Endurvinnsluátakinu „Gefum jólaljósum lengra líf – endurvinnum álið í sprittkertunum“ var ýtt úr vör í byrjun vikunnar af Guðmundi Inga Guðbrandssyni umhverfis- og auðlindaráðherra, sem tók á móti nokkrum af aðstandendum átaksins í umhverfisráðuneytinu.

Tilgangurinn með átakinu er að fá fjölskyldur til að skila álinu í sprittkertum til endurvinnslu og efla vitund Íslendinga um mikilvægi þess að endurvinna það ál sem fellur til á heimilum og hjá fyrirtækjum.

Ætla má að á ári hverju séu notuð um 3 milljónir sprittkerta hér á landi. Til að setja hlutina í samhengi, þá dugar álið úr þremur sprittkertum í eina drykkjardós og einungis þarf þúsund sprittkerti til að búa til reiðhjól.

Skila má sprittkertum á um 90 endurvinnslu- og móttökustöðvar um allt land.

Þá gefst fólki kostur á að setja kertin í grænu tunnurnar sem eru í boði hjá Gámaþjónustunni og Íslenska gámafélaginu.

Að átakinu standa Endurvinnslan, Fura málmendurvinnsla, Gámaþjónustan, Íslenska gámafélagið, Málmsteypan Hella, Plastiðjan Bjarg, Samál – Samtök álframleiðenda, Samtök iðnaðarins og Sorpa.

Ráðist hefur verið í sambærileg átaksverkefni í Noregi, Finnlandi, Svíþjóð og á Írlandi og er þetta tilraunaverkefni hér á landi. Álið sem safnast verður pressað hjá Furu og endurunnið hér á landi, en nánar verður tilkynnt um útfærslu þess þegar söfnunarátakinu lýkur í lok janúar.

Ál hefur þá sérstöðu að það má nýta aftur og aftur án þess að það tapi upprunalegum eiginleikum sínum. Einungis þarf um 5% af orkunni sem fór upphaflega í að framleiða álið til að endurvinna það. Það þýðir að mikil verðmæti leysast úr læðingi við endurvinnslu álsins og færir það stoðir undir rekstur endurvinnslufyrirtækja víða um Evrópu.

Þá dregur orkusparnaðurinn við endurvinnslu áls verulega úr losun gróðurhúsalofttegunda, enda verður almennt mest losun frá orkuvinnslunni við framleiðslu áls í heiminum.

Átakið stendur til 31. janúar næstkomandi.

bryndis@bb.is

Auglýsing

Auglýsing

Jónas Guðmundsson gerði á dögunum að umtalsefni erlendar merkingar á Nettó en verslunin er merkt sem „discount-supermarket“. Fyrirsögn greinarinnar sem birtist á bb.is er „Samkaup – Why English“.  Jónas er ósáttur við að ekki skuli íslenskum áletrunum bætt við og spyr hvað valdi.

Nú hefur Gunnar Egill Sigurðsson, framkvæmdastjóri verslunarsviðs Samkaupa svarað Jónasi og óskar eftir birtingu á sama vettvangi.

Vegna aðsendrar greinar sem birtist hér á vefnum í síðustu viku frá Jónasi Guðmundssyni íbúa á Ísafirði er það mér bæði ljúft og skylt að svara.

Fyrst af öllu vil ég þakka Jónasi fyrir greinina. Það skiptir miklu máli fyrir hvert samfélag að íbúar láti sig málefni þess varða. Það er líka afar mikilvægt að taka tillit til athugasemda íbúa – ekki síst réttmætra athugasemda, eins og í tilfelli Jónasar. Það er óheppilegt að lágvöruverðsverslunin Nettó sé einungis merkt sérstaklega á ensku.

Við hjá Samkaupum getum ekki svarað fyrir önnur fyrirtæki. En við höfum í það minnsta kappkostað að gera eins vel við alla okkar viðskiptavini og hægt er. Kúnnahópurinn okkar um land allt er afar fjölbreyttur og fer sífellt stækkandi. Ekki síst á Ísafirði. Því fögnum við ákaft.

