur verið valin íþróttamaður Ísafjarðarbæjar síðustu fjögur árin.

Það verður hægviðri á Vestfjörðum fram eftir degi og frosti 2-8 stig. Vaxandi suðaustanátt seint í dag, 8-15 m/s og skýjað um kvöldið. Í hugleiðingum veðurfræðings um veðrið á landinu segir að víða verði hægur vindur, léttskýjað og talsvert frost. Vaxandi suðaustanátt á Suður- og Vesturlandi seinnipartinn, þykknar upp og dregur úr frosti. Suðaustan 13-20 m/s kringum miðnætti með snjókomu í fyrstu, síðan rigningu eða slyddu á láglendi og hiti 0 til 5 stig. Hægari vindur á Norður- og Austurlandi, úrkomulítið og minnkandi frost. Dregur aftur úr vindi á morgun, suðaustan 5-13 seinnipartinn og skúrir eða él, en rigning á Suðausturlandi.

Á Norður- og Austurlandi léttir til og verður bjart og kalt í dag, en þar fer frostið að minnka í nótt þegar sunnanáttin nær þangað norðureftir.

Það dregur úr vindinum strax á morgun og eftir hádegi er útlit fyrir meinlitla suðaustanátt. Úrkoman á morgun verður ýmist skúrir eða él. Það eru engin alvöru hlýindi með sunnanáttinni að þessu sinni og hitinn drífur ekki nægilega yfir frostmarkið til að hægt sé að útiloka að eitthvað af úrkomunni verði á föstu formi á morgun.

Innan skamms, eða á næsta fundi hreppsnefndar Árneshrepps, verður ákveðið hvort að ráðist verði í kostamat á Hvalárvirkjun annars vegar og stofnun þjóðgarðs hins vegar. Einnig verður tekin afstaða til þess hvort að boð Sigurðar Gísla Pálmasonar athafnamanns um að greiða fyrir matið verði þegið. Frá þessu er greint á vef mbl.is. Í athugasemdum við skipulagsbreytingar Árneshrepps vegna Hvalárvirkjunar kom þessi hugmynd Sigurðar Gísla fram. Hann telur að kostagreinig taki um 3-4 mánuði og hann telur að hreppsnefndin og íbúar í Árneshreppi geti notað niðurstöðuna til að taka upplýsta ákvörðun um næstu skref.

Sigurður Gísli er þekktur náttúrverndarsinni og hann segir í samtali við blaðamann mbl.is að þjóðgarður geti haft annað og meira hlut­verk en það eitt að vernda nátt­úr­una. Þannig yrði bú­seta inn­an hans og aðstæður skapaðar til rann­sókna og þró­un­ar at­vinnu­lífs. Slík svæði er þegar að finna víða um heim und­ir merkj­um Menn­ing­ar­mála­stofn­un­ar Sam­einuðu þjóðanna, UNESCO, þangað sem Sig­urður sæk­ir hug­mynd sína. Verk­efnið kall­ast „Man and the Bi­osph­ere“ eða „Maður í líf­heimi.“ Ekki þyrfti að koma til eign­ar­náms lands við stofn­un vernd­ar­svæðis­ins og hefðu ein­hverj­ir land­eig­end­ur ekki áhuga á að vera með í verk­efn­inu væri þeim frjálst að standa utan þess. Frum­kvæði að stofn­setn­ing­unni þyrfti ekki að koma frá rík­inu.

Skipulagsefnd jólasveinsins hefur fundað og óskar nú eftir skilaboðum frá foreldrum góðra barna um hvenær þeir óski afhendingar á jólapökkum. Hægt er að spjalla við jólasveininn á Þorláksmessu og á aðfangadag verður sveinki á ferðinni um bæinn.

Björgunarfélag Ísafjarðar brást snarlega við hjálparbeiðni Grýlu og sona hennar og hefur tekið að sér að annast skipulagninguna.