Við leggjum mikla áherslu á að vekja athygli á þjónustunni sem við höfum uppá að bjóða; með kraftmiklum hætti í sjónvarpi, útvarpi, á neti og í bæklingum þar sem íslenskan er í hávegum höfð. Við finnum líka að Íslendingar þekkja verslanir okkar gríðarlega vel.

Eins og Jónas bendir réttilega á eru útveggir verslunar okkar á Ísafirði merktir Nettó- Discount Supermarket.  Og ástæðan er einföld, eins og hann sjálfur bendir á: Fjölgun erlendra gesta á svæðinu.

Yfir tvær milljónir ferðamanna heimsóttu landið okkar í fyrra. Eðli málsins samkvæmt eru þeir misgóðir í íslensku og komast líklega að mestu leyti hjá því að heyra eða sjá auglýsingarnar okkar. Og ef þeir heyra þær eða sjá – eiga þeir sennilega oft erfitt með að skilja þær. Þess utan stoppa ferðmenn alla jafna aðeins stutta stund á hverjum stað og hafa þ.a.l. sjaldnast hugmynd um hvað lágvöruverðsverslunin Nettó er.

Því brugðum við á það ráð, til að upplýsa erlendu ferðamennina, að merkja verslunina, vitandi að Ísfirðingar þekktu Nettó ágætlega.

Við hjá Samkaupum viljum öðru fremur starfa í sátt og samlyndi við heimamenn á hverjum stað. Ég vil því enn og aftur þakka Jónasi fyrir greinina og í kjölfarið munum við taka málið til skoðunar hjá okkur.

 Með vinsemd og virðingu,  

Gunnar Egill Sigurðsson, framkvæmdastjóri verslunarsviðs Samkaupa.

bryndis@bb.is

Auglýsing

Auglýsing

Gullfossar Stranda heitir dagatal þeirra Tómasar Guðbjartssonar og Ólafs Más Björnssonar og verður það til sölu í versluninni Götu sem er til húsa í Bræðraborg. Allir alþingismenn, sveitarstjórnamenn á Vestfjörðum og forsvarsmenn Vesturverks og Landsvirkjunar hafa fengið eintak af dagatalinu, sem og allir íbúar Árneshrepps. Fyrsta upplag dagatalsins seldist upp á fyrsta degi.

Þeir félagar, Tómas og Ólafur, hafa látið sig málefni náttúrunnar varða og berjast hatrammlega á móti Hvalárvirkjun við mismikinn fögnuð þeirra er fjórðunginn byggja. Til dæmis taldi Hafdís Gunnarsdóttir þáverandi varaþingmaður Sjálfstæðisflokksins í kjördæminu Tómas hafa tekist „móðga heilan fjórðung í viðtali“. Í athugasemd við fréttina á bb.is tjáir þingmaður Framsóknarflokksins, Halla Signý Kristjánsdóttir og bendir á að hún sé nú stödd á suðvestur horni landsins og segist þar „sjá mannvistarleifar, hvort sem það er byggð eða atvinnuuppbygging, byggðin teygir og treður niður fallegar útivistarperlur“

Í september birtu þeir rafrænt fossadagatal með daglegum myndum af fallegum fossum á upptökusvæði Hvalárvirkjunnar.

Allur ágóði af útgáfunni rennur til Rjúkanda, samtaka um verndun náttúru og menningarverðmæta í Árneshreppi á Ströndum.

bryndis@bb.is

Auglýsing

Auglýsing

Veðurstofan spáir norðaustan 8-13 á Vestfjörðum og dálítil él norðantil, hiti um frostmark. Skýjað verður með köflum á morgun, úrkomulítið og kólnandi veður.