 Grýla

Mannúðarmál og samfélagsmál að fá flóttafólk

Það er bæði mannúðarmál og samfélagsmál að taka á móti flóttafólki. Þetta segir Pétur G. Markan, sveitarstjóri Súðavíkurhrepps. Eins og greint var frá í gær eru sveitarfélögin við Djúp – Súðavíkurhreppur, Ísafjarðarbær og Bolungarvíkurkaupstaður – með til skoðunar að taka á móti flóttamönnum frá Sýrlandi. Áætlað er að þeir verði á bilinu 20 til 30 manns. „Við sóttum um að taka á móti svokölluðum kvótaflóttamönnum fyrir tveimur árum en urðum ekki fyrir valinu. Svo gerist það að velferðarráðuneytið hefur samband fyrir stuttu og við tókum upp þráðinn aftur og helsta áskorunin er húsnæðismál,“ segir Pétur.

Hann leggur áherslu á að móttaka flóttamanna sé fyrst og fremst mannúðarverk. „En við viljum líka efla samfélögin okkar og þá þurfum við fólk til að efla félagsandann,“ segir Pétur.

Hann hefur fulla trú á að hægt verði að leysa húsnæðismálin. „Í svona málaflokkum er ótrúlega auðvelt að gefast upp við fyrstu hindrun, það er ekkert straumlínulagað í sveitarstjórnum í þessum málum. Þú verður að taka ákvörðun um að þetta sé eitthvað sem þú vilt gera og svo tekstu á við hindranirnar,“ segir Pétur.

Stjórn nýstofnaðrar Vestfjarðastofu ses. auglýsir eftir framkvæmdastjóra til þess að leiða starfsemi Vestfjarðastofu sem tók til starfa 1. desember sl.  Vestfjarðastofa varð til við sameiningu verkefna sem áður heyrðu undir Fjórðungssamband Vestfirðinga og Atvinnuþróunarfélag Vestfjarða hf.

Markmið Vestfjarðastofu er að efla atvinnulíf á Vestfjörðum, stuðla að velferð íbúa, fjölbreyttu menningarstarfi og styrkja Vestfirði sem búsetukost og áfangastað ferðamanna. Markmiði sínu hyggst Vestfjarðastofa ná með öflugu samstarfi atvinnulífs, sveitarfélaga, ríkisvalds og stoðkerfis hins opinbera.

Framkvæmdastjóri Vestfjarðastofu leiðir starfsemina og er ábyrgur gagnvart stjórn fyrir yfirstjórn og daglegum rekstri Vestfjarðastofu í umboði stjórnar.  Hann undirbýr stefnumörkun, rýnir markmið og aðgerðir og vaktar innleiðingu stefnu Vestfjarðastofu í samvinnu við stjórn og starfsmenn. Framkvæmdastjóri undirbýr rekstrar- og starfsáætlun Vestfjarðastofu og ber ábyrgð á að reksturinn rúmist innan gildandi áætlana á hverjum tíma.

Menntunarkröfur

• Háskólamenntun sem nýtist í starfi er skilyrði, framhaldsmenntun æskileg
• Haldbær reynsla af rekstri og farsæl stjórnunarreynsla
• Reynsla af stefnumótunarvinnu og innleiðingu stefnu er skilyrði
• Þekking á opinberri stjórnsýslu/málefnum sveitarfélaga er æskileg

Kröfur um hæfni

• Leiðtogahæfni og góð hæfni í mannlegum samskiptum
• Geta til að sýna frumkvæði og rík skipulagshæfni
• Sjálfstæði í vinnubrögðum og geta til að taka þátt í mótun og stjórnun breytinga
• Rík aðlögunarhæfni og geta til að starfa undir álagi
• Hæfni til að miðla flóknum upplýsingum á einfaldan hátt í töluðu og rituðu máli

Umsókn þarf að fylgja starfsferilskrá og einnar blaðsíðu kynningarbréf þar sem á  kerfisbundinn hátt er gerð grein fyrir því hvernig viðkomandi uppfyllir hæfniskröfur starfsins.

Starfshópur um leik- og grunnskólastarf á Flateyri hefur óskað eftir því við fræðslunefnd Ísafjarðarbæjar að Grunnskólinn Önundarfjarðar og leikskólinn Grænigarður á Flateyri verði sameinaðir í eina stofnun. Í framhaldi verði farið í að móta sameiginlega stefnu fyrir skólana með aðkomu skólasamfélagsins alls. Fræðslunefnd tekur undir með og telur fagleg rök og hagsmuni nemenda, kennara, annars starfsfólks sem og íbúa Flateyrar mæla með því að umræddir skólar verði sameinaðir í eina stofnun. Samkvæmt fyrirætlunum samráðshópsins mun álit hans á húsnæðismálum sameinaðs skóla liggja fyrir í lok vorannar 2018.