Auglýsing

Auglýsing

Flóknar leiðir stjórnsýslunnar vefjast fyrir mörgum sem þurfa að eiga erinda við hana en Árdís Niní Liljudóttir á Suðureyri veit hvert skal leita með erindi sín. Á fundi bæjarráðs Ísafjarðarbæjar á mánudaginn var tekið fyrir bréf frá Árdísi þar sem hún bendir á að það vanti gangstétt við „holuveginn“.  Holuvegurinn mun vera malarvegurinn í kringum tjörnina og tók bæjarráð vel í athugasemd hennar, þakkaði bréfritara fyrir bréfið og sagði að til framtíðar væri fyrirhugað að gera fallega gönguleið meðfram tjörninni.

bryndis@bb.is

Auglýsing

Auglýsing

Breytingar hafa verið gerðar á reglugerð um ökuskírteini. Fyrir þau sem eru að taka bílpróf er ein breyting gerð nú sem getur skipt miklu máli. Nú er frjálst val um það hvort próf sé tekið á sjálfskipta eða beinskipta bifreið.

Sé próf tekið á sjálfskipta bifreið verða ökuréttindin takmörkuð við bifreið með sjálfskiptingu. Takmörkunin kemur fram í ökuskírteini og er tilgreind með tákntölunni 78. Hægt að afmá þessa takmörkun síðar, sé þess óskað, og þarf þá að standast próf í aksturshæfni á beinskipta bifreið.

Önnur breyting varðar farþegaflutninga í atvinnuskyni á fólksbifreið. Nú má sá eða sú sem er með réttindi til að aka hópbifreið (D1- eða D-flokkur) í atvinnuskyni einnig aka fólksbifreið með farþega (B-flokkur) í atvinnuskyni.

bryndis@bb.is

Auglýsing

Auglýsing

Bæjarstjórn Bolungarvíkur samþykkti í fundi sínum  á þriðjudaginn fjárhagsáætlun fyrir árið 2018 og að sögn Baldurs Smára Einarssonar formanns bæjarráðs ber áætlunin merki betri tíðar í Bolungarvík. Gert er ráð fyrir 19 milljóna afgangi af rekstri og skuldahlutfallið verði komið niður í 110% sem er vel undir þeim 150% mörkum sem sveitarstjórnarlög kveða á um.

Á framkvæmdalista næsta árs er leikskólabygging, gatnagerð og fegrun umhverfis. Stækkun leikskólans Glaðheima er fyrsti áfangi og mun kosta 75 milljónir  og 40 milljónum verður varið í gatnagerð.

Baldur Smári ritar grein sem birtist á bb.is í gær og þar nefnir hann sömuleiðis nýtt verkefni sem kallað er „Betri Bolungarvík“ þar sem lögð verður áhersla á aukið íbúalýðræði og um tillögur bæjarbúa verði kosið í rafrænni kosningu. Settur verður upp hugmynda- og kosningavefur á heimasíðu bæjarins og geta íbúar kosið þar um þau verkefni sem þeir vilja að fái framgang á árinu 2018.

Baldur segir sömuleiðis að fjárhagsstaða bæjarins hafi aldrei verið betri og heilt yfir séu allar kennitölur sem sveitarfélög miða við í rekstri sínum að batna.

bryndis@bb.is

Auglýsing

Auglýsing

Árið 2006 dreifði Hálfdan Pedersen hundruðum einnota ljósmyndavéla til fimm ára leikskólabarna í öllum bæjar- og sveitarfélögum á Íslandi. Ætlunin var að hvetja ung börn til að prófa sig áfram með ljósmyndun og um leið fanga lífið með augum barna. Viðfangsefni myndanna var undir börnunum sjálfum komið. Hvert barn fékk einnota myndavél með 27 ramma filmu sem það mátti nota í viku. Afraksturinn varð yfir 30 þúsund ljósmyndir og hefur úrval þeirra birst á ljósmyndasýningum á Menningarnótt og Listahátíð í Reykjavík.

Nú 11 árum frá upphafi verkefnisins hafa verið valdar ljósmyndir sem prýða 215 síðna ljósmyndabók sem ber heitið FIMM. Ljósmyndarar bókarinnar eru 107 talsins og eru ljósmyndirnar teknar víðsvegar um landið. Sjónarhorn barnanna er listrænt en laust við tilgerð og veitir ómetanlega innsýn í raunveruleika fimm ára aldamóta barna á Íslandi.

500 krónur af hverri seldri bók rennur til Barnaspítala hringsins.

Meðfylgjandi myndir voru teknar af fimm ára vestfirskum börnum.

bryndis@bb.is

Auglýsing

Auglýsing