Meðalaldur fiskiskipaflotans var um 29 ár í fyrra og hafði þá hækkað um eitt ár frá árinu 2015. Á árunum 1999 til 2016 hækkaði meðalaldur flotans um rúm tíu ár og telst hann vera orðinn býsna hár núna í sögulegu samhengi. Þetta kemur fram í riti Íslandsbankans, Íslenski sjávarútvegurinn 2017, sem kom út í síðasta mánuði. Meðalaldurinn ætti að lækka eitthvað á næstu árum enda fádæma mikil endurnýjun í flotanum. Sex nýir togarar hafa komið til landsins á þessu ári, von er á einum til viðbótar fyrir árslok og samið hefur verið um smíði á átta togurum til viðbótar sem væntanlegir eru á næstu árum – einn af þeim er Páll Pálsson ÍS.

Í ritinu telst höfundum til að nú séu gerð út 1.647 fiskiskip á Íslandi og hefur skipum fækkað um tæpan fimmtung frá 2001 þegar þau voru 2.012.

Það var fagurt um að lítast á Ísafirði við sólarupprás í morgun þegar glitský sáust á himni. Glitskýin eru það hátt í andrúmsloftinu að þau sjást í sömu hæð víðast hvar á landinu.  Glitský eru ákaflega fögur ský sem myndast í heiðhvolfinu, gjarnan í um 15 – 30 km hæð. Glitský sjást helst um miðjan vetur, um sólarlag eða sólaruppkomu. Litadýrð þeirra er mjög greinileg því þau eru böðuð sólskini, þótt rökkvað sé eða jafnvel aldimmt við jörð. Litadýrðin þykir minna á þá liti sem sjá má í hvítu lagi sem er innan á sumum skeljum (svonefnt ,,perlumóður“-lag í perluskeljum) og eru þau í ýmsum tungumálum því nefnd perlumóðurský.

Glitský myndast þegar óvenjukalt er í heiðhvolfinu og eru úr ískristöllum. Kristallarnir í skýjunum beygja sólarljósið, en mismikið eftir bylgjulengd þess. Þannig beygir blátt ljós meira en rautt. Rauða ljósið kemur því til okkar undir öðru horni en það bláa, þannig að við sjáum það koma frá öðrum hluta glitskýsins. Litaröðin frá jaðri inn til miðju skýsins er stundum eins og vísuorðin: gulur, rauður, grænn og blár en oft er skýið einnig hvítt í miðju. Litirnir eru líka háðir stærðardreifingu agna í skýjunum, þannig að oft má sjá rauða, gula og græna flekki í bland.

Síðustu vikur og mánuði hafa verið mikil umsvif í Ísafjarðarhöfn. Aðkomutogarar hafa verið í fastri áskrift með reglulegar landanir. „Þetta er búið að vera mjög líflegt,“ segir Guðmundur M. Kristjánsson hafnarstjóri. Ástæður fyrir tíðum löndunum aðkomutogara eru að sögn Guðmundar einfaldar, góð veiði á Vestfjarðamiðum og eftirspurn eftir ferskum fiski á mörkuðum í Evrópu. „Eftir því sem mér skilst eru ferskfiskmarkaðir í Evrópu mjög góðir og þegar menn eru að veiða á Vestfjarðamiðum munar um þann tíma sem það tekur fyrir skipin að sigla með aflann til heimahafnar og því kjósa menn að landa hér og keyra aflanum í suður,“ segir Guðmundur.

Togarar HB Granda hafa verið áberandi og einnig skip Nesfisks sem og Bergur VE, Frosti ÞH og Steinunn SF.

Guðmundur segir að landanirnar skipti miklu máli fyrir rekstur hafnarinnar. „Ég er vongóður um að við náum að halda tekjuáætlun ársins þrátt fyrir rólegt upphaf sökum sjómannaverkfalls.“

Í nóvember var landað 3.244 tonnum samanborið við 2.033 tonn í sama mánuði í fyrra.